Soera Moze V Faza 34

I. Faʼamate Moze ba fogoʼo jaʼia. II. Fangalinia Josoea. Faʼeboea Moze.

1I. Ba mõi mijaw̃a ba hili Nebo Moze, iʼoroi ndraso Ndraono Moabi andrõ, isaw̃a zoezoe hili Wisiga, ba gamaoedoe Jericho; ba daʼõ iʼoromaʼõ chõnia danõ maʼasagõrõ Jehowa, tanõ Gileadi ba iroegi Dano, (F. 3, 27), 2ba tanõ mado Nafetali maʼasagõrõ ba tanõ mado Geferaji ba tanõ mado Manase ba tanõ mado Joeda maʼafefoe, irege nasi tánõ ba gechoela loeo, 3ba tanõ tánõ raja ba daso Joridano, daso mbanoea chorema andrõ, Jericho, iroegi Zoara. 4Ba imane chõnia Jehowa: Daʼõ danõ andrõ nifaboeʼoegoe chõ ndra Aberahamo, Izaʼaki, Jakobo, si no mõi ba hõloe ndraʼo chõra, wangoemaʼõ: Ba maʼoewoemõ dania oebeʼe ia. No iʼila hõrõoe oebeʼe, ba lõʼõ sa õroegi! (Moz. I. 12, 7). 5Ba mate Moze, enoni Jehowa andrõ, ba daʼõ, ba danõ Ndraono Moabi andrõ, itõrõ niw̃aʼõ Jehowa, 6ba ikoʼo ia ba ndraso ba danõ Ndraono Moabi, ba gamaoedoe Mbeti-Weoro; ba lõ sangila heza so lewatõnia, iroegi maʼõchṍ andre. 7Ba 120 fache Moze, me mate ia, lõ sabõzi hõrõnia ba lõ salõ waʼabeʼenia. 8Ba laʼeʼesi Moze Iraono Gizeraëli ba ndraso Ndraono Moabi andrõ, tõloe ngafoeloe wongi waʼara, awena ahõwõ mbongi wangeʼesi Moze andrõ.

9II. Ba fahõna Geheha faʼatoeatoea chõ Josoea andrõ, ono Noeni, me no itoefa ia tangania Moze, ba lafondrondrongo linia Iraono Gizeraëli, laʼoʼõ goroisa andrõ, nibeʼe Jehowa chõ Moze. (Moz. IV. 27, 18). 10Ba lõʼõ saʼae maoso ba Ndraono Gizeraëli zamaʼeleʼõ si mane Moze, ba zi fahoehoeo Jehowa, si faʼila bawa ira; (Moz. II. 33, 11); 11dali dandra andrõ fefoe ba ilaʼila, nilaoenia, nifatenge Jehowa jaʼia, ba danõ Miseraji, chõ Waraʼo ba ba mbanoeania fefoe ba ba danõnia maʼasagõrõ, 12ba dali waʼabõlõnia andrõ fefoe, si tenga inõtõ, ba faʼabeʼenia andrõ, sataʼoe ita, niʼoromaʼõ Moze, ba zanehe Ndraono Gizeraëli fefoe.

Soera Moze V Faza 33

Famahowoeʼõ Moze mado Ndraono Gizeraëli, si felendroea, fangonania.

