Soera Moze IV Faza 7

I. Soemange nibeʼe zatoea Ndraono Gizeraëli ba weʼamoniʼõ ose wamaʼeleʼõ. II. Nibeʼe zamõsana hõgõ mado andrõ, si felendroea, boeala. III. Oroedoea nibeʼe andrõ, fefoe.

1I. Ba me no awai ifaʼanõ nose andrõ Moze ba me no ibajoini ba me no iʼamoniʼõ, awõ wakake chõnia fefoe, ba me no ibajoini gõi naha wameʼe soemange ba me no iʼamoniʼõ, awõ wakake chõnia fefoe, 2ba laʼohe zoemange satoea Ndraono Gizeraëli, hõgõ madora andrõ — salaw̃a ganara andrõ, satoea niʼofaja no. 3Niʼohera chõ Jehowa, ameʼelara, ba õnõ goereta nifosagõ, ba felendroea nono zaw̃i — daroedaroea zalaw̃a, ba samboesamboea koereta ba sara nono zaw̃i zamõsa; daʼõ laʼohe fõna nose. 4Ba imane Jehowa chõ Moze: 5Tema chõra, enaʼõ teʼogoenaʼõ ba nilaoe andrõ, ba nose wamaʼeleʼõ; ba ba danga Nono Lewi õbeʼe, õfaigi hadia zogoena ba holõw̃õ zamõsana. 6Ba itema Moze goereta andrõ, awõ nono zaw̃i ba ibeʼe ba danga Nono Lewi. 7Domboea goereta ba õfa nono zaw̃i ibeʼe ba danga ndraono Gereso, balazi hadia zogoena ba halõw̃õra. 8Ba õfa goereta ba w̃aloe nono zaw̃i ibeʼe ba danga ndraono Merari, balazi hadia zogoena ba halõw̃õra, barõ mbawa Gitamari andrõ, ono Gaʼaroni ere. 9Ba ba ndraono Gahati, ba lõʼõ, me solohe niʼamoniʼõ [sibai] andrõ ira; niʼosaʼõ daʼõ. 10Ba laʼohe salaw̃a gameʼela ba weʼamoniʼõ naha wameʼe soemange, me loeo tebajoini ia; fõna naha wameʼe soemange labeʼe zoemange andrõ chõra salaw̃a. 11Ba imane Jehowa chõ Moze: Samõsa maʼṍchõ ndramoebeʼe salaw̃a zoemange andrõ chõra, ba weʼamoniʼõ naha wameʼe soemange.

