Soera Moze IV Faza 15

I. Famachoi soemange niʼā ba soemange nibadoe. II. Soemange si aʼa gõ ba soemange fameta horõ. III. Fotoe zanawõ oroisa ba zabato. IV. Nifobowobowo noecha.

1I. Ba hoemede Jehowa chõ Moze, imane: 2Hede ba Ndraono Gizeraëli, õmane chõra: Na miroegi dania danõ andrõ, nibeʼegoe nahami, 3ba na mibeʼe chõ Jehowa zoemange nifatõrõ ba galitõ, he soemange nitoenoe ba he soemange nitaba, ma ba wanõrõ amaboeʼoela li, ba ma ameʼela saoha gõlõ, ba ma na baw̃a gowasa andrõ chõmi, ba wameʼe samohoea chõ Jehowa, saw̃i, ba ma biribiri, 4ba sameʼe soemange Jehowa andrõ, chõnia, ba samboea niʼofoeloe hamo si sõchi nifaroeka fanicha, samba hinaoja, ifao soemange niʼā. (Moz. III. 6, 14). 5Ba agoe, soemange nibadoe, ba samba hinaoja ba zi sara ono mbiribiri, õfao ba zoemange nitoenoe ba ba zoemange nitaba. 6Ba ba mbiribiri si matoea, ba õfao soemange niʼā domboea niʼofoeloe hamo si sõchi nifaroeka si tõloe kata fanicha, ba agoe, soemange nibadoe, 7ba tõloe kata õbeʼe chõ Jehowa, samohoea. 8Ba na ono zaw̃i, si matoea õbeʼe soemange nitoenoe, ba ma soemange nitaba, ba wanõrõ amaboeʼoela li, ba ma soemange Jehowa, fangorifi, ba nifao ba nono zaw̃i andrõ, 9soemange niʼā, ba tõloe niʼofoeloe hamo si sõchi, nifaroeka si sadoemba fanicha. 10Ba agoe, soemange nibadoe, ba sadoemba õbeʼe, soemange Jehowa, nifatõrõ ba galitõ, samohoea. 11Si manõ wolaoe ba nono zaw̃i fefoe ba ba mbiribiri si matoea fefoe ba ba nono mbiribiri ba ba nono nambi fefoe. 12Dali ha oega geoe nibeʼemi, ba sagesageoe, ba mimanõ. 13Dozi niha ba danõ zoloʼõ amachoita andrõ, na labeʼe zoemange Jehowa, nifatõrõ ba galitõ, samohoea. 14Ba na so ba chõmi niha bõʼõ, ba ma si no ahono chõmi, ba si manõ gõi ilaoe, dali wolaoemi. 15Ha sara lala, dozi, he jaʼami, ba he niha bõʼõ, si sosó chõmi. Amachoita si lõ teboelõ daʼõ, gõtõgõtõ waʼara; ba zoemange Jehowa, ba faoma, he ba niha bõʼõ, ba he ba chõmi. (Moz. II. 12, 49). 16Ha sara nihohogõi ba ha sara nifachoi, he ba chõmi, ba he ba niha bõʼõ, si soso ba chõmi.