1 Daʼe wamahowoeʼõ Moze, enoni Lowalangi andrõ, famahowoeʼõnia Iraono Gizeraëli, me no ahatõ waʼamatenia. 2Imane: Ba Zinaʼi iʼotarai mege Jehowa, moroi ba Zeʼira hoemaga ia chõra; moroi ba hili Warana ifohaga hagania andrõ; iʼotarai zi liwoe [malaʼika], oroisa soʼalitõ chõra ba dangania kambõlõ. (Hal. zin. 7, 53. Joed. a. 14). 3Irorogõ mbanoeania, iʼomasiʼõ. Ba dangania so niʼamoniʼõ andrõ chõnia, fefoe; fõna gaheoe moedadao ira ba latema daroma limõ. 4No iw̃aʼõ chõda goroisa Moze, ondrõita dania ba mbanoea maʼoewoe Jakobo. 5Ba no razo Jesoeroe ia (Jehowa) me faloecha zatoea mbanoea, me aʼoi so mado Ndraono Gizeraëli. 6Jaʼaoeri mado Roebeno, bõi mate, fa bõi alõ waʼato niha chõra! (Moz. I. 49, 3 b. t.). 7Ba daʼe ba mado Joeda, imane: Fondrondrongo wangarõngarõ mado Joeda, jaʼoegõ Jehowa, ba ohe mangawoeli ira, ba niwara! Laoe fasõndra tangaoe, fõnara, ba tolo ira ba zamakao jaʼira andrõ! 8Ba ba mado Lewi, ba imane: ”Toemimi” ba ”oerimi” andrõ chõoe, ba no ba niha sadõni tõdõ chõoe, nitandraigõmõ andrõ ba Masa no, si fasoso ndraʼoegõ no, ba nidanõ ba Meriba andrõ; (Moz. II. 28, 30. Moz. IV. 20, 13), 9ba zangoemaʼõ chõ ndra amania inania: Lõ niʼilagoe jaʼira, si lõ manehe talifoesõnia ba si lõ ba dõdõ ononia. Lõʼõ sa labõhõli niw̃aʼõoe, ba lõ aefa chõra goroisamõ. (Moz. II. 32, 29). 10Lafahaõ maʼoewoe Jakobo ba hoekoemõ andrõ ba Iraono Gizeraëli ba nifachoimõ; lafaʼagoʼõ chõoe hoea zoemange, ba labeʼe ba naha wameʼe soemange chõoe zoemange saʼoi so. 11Fahowoeʼõ gõlõra, jaʼoegõ Jehowa, ba sõchi na omasi ndraʼoegõ halõw̃õ dangara andrõ! Rasa lõwilõwi noedoera, awõ lõwilõwi si fatioe tõdõ chõra, fa bõi saʼae maoso ira. 12Ba ba mado Mbenijami, ba imane: Omasiõ Jehowa ira, chõnia sosó ira, lõ hadia ia. Itimba zi lõ sõchi chõra, lõ mamalõmalõ, ba gotaloea mboto hili chõra ibeʼe nahiania. (Sam. II. 12, 25. Jer. 11, 15). 13Ba ba mado Josefo, ba imane: Nifahowoeʼõ Jehowa danõra, nifahowoeʼõ boeala mbanoea si jaw̃a, fondrege zeboea bõli, namo andrõ, ba boto nidanõ, tooe ba danõ; 14fondrege zeboea bõli, niʼasogõloeo, ba fondrege zeboea bõli, si toemboe ba haga mbaw̃a. 15Fondrege zi sõchi ba hili andrõ, si no ararā, ba fondrege zeboea bõli ba hilihili, si no gõtõgõtõ faʼara. 