Soera Moze IV Faza 18

I. Halõw̃õ gere ba halõw̃õ nono Lewi. II. Oeracha gere ba zoemange ba ba zi aʼa mboea danõ ba ba zi aʼa nono goerifõ. III. Si samboea niʼofoeloe nitehe ba Nono Lewi ba si samboea niʼofoeloe zi samboea niʼofoeloe nitehe ba gere.

1I. Ba imane Jehowa chõ Gaʼaroni: Jaʼoegõ ba iraonooe andrõ ba iwami zoloeʼi sala ba niʼamoniʼõ andrõ, ba he si sala halõw̃õ gere andrõ chõmi, ba jaʼoegõ ba iraonooe zoloeʼi. 2Ba talifoesõoe andrõ gõi, mado Lewi, iwami, ba faʼamõi, awõoe, enaʼõ fao ira chõoe, ngoningonioe, na mihalõhalõ halõw̃õ ba golajama nose goroisa, jaʼoegõ ba iraonooe. (Moz. V. 18, 5). 3Ba halõw̃õra nihalõhalõ chõoe ba hadia nihalõhalõ ba nose, maʼasamboea. Ba bõi lahatõʼõ ira ba wakake niʼamoniʼõ andrõ ba ba naha wameʼe soemange, fa bõi faoma mate ami, he jaʼira ba he jaʼami. 4Ba ndrafao chõoe, ndra moehalõhalõ halõw̃õ ba nose wamaʼeleʼõ, fefoe hadia ia halõw̃õ ba nose; ba niha bõʼõ, ba lõ tola ihatõʼõ ia chõmi. 5Ba jaʼami zangai halõw̃õ ba niʼamoniʼõ andrõ, awõ halõw̃õ ba naha wameʼe soemange, fa bõi ifoeli gõna fõnoe Ndraono Gizeraëli. 6Hiza, no oetoejoe ba Ndraono Gizeraëli nono Lewi andrõ, boealagoe chõmi, nibeʼe tána chõ Jehowa, enaʼõ lahalõhalõ halõw̃õ ba nose wamaʼeleʼõ. 7Ba jaʼoegõ ba iraonooe andrõ, ba mihalõhalõ halõw̃õmi, halõw̃õ gere, hadia ia fefoe ba naha wameʼe soemange, ba bacha barõ mbaʼabaʼa andrõ; mihalõhalõ halõw̃õ. Boealagoe chõmi halõw̃õ gere andrõ: ba niha bõʼõ, si hatõʼõ jaʼia, ba niboenoe.

8II. Ba imane Jehowa chõ Gaʼaroni: Hiza, oetehe chõoe nibeʼe jaw̃a soemangegoe si no amaedola wegero andrõ; ba gameʼela Ndraono Gizeraëli andrõ niʼamoniʼõ fefoe oetehe chõoe ba ba ndraonooe, tána chõmi, õmõ nibeʼebeʼe, si lõ mamalõmalõ. (Moz. III. 7, 35). 9Ba daʼõ dána chõoe ba gameʼela andrõ niʼamoniʼõ sibai — na no moehalõ dána nitoenoe andrõ —: fefoe gameʼelara soemange niʼā ba soemange fameta horõ ba soemange ogaoeta, nibeʼera chõgoe, fangali [nilimo]; chõoe ba ba ndraonooe, niʼamoniʼõ sibai. 10Ba naha niʼamoniʼõ sibai õʼā ia; dozi motõi matoea zi manga jaʼia: niʼamoniʼõ ia õw̃aʼõ. 11Ba daʼõ zi mõi chõoe si hoelõ wegero, ba gameʼelara [bõʼõ] andrõ, ba zoemange Ndraono Gizeraëli andrõ nihahae: oetehe chõoe ba ba nonooe matoea ba ba nonooe alawe; õmõ, nibeʼe, si lõ mamalõmalõ; dozi si lõ si raʼiõ moroi jomo chõoe zi manga jaʼia. (Moz. II. 29, 27). 12Fefoe zi sõchi fanicha ba fefoe zi sõchi agoe ba fache, fondrege zi sõchinia, nibeʼera chõ Jehowa, ba no oetehe chõoe. 13Fefoe zi aʼa mboea danõ chõra, nibeʼera chõ Jehowa, ba chõoe; dozi si lõ si raʼiõ, moroi jomo chõoe, zi manga jaʼia. 14Fefoe hadia ia nilachaʼõ ba Ndraono Gizeraëli, ba chõoe. (Moz. III. 27, 28). 15Fefoe zi aʼa ba waʼatoemboe, fefoe nibeʼebeʼe chõ Jehowa, he niha, ba he oerifõ, ba chõoe, ba si aʼa nono niha, ba õbeʼe nisanoe, ba si manõ gõi zi aʼa nono goerifõ si raʼiõ. (Moz. II. 13, 2). 16Ba ba wananoe jaʼia [ba nono niha], ba na sara waw̃a waʼeboea, ba ma na eboea moroi andrõ õbeʼe nisanoe, dali watõ, lima sekeli (roefia) wananoe, ba zaga niʼamoniʼõ, si samba sekeli, ba 20 gera. (Moz. II. 30, 13). 17Ba si aʼa nono zaw̃i ba he ono mbiribiri ba he ono nambi, ba lõ tola õbeʼe nisanoe: niʼamoniʼõ daʼõ; donia, ba õbeʼe fanefe naha wameʼe soemange, ba taw̃õnia, ba õtoenoe, soemange nifatõrõ ba galitõ, nibeʼe chõ Jehowa, samohoea. 18Ba õsira, ba chõoe, si mane osoe andrõ, nihahae ba faha andrõ kambõlõ, chõoe ia. 19Fefoe zoemange si hoelõ wegero andrõ, fõfõ gameʼela niʼamoniʼõ andrõ nibeʼe Ndraono Gizeraëli amaedola wegero chõ Jehowa, ba chõoe oetehe ba ba nonooe matoea ba ba nonooe alawe, õmõ, nibeʼe, si lõ mamalõmalõ. Amaboeʼoela li nilaoe asio daʼõ, si lõ teboelõ, gõtõgõtõ waʼara, chõoe ba ba ngaʼõtõoe dania. (Moz. III. 2, 13. Ngaʼõt. II. 13, 5).

