Soera Josoea Faza 3

I. Iw̃aʼõ li Josoea ba wangõtõ Joridano. II. Laʼõtõ Joridano.

1I. Ba ihoelõ wongi wemaoso Josoea, ba laheta ira ba Ziti ba laroegi mbewe Joridano, jaʼia ba Iraono Gizeraëli fefoe, ba molombase ira ba daʼõ, atṍ laʼõtõ. 2Ba aefa tõloe bongi, ba latõrõ golombasew̃a satoea, 3law̃aʼõ li ba zato, lamane: Na miʼila daw̃ola gamaboeʼoela li andrõ chõ Lowalangimi, Jehowa, ba ere andrõ, ono Lewi, samabea jaʼia, ba milaboe, mirõi nahami ba miʼoʼõ. 4Ba bõi mihatõʼõ ami, mifoʼotaloea, mato doea ngahõnõ hela, nisoeʼa. Bõi fadege ami chõnia, enaʼõ miʼila lala nitõrõmi; tenga sa taw̃aʼõ, no mitõrõ lala daʼõ menewi ba me doea wongi. 5Ba imane Josoea ba zato: Miʼamoni, ilaoe saʼae zahõlihõli dõdõ Jehowa, ba hoenõmi, mahemoloe. (Moz. II. 19, 10). 6Ba iw̃aʼõ Josoea ba gere andrõ, wangoemaʼõ: Mifabea dawõla gamaboeʼoela li ba miʼowaõwaõ fõna zato! Ba laʼohe daw̃ola gamaboeʼoela li, mowaõwaõ ira fõna zato. 7Ba imane Jehowa chõ Josoea: Maʼõchṍ andre oebõrõgõ wangeboea jaʼoegõ, nifaigi Ndraono Gizeraëli, enaʼõ laʼila, wa oetolo ndraʼoegõ; si mane fanologoe Moze mege. 8Ba beʼe li saʼae ba gere andrõ, samabea taw̃ola gamaboeʼoela li, õmane: Na miroegi zinga nidanõ Joridano, ba mibadoegõ ami ba mbewe Joridano. 9Ba imane Josoea ba Ndraono Gizeraëli; Miʼaine, ba mifondrondrongo li Lowalangimi Jehowa. 10Ba imane Josoea: Ba daʼõ aboto ba dõdõmi so ba hoenõmi Lowalangi saoeri, ba ifofanõ fõnami Ndrawa Ganaʼana, Iraono Cheti ba Iraono Hewi ba Iraono Weresi ba Iraono Girigasi ba Iraono Gamori ba Iraono Jeboesi. 11Hiza, mowaõwaõ fõnami dawõla gamaboeʼoela li andrõ chõ Zoʼaja tanõ maʼafefoe, ba wangõtõ Joridano andrõ. 12Ba mitoetoejoe chõmi niha, felendroea, ba mado Gizeraëli, samõsa zamboea mado. 13Ba tobali dania, na tebato ba nidanõ Joridano gahe gere andrõ, samabea tawõla gamaboeʼoela li andrõ chõ Jehowa, Soʼaja tanõ maʼafefoe, ba aetoe nidanõ Joridano, idanõ andrõ, si otarai noeloe, tebato ia, hoelõ mbaʼabaʼa. (Sin. 114, 3).

14II. Ba tobali me larõi nosera sato, ba wangõtõ Joridano, awõ gere andrõ, samabea tawõla gamaboeʼoela li, sawaõwaõ fõna zato, (Hal. zin. 7, 45), 15ba me laroegi Joridano samabea tawõla, me lahoendragõ zinga nidanõ ere andrõ samabeʼa taw̃ola (ba no falawoe fefoe ngõfi Joridano, gõtõ mbaw̃a wamasi), 16ba tebato nidanõ, si otarai noeloe; ahono, hoelõ mbaʼabaʼa, arõoe sibai, ba ngai Gadamo, banoea andrõ ba zi tambai Zarata, ba soloeaha mijõoe ba ziloeaʼasi ba zaloʼo tanõ, siloeaʼasi sasiʼasi andrõ, ba aetoe manõ. Ba laʼõtõ sato, ba gamaoedoe Jericho. (Sin. 66, 6). 17Ba laʼiagõ manõ daloe Joridano ere andrõ samabea tawõla gamaboeʼoela li andrõ, chõ Jehowa, no otoefo naha gahera; ba laʼõtõ Iraono Gizeraëli fefoe, no otoefo, irege no aloea laʼõtõ Joridano, dozi ira.