Soera Moze IV Faza 13

I. Tefatenge zamaoeze tanõ Ganaʼana. II. Mõi ria. III. Aboe dõdõ zato, ba irara Kalebi.

1I. Ba hoemede Jehowa chõ Moze, imane: 2Fatenge niha, enaʼõ lafaoezeï danõ Ganaʼana andrõ, nibeʼegoe ba Ndraono Gizeraëli dania; samõsa zamboea mado mifatenge, ha sambalõ salaw̃ara. 3Ba ifatenge Moze, moroi ba danõ si mate Farana, dali goroisa Jehowa, ha sambalõ si no salaw̃a ba Ndraono Gizeraëli. (Moz. V. 1. 22). 4Ba daʼe dõira: Mado Roebeno, ba Samoea, ono Zakoeri; 5ba mado Zimeoni, ba Safata, ono Hori; 6ba mado Joeda, ba Kalebi, ono Jefoene; ba mado Izasari, 7ba Igeala, ono Josefo; ba mado Geferaji, 8ba Hosea, ono Noeni; 9ba mado Mbenijami ba Falati, ono Rafoe, 10ba mado Zeboeloni, ba Gadiëli, ono Zodi; ba mado Josefo, 11mado Manase andrõ, ba Gadi, ono Zoesi; ba mado Dano, ba Amiëli, 12ono Gamali; ba mado Gaseri, 13ba Setoero, ono Michaʼeli; 14ba mado Nafetali, ba Nahebi, ono Wofisi; 15ba mado Gado, ba Gõeli, ono Machi. 16Daʼõ dõi niha andrõ nifatenge Moze, ba wamaoeze tanõ. Ba tõi Hosea andrõ, ono Noeni, ba Josoea ibeʼe Moze. 17Ba ifatenge ira Moze ba wamaoeze tánõ Ganaʼana andrõ. Ba imane chõra: Miʼae mijaw̃a ba daʼõ ba danõ tánõ raja, misõsõ hili andrõ; 18mifaigi he wisa danõ andrõ, ba na sabõlõ niha andrõ, si so ba danõ, ba na samomó, ba na sambõ faʼato, ba na si no ato; 19he wisa gamoeata danõ andrõ, ba zi so ira, na si sõchi, ba na si lõ sõchi, ba he wisa mbanoea, nahiara andrõ, na ba danõ manõ so ira, ba na ba mbanoea saro; 20ba he wisa nowi gõi, na satabõ sinanõ, ba na safoeo; na so dõla geoe, ba na lõʼõ. Ba miʼabeʼeʼõ saʼae dõdõmi ba miʼohe ba daʼe õsa mboea danõ! Ba no baw̃a mboea nagoe sahoelõ. 21Ba mõi ira misi jaw̃a, lafaoezeï danõ, iʼotarai danõ si mate Sini andrõ, iroegi Rehobi, irege wabaliw̃a lala ba Hamata.

22II. Mõi ira misi jaw̃a ba danõ tánõ raja ba laroegi Heberona, banoea ndra Ahima, Sezai, Talamai, ngaʼõtõ Genaki andrõ. Ba Heberona andrõ, ba mewitoe fache fõna wanaroeʼõ Soana ba danõ Miseraji tetaroeʼõ mege. (Jos. 15, 14). 23Ba me laroegi ndraso Esikoli andrõ, ba lataba zara ndraha nagoe, fabaja boea, sangamohi, ba daroea zamabea, ba lahalõ gõi mboea dalimo õsa ba boea ara õsa. 24Ba andrõ wa labeʼe tõi ndraso andrõ ndraso Esikoli, ba mboea nagoe andrõ, nitaba Ndraono Gizeraëli ba daʼõ.

25III. Ba me no iroegi 40 wongi, me no lafaoezeï danõ, ba lafoeli ira. 26Mowaõwaõ ira, ba laroegi ndra Moze Aʼaroni ba Iraono Gizeraëli fefoe, sato, ba danõ si mate Farana, ba Gadesi; ba laʼombachaʼõ chõra ba ba zato fefoe loealoea, ba laʼoromaʼõ chõra mboea danõ andrõ. 27Ba ladoenõdoenõ chõ Moze, lamane: No maroegi danõ andrõ, nifatengeoe jaʼaga. Si ndroehoe sa, si falawoe soesoe ba w̃e w̃ani, ba jāʼe mboea danõ; 28ba si ndroehoe gõi niha andrõ, si so ba danõ, ba no sabõlõ, ba banoea, ba saro ba seboea sibai, ba noa gõi maʼila ba daʼõ ngaʼõtõ Genaki andrõ. (Moz. V. 9, 2). 29Ba danõ tánõ raja, ba Iraono Gamaleki; ba ba hili, ba Iraono Cheti, ba Iraono Jeboesi ba Iraono Gamori; ba Dawa Ganaʼana zi hene asi ba fatambai Joridano. 30Ba Kalebi zondrara tõdõ zato ba chõ Moze, imane: Mõi zoei ita misi jaw̃a, tahalõ chõda danõ; tenga safõchõ sibai wolaw̃a jaʼira! 31Ba lamane awõnia si fao chõnia mege misi jaw̃a: Tebai tasoewõ niha andrõ, no sabõlõ abeʼe ira! 32Ba si lõ sõchi laʼombachaʼõ ba Ndraono Gizeraëli, ba danõ andrõ, nifaoezeïra, lamane: Tanõ andrõ nitõrõima, ba wamaoeze jaʼia, ba iʼagaʼaga niha si so ba chõnia, ba niha andrõ fefoe, niʼilama ba daʼõ, ba no si tenga inõtõ faʼeboea. 33Ba no maʼila gõi ba daʼõ niha andrõ seboea sibai, ngaʼõtõ Genaki andrõ, awõ zeboea sibai andrõ, ba amaedola larew̃e ndraʼaga fõnara, wamaigima, ba si manõ gõi wamaigira.