20III. Ba imane Jehowa chõ Gaʼaroni: Lõ labeʼe dána chõoe ba danõra, lõ benoeaoe ba chõra. Jaʼodo sa dána chõoe ba amaedola gondrõita chõoe ba hoenõ Ndraono Gizeraëli. (Moz. V. 10, 9). 21Ba nitehegoe ba nono Lewi, ba samboea niʼofoeloe ba Ndraono Gizeraëli, amaedola gondrõita, ba halõw̃õ andrõ, nihalõhalõra, halõw̃õ ba nose wamaʼeleʼõ. 22Ba Iraono Gizeraëli, ba lõ tola saʼae lahatõʼõ ira ba nose wamaʼeleʼõ, fa bõi lahalõ horõra ba fa bõi mate ira. 23Ono Lewi zangaingai halõw̃õ ba nose wamaʼeleʼõ, ba jaʼira zoloeʼi sala dánõ bõʼõ, dali nifachoi andrõ chõmi, si lõ teboelõ, gõtõgõtõ waʼara; ba tána chõra tanõ, ba lõ labeʼe chõra ba Ndraono Gizeraëli. (Jos. 13, 14). 24Me oetehe ba nono Lewi zi samboea niʼofoeloe andrõ ba Ndraono Gizeraëli nibeʼera chõ Jehowa soemange si no amaedola wegero, oebeʼe amaedola gondrõita chõra; andrõ wa no oefachoi ba chõra andrõ, wa lõ labeʼe chõra dána chõra tanõ ba Ndraono Gizeraëli. 25Ba hoemede Jehowa chõ Moze, imane: 26W̃aʼõ ba nono Lewi, õmane chõra: Na mitema ba Ndraono Gizeraëli zi samboea niʼofoeloe andrõ, nitehegoe chõmi tána chõmi ba chõra andrõ, ba mibeʼe õsa soemange si no amaedola wegero, chõ Jehowa, samboea niʼofoeloe zi samboea niʼofoeloe andrõ. (Neh. 10, 38). 27Ba lafotõi chõmi zoemange fegero andrõ chõmi, amaedola wache ba golajama mbasitõ ba amaedola zi tõra ba wolazi nagoe. 28Ba si manõ ba niʼofoeloe andrõ fefoe, sinemami, nitemami ba Ndraono Gizeraëli, mibeʼe õsa, soemange fegero chõ Jehowa; ba soemange fegero andrõ fõfõnia, nihonogõi chõ Jehowa, ba ba danga Gaʼaroni ere mibeʼe. 29Fefoe gameʼela, si mõi chõmi, ba lõ teboelõ mibeʼe õsa soemange fegero chõ Jehowa, fefoe zi sõchinia mibeʼe õsa, amachoita. Ameʼela niʼamoniʼõ, fõfõnia. 30Õmane chõra: Na mimanõ, wameʼe si sõchinia, ba tefotõi ba nono Lewi, amaedola nõsi golajama mbasitõ ba amaedola nõsi wolazi nagoe. 31Fefoe gofoe heza, ba tola miʼā, jaʼami ba soroijomomi fefoe, me no loeomi ba halõw̃õmi ba nose wamaʼeleʼõ. 32Ba lõ tohare chõmi horõ ba daʼõ, asala mibeʼe zi sõchinia, ba daʼõ, asala mibeʼe zi sõchinia, ba lõʼõ sa mifatõrõ zalacha ba gameʼela Ndraono Gizeraëli andrõ, niʼamoniʼõ, ba lõ mate ami.