16Fondrege zeboea bõli ba danõ, awõ zi no fahõna chõnia! Ba faʼeboea dõdõ zi so ba ngafoe zaʼasaʼa mao no, ba jatohare ba hõgõ mado Josefo, ba galizoezoe zi no moefanaemboe ba niwara andrõ! 17No tefasoei lachõmi zi aʼa nono zaw̃i chõnia, si matoea, tandroe gõrõbao ndroeʼoe dandroenia, ibeʼe fanandroe tooe soi niha fefoe, iroegi ba wondrege danõ. Daʼõ zi liwoe mado Geferaji, ba daʼõ ngahõnõ mado Manase! 18Ba ba mado Zeboeloni, ba imane: Omoesoiʼõ tõdõoe dõrõw̃amõ andrõ, jaʼoegõ mado Zeboeloni, ba jaʼoegõ, mado Isasari, ba õʼomoesoiʼõ tõdõoe nosemõ andrõ! 19Lakaoni ba hili soi niha, ba labeʼe zoemange si ndroehoe ba daʼõ, lasisiõ saʼae zi no fahõna andrõ ba nasi, fabaja girõgirõ andrõ, si no tobaloe ene. 20Ba ba mado Gado, ba imane: Jaʼahowoe zamonaha mado Gado andrõ! No mõrõ ira tooe, si mane si alawe zingo, sanasawi taʼio ba alizoezoe ira. 21No itoejoe chõnia zi aʼa [tanõ], me no tohõna ba daʼõ dána ba zalaw̃a [mado]. Ba iʼoroedoegõ ia ba zalaw̃ara, wamatõrõ hoekoe satoelõ andrõ, chõ Jehowa, ifatõrõ ba lala Jehowa Ndraono Gizeraëli. (Moz. IV. 32, 33. F. 34, 6). 22Ba ba mado Dano, ba imane: Ono zingo mado Dano, moroi ba Mbazana ifanoka ia. (Sangoeh. 13, 25). 23Ba ba mado Nafetali, ba imane: Mado Nafetali, ba niʼaboesoiʼõ faʼeboea dõdõ, ba no fahõna chõra howoehowoe Jehowa, asi ba tanõ tánõ raja laʼochõgõ! 24Ba ba mado Gaseri, ba imane: Ja ono fondrege nifahowoeʼõ mado Gaseri; ja niʼomasiʼõ dalifoesõra ira, ba ndramoeoengoegõ ba wanicha gahera! 25Ja siʼõli ba tola gõdomi, ba bõi alõ waʼabõlõmi, gõtõ waʼanooe nosomi! 26Lõ Lowalangi si mane Lowalangi Jesoeroe andrõ, sanõrõ banoea si jaw̃a ba wanolo jaʼoegõ, itõrõ lawoeo, ba lachõminia andrõ. (F. 32, 15). 27Saw̃atõ Lowalangi andrõ, si lõ aetoe; ba ba daʼe tooe, ba taʼionia si lõ teboelõ. No itimba nemali fõnaoe, ba no imane: 28Hori! Ba no ahono Ndraono Gizeraëli, lõ hadia ia, no tonia goemboe maʼoewoe Jakobo, ba danõ si no fahõna fache ba õsi nagoe, ba moroi ba mbanoea jaw̃a chõnia, ba mowõi namo. (Jer. 23, 6). 29Jaʼahowoe ami, jaʼami Iraono Gizeraëli! Ha niha zi fagõlõgõlõ chõmi? — Soi si mõna, ibeʼe Jehowa! Jaʼia mbaloese andrõ, fangorifioe, ba no siʼõlioe gõi ia, lachõmioe! Sangaloeloe chõoe dania nemalioe, ba õtõrõ hili andrõ chõra.

