Soera Moze IV Faza 12

I. Moekõkõkõkõ ndra Mirija Aʼaroni chõ Moze. II. Iboeʼa ba hoeloe genoninia Moze Lowalangi. III. Tebeʼe fotoe Mirija mbooe aoeri, ba ifoeli dõhõ ba wangandrõ Moze.

1I. Ba labõbõgõ chõ Moze zi lõ sõchi ira Mirija Aʼaroni, bõrõ ndra alawe Ndrawa Gaitiofia andrõ; noa sa ira alawe Ndrawa Gaitiofia nihalõnia. (Moz. II. 2, 21). 2Ba lamane: Hadia, ha chõ Moze mege fahoehoeo Jehowa? Hadia, lõ si fahoehoeo ia chõma? Ba irongo Jehowa. 3Ba no sebolo sibai tõdõ Moze andrõ, moroi ba niha bõʼõ fefoe ba goeli danõ.

4II. Ba iʼogomoezaõ imane Jehowa chõ ndra Moze Aʼaroni Mirija: Miʼae ba nose wamaʼeleʼõ, datõloe ami! 5Ba mõi ira, datõloe ira. Ba mõi tooe Jehowa, ba mboto lawoeo, iʼiagõ mbawandroehõ nose, moehede ia chõ ndra Aʼaroni Mirija; ba mõi baero zi daroea andrõ. 6Ba imane: Mifondrondrongo niw̃aʼõgoe! Na so ba chõmi zamaʼeleʼõ ba oeʼoromaʼõ ndraʼo chõnia ba gangilata, ba ma ba wangifi moehededo chõnia. 7Ba tenga si manõ chõ genonigoe Moze andrõ; no ba dangania tebeʼe fefoe hadia ia jomo chõgoe. (Heb. 3, 2). 8Fahoeohoeo ndraʼo chõnia, faoedoe wawa ndraʼaga, ba tenga ba dahõdahõ, anehe ia ngaʼeoe Jehowa. Ba hana wa lõ ataʼoe ami mibõbõgõ zi lõ sõchi chõ genonigoe andrõ, chõ Moze andrõ? (Moz. II. 33, 11).

9III. Ba mofõnoe sibai chõra Jehowa, ba iheta ia, 10ba iheta gõi ia ba nose lawoeo. Ba iʼozoemagõ tehawoe booe aoeri Mirija, afoesi, hoelõ mbetoea. Ba me iʼotahõgõ ia Aʼaroni, ba no tehawoe booe aoeri ia, si lõ moedõnadõna. (Moz. V. 24, 9). 11Ba imane Aʼaroni chõ Moze: He Toea, bõi beʼe horõma, me no hoelõ zowõhõ mowa ndraʼaga ba me no molalõ ndraʼagá! 12Bõi hoelõ nono si no mate moroi ba daloe ia, si no matonga obooe õsi, na iʼotarai daloe ninania! 13Ba iʼangarõfi li Jehowa Moze, imane: He Lowalangi, fadõhõ chõnia! 14Ba imane Jehowa chõ Moze: Hadia na no idiloi mbawania amania, ba hadia, tenga fitoe bongi waʼara aila ia? Ba fitoe bongi jamoeʼiagõ baero golombasew̃a, niʼoniagõ; ba na aefa daʼõ, ba hana na lafoeli lafaʼamõi ia. (Moz. III. 13, 46). 15Ba laʼoniagõ Mirija, baero golombasew̃a, fitoe bongi. Ba lõ latohoegõ wofanõ, irege no moefoeli moefaʼamõi Mirija. 16Ba aefa daʼõ, ba laheta ira ba Haseroti andrõ, ba ba danõ si mate Farana molombase ira dania. (F. 10, 12).