Soera Moze IV Faza 9

I. He wisa wolaoe owasa fasa. II. He wisa zi tebai fao. III. Boto lawoeo andrõ jaw̃a nose.

1I. Ba hoemede Jehowa chõ Moze, ba danõ si mate, ba gahe hili Zinaʼi, me dõfi si doea, aefa aheta ira ba danõ Miseraji, me baw̃a si fõfõna, imane: 2Bõi zi lõ lalaoe gowasa fasa Iraono Gizeraëli, na baw̃ania. (Moz. III. 23, 5). 3Ba zi meweleõfa ba baw̃a daʼe lalaoe, na bongibongi, ba ginõtõnia; miʼoʼõ nifachoi fefoe, awõ nihonogõi ba chõnia, wolaoe jaʼia. 4Ba iw̃aʼõ Moze ba Ndraono Gizeraëli, lalaoe wasa andrõ. 5Ba lalaoe wasa ba mbaw̃a si fõfõna andrõ, ba zi meweleõfa, me bongibongi, ba danõ si mate, ba gahe hili Zinaʼi; laʼoʼõ sibai niw̃aʼõ Jehowa chõ Moze; si manõ wolaoe Ndraono Gizeraëli.

6II. Ba so niha si no raʼiõ ba zi mate, ba tobali tebai lalaoe wasa, me loeo daʼõ. Ba mõi ira chõ ndra Moze Aʼaroni, me loeo daʼõ, 7lamane chõnia: No raʼiõ ndraʼaga ba zi mate, ba hana wa teʼambõsi ndraʼaga, me tebai ba ginõtõnia mabeʼe zoemange andrõ chõ Jehowa, awõ Ndraono Gizeraëli bõʼõ? 8Ba imane chõra Moze: Mibaseʼõ, daʼoefondrondrongo oea, hadia niw̃aʼõ Jehowa ba chõmi andrõ. 9Ba hoemede Jehowa chõ Moze, imane: 10W̃aʼõ ba Ndraono Gizeraëli: Na so, ha niha ia, ba chõmi, ba ma ba ngaʼõtõmi dania, zi no raʼiõ ba zi mate, ba ma si no mofanõ moekoli, ba ilaoe zoei wasa chõ Jehowa. 11Ba mbaw̃a si doea, ba zi meweleõfa, na bongibongi, lalaoe, lafoʼawõ roti si lõ moeʼaisõni ba goelegoele safeto, wemanga jaʼia. (Moz. II. 12, 8). 12Lõ tola lasaigõ hadia ia, irege mahemoloe, ba sara tõla lõ tola lafatõ chõnia; laʼoʼõ fefoe nifachoi ba wolaoe fasa andrõ, wolaoe jaʼia. (Moz. II. 12, 46). 13Ba si lõ faʼaraʼiõ ba si tenga si mõi moekoli, ba na lõ ilaoe wasa, ba niseʼe ia a niwara, me no lõ nibeʼenia soemange andrõ chõ Jehowa, me inõtõnia; no tohare chõnia horõ ibeʼe niha si manõ. 14Ba na so ba chõmi niha bõʼõ, ba na ilaoe wasa chõ Jehowa, ba dali chõnia nifachoi andrõ, awõ nihonogõi ba wolaoe fasa andrõ. Ha sara gamachoita chõmi fefoe, he ba niha bõʼõ, ba he ba niha ba danõ. (Moz. II. 12, 49).

15III. Ba me loeo tefaʼanõ nose andrõ, ba ibaloegõ lawoeo nose — ose nahia zoera goroisa — ba na bongi, ba jaw̃a nose so ia, hoelõ haga galitõ. (Moz. II. 40, 38). 16Ba si manõmanõ dania: ibaloegõ ia lawoeo, ba ba zi bongi, ba hoelõ haga galitõ, iroegi moloeo. 17Ba ero na ifazaw̃a ia lawoeo, na iheta ia ba nose, ba lafazaw̃a gõi ira Iraono Gizeraëli, ba ba zadada lawoeo andrõ, ba daʼõ molombase Ndraono Gizeraëli. 18Dali goroisa Jehowa ba wamazaw̃a Ndraono Gizeraëli jaʼira ba dali goroisa Jehowa ba wolombasera; fatoea ahono jaw̃a nose lawoeo, ba lõ laboelõʼõ ira ba golombasew̃a. (Moz. II. 40, 37). 19Ba na iradõ ia jaw̃a nose lawoeo, ba laʼoʼõ nilaoe Jehowa Iraono Gizeraëli, lõ lafazaw̃a ira. 20Ba so gõi, ba ha mato tõloe bongi lawoeo jaw̃a nose; dali goroisa Jehowa ba wolombasera ba dali goroisa Jehowa ba wamazaw̃ara jaʼira. 21Ba so gõi, ba sara wongi lawoeo, ba na ifazaw̃a ia na moloeo, ba lafazaw̃a gõi ira. Ba so zoei, ba sara loeo sara mbongi ia, ba na ifazaw̃a ia lawoeo, ba lafazaw̃a gõi ira. 22Ba so, ba doea wongi ia ba ma sara waw̃a, ba ma ara moroi andrõ, na iradõ ia jaw̃a nose lawoeo, na ahono ia jaw̃ania, ba lõ laboelõʼõ ira ba golombasew̃a Iraono Gizeraëli, lõ lafazaw̃a ira. Ba na isaw̃a jaw̃a lawoeo, ba lafazaw̃a gõi ira. 23Dali goroisa Jehowa, ero na molombase ira, ba dali goroisa Jehowa, ero na lafazaw̃a ira; laʼoʼõ nifachoi Jehowa, dali goroisa Jehowa chõ Moze.