Soera Moze V Faza 32

I. Sinoenõ Moze. II. Famarooe tõdõ zato. III. Teʼombachaʼõ chõ Moze waʼamatenia dania.

1I. Mifondrongondrongo, jaʼami banoea si jaw̃a, moehede saʼae ndraʼo, ba jamoerongo tanõ wehede mbewegoe andre! 2Ja hoelõ deoe moroi jaw̃a wamahaõgoe, jamowõi hoelõ namo wehedegoe, ja si mane teoe ba ndroeʼoe danõ, si mane bõibõi ba mboeloe ndroeʼoe! 3Tõi Jehowa saʼae oefarongogõ: Mifosoemange Lowalangida! 4Gowe ia, soʼahonoa wolaoenia; me no satoelõ lala andrõ chõnia fefoe, Lowalangi si lõ farõi ia, lõ falimosa chõnia, satoelõ tõdõ ba sadõlõ tõdõ ia! 5Si lõ sõchi nilaoera chõnia, si tenga ononia andrõ, ba fangaila ira, ngaʼõtõ si no tefoejoe ba si no tekiko. 6Hadia, si manõ wamasoelõnimi [sisõchi] chõ Jehowa, jaʼami niha sambõ eraʼera ba si lõ tõdõ? Hadia, tenga jaʼia namaoe, sombõi jaʼoegõ mege? Tenga jaʼia zangasogõ jaʼoegõ ba samataro jaʼoegõ? (Mal. 1, 6). 7Tõrõ tõdõoe gõtõ fõna andrõ, tõngõtõngõni gõtõ ngaʼõtõ niha si no noemalõ! Sofoe chõ namaoe, enaʼõ iʼombachaʼõ chõoe; ba zi no tohare hoewa ba chõmi sofoe, enaʼõ latoenõ chõoe. 8Me ibeʼe tána ba niha danõ Fondrege zalaw̃a, me ifõfõʼõ nono niha, ba ifachoi nola soi, dali waʼato Ndraono Gizeraëli andrõ. (Hal. zin. 17, 26). 9Tána chõ Jehowa sa mbanoeania andrõ, ochõtania, si lõ teboelõ, nifachoi chõnia maʼoewoe Jakobo. (F. 4, 20). 10Ba danõ si mate isõndra, ba danõ si mate sataʼoe ita, si lõ nihaniha. Ba no irorogõ, lõ aefaʼaefa hõrõnia chõra; no irorogõ, nifondrorogõ ono hõrõnia. 11Si mane mojo sameʼawa ononia ba gazoeni ba sanahanahae jaw̃a nononia andrõ, si manõ wamologõnia afinia, ihalõ ira ba itaja afinia. (Moz. II. 19, 4). 12Ha Jehowa zolohe jaʼira ba lõ awõnia Lowalangi bõʼõ. 13Ba zalaw̃a tanõ ifatõrõ ira, ba boea danõ ibeʼe õra. Ba gara lasisiõ w̃e w̃ani ibeʼe ba ba gowe lasisiõ wanicha, (Sin. 81, 17), 14fabaja fanicha zoesoe zaw̃i ba soesoe nambi, awõ dawõ nono mbiribiri ba tawõ mbiribiri si matoea. Saw̃i Mbazana, si matoea [ibeʼe chõra], awõ mbiribiri si matoea ba fondrege zi sõchi gandroe, ba no mibadoe nõsi mboea nagoe, timba nagoe saoechoe. 15Ba atabõ Jesoeroe andrõ, ba fasifa — satabõ ndraʼoegõ ba sesolo ba soʼõsi! Ba iʼerogõ Lowalangi, sombõi jaʼia mege, ba lõʼõ saʼae ba dõdõnia gowe andrõ, fangorifinia. (Jes. 44, 2). 16Laʼandrõ wõnoenia, bõrõ Lowalangi bõʼõ andrõ, sogoro ita labeʼe famaosi dõdõnia. 17Labeʼe gõ mbechoe, si tenga Lowalangi, õ Lowalangi si lõ larai mila mege; si bohooe toemboe, sawena so, si tenga niʼataʼoefi ndra toeami mege. 18Gowe andrõ, soʼono jaʼoegõ mege, ba lõ itõrõ tõdõoe, ba no olifoeʼõ Lowalangi andrõ, sadono jaʼoegõ. 19Ba iʼila Jehowa ba itiboʼõ [mbanoeania andrõ], ba wõnoenia ba nononia matoea ba ba nononia alawe andrõ. 20Imane: Daʼoebaloegõ mbawagoe chõra, daʼoefaigi he wisa loealoea dania chõra. Me no niha si tefoejoe sibai tõdõ ira, iraono si lõ falõfarõi. 