Soera Moze IV Faza 10

I. Torofe ba wameʼe tandra. II. Aheta ira ba gahe hili Zinaʼi ba he wisa wofanõra. III. Ifasao ira Hobaba andrõ. IV. Fangandrõ Moze na mofanõ ba na tebato.

1I. Ba hoemede Jehowa chõ Moze, imane: 2Fazõchi chõoe dorofe, domboea, nibõbõzi, wamazõchioe jaʼia, — sogoena ba wameʼe tandra ba zato, na lafazaw̃a ira ba golombasew̃a. 3Na telaoe, ba sowoelo chõoe zato fefoe fõna nose wamaʼeleʼõ. 4Ba na ha samboea telaoe, ba salaw̃a andrõ — hõgõ Ndraono Gizeraëli — zowoelo chõoe. 5Ba na milaoe, fangechoegõ niha, ba si so ba golombasew̃a tánõ ba gatoemboecha loeo zamazaw̃a jaʼira. 6Ba na milaoe zamoeza tõ, fangechoegõ niha, ba si so ba golombasew̃a tánõ miraja zamazaw̃a jaʼira; nilaoe fangechoegõ niha, na lafazaw̃a ira enaʼõ. 7Ba na ba wangowoelo sato, ba milaoe manõ, si tenga fangechoegõ niha. 8Ba iraono Gaʼaroni, ere andrõ zolaoe torofe andrõ; ba folaoe jaʼia, ba hoekoe chõmi dania, si lõ teboelõ, gõtõgõtõ waʼara. 9Ba na lasoewõ ami ba danõmi emalimi, samakao jaʼami, ba na milaoe dorofe andrõ, ba itõrõ tõdõ Jehowa, Lowalangimi, ami, ba teʼefaʼõ ami ba danga nemalimi andrõ. 10Ba he gõi na baw̃a waʼomoeso dõdõ chõmi, ba gowasa andrõ chõmi ba ba wasoelõna, ba milaoe dorofe andrõ, na mibeʼe zoemange nitoenoe ba soemange fangorifi; enaʼõ itõrõ tõdõ Lowalangi ami ibeʼe; Jehowa ndraʼodo, Lowalangimi.

11II. Ba ba ndrõfi si doea, me baw̃a si doea, ba zi mendrõfa gofajaõ, ba isaw̃a jaw̃a lawoeo andrõ, moroi ba nose zoera goroisa. 12Ba lafazaw̃a ira Iraono Gizeraëli, monizanizara, laheta ira ba danõ si mate, ba gahe hili Zinaʼi, ba ba danõ si mate Farana adada lawoeo. 13Bõrõta wamazaw̃ara jaʼira daʼõ, dali niʼoroiʼõ Lowalangi chõ Moze. 14Si fõfõna aheta, ba mandrera ba golombasew̃a Ndraono Joeda sambasambawá; ba hõgõ ngawawá andrõ chõra, ba Nahaso andrõ, ono Gaminadabi. 15Ba solohe ngawawá mado ndraono Izasari, ba Natanaʼeli andrõ, ono Zoeara, 16ba solohe ngawawá mado ndraono Zeboeloni, ba Eliabi andrõ, ono Helono. 17Ba na no moedoedoegõ nose, ba lafazaw̃a ira iraono Gereso ba iraono Merari, sangosaʼõ ose. 18Aefa daʼõ, ba aheta mandrera ba golombasew̃a mado Roebeno, sambasambawá; ba solohe ngawawá andrõ, si fabõbõ ba daʼõ, ba Elisoeri andrõ, ono Zedeoeri. 19Ba solohe ngawawá mado ndraono Zimeoni, ba Seloemiëli andrõ, ono Zoeri-Sadaiʼi. 20Ba solohe ngawawá mado ndraono Gado, ba Eliasafi andrõ, ono Degoeeli. 21Aefa daʼõ, ba lafazaw̃a ira ngaʼõtõ Gahati, sangosaʼõ niʼamoniʼõ andrõ; ba irege so ira, ba no moefaʼanõ nose. 22Ba awena aheta mandrera ba golombasew̃a ndraono Geferaji sambasambawá: ba solohe ngawawá si fabõbõ ba daʼõ, ba Elisama andrõ, ono Gamihoedi. 23Ba solohe ngawawá mado ndraono Manase, ba Gameliëli andrõ, ono Wedasoeri. 24Ba solohe ngawawá mado ndraono Mbenijami, ba Abidano andrõ, ono Gideono. 25Ba aefa daʼõ ba aheta mandrera ba golombasew̃a ndraono Dano, angohorita golombasew̃a fefoe, sambasambawá; ba solohe ngawawá, si fabõbõ ba daʼõ, ba Ahiëzeri andrõ, ono Ami-Sadaʼi. 26Ba solohe ngawawá mado ndraono Gaseri, ba Fagiëli andrõ, ono Ocherana. 27Ba solohe ngawawá mado ndraono Nafetali, ba Ahira andrõ, ono Genani. 28Daʼõ wamõfõʼõ, na monizanizara Ndraono Gizeraëli wamazaw̃a jaʼira, sambasambawá.

29III. Ba me mofanõ ira, ba imane Moze chõ laʼonia Hobaba, ono Regoeeli, Iraono Midiano andrõ: Hiza, mofanõ saʼae ndraʼaga, masaw̃a danõ nifaboeʼoe Jehowa, wangoemaʼõ: oebeʼe chõmi; ae awõma, ba lõ maʼambõsi mbõli gõlõoe; noa sa ifaboeʼoe zi sõchi sibai ba Ndraono Gizeraëli Jehowa! 30Ba imane: Lõ omasido mõido awõmi; oefoelido ba chõma, ba niwama. 31Ba iʼandrõ [chõnia Moze], imane: Bõi erogõ ndraʼaga; noa sa sangila ndraʼoegõ, heza mabeʼe nahama wolombase, ba danõ si mate, ba acha sangombacha lala chõma ndraʼoegõ. 32Na mõiʼõ awõma ba na faloechaga dania zi sõchi sibai andrõ fefoe, nibeʼe Jehowa chõma, ba lõ maʼambõsi mbõli gõlõoe. 33Ba laheta ira ba gahe hili Jehowa, mofanõ ira, tõloe ngaloeo, ba sowaõwaõ fõnara dawõla andrõ, nahia zoera goroisa Jehowa, zi tõloe ngaloeo fofanõ andrõ, ba wangaloei naha wolombase chõra. 34Ba lawoeo andrõ chõ Jehowa, ba jaw̃ara so na maʼṍchõ, na laheta ira ba golombasew̃a.

35IV. Ba na mofanõ dawõla, ba imane Moze: Faoso Jehowa! enaʼõ moezaewe zi faʼoedoe chõoe, ba enaʼõ moloi fõnaoe zi fatioe tõdõ chõoe! (Sin. 68, 2). 36Ba na iroegi golombasew̃a, ba imane: Foeliʼõ Jehowa ba zi mewoeloe ngahõnõ wa hõnõ andrõ Iraono Gizeraëli!