17II. Ba hoemede Jehowa chõ Moze, imane 18Hede ba Ndraono Gizeraëli, ba õmane chõra: Na miroegi dania danõ andrõ, niʼohegoe jaʼami, 19ba na miʼā mboea danõ, ba mibeʼe chõ Jehowa zi no amaedola wegero, fõfõnia. 20Si aʼa hamo niʼotambõni chõmi, ba sagõrõ koee mibeʼe fegero, lala wameʼe fegero ba golajama mbasitõ wameʼemi jaʼia. 21Si aʼa hamo niʼotambõni andrõ chõmi, ba mibeʼe chõ Jehowa õsa, soemange fegero, gõtõgõtõ waʼara dania. (Moz. II. 23, 19). 22Ba na so hadia ia zi lõ mitõrõ amachoita andrõ, si lõ moeʼodõdõgõ, oroisa Jehowa andrõ chõ Moze, (Moz. III. 4, 2), 23hadia ia, niʼoroiʼõ Jehowa chõmi, chõ Moze, iʼotarai loeo andrõ, me ibeʼe goroisa Jehowa, ba dania na, gõtõgõtõ waʼara, 24na tenga niʼodõdõgõ zato, wa lõ moetõrõ daʼõ, ba sato fefoe zameʼe ono zaw̃i, si matoea, soemange nitoenoe, samohoea chõ Jehowa, nifao soemange niʼā ba soemange nibadoe, nifaofao ba daʼõ, lalania, ba sageoe nambi si matoea, soemange fameta horõ. 25Ba na no ifaigi ere wameta sala Ndraono Gizeraëli sato, fefoe, ba tebeʼe aefa chõra. Noa sa tenga niʼodõdõgõ, ba no labeʼe zoemange chõra, soemange Jehowa nifatõrõ ba galitõ, awõ zoemange fameta horõ, chõ Jehowa, ba lalõra andrõ. 26Ba tebeʼe aefa zala Ndraono Gizeraëli sato fefoe ba sala niha bõʼõ, si sosó ba chõra; noa sa horõ zato fefoe, lalõ andrõ. 27Ba na so zi sala si lõ moeʼodõdõgõ, na ha samõsa, ba nambi si dõfi faʼeboea ibeʼe soemange fameta horõ. 28Ba jamoefaigi ere wameta sala zi no mosala chõ Jehowa, si tenga niʼodõdõgõ, wolaoe fameta sala andrõ chõnia, ba tebeʼe aefa chõnia. 29Ha sara lala chõmi — he ba niha ba danõ, Iraono Gizeraëli, ba he ba niha bõʼõ, si sosó ba chõra, na so zolaoe hadia ia, si lõ moeʼodõdõgõ. 30Ba na so zolalõ niʼodõdõgõ, he niha ba danõ, ba he niha bõʼõ, ba sanandraw̃aisi Jehowa, ba niseʼe ba niwara niha si manõ. 31Noa sa si lõ goena li Jehowa ba si lõ boto goroisania ibeʼe; ba lõ foelitõ, ba niseʼe niha si manõ — iloeʼi horõnia.

32III. Ba me so ba danõ si mate andrõ Ndraono Gizeraëli, ba faloecha ira niha sangozaragõ eoe, me loeo sabato. 33Ba laʼohe ia chõ ndra Moze Aʼaroni ba ba zato fefoe si fachamõ chõnia, me iʼozaragõ geoe, ba lakoeroe ia, 34me lõʼõ na oroisa ba daʼõ, he lawisa chõnia. (Moz. III. 24, 12). 35Ba imane Jehowa chõ Moze: Niha andrõ, ba niboenoe; sato fefoe zaneboe kara jaʼia, baero golombasew̃a. 36Ba laʼohe ia baero golombasew̃a sato fefoe ba lateboe kara, laboenoe, dali niw̃aʼõ Jehowa chõ Moze.

37IV. Ba hoemede Jehowa chõ Moze, imane: 38Hede ba Ndraono Gizeraëli, õw̃aʼõ chõra lafobowobowo gahe mbaroera jaʼira ba madooera dania; ba bowobowo andrõ, ba ladozigõ sinali oengoe sowōē waroewaroe. (Moz. V. 22, 12. Mat. 23, 5). 39Ba daʼõ geloeaha mbowobowo andrõ chõmi: na mifaigi ia, ba itõrõ tõdõmi goroisa Jehowa andrõ fefoe, enaʼõ miʼoʼõ ia, ba bõi miholeʼõ ami ba gisõisõ dõdõmi ba ba gomasiõ hõrõmi, famaeloengoemi ba wangerogõ Jehowa. 40Enaʼõ lõ olifoe ami goroisagoe andrõ fefoe ba enaʼõ miʼoʼõ, fa niʼamoniʼõ ami fõna Lowalangimi. 41Jehowa ndraʼodo, Lowalangimi, si no mangeheta jaʼami ba danõ Miseraji, ba weʼamõi Lowalangimi, jaʼodo andre, Jehowa, Lowalangimi!