Soera Moze IV Faza 14

I. Molaw̃a zato ba tebai lahonogõ ira ira Josoea Kalebi. II. Ifetaʼoe ira Lowalangi ba mangandrõ Moze. III. Teʼombachaʼõ chõra, wa 40 fache irõrõ ira ba danõ si mate Lowalangi. IV. Teʼala zabeʼe tandro andrõ, labeʼe Dawa Ganaʼana.

1I. Ba moeʼiraʼira niha sato fefoe, mangarõngarõ ira ba zi bongi andrõ. 2Ba dozi Iraono Gizeraëli, ba koemõkõkõkõ chõ ndra Moze Aʼaroni, lamane chõra sato fefoe: Alai ndraʼaga! enaʼõ na mate mege ndraʼaga ba danõ Miseraji, ba ma ba daʼe, ba danõ si mate! (Sin. 106, 25). 3Hana wa edõna iʼohe ita ba danõ andrõ Jehowa, enaʼõ ba mbawa ziʼõli mate ita? Ba õ nemali woʼomoda ba iraono sawoejoe chõda. Hadia, tenga si sõchinia, na tafoeli ita ba danõ Miseraji! 4Ba faoma lamane chõ nawõra: Datafaigi chõda zolohe jaʼita, ba tafoeli ita ba danõ Miseraji! 5Ba lafalõgoe tooe ira ba danõ ira Moze Aʼaroni, fõna Ndraono Gizeraëli sato, fefoe, si no owoelo ba daʼõ. 6Ba lasika noechara ira Josoea, ono Noeni, Kalebi, ono Jefoene, si no fao gõi ba wamaoeze tanõ andrõ, 7ba lamane ba Ndraono Gizeraëli sato, fefoe: Tanõ andrõ, nitõrõima, ba wamaoeze jaʼia, ba no tanõ si maoeloe faʼasõchi. 8Na eboea dõdõ Jehowa chõda, ba iʼohe ita ba danõ andrõ ba ibeʼe chõda — tanõ si falawoe soesoe ba w̃e w̃ani! 9Ba bõi milaw̃a Jehowa ba bõi miʼataʼoefi niha ba danõ andrõ; taʼā saʼae ira dania. No aheta chõra mbaʼabaʼara andrõ, ba jaʼita, ba nitolo Jehowa; bõi miʼataʼoefi ira! (Moz. V. 20, 3. Rom. 8, 31). 10Ba me hatṍ maʼifoe tõ lateboe kara ira sato fefoe, ba oroma lachõmi Jehowa ba Ndraono Gizeraeli fefoe, ba nose wamaʼeleʼõ.

11II. Ba imane Jehowa chõ Moze: Ha waʼara tebato wangoʼaja niha andrõ jaʼo, wa lõ fadoehoe dõdõra chõgoe, lõ lai dandra andrõ fefoe, si no oelaoe ba chõra andrõ! 12Daʼoeboenoe ira fõchõ waba, oeseʼe ira, ba jaʼoegõ oebeʼe foeroegõ soi [si bohooe], seboea ba sato niha moroi chõra! (Moz. II. 32, 10). 13Ba imane Moze chõ Jehowa: Ba larongo Dawa Miseraji; noa sa õʼohe mijaw̃a, moroi ba chõra, soi andre faʼabõlõmõ andrõ, 14ba laʼombachaʼõ ba niha ba danõ andre, ba zi no terongo, wa ba hoenõ niha andre so ndraʼoegõ, jaʼoegõ Jehowa, awõ wa no õʼoromaʼõ ndraʼoegõ, fa faʼila bawa. Jaʼoegõ Jehowa, awõ wa no so jaw̃ara lawoeo andrõ chõoe, wa mowaõwaõʼõ fõnara, na maʼṍchõ, ba boto lawoeo, ba ba zi bongi, ba boto galitõ. (Moz. II. 13, 21). 15Ba na õboenoe soi andre, hoelõ na ha samõsa, ba lamane dania soi bõʼõ, si no mamondrongo toeriamõ andrõ: 16Me no tebai Jehowa, iʼohe ba danõ andrõ, nifaboeʼoenia chõra fahõloesa, soi andrõ, andrõ wa iboeboenoe ira ba danõ si mate. (Moz. V. 9, 28). 17Enaʼõ na oroma sibai waʼabõlõoe, jaʼoegõ Jehowa, si mane nifaboeʼoemõ, me õmane. 18Sebolo tõdõ Jehowa ba si no fahõna faʼahachõ dõdõ; sala ba olalõw̃a, ba ibeʼe aefa, ba lõʼõ sa aefa sibai wotoe; horõ ndra ama ihoekoe ba ndraono, iroegi tõloe, õfa ngaʼõtõ. (Moz. II. 34, 6. 7. Jon. 4, 2). 19Beʼe aefa horõ niha andre, ba waʼeboea waʼahachõ dõdõoe andrõ, si mane fameʼeoe aefa horõra iʼotarai ba danõ Miseraji, iroegi maʼõchṍ!

