Soera Josoea Faza 2

I. Tefatenge zamaoeze andrõ ba mõrõ ira chõ Rachaba andrõ. II. Iʼorifi zamaoeze andrõ Rachaba ba lafaboeʼoe chõnia lõ laboenoe dania ia ba he si so jomo chõnia, na lahalõ chõra danõ. III. Mangawoeli chõ Josoea zamaoeze andrõ.

1I. Ba daroea ifatenga Josoea, ono Noeni andrõ, niha, si mõi mamaoeze, moroi ba Ziti, lõ ifarongogõ, ba imane: Miʼae mifaigi danõ andrõ ba banoea Jericho! Ba mõi ira ba laroegi jomo chõ zohorõ, ira alawe, Rachaba dõi, ba mõrõ ira ba daʼõ. (Mat. 1, 7. Hebr. 11, 31. Jak. 2, 25). 2Ba teʼombachaʼõ chõ razo Jericho, lamane: Hiza, no so niha, bongi, Iraono Gizeraëli, ba wamaoeze tanõ. 3Ba ifatenge chõ Rachaba razo Jericho, imane chõnia: Ohe tooe niha andrõ, si no mõi chõoe, baomooe, me no ba wamaoeze tanõ fefoe mõi ira. 4Ba ihalõ niha andrõ si daroea ira alawe andrõ, ibiniʼõ, ba imane: Doehoe, no mõi chõgoe niha, ba lõ oeʼila, he moroi ira. 5Ba me inõtõ lakoesi mbawa gõli, me bongi, ba mõi baero niha andrõ; lõ oeʼila, heza lasaw̃a. Mitaʼitaʼi migohi ira, enaʼõ michamõ! 6Ba no iʼohe jaw̃a ira ba dete nomo ba no ibiniʼõ barõ dõla daliõ, nifaʼanõnia ba dete nomo jaw̃a. 7Ba lagohi ira banoeara andrõ, ba lala ba Joridano, ba gõtõna andrõ; ba lakoesi mbawa gõli, me no latõrõ solohi andrõ.

8II. Ba lõ si mõrõ ira na, ba mõi jaw̃a ndra alawe andrõ ba dete nomo chõra. 9Ba imane ba niha andrõ: Oeʼila, wa no ibeʼe chõmi danõ andre Jehowa, awõ wa no ihawoei ndraʼaga faʼataʼoema ami, awõ wa no atalõ dõdõ niha ba danõ fefoe, ba chõmi andrõ. 10Noa sa marongo, he wisa Jehowa wangogoʼõisi asi zoechoe andrõ fõnami, me aheta ami ba danõ Miseraji, ba hadia nilaoemi ba razo Ndraono Gamori andrõ, si daroea, jefo Joridano, Sihona ba Ogi, nifakikomi. (Moz. II. 14, 21. Moz. IV. 21, 24). 11Me marongo daʼõ, ba atalõ dõdõma, ba samõsa lõʼõ saʼae sabeʼe tõdõ, ba chõmi andrõ, me no Lowalangi ba mbanoea si jaw̃a ba ba goeli danõ si tooe Lowalangimi andrõ, Jehowa. (Moz. V. 4, 39). 12Ba miʼae ba hõloe saʼae chõgoe, ba chõ Jehowa, wa mihachõsi tõdõ zoroijomo namagoe fefoe, si mane faʼahachõ dõdõgoe ami, ba mibeʼe chõgoe dandra, wa tenga si falimo ami. 13Miʼorifi namagoe ba inagoe ba talifoesõgoe matoea ba talifoesõgoe alawe, awõ dozi zi fabõbõ chõra, bõi mibeʼe mate ndraʼaga. 14Ba lamane chõnia niha andrõ: Alacha aetoe nosoma salahimi! Na lõ miʼombachaʼõ weʼamõima andre, ba lõ zi lõ mahachõsi tõdõ ndraʼoegõ, na ibeʼe chõma danõ andre Jehowa, lõ malimoʼõ. 15Awena idada ira ba zandrela sinali, me no fasinga ba gõli mbanoea nomonia; ba dete gõli so nahiania. 16Ba imane chõra: Misaw̃a hili, fa bõi lachamõ ami solohi andrõ, ba mibiniʼõ ami, ba daʼõ tõloe bongi, irege mangawoeli zolohi andrõ, ba awena dania mofanõ ami. 17Ba lamane chõnia niha andrõ: Ba aefa ndraʼaga ba hõloe andrõ, niʼandrõoe chõma [na lõ õʼoʼõ niw̃aʼõma chõoe]. 18Hiza, na maroegi danõ, ba õtaw̃i zinali sojo andre ba zandrela, ba nidadamõ jaʼaga, ba õʼowoeloi jomo chõoe ndra amaoe inaoe ba ira talifoesõoe, awõ zoroijomo namaoe fefoe. 19Ba ha niha zanõrõ ora, weʼamõi tooe baolajama, ba balibalinia nosonia ba lõ horõma, ba dozi soroedoe jomo chõoe, ba jaʼaga zoloeʼi noso, na so zombambaja jaʼira. 20Ba na õʼombachaʼõ weʼamõima andre, ba aefa gõi ndraʼaga ba hõloe andrõ, niʼandrõoe chõma. 21Ba imane: Jaʼitõrõ niw̃aʼõmi! Ba iʼefaʼõ ira, ba mofanõ ira. Ba itaw̃i ba zandrela zinali sojo andrõ.

22III. Ba mofanõ ira, laroegi hili ba laʼiagõ ba daʼõ, tõloe bongi, irege no mangawoeli zolohi andrõ; ba laʼaloei ira solohi, maʼasara lala andrõ, ba lõ lasõndra. 23Ba mangawoeli niha andrõ, si daroea, latoeeli hili, mõi ira mijefo chõ Josoea, ono Noeni, ba ladoenõdoenõ chõnia fefoe zi no faloecha ira. 24Ba lamane chõ Josoea: No ibeʼe ba dangada danõ andrõ maʼafefoe Jehowa ba noa gõi atalõ dõdõ niha ba danõ fefoe ba chõda andre.