Soera Moze IV Faza 4

Halõw̃õ Nono Lewi andrõ, na mofanõ ira. I. Halõw̃õ ndraono Gahati. II. Halõw̃õ ndraono Gereso. III. Halõw̃õ ndraono Merari. IV. Fangofaja Ono Lewi, si tola mangai halõw̃õ.

1I. Ba hoemede Jehowa chõ ndra Moze Aʼaroni, imane: 2Miʼofaja ba Nono Lewi ha waʼato ndraono Gahati, sawoesawōē, ba samboesamboea watalifoesõta, 3iʼotarai zi 30 fache ba si aʼa moroi andrõ, iroegi zi 50 fache, dozi si mõi ngoningoni, sangai halõw̃õ ba nose wamaʼeleʼõ. 4Ba daʼõ halõw̃õ ndraono Gahati andrõ ba nose wamaʼeleʼõ: famaigi niʼamoniʼõ sibai andrõ. 5Ba na mifazaw̃a ami ba zolombase ami, ba mõi si bacha ndra Aʼaroni iraononia, lahalõ tooe mbaʼabaʼa andrõ ba labeʼe baloebaloe dawõla zoera goroisa. 6Ba labeʼe na doefo oeli goeaza mina ba ba dete daʼõ labologõ lembe sadõlõ oengoe sowōē waroewaroe, ba labeʼe heahea andrõ. 7Ba meza roti nifaigifaigi andrõ, ba labaloegõ lembe oengoe sowōē waroewaroe ba labeʼe jaw̃a mako ba figa ba mako wamadoe andrõ, awõ goendri, sogoena ba zoemange nibadoe, ba jaso gõi jaw̃a roti andrõ, niʼaliʼali. 8Ba daʼõ fefoe, ba nibaloegõ lembe kirimisi, ba baloebaloe daʼõ, ba toefa oeli goeaza mina; awena dania labeʼe heaheania. 9Ba lahalõ na lembe oengoe sowōē waroewaroe, ba labeʼe baloebaloe naha wandroe andrõ, fabaja fandroe ba goeti wandroe ba gali andrõ, awõ naha wanicha chõnia fefoe, sogoena ba wangehao jaʼia. 10Ba laʼolohoeni ia — fabaja fakakenia fefoe — lohoelohoe oeli goeaza mina, ba labeʼe ba heahea. 11Ba naha wameʼe soemange andrõ anaʼa, ba labaloegõ lembe oengoe sowōē waroewaroe, ba latõtõwoei toefo oeli goeaza mina, ba labeʼe heaheania. 12Ba lahalõ fefoe wakake sogoena ba halõw̃õ andrõ, nifakefake ba wangaingai halõw̃õ andrõ ba niʼamoniʼõ, ba laʼolohoeni lembe oengoe sowōē waroewaroe; ba latõtõwoei toefo oeli goeaza mina, ba labeʼe ba heahea. 13Ba lahaogõ naha wameʼe soemange, laheta nawoe, ba labeʼe baloebaloenia lembe oengoe sojo. 14Ba ba dete daʼõ labeʼe wakake andrõ, fefoe, nifakefake ba wangaingai halõw̃õ ba chõnia, gali andrõ ba garafoe ba soendroesoendroe ba figa, fefoe wakake ba naha wameʼe soemange; ba latõtõwoei ia toefo oeli goeaza mina, ba labeʼe heaheania. 15Ba na no moʼahonoa chõ Gaʼaroni ba ba ndraononia wangolohoeni ngawalõ andrõ fefoe, niʼamoniʼõ fefoe, na lafazaw̃a ira sato, ba ndra moefaʼaso ira iraono Gahati andrõ, ba wamahea; ba lõ tola lababaja niʼamoniʼõ andrõ, fa bõi mate ira. (Sam. I. 6, 19; II. 6, 6). 16Ba ba danga Geleazari, ono Gaʼaroni ere, ba tebeʼe wanicha wandroe ba samohoea andrõ nitoenoetoenoe ba soemange niʼā andrõ, sero maʼṍchõ ba fanicha famajoini andrõ, fabaja famaigi ose maʼafefoe, awõ nõsinia fefoe, hadia ia ngawalõ niʼamoniʼõ ba fakake andrõ chõnia. 17Ba hoemede Jehowa chõ ndra Moze Aʼaroni, imane: 18Bõi mibeʼe nihori ngaʼõtõ Gahati andrõ, ba Nono Lewi. 19Mimane wamaigi, jaʼira, enaʼõ aoeri ira ba niʼamoniʼõ sibai andrõ —: Mõi bacha ndra Aʼaroni iraononia ba lafataro ba halõw̃õnia zamõsana, hadia nihalõ ba hadia niʼohe. 20Ba bõi mõi ira bacha, ba wamaigi niʼamoniʼõ andrõ, he ha mamõʼi hõrõ waʼara, fa bõi mate ira.

