Soera Josoea Faza 6

I. Lasoewõ Jericho. II. Atoeʼa ira ba (Jericho ba) ladoedoegõ.

1I. Ba no ladoehõ mbawa gõli Jericho, no moekoesi fõna Ndraono Gizeraëli, lõ si mõi baero ba lõ si mõi mijomo. 2Ba imane Jehowa chõ Josoea: Hiza, no oebeʼe ba dangaoe Jericho andrõ, fabaja razora, niha sabõlõ andrõ. 3Ba mihene gõli mbanoea, dozi sabõlõ, mifasoei zamoeza; õnõ ngaloeo õlaoe zi manõ. 4Ba dafitoe gere solohe torofe seboea li, fitoe, fõna dawõla gamaboeʼoela li. Ba na loeo si fitoe, ba mewitoe mifasoei mbanoea ba ndramoelaoe dorofe ere andrõ. 5Ba na lalaoe dorofe, na mirongo linia, ba ndramoeʼabõlõgõ weʼao sato fefoe, ba adoedoe gõli mbanoea ba ndramoesawõ sato, jamoedõlõ ia zamõsana. 6Ba hoemede ba gere andrõ Josoea, ono Noeni, imane chõra: Mifabea dawõla gamaboeʼoela li! ba dafitoe gere solohe torofe seboea li fitoe, fõna dawõla gamaboeʼoela li chõ Jehowa. 7Ba lamane ba zato: Milaboe, mifasoei mbanoea ba laʼiagõ fõna dawõla gamaboeʼoela li chõ Jehowa si no mangaró. 8Ba me no ibeʼe li ba zato Josoea, ba mangefa gere andrõ, si dafitoe, solohe torofe andrõ, seboea li, si fitoe, fõna Jehowa, ba lalaoe dorofe, ba lafagoʼõ chõra dawõla gamaboeʼoela li chõ Jehowa. 9Ba mowaõwaõ fõna gere andrõ, samoli torofe, zi no mangaró andrõ, ba sato, ba laʼoʼõ dawõla gamaboeʼoela li ba lõ laʼetoeʼõ wolaoe torofe. 10Ba no ibeʼe li Josoea ba zato, no imane: Bõi miʼao, bõi mifarongogõ limi, samboea li bõi aefa ba mbewemi, iroegi loeo oew̃aʼõ chõmi: Miʼao! awena dania moeʼao ami. 11Ba lafatõrõ dawõla gamaboeʼoela li, lafasoei mbanoea zamoeza, ba laroegi golombasew̃a ba mõrõ ira ba daʼõ. 12Ba ihoelõ wongi wemaoso Josoea ba lafabea dawõla gamaboeʼoela li chõ Jehowa ere andrõ. 13Ba ere andrõ si dafitoe, solohe torofe andrõ seboea li, si fitoe, fõna dawõla gamaboeʼoela li chõ Jehowa, ba fadoro lalaoe dorofe, ba mowaõwaõ fõnara si no mangaró andrõ ba sato fefoe, ba laʼoʼõ dawõla gamaboeʼoela li chõ Jehowa ba lõ aetoe wolaoe torofe. 14Ba mahemoloe õ, ba lafoeli lafasoei mbanoea, zamoeza, ba mangawoeli ira ba golombasew̃a. Ba õnõ ngaloeo lalaoe zi manõ.

15II. Ba me loeo si fitoe, ba lahoelõ wongi wemaoso, me afoesi wali, ba lafasoei mbanoea, si manõ zoei, mewitoe; ha me loeo daʼõ wa mewitoe lafasoei mbanoea. 16Ba ba zi mewitoe, me no lalaoe dorofe ere andrõ, ba imane Josoea ba zato: Milaoe moeʼao, noa sa ibeʼe ba dangami mbanoea andre Jehowa! 17Ba salacha mbanoea andre, jaʼia ba si so bacha fefoe, chõ Jehowa; ha Rachaba andrõ, sohorõ andrõ, niʼorifi, jaʼia ba soroedoe jomo chõnia fefoe; me no ibiniʼõ zinenge andrõ, nifatengeda. 18Ba bõi mibabaja zalacha andrõ, ma dania lõ miʼamoniʼõ, ma mihalõ zalacha andrõ õsa, ba mibaliʼõ salacha golombasew̃a Ndraono Gizeraëli ba mifobõrõ waʼatekiko. 19Ba fefoe wirõ ba anaʼa ba fefoe wakake tõla ba fakake siʼõli, ba niʼamoniʼõ chõ Jehowa; ba girõgirõ andrõ chõ Jehowa labeʼe. 20Ba moeʼao zato ba lalaoe dorofe. Ba tobali me larongo li dorofe sato, ba laʼeboeaʼõ lira weʼao, ba adoedoe gõli, ba lasawõ gõli sato, idõlõ manõ ia zamõsana, ba atoeʼa ira ba mbanoea. (Heb. 11, 30). 21Ba lalachaʼõ fefoe zi so ba mbanoea bacha, iʼotarai ndra matoea, noemalõ ba ndra alawe, ba iʼotarai nono matoea, noemalõ ba zi no tohare hoewa ba ba zaw̃i ba ba mbiribiri ba ba galide, laʼõʼõtõ fõda. (Moz. V. 20, 13). 22Ba imane Josoea ba niha andrõ, si daroea, si mõi no, ba wamaoeze tanõ: Miʼae ba nomo ndra alawe andrõ, sohorõ andrõ, ba miʼohe tooe ndra alawe andrõ, awõ fefoe dána chõnia, si mane fahõloesami chõnia. 23Ba mõi nono matoea andrõ, samaoeze andrõ, laʼohe tooe Rachaba andrõ ba amania ba inania ba ira talifoesõnia, awõ fefoe zi so chõnia, si samba omo jaʼira, laʼohe baero ba lafaʼaso baero, fõna golombasew̃a Ndraono Gizeraëli. 24Ba banoea andrõ, ba latoenoe alitõ, fabaja õsinia fefoe; ha firõ ba anaʼa ba fakake tõla ba fakake siʼõli nibeʼe ba naha girõgirõ ba nomo Jehowa. 25Ba Rachaba andrõ, sohorõ andrõ, ba soroijomo namania fefoe, awõ fefoe dána chõnia, ba iʼorifi Josoea. Ba ba Ndraono Gizeraëli so ia, iroegi maʼõchṍ andre, me no ibiniʼõ zinenge andrõ, nifatenge Josoea, ba wamaoeze Jericho andrõ. 26Ba iʼohe ira ba hõloe Josoea, me loeo daʼõ imane: Niʼelifi chõ Jehowa niha si maoso ba wanaroeʼõ banoea andre, Jericho andre! Ja mate nononia si aʼa, na ibeʼe tooe dojo ba ononia si achi, na ibeʼe doehõdoehõ mbawa gõli! (Raz. I. 16, 34). 27Ba itolo Josoea Jehowa ba hoemõngõ doeriania ba danõ maʼasagõrõ.