21No laʼandrõ wõnoegoe, bõrõ zi tenga Lowalangi andrõ, no labaosi dõdõgoe ba nadoe faja andrõ chõra, ba daʼoebeʼe famasoegi wõnoera niha si tenga niha, ba oebeʼe famaosi dõdõra niha baero. (Rom. 10, 19). 22Hoemola saʼae galitõ wõnoegoe, iroegi zabacha mbanoea tooe feholania, iʼā danõ, fabaja saoeri ba goelinia, iraʼi dajadaja hili. (Jer. 15, 14). 23Daʼoehawoei ira famakao, oehori nono wana chõgoe, wolaoe chõra. 24Ba na no afoeo dania ira ba waʼolofo ba na no ariri ba waʼaoechoe wõchõ waba ba ba wõchõ bõʼõ, sabeʼe sibai, ba oefatõrõ chõra nifõ goetoe ndroeʼoe ba sõfoe goelõ, ba danõ tooe. 25Na baero, ba ahori ira ba mbawa ziʼõli; ba na jomo, ba ba waʼataʼoe, ono matoea ba ono alawe ba iraono ba mbagi zoesoe ba si no tohare hoewa. 26Oemane enaʼõ: Daʼoewoewoesi misa ira, olifoe niha bõʼõ ira oebeʼe, 27na lõ ataʼoedo waʼaboe dõdõgoe ba zi faʼoedoe andrõ, ma lõ aboto ba dõdõ zamakao jaʼira andrõ, ma lamane dõdõra: Tangama zabõlõ, ba tenga Jehowa, zolaoe daʼõ fefoe. 28Noa sa niha si lõ famobawa lala ira, niha si lõ bacha tõdõ. 29Na satoeatoea ira, ba aboto ba dõdõra enaʼõ, ba lafatooetooe enaʼõ loealoea, si so fõnara. 30Hana wa iʼila igohi zi hõnõ si ha samõsa, ba hana wa moloi zi foeloe ngahõnõ labeʼe si daroea, na lõ niʼamawa gowera andrõ jaʼira ba na lõ nibõhõli Jehowa jaʼira. 31Gowera andrõ, ba tenga sa si mane goweda; emalidá zamadoehoeʼõ daʼõ. 32Ina w̃ew̃e nagoe chõra sa, ba w̃ew̃e nagoe Zodoma ba ba danõ Gomora moroi chõrá. Boea nagoe chõra, ba langoe, faʼafeto gawõchoe waʼafeto mboea andrõ. 33Ilo naga nõsi nagoera andrõ, ba sõfoe goelõ, sataʼoe ita. 34Hadia tenga no moebeʼe jaw̃a daʼõ jomo chõgoe, tenga ba mbateʼe girõgirõ chõgoe so ia, nifotandro? 35Folombase mbaw̃a wolaoe balõ, baw̃a wameʼe soelõ, na loeo mangiwa gahera. Noa sa ahatõ ia, mbaw̃a wamakikora andrõ, iʼaliogõ ia moroi sa nihonogõi chõra andrõ. (Rom. 12, 19. Heb. 10, 30). 36Iʼohe sa ba zatoelõ hoehoeo mbanoeania Jehowa, ihachõsi tõdõ ngoningoninia, na iʼila, no taja waʼabõlõ ba si lõ boto nono matoea, fabaja iraono. 37Imane dania: Heza so iadaʼe Lowalangira andrõ? gowe andrõ, saw̃atõra mege? 38si manga dawõ zoemange andrõ chõra mege, samadoe agoe soemange nibadoe andrõ chõra? Hana na maoso daʼõ, ba wanolo jaʼami, ndramõi baʼabaʼami! 39Jaʼoroma saʼae chõmi wa jaʼodo, jaʼodo andre, awõ wa lõ Lowalangi bõʼõ baerogoe. Samoenoe niha ndraʼo ba sangorifi gõi, samesocho ba samedõhõ gõi, ba lõ sangila mangefaʼõ ba dangagoe nihá. (F. 6, 4. Sam. I. 2, 6). 40Oeʼoroʼõ saʼae dangagoe mijaw̃a ba mbanoea si jaw̃a, ba oemane: Saoeri ndraʼo, iroegi zi lõ aetoe! 41Na no oedali ziʼõligoe andrõ si takile, na oebabaja wangoehoekoe, ba oelaoe mbalõgoe ba zamakao jaʼodo, oelaoe zoelõ ba zi fatioe tõdõ chõgoe! 42Maboe do nono wana chõgoe oebeʼe ba iʼā nõsi niha siʼõligoe — do niboenoe andrõ ba do niraʼoe ba nagole hõgõ zolohe emali andrõ. 43Misoeno mbanoeania, jaʼami niha baero, me no solaoe balõ ndro ngoningoninia ia, ilaoe mbalõnia ba zamakao jaʼia ba isalaʼõ zi lõ sõchi ba danõ mbanoeania. (Rom. 15, 10).

