Soera Moze IV Faza 8

I. Fangehao fandroe, ba naha wandroe jaw̃a. II. Fangehao Ono Lewi. III. Ha me oega fache ira, na labõrõgõ weʼamõi ba halõw̃õra.

1I. Ba hoemede Jehowa chõ Moze, imane: 2Hede chõ Gaʼaroni, ba õmane chõnia: Na õbeʼe ba naha wandroe wandroe andrõ, ba mifõna naha wandroe haga wandroe andrõ, si fitoe, õbeʼe. (Moz. II. 25, 37). 3Ba iʼoʼõ daʼõ Aʼaroni; tánõ fõna ba naha wandroe ibeʼe wandroe andrõ, dali niw̃aʼõ Jehowa chõ Mose. 4Ba naha wandroe andrõ, ba no anaʼa nibõbõzi mege, wamazõchi jaʼia; he tõlania, ba he boenga andrõ chõnia, oi anaʼa nibõbõzi, dali wamaedo andrõ, niʼoromaʼõ Jehowa chõ Moze, si manõ ifazõchi naha wandroe andrõ.

5II. Ba hoemede Jehowa chõ Moze, imane: 6Toetoejoe Nono Lewi ba Ndraono Gizeraëli bõʼõ, ba haogõ ira. 7Õmane chõra, wangehao jaʼira: Õtefe ira idanõ fameta horõ, ba latõw̃õ mboera, maʼasageoe jaʼira, lababago noechara ba lahaogõ ira. 8Ba lahalõ nono zaw̃i, si matoea, awõ zoemange niʼā, si fabõbõ ba daʼõ — hamo si sõchi nifaroeka fanicha — ba jaʼoegõ, ba sara tõ õhalõ ono zaw̃i, si matoea, soemange fameta horõ. 9Ba õfaʼaso nono Lewi fõna nose wamaʼeleʼõ ba õfaloechaʼõ zato Ndraono Gizeraëli fefoe. 10Awena dania moehedeʼõ ba nono Lewi, fõna Jehowa ba latoefa tangara Nono Lewi Iraono Gizeraëli. 11Ba ihahae Nono Lewi Aʼaroni, fõna Jehowa, soemange nihahae, nibeʼe Ndraono Gizeraëli, enaʼõ lahalõhalõ halõw̃õ andrõ chõ Jehowa. (Moz. II. 29, 24). 12Ba Ono Lewi, ba latoefa tangara hõgõ nono zaw̃i andrõ, ba õʼasiwai, si sara, ba soemange fameta horõ, ba si sara, ba soemange nitoenoe chõ Jehowa, ba wameta sala Nono Lewi. 13Ba õʼohe chõ ndra Aʼaroni iraononia Nono Lewi, ba õhahae ira soemange nihahae chõ Jehowa. 14Ba õʼoniagõ Nono Lewi ba Ndraono Gizeraëli, enaʼõ tána chõgoe Nono Lewi andrõ. 15Ba aefa daʼõ, ba hana na mõi bacha Nono Lewi, ba wangai halõw̃õ ba nose wamaʼeleʼõ; õmanõ wangehao jaʼira ba õhahae soemange nihahae. 16Boeala Ndraono Gizeraëli chõgoe manõ saʼae ira, salahi zi aʼa ba waʼatoemboe, fefoe, si aʼa ndraono ba Ndraono Gizeraëli fefoe, wa no oehalõ ira chõgoe. (F. 3, 12). 17Me no chõgoe fefoe zi aʼa ba waʼatoemboe, ba Ndraono Gizeraëli, he ba niha, ba he ba goerifõ. Me loeo oeboenoe no zi aʼa ba waʼatoemboe ba danõ Miseraji oeʼamoniʼõ ira chõgoe. (Moz. II. 13, 2). 18Ba no oehalõ Nono Lewi, salahi zi aʼa andrõ, fefoe, ba Ndraono Gizeraëli. 19Ba no oebeʼe tána chõ ndra Aʼaroni iraononia Nono Lewi andrõ nitoetoejoe ba Ndraono Gizeraëli, enaʼõ lahalõhalõ halõw̃õ andrõ ba nose wamaʼeleʼõ, sogoena ba Ndraono Gizeraëli, ba enaʼõ baʼabaʼa Ndraono Gizeraëli ira, fa lõ gõna famakao Ndraono Gizeraëli, na lahatõʼõ enaʼõ ira ba niʼamoniʼõ andrõ. 20Ba lamanõ ba Nono Lewi andrõ ira Moze Aʼaroni ba sato Ndraono Gizeraëli fefoe; laʼoʼõ sibai niw̃aʼõ Jehowa chõ Moze, ba Nono Lewi andrõ; si manõ wolaoe Ndraono Gizeraëli chõra. 21Ba lafabetaʼõ horõra Ono Lewi, ba lababago noechara; ba ihahae ira Aʼaroni soemange nihahae, ba ifaigi chõra wangatoelõ, ba wangehao jaʼira. 22Ba aefa daʼõ, ba mõi bacha ba nose Nono Lewi, ba wangai halõw̃õra ba nose wamaʼeleʼõ, barõ mbawa ndra Aʼaroni iraononia; dali niw̃aʼõ Jehowa chõ Moze ba Nono Lewi andrõ; si manõ wolaoera chõra.

23III. Ba hoemede Jehowa chõ Moze, imane: 24Daʼõ ia, ba Nono Lewi andrõ: Na 25 fache ia ba ma si aʼa moroi andrõ, ba lafataro ia, ba wanolo ba halõw̃õ andrõ, ba nose wamaʼeleʼõ. (F. 4, 3). 25Ba na 50 fache ia, ba aefa ia ba halõw̃õ; alacha lõʼõ saʼae mohalõw̃õ. 26Ba hana na mõi ia tohoetohoe danga dalifoesõnia ba nose wamaʼeleʼõ, ba wangai halõw̃õ andrõ; ba si ndroehoe halõw̃õ, ba lõʼõ saʼae ihalõ. Si manõ wolaoemõ ba Nono Lewi andrõ, ba halõw̃õra andrõ.