12II. Ba si bõrõtaigõ mameʼe soemange chõnia, ba Nahaso, ono Gaminadabi, mado Joeda. 13Ba soemange andrõ chõnia, ba mako firõ, 130 roefia fanoelo, ba figa seboea, firõ, 70 roefia fanoelo ba zaga niʼamoniʼõ, faoma nifoʼõsi hamo si sõchi, nifaroeka fanicha, soemange niʼā, ba samboea wiga anaʼa, 1410 roefia fanoelo, nifoʼõsi samohoea nitoenoe, ba sara nono zaw̃i, 15si matoea, ba sageoe mbiribiri si matoea, ba sara nono mbiribiri, si matoea, si dõfi faʼeboea, soemange nitoenoe, ba sageoe nambi si matoea, 16soemange fameta horõ; 17ba soemange fangorifi, ba doea rozi nono zaw̃i, ba lima ngaʼeoe mbiribiri si matoea ba lima ngaʼeoe nambi si matoea, ba lima rozi nono mbiribiri, si matoea, si dõfi faʼeboea. Daʼõ gameʼela Nahaso andrõ, ono Gaminadabi. 18Ba mahemoloe õ, ba Natanaʼeli, ono Zoeara, salaw̃a mado Izasari. 19-23Ba soemange chõnia ba mako firõ, 130 roefia fanoelo, ba si manõ saʼae, si mane chõ Nahaso no mege. Daʼõ gameʼela Natanaʼeli andrõ, ono Zoeara. 24Ba me loeo si tõloe, ba salaw̃a Ndraono Zeboeloni, Eliabi andrõ, ono Helono. 25-29Ba soemange chõnia, ba mako firõ, ba si manõ saʼae, si mane chõ Nahaso no mege. Daʼõ gameʼela Geliabi andrõ, ono Helono. 30Ba me loeo si õfa, ba salaw̃a Ndraono Roebeno, Elisoeri andrõ, ono Zedeoeri. 31-35Ba soemange chõnia, ba mako firõ, ba si manõ saʼae, si mane chõ Nahaso no mege. Daʼõ gameʼela Gelisoeri andrõ, ono Zedeoeri. 36Ba me loeo si lima, ba salaw̃a Ndraono Zimeoni, Seloemiëli andrõ, ono Zoeri-Sadaʼi. 37-41Ba soemange chõnia, ba mako firõ, ba si manõ saʼae, si mane chõ Nahaso no mege. Daʼõ gameʼela Zeloemiëli andrõ, ono Zoeri-Sadaʼi. 42Ba me loeo si õnõ, ba salaw̃a Ndraono Gado, Eliazafi andrõ, ono Degoeeli. 43-47Ba soemange chõnia, ba mako firõ, ba si manõ saʼae, si mane chõ Nahaso no mege. Daʼõ gameʼela Geliazafi andrõ, ono Degoeeli. 48Ba me loeo si fitoe, ba salaw̃a Ndraono Geferaji, Eliazama andrõ, ono Gamihoedi. 49-53Ba soemange chõnia, ba mako firõ, ba si manõ saʼae, si mane chõ Nahaso no mege. Daʼõ gameʼela Geliazama andrõ, ono Gamihoedi. 54Ba me loeo si w̃aloe, ba salaw̃a Ndraono Manase, Gameliëli andrõ, ono Wedasoeri. 55-59Ba soemange chõnia, ba mako firõ, ba si manõ saʼae, si mane chõ Nahaso no mege. Daʼõ gameʼela Gameliëli andrõ, ono Wedasoeri. 60Ba me loeo si siw̃a, ba salaw̃a Ndraono Mbenijami, Abidano andrõ, ono Gideono. 61-65Ba soemange chõnia, ba mako firõ, ba si manõ saʼae, si mane chõ Nahaso no mege. Daʼõ gameʼela Gabidano andrõ, ono Gideono. 66Ba me loeo si foeloe, ba salaw̃a Ndraono Dano, Ahiëzeri andrõ, ono Ami-Sadaʼi. 67-71Ba soemange chõnia, ba mako firõ, ba si manõ saʼae, si mane chõ Nahaso no mege. Daʼõ gameʼela Gahiezeri andrõ, ono Ami-Sadaʼi. 72Ba me loeo si felezara, ba salaw̃a Ndraono Gaseri, Fagiëli andrõ, ono Ocherana. 73-77Ba soemange chõnia, ba mako firõ, ba si manõ saʼae, si mane chõ Nahaso no mege. Daʼõ gameʼela Wagiëli andrõ, ono Ocherana. 78Be me loeo si felendroea, ba salaw̃a Ndraono Nafetali, Ahira andrõ, ono Genani. 79-83Ba soemange chõnia, ba mako firõ, ba si manõ saʼae, si mane chõ Nahaso no mege. Daʼõ gameʼela Gahira andrõ, ono Genani.

84III. Daʼõ weʼamoniʼõ naha wameʼe soemange andrõ, me loeo tebajoini ia, nibeʼe zalaw̃a Ndraono Gizeraëli: 12 mako firõ ba 12 wiga seboea firõ ba 12 wiga anaʼa; samboesamboea mako, 85ba 130 roefia fanoelo, ba samboesamboea figa seboea, ba 70 roefia; firõ gamagama andrõ fefoe, ba 2400 roefia fanoelo, ba zaga niʼamoniʼõ. 86Felendroea wiga anaʼa, nifoʼõsi samohoea nitoenoe; samboesamboea figa ba 10 roefia fanoelo, ba zaga niʼamoniʼõ; anaʼa wiga andrõ fefoe, ba 120 roefia fanoelo. 87Ba saw̃i fefoe, soemange nitoenoe, ba 12 nono zaw̃i; ba 12 mbiribiri si matoea, ba 12 rozi nono mbiribiri, si matoea, si dõfi faʼeboea, awõ zoemange niʼā andrõ, nifao ba daʼõ, ba 12 nambi si matoea, soemange fameta horõ. 88Ba fefoe zaw̃i, soemange fangandrõ saoha gõlõ, ba 24 nono zaw̃i; ba 60 mbiribiri si matoea, ba 60 nambi si matoea, ba 60 rozi nono mbiribiri, si matoea, si dõfi faʼeboea. Daʼõ weʼamoniʼõ naha wameʼe soemange andrõ, me no tebajoini ia. 89Ba na mõi bacha Moze ba nose wamaʼeleʼõ, fahoehoeo chõ Jehowa, ba irongo linia chõnia, moroi ba lagõlagõ andrõ, ba dete dawõla zoera goroisa, moroi ba naha andrõ ba gotaloea geroebi andrõ, si domboea; si manõ wehedenia chõnia. (Moz. II. 25, 22).