Soera Moze IV Faza 16

I. Molaw̃a ndra Kora, Datano, Abiramo. II. Ihoekoe zolaw̃a andrõ Lowalangi.

1I. Ba molaw̃a Gora, ono Jesehari ono Gahati ono Lewi, ba awõnia Datano ba Abiramo, iraono Geliabi andrõ, ono Waloe ono Roebeno. (Joed. a. 11). 2Lalaw̃a Moze, ba 250 niha nawõra, Iraono Gizeraëli, satoea mbanoea, salaw̃a rafe, seboea tõi. 3Mõi ira faloecha chõ ndra Moze Aʼaroni, lamane chõra: Tenga inõtõ chõmi! Niʼamoniʼõ sa zato fefoe, dozi ira, ba sosó chõra Jehowa; ba hana wa mibaliʼõ salaw̃a mbanoea Jehowa ami? (Moz. II. 19, 6). 4Ba me irongo daʼõ Moze, ba ifalõgoe tooe ia ba danõ. 5Ba imane chõ Gora ba ba zato andrõ chõnia fefoe: Mahemoloe iʼoromaʼõ Jehowa, ha niha dána chõnia ba ha niha niʼamoniʼõ, fa ifaʼamõi chõnia; somasi ia, ba ifaʼamõi chõnia. 6Ba mimane: Mihalõ gali ba wanoenoe samohoea, Kora ba sato andrõ chõnia fefoe; 7mibeʼe jaw̃a galitõ ba milaoe zamohoea nitoenoe, fõna Jehowa; ba ha niha nitehe Jehowa, daʼõ niʼamoniʼõ taw̃aʼõ. Noa irege daʼõ, jaʼami ono Lewi! 8Ba imane Moze chõ Gora: Mifondrondrongo, jaʼami, ono Lewi! 9Hadia, ambõ na chõmi, wa no iʼoniagõ ami ba Ndraono Gizeraëli sato, ba wamaʼamõi chõnia jaʼami, enaʼõ mihalõhalõ halõw̃õ andrõ ba nahia Jehowa, ba enaʼõ mõi ngoningoni zato ami ba wangaingai halõw̃õ chõra? (F. 3, 6). 10Ba no ifaʼamõi ndraʼoegõ, awõ dalifoesõoe fefoe, ono Lewi, ba hadia, miʼandrõ na gõi chõmi, enaʼõ latehe ere ami? 11Andrõ mamagõlõ ami, oedoe Jehowa, jaʼoegõ ba sato andrõ chõoe fefoe — hadia sa Gaʼaroni, wa koemõkõkõkõ ami chõnia? 12Ba ifakaoniʼõ ndra Datano Abiramo, iraono Geliabi andrõ, Moze; ba lamane: Lõ mõiga! 13Hadia, ambõ na, wa no õhetaga ba danõ si falawoe soesoe ba w̃e w̃ani, wa no õʼohega ba daʼe, ba wamoenoe jaʼaga ba danõ si mate; hadia, õbaliʼõ salaw̃ama na gõi ndraʼoegõ? 14Noa sa õhaogõ wolohe jaʼaga ba danõ si falawoe soesoe ba w̃e w̃ani, awõ wameʼe benoea chõma ba kaboe nagoe, tána chõma. Hadia, õwai õʼila õʼabõsiʼõ niha? 15Lõ mõiga! Ba mofõnoe sibai Moze, ba imane chõ Jehowa: Bõi otahõgõ zoemange andrõ chõra! Sageoe kalide lõ nihalõgoe chõra, samõsa lõ ba chõra niʼaboesigoe tõdõ! (Sam. I. 12, 3). 16Ba imane Mose chõ Gora: Jaʼoegõ ba sato andrõ chõoe fefoe, mahemoloe miʼondrasi Jehowa — jaʼoegõ ba jaʼira ba Aʼaroni! 17Ba dozi ami mihalõ gali ba wanoenoe samohoea chõmi, milaoe jaw̃a zamohoea, ba iʼohe fõna Jehowa gali chõnia zamõsana — 250 gali; ba jaʼoegõ gõi ba Aʼaroni, ba faoma so gali chõmi. 18Ba dozi lahalõ gali chõra, labeʼe jaw̃a galitõ ba lalaoe zamohoea nitoenoe. Ba laʼiagõ golajama nose wamaʼeleʼõ, awõ ndra Moze Aʼaroni. 19Ba ifaloechaʼõ zato fefoe oedoera Kora, ba golajama nose wamaʼeleʼõ. Ba toʼele ba zato fefoe lachõmi Jehowa.

20II. Ba hoemede Jehowa chõ ndra Moze Aʼaroni, imane: 21Miʼoniagõ ami a niha andrõ, enaʼõ oeʼozoemagõ oehori ira! 22Ba lafalõgoe tooe ira ba danõ, lamane: He Lowalangi. Soʼaja noso ba mboto niha fefoe! Hadia, na ha samõsa zamazõchi horõ, ba mofõnoe ndraʼoegõ ba zato fefoe. (F. 27, 16. Heb. 12, 9). 23Ba hoemede Jehowa chõ Moze, imane: 24Hede ba zato, õmane chõra: Miheta ami ba zahatõ ba nahia ndra Kora, Datano, Abiramo! 25Ba maoso Moze, mõi ia chõ ndra Datano Abiramo, ba laʼoʼõ ia satoea Ndraono Gizeraëli. 26Ba hoemede ia ba zato, imane: Mitaʼitaʼi miheta ami ba nose niha seboea horõ andrõ, ba bõi mibabaja hadia ia nibajabajara, fa bõi teseʼe ami [gõi], ba horõra andrõ fefoe. 27Ba laheta ira ba zahatõ ba nahia ndra Kora, Datano, Abiramo. Ba Datano ba Abiramo, ba no mõi tooe, laʼiagõ newali nosera, awõ woʼomora, ba onora, he segeboea, ba he sigideʼide. 28Ba imane Moze: Ba daʼõ dania aboto ba dõdõmi, wa no Jehowa zamatenge jaʼodo, ba wolaoe nilaoe andrõ fefoe, wa tenga moroi chõgoe manõ: 29Na si mane faʼamate niha bõʼõ fefoe waʼamate daʼe, na ha sanõrõ niha bõʼõ fefoe itõrõ ira, ba no tenga Jehowa zamatenge jaʼo. 30Ba na ilaoe Jehowa zi lõ moerai moerongo, na ifaboka mbawania tanõ ba na itõlõ ira, fabaja fefoe zi so chõra, na noemalõ ba mbanoea tooe, aoeri, ba aboto ba dõdõmi, wa no latandraw̃aisi Jehowa niha andrõ. 31Ba me no aʼozoe chõnia hoehoeo andrõ, ba fabali danõ barõ gahera, 32ifaboka mbawania tanõ, itõlõ ira, fabaja nosera, ba awõ niha fefoe, tána chõ Gora, noemalõ nibajabajara. (F. 26, 10. Moz. V. 11, 6. Sin. 106, 17). 33Noemalõ mitooe ira ba mbanoea tooe, aoeri, fabaja fefoe zi so chõra, ba fahalõ danõ, jaw̃ara, tobali taja manõ ira ba hoenõ zato. 34Ba dozi Iraono Gizeraëli ba zi tefasoei jaʼira, ba moloi ba weʼiraʼirara, lamane sa: ma itõlõ ita gõi tanõ! 35Ba itõrõ alitõ, si oroi Jehowa, ba iʼā niha andrõ, si 250, sanoenoe samohoea andrõ.