Soera Moze IV Faza 5

I. Niheta ba golombasew̃a zi raʼiõ. II. Nisalahini zinagõ. III. Folohe ba doena na so ndra alawe niw̃aʼõ sohorõ.

1I. Ba hoemede Jehowa chõ Moze, imane: 2W̃aʼõ ba Ndraono Gizeraëli, laheta ba golombasew̃a dozi si no gõna booe aoeri ba si so si hoelõ zonana, ba dozi si no raʼiõ, me no lababaja mboto zi mate. (Moz. III. 13, 46; 21, 1). 3He ira matoea, ba he ira alawe, ba niʼohe baero, fa bõi raʼiõ nahiara labeʼe, me no jaʼodo zi sosó ba chõra. 4Ba laʼoʼõ daʼõ Iraono Gizeraëli, laʼohe baero golombasew̃a, dali niw̃aʼõ Jehowa chõ Moze, si manõ wolaoe Ndraono Gizeraëli.

5II. Ba hoemede Jehowa chõ Moze, imane: 6W̃aʼõ ba Ndraono Gizeraëli: Na lafazõchi horõ, he ira matoea, ba he ira alawe, horõ nifazõchizõchi niha, na lalimo Jehowa, ba na tobali moʼõmõ niha si manõ, (Moz. III. 6, 2), 7ba ndra moeʼombachaʼõ horõ andrõ, nifazõchira, ba laʼali zinagõra andrõ, bõi ambõ, ba samboea niʼolima waʼeboeania lanõnõ, ba ba nilimora labeʼe. (Moz. III. 5, 5). 8Ba na lõ sahatõ ba daʼõ, ba nibeʼe ogaoeta andrõ enaʼõ, ba chõ Jehowa mõi gogaoeta andrõ nibeʼe, tána ba gere, lõ lai mbiribiri si matoea andrõ, fangatoelõ, nibeʼe ba wangatoelõ jaʼia. 9Ba fefoe zi no amaedola wegero andrõ, fõfõ gameʼela Ndraono Gizeraëli andrõ, niʼamoniʼõ, fefoe, niʼohera chõ gere, ba tána chõnia. 10Fefoe hadia ia niʼamoniʼõ niha, ba chõnia; hadia ia nibeʼe niha chõ gere, ba no chõnia.

11III. Ba hoemede Jehowa chõ Moze, imane: 12Hede ba Ndraono Gizeraëli, õmane chõra: Na mosala ndronga niha, na ilimo ia, 13na so zoroedoe chõnia [niha bõʼõ] ba na lõ irongo sodonga jaʼia, na lõ teboka, he w̃aʼae no raiʼõ ia ibeʼe, ba na lõʼõ gõi si so ba mbõrõ, na lõ moeraʼoe baewawõ, 14ba na tesao chõnia waʼolohoe, na oloho ia ba chõ ndrongania, me no raʼiõ ia ibeʼe — ma na tesao chõnia waʼolohoe, fa olohoe ia ba chõ ndrongania, he w̃aʼae lõ si raʼiõ ia —, 15ba jamoeʼohe chõ gere ndrongania niha daʼõ, ba iʼoloheʼõ soemange andrõ, niw̃aʼõ, nibeʼe, ba chõnia andrõ: sadoemba hamo gandroe, ba lõ tola ilaoe jaw̃a wanicha, ba he koemõjõ, ba lõ tola ilaoe. Me no soemange niʼā, ba waʼolohoe, soemange niʼā famaʼeleʼõ, famokai horõ. 16Ba jamoefaʼaso ia [ndra alawe andrõ] ere, jamoebeʼe fõna Jehowa. 17Ba ihalõ nidanõ niʼamoniʼõ ere, ba nahia tanõ; ba tanõ maʼifoe ihalõ ere, tooe, baose, ba ilaoe ba nidanõ andrõ. 18Ba ibeʼe fõna Jehowa ndra alawe andrõ ere, idoedoegõ mboenia ba ibeʼe ba dangania zoemange niʼā andrõ, soemange famaʼeleʼõ — no soemange niʼā, ba waʼolohoe; ba idanõ safeto andrõ, idanõ fangelifi, ba iʼohe tangania ere. 19Ba idõni ba doena ndra alawe ere, imane chõnia: Na lõ soroedoe chõoe niha, na lõ si sala ndraʼoegõ ba na tenga si raʼiõ ndraʼoegõ ba na lõ horõoe chõ ndrongaoe, ba bõi jatobali famoenoemõ nidanõ safeto andre, idanõ fangelifi. 20Ba na no atṍ mosala ndraʼoegõ, na so horõoe chõ ndrongaoe, na no raʼiõ ndraʼoegõ õbeʼe, na no oeroedoe chõoe niha bõʼõ, baero ndrongaoe — 21(ba jamoebeʼe ba hõloe ndra alawe andrõ ere, ba hõloe fangelifi, imane ba ndra alawe andrõ ere:) Jamoebeʼe niʼelifi ndraʼoegõ Jehowa, ba niwami; jamoebeʼe Jehowa ariri zolamõ ba abao daloemõ; 22ba jamoetõrõ mbetoeʼaoe idanõ fangelifi andre, enaʼõ abao daloemõ ba enaʼõ ariri zolamõ! Ba imane dania ira alawe: Jadoehoe! Jadoehoe! 23Ba itanõ ba zoera wangelifi andrõ ere, ba isasai ba nidanõ safeto andrõ, 24ba ifabadoegõ ba ndra alawe andrõ nidanõ safeto andrõ, idanõ fangelifi, enaʼõ itõrõ daloenia idanõ fangelifi andrõ ba enaʼõ afeto chõnia. 25Ba ihalõ saʼae ba danga ndra alawe zoemange niʼā andrõ ere, soemange ba waʼolohoe andrõ; ihahae zoemange niʼā andrõ fõna Jehowa, ba iʼohe ba naha wameʼe soemange. 26Ba ihalõ zi sadane ere, fõfõ zoemange niʼā andrõ, ihalõ samohoea, nibeʼe, fõfõnia, ba itoenoe ba naha wameʼe soemange; aefa daʼõ, ba ifabadoegõ ba ndra alawe andrõ nidanõ andrõ. 27Ba na no ifabadoegõ chõnia nidanõ, ba na si raʼiõ ia, na no ilimo ndrongania, ba itõrõ daloenia idanõ fangelifi andrõ, ba tobali afeto chõnia: abao dania daloenia ba ariri zolania, ba niʼelifi ndra alawe andrõ na niwara. 28Ba na tenga si raʼiõ ndra alawe andrõ, na lõ faʼaraʼiõnia, ba lõ gõna ia hadia ia, ba tola manabina ia. 29Daʼõ gamachoita ba waʼolohoe. Na mosala ndra alawe, na so horõnia chõ ndrongania, na si raʼiõ ia, 30ba ma zoei na tesao waʼolohoe ba ndra matoea, na olohoe ia ba chõ ndrongania, ba jamoeʼohe fõna Jehowa ndra alawe andrõ, ba jamoefatõrõ chõnia nifachoi andrõ, fefoe. 31Ba ira matoea andrõ, ba si lõ horõ; ba ira alawe si manõ ba iloeʼi horõnia.