Soera Moze IV Faza 19

I. Labeʼe fangehao nawoe zaw̃i sojo. II. Idanõ fangehao ba he lawisa wangogoenaʼõ jaʼia.

1I. Ba hoemede Jehowa chõ ndra Moze Aʼaroni, imane: 2Daʼõ gamachoita, nifachoi Jehowa, me imane: W̃aʼõ ba Ndraono Gizeraëli, ndramoeʼohe chõoe zaw̃i sojo, si lõ si sala, si lõ hadia ia zi lõ gõna ba ba zi lõ moerai moehareʼõ kalo mbagi. 3Ba mibeʼe ba danga Geleazari ere andrõ; ba laʼohe baero, fõna golombasew̃a, ba lataba ba zanehe ia. (Heb. 13, 11). 4Ba ihalõ ndronia maʼifoe Eleazari ere andrõ, toeroenia, ba mewitoe itefe do andrõ õsa gamaoedoe mbawa doeasa nose wamaʼeleʼõ. 5Aefa daʼõ, ba latoenoe zaw̃i andrõ ba zanehe ia; oelinia ba õsinia ba donia, ba nitoenoe, fabaja tainia. (Moz. II. 29, 14). 6Ba ihalõ geoe eresi ere ba soefa ba kirimisi, ba itiboʼõ ba galitõ fanoenoe zaw̃i andrõ. (Moz. III. 14, 6). 7Aefa daʼõ, ba ibabago noechania ere ba mondri. Awena tola ifoeli ia ba golombasew̃a; ba si raʼiõ na gere, irege bongi. 8Ba sanoenoe jaʼia [saw̃i andrõ] gõi, ba ibabago noechania ba mondri ba si raʼiõ ia, irege bongi. 9Ba si lõ si raʼiõ zangozaragõ awoe zaw̃i andrõ, ba itooeʼõ tooe ba naha si sõchi, baero, fõna golombasew̃a, enaʼõ teʼirõʼõ sogoena ba Ndraono Gizeraëli sato, nifaroeka ba nidanõ fangehao; soemange fameta horõ ia. (Heb. 9, 13). 10Ba sangozaragõ awoe zaw̃i andrõ, ba ibabago noechania ba si raʼiõ ia irege bongi. Ba hoekoe si lõ teboelõ ba Ndraono Gizeraëli ba ba niha bõʼõ, si sosó ba chõra daʼõ, si gõtõgõtõ faʼara:

11II. Ha niha zombambaja si mate, hadia ia mboto niha si no mate, ba fitoe bongi raʼiõ ia. 12Daʼõ zameʼe fameta zalania jaʼia [idanõ no mege], na loeo si tõloe ba na loeo si fitoe, ba abeta waʼaraʼiõnia. Ba na lõ iheta zalania, na loeo si tõloe ba na loeo si fitoe, ba dõrõdõrṍ raʼiõ ia. 13Ha niha zombambambaja si mate, boto niha si no mate, ba lõ iheta zalania, ba raʼiõ nose Jehowa ibeʼe, ba niseʼe ba Ndraono Gizeraëli niha si manõ; me lõ moetefe ia idanõ fangehao, ba si raʼiraʼiõ ia; falemba chõnia waʼaraʼiõnia, si lõ mamalõmalõ. 14Ba daʼõ gamachoita, na so zi mate baose: Dozi si mõi baose andrõ ba dozi si tohõna bacha, ba fitoe bongi waʼara raʼiõ. 15Ba fefoe nahia, si lõ lagõlagõ, lagõlagõ nibõbõ sinali, ba raʼiõ. 16Si manõ gõi dozi si fabaja ba niboenoe baero ba mbenoea ba ma ba zi mate ba daʼõ ba ma ba dõla zi mate ba ma ba lewatõ, ba fitoe bongi waʼara raʼiõ. 17Ba ba zi no raʼiõ si manõ ba ndramoehalõ nawoe zoemange fameta horõ andrõ, si no moetoenoe, labeʼe ba nahia ba lalaoe jaw̃a nidanõ goemboe. 18Ba si lõ faʼaraʼiõ zangai soefa, iʼoengoegõ ba nidanõ andrõ ba itefe nose andrõ, awõ gamagama fefoe, awõ niha, si so baose, awõ zi no fabaja ba dõla zi mate ba ma ba niboenoe, ba ma ba zi mate manõ ba ma ba lewatõ. (Sin. 51, 9). 19Na loeo si tõloe ba na loeo si fitoe itefe zi raʼiõ si lõ faʼaraʼiõ, ba aheta zalania ibeʼe, na loeo si fitoe andrõ. Ba ibabago noechania ba mondri, ba aheta waʼaraʼiõnia na bongi. 20Ba na so zi raʼiõ ba lõ iheta zalania, ba niseʼe ba zato zi manõ; noa sa raʼiõ niʼamoniʼõ andrõ chõ Jehowa ibeʼe: lõ moetefe ia idanõ fangehao, andrõ wa si raʼiõ ia. 21Amachoita si lõ teboelõ chõmi daʼõ, nitõrõ, gõtõgõtõ waʼara. Ba sanefe idanõ fangehao andrõ, ba ibabago noechania, ba sombambaja idanõ fangehao, ba raʼiõ, irege bongi. 22Ba fefoe hadia ia, nibabaja zi noraʼiõ andrõ, ba raʼiõ, ba si manõ gõi dozi sombambaja jaʼia, baraʼiõ, irege bongi.