21II. Ba hoemede Jehowa chõ Moze, imane: 22Ofaja gõi waʼato ndraono Gereso, samboesamboea watalifoesõta ba sawoesawōē, 23iʼotarai zi 30 fache ba si aʼa moroi andrõ, irege zi 50 fache õʼofaja, dozi si mõi ba halõw̃õ andrõ, ba wangaingai hadia ia ba nose wamaʼeleʼõ. 24Ba daʼõ halõw̃õ ngaʼõtõ Gereso andrõ — nihalõra ba niʼohera: 25Niʼohera, ba koelamboe nose andrõ ba ose wamaʼeleʼõ, sagõnia andrõ, awõ doefo oeli goeaza mina, baloebaloenia ba baʼabaʼa mbawandroehõ nose wamaʼeleʼõ. 26Ba baʼabaʼa ba golajama ba baʼabaʼa mbawa gõli ba golajama, samasoei ose, awõ naha wameʼe soemange, fabaja sinali andrõ chõnia ba fakake fefoe, si fabõbõ ba daʼõ nihalõra, ba fefoe hadia ia halõw̃õ ba daʼõ, ba halõw̃õra daʼõ. 27Dali niw̃aʼõ ndra Aʼaroni iraononia chõra ba halõw̃õra andrõ, ba niʼohera andrõ fefoe ba ba nihalõhalõra fefoe; ba fefoe hadia ia norora, ba mitoetoeroe chõra, mitõtõi dõi. 28Daʼõ halõw̃õ ngaʼõtõ ndraono Gereso andrõ, ba nose wamaʼeleʼõ; ba mandroera ba halõw̃õra, ba Itamari, ono Gaʼaroni ere andrõ.

29III. Ba iraono Merari, ba õʼofaja gõi, sawoesawōē ba samboesamboea watalifoesõta, 30iʼotarai zi 30 fache ba si aʼa moroi andrõ, irege zi 50 fache, õʼofaja, dozi si mõi ba halõwõ andrõ, sangaingai nihalõhalõ andrõ ba nose wameʼeleʼõ. 31Ba daʼõ niʼohera, daʼõ fefoe nibeʼe ba dangara, fõfõ nose wamaʼeleʼõ: Fafa [dõladõla] nose ba lazi ba taroe nahe, fabaja ahe; 32ba taroe nahe ba golajama fasoei, fabaja ahe ba taroetaroe ba sinali, awõ wakakenia fefoe, awõ nihalõhalõ ba daʼõ, fefoe; ba fakake andrõ, norora, ba mitoetoeroe chõra, mitõtõi dõi. 33Daʼõ halõw̃õ ngaʼõtõ ndraono Merari andrõ, nihalõhalõra ba nose wamaʼeleʼõ, barõ mbawa Gitamari andrõ, ono Gaʼaroni ere.

34IV. Ba laʼofaja ndraono Gahati ira Moze Aʼaroni ba satoea mbanoea, sawoesawōē ba samboesamboea watalifoesõta, 35iʼotarai zi 30 fache ba si aʼa moroi andrõ, irege zi 50 fache, dozi si mõi ba halõw̃õ andrõ, ba nihalõhalõ ba nose wamaʼeleʼõ. 36Ba faʼato niʼofaja andrõ, sawoesawōē, ba no 2750. 37Daʼõ niʼofaja ngaʼõtõ Gahati, dozi si so halõw̃õ ba nose wamaʼeleʼõ, niʼofaja ndra Moze Aʼaroni, dali niʼoroiʼõ Jehowa chõ Moze. 38Ba ba niʼofaja iraono Gereso, sawoesawōē ba samboesamboea watalifoesõta, 39iʼotarai zi 30 fache ba si aʼa moroi andrõ, irege zi 50 fache, dozi si mõi ba halõw̃õ andrõ, ba nihalõhalõ ba nose wamaʼeleʼõ, ba faʼato niʼofaja, 40sawoesawōē ba samboesamboea watalifoesota, ba no 2630. 41Daʼõ niʼofaja ngaʼõtõ ndraono Gereso, dozi si so halõw̃õ ba nose wamaʼeleʼõ, niʼofaja ndra Moze Aʼaroni, dali goroisa Jehowa. 42Ba ba niʼofaja ngaʼõtõ ndraono Merari, sawoesawōē ba samboesamboea watalifoesõta, 43iʼotarai zi 30 fache ba si aʼa moroi andrõ, irege zi 50 fache, dozi si mõi ba halõw̃õ andrõ, ba nihalõhalõ ba nose wamaʼeleʼõ, 44ba faʼatṍ niʼofaja andrõ, sawoesawōē, ba no 3200. 45Daʼõ niʼofaja andrõ, ngaʼõtõ ndraono Merari, niʼofaja ndra Moze Aʼaroni, dali niʼoroiʼõ Jehowa chõ Moze. 46Ba ba niʼofaja andrõ fefoe, niʼofaja ndra Moze Aʼaroni ba satoea Ndraono Gizeraëli, Ono Lewi sawoesawōē ba samboesamboea watalifoesõta, 47iʼotarai zi 30 fache ba si aʼa moroi andrõ, irege zi 50 fache, si mõi ba wangai halõw̃õ andrõ, ba nose wamaʼeleʼõ ba ba halõw̃õ fonoro andrõ, 48faʼato niʼofaja andrõ chõra, ba no 8580. 49Ba lafataro ba halõw̃õnia zamõsana — Moze zamaigi — dali goroisa Jehowa, hadia halõw̃õra, hadia norora, niʼofajania andrõ, dali niw̃aʼõ Jehowa chõ Moze.