Soera Moze IV Faza 11

I. Teʼotoeʼõ alitõ wekõkõkõkõ zato. II. Foloeʼaloeʼa zato ba faʼanoezoe dõdõra ”mana” andrõ. III. Mangarõngarõ Moze ba waʼabeʼe halõw̃õnia, ba hadia niw̃aʼõ Lowalangi. IV. Satoea mbanoea andrõ si fitoe ngafoeloe. V. Siate; fotoe woloeʼaloeʼa andrõ.

1I. Ba latahigõ Jehowa niha sato, wa hoelõ nifakao ira, lafarongogõ chõ Jehowa. Ba me irongo Jehowa ba mofõnoe ia; ba ifatõrõ chõra galitõ Jehowa, si manga golombasew̃a õsa. (Moz. II. 16, 2. Moz. III. 10, 2. Sin. 78, 21). 2Ba laʼangarõfi li Moze sato; ba mangandrõ Moze chõ Jehowa, ba mate galitõ andrõ. 3Andrõ wa labeʼe tõi naha andrõ Dabera (anoenoea), me no itõrõ ira alitõ andrõ, chõ Jehowa, ba daʼõ.

4II. Ba tesao wangisõ ba niha bõʼõ andrõ, si no fao chõra; ba ifoeli labõrõtaigõ gõi Iraono Gizeraëli mangarõngarõ, lamane: Ha niha zameʼe chõma diwo? (Moz. II. 12, 38. Sin. 106, 14. Kor. I. 10, 6). 5Itõrõ tõdõma giʼa andrõ, niʼama mege ba danõ Miseraji, si lõ bõli, ba laʼizoe andrõ, ba baw̃a limi ba kalamboza ba baw̃a ba dasoe. (F. 21, 5). 6Ba ijaʼe, ba si mate olofo ndraʼaga, me lõ hadia ia; lõ hadia ia maʼila, ha ”mana” andrõ. 7Ba ”mana” andrõ, ba no hoelõ mboea gatoemba ba si mane moetiara wamaigida. (Moz. I. 2, 12). 8Ba latõrõi danõ wangozaragõ jaʼia ba lakisa, ba so gõi, ba latoetoe; awena dania larino ba mbowoa, ba labaliʼõ koee sanifi; ba hoelõ koee nisala ba wanicha waʼami. (Moz. II. 16, 21). 9Ba na aechoe namo ba golombasew̃a ba zi bongi, ba aechoe gõi jaw̃a ”mana” andrõ.

10III. Ba me irongo Moze mangarõngarõ zamõsana ba mbawandroehõ nosenia, niha sato, sambasamba omo, ba mofõnoe sibai Jehowa ba anoezoe sibai dõdõ Moze gõi. 11Ba imane Moze chõ Jehowa: Hana wa õfakao genonioe, ba hana wa lõʼõ saʼae ba dõdõoe jaʼodo, wa õbeʼe manõ ba hoeloegoe zi samboea soi andre? 12Hadia, jaʼodo mege zanabina si samboea soi andre ba jaʼodo zadono jaʼia, wa õw̃aʼõ chõgoe iadaʼe: Hagi ia, si mane sangai ono ba ndraono si lõ aefa na ba mbagi zoesoe, ba ohe ba danõ andrõ, nifaboeʼoegoe chõ ndra toeara fahõloesa? 13Heza oehalõ ndriwo, ba wameʼe ba zi samboea soi andre? Mangarõngarõ ira chõgoe, lamane: Faigi chõma ndriwo, õma! 14Tebai oeʼohe noro andrõ, si so ba hoeloegoe, ba zi samboea soi andre, tebai, na ha jaʼodo; no tenga inõtõ norogoe. 15Na õlaoe chõgoe daʼõ, ba si sõchinia, na õdõlõ wamoenoe jaʼo, na so atṍ ba dõdõoe ndraʼodo, fa bõi saʼae oefaigifaigi wamakaogoe andrõ. 16Ba imane Jehowa chõ Moze: Kaoni chõgoe niha, 70, satoea Ndraono Gizeraëli, niʼilaoe wa no salaw̃a ira ba mbanoeara ba samaigimaigi sato; ba nose wamaʼeleʼõ ohe ira, enaʼõ laʼiagõ ngaimõ ba daʼõ. (Moz. II. 18, 21). 17Ba mõido tooe dania fahoehoeo chõoe ba daʼõ, ba oehalõ maʼifoe Geheha andrõ, si no ahono chõoe, ba oefaʼema chõra, enaʼõ latoloʼõ wolohe noro andrõ ba niha andre, fa bõi ha jaʼoegõ zi onoro jaʼia. 18Ba ba niha sato, ba õmane: Mifaigi, fa lõ faʼaraʼiõmi mahemoloe, so gõmi diwo donia; noa sa mangarõngarõ ami, nirongo Jehowa, me mimane: Ha niha zameʼe chõma diwo, õma? Noa sa ohahaoe dõdõma ba danõ Miseraji mege! Ba so dania chõmi ndriwo ibeʼe Jehowa, enaʼõ lõ ambõ õmi. (Jos. 3, 5). 19Tenga ha maʼṍchõ ba tenga ha doea ngaloeo, ba tenga ha lima ba tenga ha foeloe ba tenga ha doea woeloe ngaloeo miʼamangaʼõ, 20aloʼo sara waw̃a waʼara dania, irege tebai saʼae miʼago hoea, irege ogoro ami; noa sa lõ ba dõdõmi Jehowa, si sosó ba chõmi, ba no mangarõngarõ ami ba no mimane: Hadia atṍ, wa aheta mege ita ba danõ Miseraji? (F. 21, 5). 21Ba imane Moze: Õnõ ngaotoe ngahõnõ zabõlõ niha andrõ, si so ndraʼo, ba õfaboeʼoe, wangoemaʼõ: Modiwo ira oebeʼe, ba tobali aloʼo sara waw̃a waʼara laʼamangaʼõ? 22Hadia, tola tetaba õra mbiribiri ba saw̃i, balazi abõnõ õra? 23Ba imane Jehowa chõ Moze: Hadia, no ambõ waʼabõlõ Jehowa? Awena dania õʼila, na itõrõ nifaboeʼoegoe chõoe, ba na lõʼõ. (Jes. 50, 2).

