Soera Moze IV Faza 20

I. Faʼamate Mirija. Moekõkõkõkõ zato, me lõ õra idanõ. II. Idanõ moroi ba gara. Fotoe wangiwa dõdõ ndra Moze Aʼaroni. III. Lõ latehe Iraono Gedomo latõrõ danõra. IV. Mate Gaʼaroni; fangalinia Geleazari.

1I. Ba laroegi danõ si mate Sini Iraono Gizeraëli fefoe, ba ba Gadesi tebato ira; ba mate ba daʼõ Mirija ba lakoʼo ia ba daʼõ. 2Ba lõ õ zato idanõ. Ba aechoe ira chõ ndra Moze Aʼaroni, (Moz. II. 17, 3), 3fasoso zato chõ Moze, lamane: Enaʼõ na tekiko mege ndraʼaga gõi, me tekiko dalifoesõma fõna Jehowa! 4Hana wa õʼohe ba danõ si mate mbanoea Jehowa, enaʼõ mate ba daʼe ndraʼaga, awõ goerifõma! 5Hana wa no õheta ndraʼaga ba danõ Miseraji, ba wolohe jaʼaga ba danõ andre, si lõ sõchi, ba zi tebai monowi ita, ba zi lõ boea ara ba he agoe ba he dalimo ba ba zi lõ õma idanõ! 6Ba larõi zato ira Moze Aʼaroni, mõi ira ba zinga mbawandroehõ nose wamaʼeleʼõ ba lafalõgoe tooe ira ba danõ; ba toʼele chõra lachõmi Jehowa.

7II. Ba hoemede Jehowa chõ moze, imane: Halõ ziʼo, owoeloi niha sato, daroea ami, gaʼaoe Aʼaroni ba mihede ba gara andrõ, ba zanehe ira, ba aloea chõnia nidanõ. 8Faloea ba gara andrõ gõra idanõ, asogõ nibadoe niha sato, awõ goerifõra! 9Ba ihalõ ziʼo Mose, ba niʼamoniʼõ, iʼoʼõ niw̃aʼõ Jehowa chõnia. 10Ba laʼowoeloi zato ira Moze Aʼaroni, fõna gara andrõ, ba imane chõra: Mifondrondrongo, jaʼami sabeʼe tandro! Hadia maʼila maõ mafaloea ba gara andre gõmi idanõ? 11Ba ifazaw̃a dangania Moze, ibõzi gara andrõ siʼonia, mendroea. Ba abõlõ nidanõ saloea chõnia, tobali labadoe niha sato ba oerifõra. 12Ba imane Jehowa chõ ndra Moze Aʼaroni: Me no aombõ dõdõmi chõgoe, me no lõ nifosoemangemi jaʼodo, jaʼodó, niʼamoniʼõ andre, ba zanehe Ndraono Gizeraëli, ba bõi jaʼami zolohe niha andre ba danõ andrõ nibeʼegoe chõra. (F. 27, 14. Moz. V. 1, 37; 32, 51). 13Daʼõ nidanõ wasosota andrõ: si fasoso Ndraono Gizeraëli chõ Jehowa, niʼoromaʼõnia chõra lachõminia. (Sin. 81, 8; 106, 32).

14III. Ba iʼotarai Gadesi ifatenge zinenge Moze chõ razo Ndraono Gedomo, imane: Daʼõ niw̃aʼõ nachioe Izeraëli: No õrongo wamakao andrõ fefoe, si no gõna ndraʼaga, 15wa no mõi ba danõ Miseraji ndra toeama, awõ wa no ara ndraʼaga ba danõ Miseraji, awõ wa no lafakao sibai ndraʼaga Dawa Miseraji, ba he ira toeama mege saʼae. 16Ba no maʼangarõfi li Jehowa ba no ifondrondrongo wakaosama andrõ, ba no ifatenge malaʼika; daʼõ zangeheta jaʼaga ba danõ Miseraji. Ba ba daʼe, ba Gadesi andre soga maʼõchṍ, ba mbanoea ba nola danõoe. 17Damatõrõ danooe! Lõ matõrõ nowi ba lõ matõrõ kaboe nagoe, ba lõ mabadoe nidanõ ba mbaʼa; lala seboea maʼosisi, lõ maholeʼõ ndraʼaga, he ba gambõlõ, ba he ba gabera, irege no aefaga ba danõoe. 18Ba imane razo Ndraono Gedomo: Lõ tola õtõrõ danõgoe, fa bõi fasoewõ ndraʼo chõoe. 19Ba lamane chõnia Iraono Gizeraëli: Lala seboea maʼosisi, ba na mabadoe gõoe idanõ, jaʼaga ba oerifõma, ba mabeʼe mbõli; ha fa matõrõ manõ! 20Ba imane: Lõ tola õtõrõ! Ba lafaondragõ ira Iraono Gedomo; ato zabõlõ, solohe baloese. 21Tobali lõ latehe Iraono Gedomo latõrõ danõra Iraono Gizeraëli; ba labõhõli ira Iraono Gizeraëli, laholeʼõ ira.

22IV. Ba lafazaw̃a ira ba Gadesi andrõ ba lasaw̃a hili Hori Iraono Gizeraëli fefoe. 23Ba imane Jehowa chõ ndra Moze Aʼaroni, ba daʼõ, ba gahe hili Hori ba nola danõ Ndraono Gedomo: 24Aʼaroni, ba niʼoroedoegõ saʼae chõ ndra amami; lõʼõ sa tola ihoendragõ danõ andrõ, nibeʼegoe ba Ndraono Gizeraëli, me no lõ nifondrondrongomi niw̃aʼõgoe, ba nidanõ wasosota no. 25Halõ Gaʼaroni ba ononia Eleazari, ba ohe mijaw̃a ira ba hili Hori, (F. 33, 38. Moz. V. 32, 50), 26heta noecha Gaʼaroni ba beʼe noecha nononia Eleazari; ba Aʼaroni, ba niʼoroedoegõ [chõ ndra amami]; mate dania ia ba daʼõ. 27Ba iʼoʼõ Moze niw̃aʼõ Jehowa chõnia, mõi ira mijaw̃a ba hili Hori ba zanehe zato fefoe. 28Ba iheta noecha Gaʼaroni Moze, ibeʼe noecha nononia Eleazari. Ba mate ba daʼõ Gaʼaroni, ba zoezoe hili andrõ; ba lafoeli ira mitooe, moroi ba hili, ira Moze Eleazari. 29Ba me laʼila sato fefoe, no mate Gaʼaroni, ba laʼeʼesi ia Iraono Gizeraëli fefoe, tõloe ngafoeloe wongi waʼara.