Soera Moze IV Faza 6

I. Amachoita ba niʼamoniʼõ chõ Lowalangi. II. Famahowoeʼõ gere niha sato.

1I. Ba hoemede Jehowa chõ Moze, imane: 2Hede ba Ndraono Gizeraëli, õmane chõra: Na so ndra matoea, ba ma ira alawe, sedõna mamaboeʼoe jaʼia chõ Lowalangi, na iʼamoniʼõ ia chõ Jehowa, 3ba lõ tola ibadoe nagoe ba hadia ia nibadoe si maboe niha; ba he na no moebaliʼõ nirõ aisõ (zoeka), ba lõ tola ibadoe; fefoe hadia ia, na õsi mboea nagoe mbõrõta, ba lõ tola ibadoe, ba boea nagoe, he saoeri, ba he niʼokõliʼõ, ba lõ tola iʼā. (Sangoehoek. 13, 4. 5. Loek. 1, 15). 4Gõtõ niʼamoniʼõ ia, ba lõ tõla iʼā hadia ia nihalõ ba nagoe, he hoenõ, ba he oeli. 5Gõtõ waʼara, nifaboeʼoenia jaʼia niʼamoniʼõ ba lõ tola itõrõ hõgõnia fanõw̃õ. Irege no noemalõ gõtõ nifaboeʼoenia jaʼia, ba niʼamoniʼõ ia law̃aʼõ; boenia, ba ifotoewoe. (Sam. I. 1, 11). 6Gõtõ waʼara nifaboeʼoenia jaʼia chõ Jehowa, ba lõ tola mõi ia ba zi mate. 7Na mate namania, ba ma inania, ba ma talifoesõnia matoea, ba ma talifoesõnia alawe, ba lõ tola ihalõ faʼaraʼiõnia, me no tohare chõnia weʼamoniʼõ andrõ chõ Lowalanginia. 8Gõtõ weʼamoniʼõ andrõ chõnia, ba niʼamoniʼõ chõ Jehowa ia. 9Ba na so zi mate, si lõ moedõnadõna, ba zi so ia, na raʼiõ ba zi manõ hõgõnia andrõ, si no moeʼamoniʼõ, ibeʼe, ba itõwõ mboenia; na loeo si fitoe itõwõ. 10Ba na loeo si w̃aloe, ba domboea iʼohe foene ba ma ono marafadi, domboea, iʼohe chõ gere, ba zinga mbawandroehõ nose wamaʼeleʼõ. (Moz. III. 5, 7). 11Ba ibeʼe soemange fameta horõ zi samboea ere, ba soemange nitoenoe zi samboea, ifaigi chõnia wangatoelõ ba daʼõ, me no mosala ia ba zi mate andrõ; ba na loeo daʼõ, ba ifoeli niʼamoniʼõ hõgõnia iw̃aʼõ, 12ba ifoeli iʼamoniʼõ ia chõ Jehowa faʼara nifaboeʼoenia [fõna], ba ono mbiribiri si dõfi faʼeboea iʼohe soemange ogaoeta; ba tobali si lõ moeʼerai zi no noemalõ irege daʼõ, me no raʼiõ weʼamoniʼõ andrõ chõnia. 13Ba daʼõ gamachoita ba niʼamoniʼõ chõ Lowalangi: na no ahõwõ gõtõ weʼamoniʼõ andrõ, nifaboeʼoenia, ba laʼohe ia ba zinga mbawandroehõ nose wamaʼeleʼõ. 14Ba soemange nibeʼenia chõ Jehowa, ba ono mbiribiri si lõ si sala, si dõfi faʼeboea, soemange nitoenoe, ba ono mbiribiri si alawe, si lõ si sala, si dõfi faʼeboea, soemange fameta horõ, ba biribiri si matoea, si lõ si sala, soemange fangorifi. 15Ba baero õ, ba samba koede koee si lõ moeʼaisõni, hamo si sõchi, nifaroeka fanicha ba koee sanifi, nigoeleʼõ fanicha, ba soemange niʼā andrõ ba soemange nibadoe, si fabõbõ ba daʼõ. 16Ba iʼohe fõna Jehowa ere, ba iʼasiwai chõnia zoemange fameta horõ ba soemange nitoenoe. 17Ba biribiri si matoea andrõ, ba iʼasiwai soemange Jehowa, soemange fangorifi, awõ goede andrõ, si so si lõ moeʼaisõni; ba he soemange niʼā ba soemange nibadoe andrõ, ba iʼasiwai chõnia ere. 18Ba jamoetõwõ saʼae mboenia, ba hõgõnia niʼamoniʼõ, niha andrõ, niʼamoniʼõ chõ Lowalangi, ba daʼõ, fõna mbawandroehõ nose wamaʼeleʼõ, ba jamoehalõ mboenia andrõ, niʼamoniʼõ, jamoetiboʼõ ba galitõ zoemange andrõ, ba galitõ zoemange fangorifi andrõ. (Hal. zin. 21, 24). 19Aefa daʼõ, ba ihalõ ere daʼio mbiribiri si matoea andrõ, si no moerino, ba sagõrõ koee si lõ moeʼaisõni ba goede no mege ba sagõrõ koee sanifi, si lõ moeʼaisõni, ba ibeʼe ba danga niʼamoniʼõ andrõ, na no itõwõ mboenia andrõ, niʼamoniʼõ. 20Ba ihahae ere fõna Jehowa nihahae; tána chõ gere ia, ameʼela niʼamoniʼõ, lõ lai nosoe andrõ, nihahae ba faha andrõ, fegero andrõ. Awena tola ibadoe nagoe niha niʼamoniʼõ andrõ. (Moz. II. 29, 27). 21Daʼõ gamachoita ba niʼamoniʼõ andrõ, si no mamaboeʼoe jaʼia — hadia gõmõnia ba Lowalangi, ba weʼamoniʼõ jaʼia andrõ, lõ lai zi tola ibeʼe na [baero õ]. Õmõ ba gamaboeʼoela li andrõ, me ifaboeʼoe ia, ba itõrõ, dali gamachoita andrõ, ba weʼamoniʼõ andrõ chõnia.

22II. Ba hoemede Jehowa chõ Moze, imane: 23Hede chõ ndra Aʼaroni iraononia, õmane: Na mifahowoeʼõ Ndraono Gizeraëli, ba mimane chõra: 24Jamoefahowoeʼõ ndraʼoegõ Jehowa, jamoerorogõ ndraʼoegõ! (Sin. 64, 2; 134, 3). 25Jamoefohaga mbawania chõoe Jehowa, jamoeʼeboeaʼõ dõdõnia chõoe! 26Jamoefalemba hõrõnia chõoe Jehowa, jamoebeʼe waʼohahaoe dõdõ chõoe! 27Ndramoebeʼe tohare ba Ndraono Gizeraëli dõigoe, ba jaʼodo zamahowoeʼõ jaʼira.