Soera Josoea Faza 4

I. Tohoetohoe wangõtõ Joridano. II. Latanõ gowe, tandra.

1I. Ba me no aloea laʼõtõ Joridano sato, ba imane Jehowa chõ Josoea: 2Mitoetoejoe niha ba zato, felendroea, samõsa zamboea mado, 3ba miw̃aʼõ li chõra, mimane: Mihalõ chõmi gara, felendroea, ba daʼe, ba daloe Joridano, ba naha andrõ, ba zi so gere andrõ mege, ba miʼohe mijefo ba mitooeʼõ tooe ba golombasew̃a, ba zi mõrõ ami bongi. 4Ba hoemede Josoea ba niha andrõ si felendroea, nihonogõinia ba Ndraono Gizeraëli, samõsa zamboea mado, 5ba imane chõra Josoea: Miʼae mijefo, miʼowaõwaõ fõna dawõla gamaboeʼoela li chõ Lowalangimi, Jehowa, ba daloe Joridano, ba mihareʼõ ba galisimi gara, samboea zamõsa, enaʼõ iʼohiaʼõ waʼoja mado Ndraono Gizeraëli, enaʼõ tobali tandra ba chõmi. 6Na lasofoe dania iraonomi, na lamane: Hadia goena gara andre? 7Ba mimane chõra: Me no aetoe nidanõ Joridano fõna dawõla gamaboeʼoela li chõ Jehowa; me lafatõrõ ba Joridano, ba aetoe nidanõ Joridano; ba tandra gara andre, fa bõi olifoe Ndraono Gizeraëli, iroegi zi lõ aetoe. 8Ba laʼoʼõ daʼõ Iraono Gizeraëli, si mane niw̃aʼõ Josoea, lahalõ gara, felendroea, ba daloe Joridano, si mane niw̃aʼõ Jehowa chõ Josoea, iʼohiaʼõ waʼoja mado Ndraono Gizeraëli; ba laʼohe mijefo ba golombasew̃a ba latooeʼõ tooe ba daʼõ. 9Ba felendroea ifatanõʼõ kara Josoea ba daloe Joridano ba naha andrõ, ba zi so gere andrõ mege, samabea taw̃ola gamaboeʼoela li, ba lõ teboelõ ba daʼõ, irege maʼõchṍ andre. 10Ba laʼiagõ dõdõ Joridano ere andrõ, samabea tawõla gamaboeʼoela li, irege no awai fefoe niʼoroiʼõ Jehowa, niw̃aʼõ ba zato, dali goroisa Moze andrõ chõ Josoea. Ba laʼaliogõ ira sato, weʼamõi mijefo. 11Ba me no dozi laʼõtõ sato, ba lafaʼõtõ gõi dawõla gamaboeʼoela li chõ Jehowa ere andrõ, laʼiagõ fõna zato. 12Ba mõi mijefo mado Roebeno ba mado Gado ba si matonga mado Manase andrõ, nifaʼoli fõna Ndraono Gizeraëli, si mane niw̃aʼõ Moze chõra. 13Mato õfa woeloe ngahõnõ zabõlõ, sowaõwaõ fõna Jehowa, ba wanoewõ ba ndraso ba Jericho andrõ. 14Me loeo daʼõ iʼeboeaʼõ Josoea Jehowa, fõna Ndraono Gizeraëli fefoe, ba laʼataʼoefi ia, si mane fangataʼoefira Moze mege, gõtõ waʼanaoe nosonia. 15Ba hoemede Jehowa chõ Josoea, imane: 16W̃aʼõ ba gere andrõ, samabea tawõla gamaboeʼoela li, ndramõi mijaw̃a moroi ba Joridano. 17Ba ibeʼe li Josoea ba gere andrõ, imane: Miʼae mijaw̃a moroi ba Joridano! 18Ba tobali, me mõi mijaw̃a gere andrõ, samabea tawõla gamaboeʼoela li chõ Jehowa, moroi ba daloe Joridano, me lahoendragõ zabeʼe tanõ ahe gere andrõ, ba mangawoeli ba nahania nidanõ Joridano, moloeaha, si mane menewi ba si mane me doea wongi, ilawoei ngõfi fefoe.

19II. Ba mõi mijaw̃a, ira moroi ba Joridano ba zi mewoeloe ba mbaw̃a si fõfõna, ba molombase ba Giligala, ba nola, tánõ ba gatoemboecha loeo iʼotarai Jericho. 20Ba kara andrõ si felendroea, niʼohera moroi ba Joridano, ba ifatanõʼõ Josoea, ba Giligala. 21Ba imane ba Ndraono Gizeraëli: Na lasofoe dania chõ namara iraonomi, na lamane: Hadia goena gara andre? (Moz. V. 6, 20). 22Ba miʼombachaʼõ ba ndraonomi, mimane: Tanõ sabeʼe lala Ndraono Gizeraëli, me latõrõ Joridano andrõ, 23me no iʼogoʼõisi nidanõ Joridano Lowalangimi, Jehowa, fõnami, irege no miʼõtõ, si mane folaoe Lowalangimi, Jehowa, ba nasi zoechoe andrõ, niʼogoʼõisinia fõnama, irege no maʼõtõ, (Moz. II. 14, 21), 24enaʼõ aboto ba dõdõ niha ba goeli dánõ fefoe danga Jehowa andrõ, he wisa waʼabõlõnia, enaʼõ laʼataʼoefi Lowalangira Jehowa, si lõ mamalõmalõ.