Soera Moze IV Faza 17

I. Famoefoe gali andrõ. II. Ifoeli koemõkõkõkõ zato. Fotoe ba fangatoelõ. III. Molewiõ ziʼo Gaʼaroni ba mobowo.

1I. Ba hoemede Jehowa chõ Moze, imane: 2W̃aʼõ chõ Geleazari, ono Gaʼaroni ere andrõ, jamoehalõ gali andrõ ba gachozila andrõ, ba jamoefazawili galitõ ba zarõoe maʼifoe; 3amonita saʼae gali zeboea horõ andrõ, me no mate ira; nibõbõzi, niʼanifiʼõ ba nibeʼe oeli naha wameʼe soemange. Noa sa laʼohe fõna Jehowa, ba amonita saʼae. Ba hana na tandra saʼae ba Ndraono Gizeraëli. 4Ba ihalõ gali tõla andrõ Eleazari, gali ba wanoenoe samohoea andrõ, niʼohe zachozi andrõ ba labõbõzi, laʼanifiʼõ, oeli naha wameʼe soemange, 5tandra ba Ndraono Gizeraëli, fa samõsa bõi mõi, si tenga ngaʼõtõ Gaʼaroni, ba wanoenoe samohoea fõna Jehowa, fa bõi gõna ia zi no gõna Gora andrõ ba awõnia andrõ, nifaʼombachaʼõgõ Jehowa chõnia chõ Moze.

6II. Ba mahemoloe õ, ba koemõkõkõkõ Ndraono Gizeraëli sato fefoe chõ ndra Moze Aʼaroni, lamane: No miboenoe niha tána chõ Jehowa. 7Ba me aechoe zato oedoe ndra Moze Aʼaroni, ba lafaigi nose wamaʼeleʼõ daʼõ; ba no ibaloegõ ia lawoeo andrõ, ba toʼele lachõmi Jehowa. 8Ba mõi ba golajama nose wamaʼeleʼõ ndra Moze Aʼaroni. (Heb. 9, 4). 9Ba hoemede Jehowa chõ Moze, imane: 10Miheta ami ba zato andrõ, enaʼõ oeseʼegõ ira, ahooe zamõʼi! 11Ba lafalõgoe tooe ira ba danõ. Ba imane Moze chõ Gaʼaroni: Halõ gali ba wanoenoe samohoea, laoe jaw̃a galitõ ba naha wameʼe soemange, ba beʼe zamohoea ba taʼitaʼi ohe ba hoenõ zato, ba wamaigi fameta salara; noa sa mofõnoe sibai Jehowa, ba no ibõrõgõ famakao. 12Ba ihalõ gali Aʼaroni, si mane niw̃aʼõ Moze, fagohi ia, isaw̃a hoenõ zato; noa sa ibõrõgõ famakao ba chõra; ba itoenoe zamohoea fameta zala zato. 13Ba me so ia ba daʼõ, ba gotaloeara zi mate zaoeri, ba dõhõ wamakao andrõ. 14Ba faʼato zi no tekiko ba wamakao andrõ, ba no 14,700; lõ lai zi tekiko mege bõrõ Gora andrõ. 15Ba ifoeli ia Aʼaroni chõ Moze, ba golajama nose wamaʼeleʼõ, ba no dõhõ wamakao andrõ.

16III. Ba hoemede Jehowa chõ Moze, imane: 17Hede ba Ndraono Gizeraëli, w̃aʼõ chõra, ndramoeʼohe chõoe ziʼo, samboea mado, ba sara ziʼo, siʼo zalaw̃ara, dozi mado, 12 ziʼo fefoe. Ba tõi zamõsana, ba soera ba ziʼonia, 18ba tõi Gaʼaroni, ba ba ziʼo mado Lewi õsoera; samõsa hõgõ mado, ba sara ziʼo. 19Ba õtooeʼõ tooe ba nose wamaʼeleʼõ, fõna dawõla zoera goroisa, ba niʼoroʼoromaʼõgoe jaʼodo chõoe. 20Ba siʼo nitoejoegoe, ba molewiõ dania, enaʼõ oefadõhõ wekõkõkõkõ Ndraono Gizeraëli chõmi, fa bõi [saʼae] aboea chõgoe. 21Ba me no iʼombachaʼõ daʼõ ba Ndraono Gizeraëli Moze ba labeʼe chõnia ziʼora salaw̃ara fefoe, dozi mado, samõsa hõgõ, ba sara ziʼo, 12 ziʼo fefoe; ba lafao ba ziʼora andrõ ziʼo Gaʼaroni. 22Ba itooeʼõ tooe zio andrõ Moze, fõna Jehowa, ba nose goroisa. 23Ba mahemoloe õ, me mõi ba nose goroisa Moze, ba no aoeri ziʼo Gaʼaroni, siʼo mado Lewi andrõ, no molewiʼõ ba mobowo saʼae ba mowoea, boea manaloe si no oʼõli. 24Ba iʼohe baero niʼamoniʼõ ziʼo andrõ fefoe Moze, iʼoromaʼõ ba Ndraono Gizeraëli fefoe, ba lafaigi, ba ihalõ ziʼonia zamõsana. 25Ba imane Jehowa chõ Moze: Foeli beʼe tooe ziʼo Gaʼaroni andrõ fõna zoera goroisa, enaʼõ teʼirõʼõ ia tandratandra ba zabeʼe tandro, ba enaʼõ dõhõ wekõkõkõkõra andrõ, fa bõi [saʼae] aboea chõgoe; fa bõi mate ira. 26Ba iʼoʼõ Moze niw̃aʼõ Jehowa chõnia; si manõ wolaoenia. 27Ba lamane Iraono Gizeraëli chõ Moze: Hiza, si mate ndraʼaga, si tekiko ndraʼaga, dozi ndraʼaga, ba si tekiko! 28Ha niha zi hatõʼõ jaʼia ba nose Jehowa andrõ, ba si mate; hadia sa, õhori manõ ndraʼaga?