24IV. Ba mõi baero Moze mangombacha ba niha sato niw̃aʼõ Jehowa. Ba ikaoni zi fitoe ngafoeloe, salaw̃a mbanoea, baero nose ifaʼaso, fasoei. 25Ba mõi tooe Jehowa ba lawoeo andrõ, fahoehoeo chõnia. Ba ihalõ maʼifoe Geheha andrõ, si no ahono chõnia ba ifaʼema ba zi fitoe ngafoeloe niha andrõ, salaw̃a andrõ. Ba me manandrõsa chõra Geheha ba mamaʼeleʼõ ira, ba dania, ba lõʼõ saʼae. (Hal. zin. 10, 44). 26Ba daroea zi no torõi foeri, ba golombasew̃a; Eledado dõi zi samõsa ba Medado zi samõsa. Ba ba chõra gõi mõi Geheha, noa sa awõ nitanõ ba zoera ira, ba lõ si mõi ira ba nose, ba tobali ba golombasew̃a mamaʼeleʼõ ira. 27Ba fagohi nono matoea samõsa, isaw̃a Moze, imane chõnia: Mamaʼeleʼõ ba golombasew̃a ndra Eledado Medado! 28Ba imane Josoea andrõ, ono Noeni, si no ngoningoni Moze, iʼotarai iraono ia: He Toeagoe, Moze, tenaw̃a ira! 29Ba imane chõnia Moze: Hadia, jaʼoegõ zameʼe lala chõgoe? Enaʼõ na samaʼeleʼõ manõ mbanoea Jehowa fefoe, enaʼõ ifaʼema chõra Gehehania Jehowa! 30Ba ifoeli ia ba golombasew̃a Moze, awõ zatoea Ndraono Gizeraëli andrõ.

31V. Ba tesao nangi nifatõrõ Jehowa, sangoloiʼõ siate moroi ba mbewe nasi, ifatõrõ ba golombasew̃a; maʼṍchõ fofanõ tánõ andre ba maʼṍchõ fofanõ tánõ sa, ba zi tefasoei olombasew̃a, doea hela waʼaweʼeweʼe aefa ba danõ. (Moz. II. 16, 13. Sin. 78, 27). 32Ba maoso ira, maʼõmaʼṍchõ ba sara wongi ba maʼõmaʼṍchõ mahemoloe laʼozaragõ ziate; si lõ ojaʼoja mangozaragõ, ba no mato 14 ngasoʼe, ba labologõ ba zi tefasoei olombasew̃a [ba wangokõliʼõ]. 33Ba me laʼagaʼaga na ndriwo andrõ, me lõ sahori na, ba tesao wõnoe Jehowa chõra, ba ifatõrõ chõra wamakiko sabõlõbõlõ. (Sin. 78, 30. 31). 34Andrõ wa labeʼe tõi naha andrõ Kiberoti hataʼawa (lewatõ zoloeʼaloeʼa), me ba daʼõ lakoʼo niha soloeʼaloeʼa andrõ. 35Ba iʼotarai Kiberoti hataʼawa, ba lasaw̃a Haseroti, ba tebato ira ba Haseroti andrõ.