20III. Ba imane Jehowa: Oebeʼe aefa chõra, oeʼoʼõ niʼandrõoe. 21Ba si ndroehoendroehoe: faja wa no saoeri ndraʼo, na faja wa anõnõ dania goeli danõ lachõmi Jehowa, 22ba na laʼila dania danõ andrõ niha andrõ fefoe, si no mangila lachõmigoe andrõ, awõ dandra andrõ fefoe, nilaoegoe ba danõ Miseraji ba ba danõ si mate, ba si no manandraigõ zoei jaʼodo, no mewoeloe saʼae, ba si lõ mamondrongo ligoe, 23na laʼila danõ andrõ, nifaboeʼoegoe chõ ndra toeara fahõloesa; samõsa lõ sangila dania, jaʼirá andrõ, fefoe, si no mangoʼaja jaʼo, (Moz. V. 1, 35. Sin. 95, 10. 11. Heb. 4, 3). 24Ba enonigoe Kalebi andrõ, si so Eheha bõʼõ, taʼila, ba si no moloʼõ sibai chõgoe, ba oeʼohe ba danõ andrõ, si mõi ia mege ba laʼochõgõ dania madooenia. (Jos. 14, 9). 25Ba Iraono Gamaleki ba Dawa Ganaʼana, ba ba zaloʼo tanõ so. Mahemoloe, ba mifoeli ami, miʼae ba danõ si mate, mitõrõ lala saechoe ba nasi zoechoe. 26Ba hoemede Jehowa chõ ndra Moze Aʼaroni, imane: 27Ha waʼara dõhõ wekõkõkõkõ niha si lõ sõchi andrõ chõgoe? Fekõkõkõkõ Ndraono Gizeraëli andrõ chõgoe, ba no oerongo! 28Õmane chõra: Faja wa no saoeri ndraʼo, iw̃aʼõ Jehowa, na lõ oefatõrõ chõmi niw̃aʼõmi andrõ, nirongo dõgi dalingagoe. 29Ba danõ si mate andre adoedoe mbotomi, ha waʼato ami niʼofaja no — dozi, iʼotarai zi 20 fache faʼeboea ba si aʼa moroi andrõ, jaʼami si no moekõkõkõkõ chõgoe! (F. 26, 65. Heb. 3, 17). 30Samõsa lõ sondroegi tanõ andrõ, motõi jaʼami andrõ, tanõ si no oetoetoeroe chõmi, nahami, fabõloesa, baero Kalebi andrõ, ono Jefoene, ba Josoea, ono Noeni. (Jos. 14, 1). 31Ba iraono sawoejoe chõmi, niwaʼõmi õ nemali dania — daʼõ oeʼohe ba danõ dania, enaʼõ laʼila danõ andrõ, niʼositengagõmi. 32Ba botomi, ba sadoedoe ba danõ si mate. 33Ba iraonomi, ba 40 fache waʼara lakoebaloi goerifõra ba danõ si mate, hoekoe wolaw̃ami andrõ, balazi no ahori aseʼe ami ba danõ si mate. 34Dali zi 40 ngaloeo, me mifaoezeï danõ andrõ — sara ngaloeo, ba dõfi labeʼe — tobali 40 fache miloeʼi hoekoe lalõmi andrõ; enaʼõ aboto ba dõdõmi, he wisa na oebõda dangagoe! 35Jaʼodo andre, Jehowa, zangoemaʼõ; si ndroehoe, si manõ dania wolaoegoe ba niha si lõ sõchi andrõ fefoe, si no mamagõlõ ba wolaw̃a jaʼodo; ba danõ si mate andre ahori ira, ba daʼe mate ira. 36Ba mate niha andrõ nifatenge Moze, ba wamaoeze tanõ andrõ, ba si no mamobõrõ fekõkõkõkõ zato fefoe chõnia, me mangawoeli ira, wangombacha sataʼoe ira ba danõ andrõ — niha andrõ, 37si no mangombacha sataʼoe ira ba danõ andrõ, ba mate fõna Jehowa, faʼamate si lõ moedõnadõna. (Kor. I. 10, 10. Joed. a. 5). 38Awai zi lõ mate niha andrõ, si no mõi mamaoeze tanõ andrõ, ha Josoea, ono Noeni, ba Kalebi, ono Jefoene. 39Ba me iʼombachaʼõ ba Ndraono Gizeraëli fefoe niw̃aʼõ andrõ Moze, ba aboe sibai dõdõra.

40IV. Ba mahemoloe õ, ba lahoelõ wongi wanaw̃a mijaw̃a hili, lamane: Omasiga mõi mijaw̃a ba danõ andrõ, niw̃aʼõ Jehowa; noa sa mosala ndraʼaga. 41Ba imane Moze: Hana wa edõna ami misawõ zoei niw̃aʼõ Jehowa? Lõʼõ sa fachai! (Moz. V. 1, 41). 42Bõi miʼae mijaw̃a, lõʼõ sa fao chõmi Jehowa; fa bõi teʼala ami labeʼe emalimi andrõ. 43Oedoemi sa ba daʼõ Ndraono Gamaleki ba Dawa Ganaʼana, ba mate ami ba mbawa ziʼõli. Me no miʼerogõ Jehowa, ba lõʼõ saʼae itolo ami! 44Ba lõ aloeloe; mõi ira mijaw̃a ba hili law̃aʼõ ba tawõla zoera goroisa Jehowa ba he Moze, ba lõ aheta ba golombasew̃a. 45Ba so Ndraono Gamaleki, awõ Ndrawa Ganaʼana, sowanoea ba hili andrõ, mõi ira mitooe, latimba ira ba moezawili irege Horema, labeʼe.