44II. So Moze, ifarongogõ ba zato daroma li sinoenõ andrõ fefoe, jaʼia ba Josoea, ono Noeni andrõ. 45Ba me no iʼoʼozoei ba Ndraono Gizeraëli fefoe daroma li andrõ Moze, ba imane chõra: 46Mitanõ ba dõdõmi daroma li andrõ fefoe, niw̃aʼõgoe sibai chõmi maʼõchṍ, enaʼõ miw̃aʼõ ba ndraonomi, enaʼõ latõngõni, ba woloʼõ taroma li oroisa andrõ fefoe. 47Tenga sa fajafaja daʼõ chõmi, balazi nosomi, ba daʼõ sibai misõndra waʼanaoe noso ba danõ andrõ, ba zi mõi ami mijefo Joridano, ba wangochõgõ jaʼia.

48III. Ba me loeo daʼõ, ba hoemede Jehowa chõ Moze, imane: 49Ae mijaw̃a ba hili Nebo andrõ, famadoro hili Gabari, ba danõ Ndraono Moabi, tánõ ba gatoemboecha, iʼotarai Jericho, ba faigi danõ Ganaʼana andrõ, nibeʼegoe ba Ndraono Gizeraëli dania, chõra ba ba madooera dania. (Moz. IV. 27, 12). 50Ba mate dania ndraʼoegõ ba hili andrõ, ba zi mõiʼõ jaw̃a, ba teʼoroedoegõ ndraʼoegõ chõ ndra toeaoe, si mane gaʼaoe Aʼaroni, si mate ba hili Hori mege, ba si no moeʼoroedoegõ chõ ndra toeami, (Moz. IV. 33, 38), 51bõrõ me no mosala ami chõgoe, ba hoenõ Ndraono Gizeraëli, ba nidanõ wasosota no andrõ, ba Gadesi, ba danõ si mate Sini, me lõ nifosoemangemi jaʼodo, niʼamoniʼõ andrõ, bacha ba hoenõ Ndraono Gizeraëli. (Moz. IV. 20, 12). 52Moroi jefo andre sa õfaigi danõ, ba lõ õroegi danõ andrõ, nibeʼegoe ba Ndraono Gizeraëli dania.

Soera Moze V Faza 31

I. Iheta ia ba halõw̃õnia Moze ba ifataro Josoea andrõ solohe sato. II. Ibeʼe ba danga gere zoera goroisa, ba wombaso ba zato. III. Oroisa Jehowa chõ Moze ba wanoera sinoenõ fangona andrõ, famadoehoeʼõ ba zato. IV. Soera goroisa andrõ, ba nibeʼe barõ dawõla andrõ.

1I. Ba mõi moehede ba Ndraono Gizeraëli fefoe Moze, 2imane chõra: Otoe a doea woeloe fache waʼaragoe ba goeli danõ iadaʼe, ba si tebai faofao saʼae ndraʼodo; ba noa gõi imane chõgoe Jehowa; Lõ õʼõtõ Joridano andrõ! (Moz. IV. 27, 12). 3Lowalangioe, Jehowa zangõtõ fõnaoe, ba jaʼia zangohori niha andrõ fõnaoe, ba õʼila õʼochõgõ danõra. Josoea andrõ zangolõiʼõ jaʼoegõ; dali niw̃aʼõ Jehowa. (Moz. IV. 27, 18). 4Ilaoe chõra Jehowa wolaoenia me ifakiko razo Ndraono Gamori andrõ, Sihona ba Ogi, fabaja tanõra. (Moz. IV. 21, 24). 5Ibeʼe ba dangami ira Jehowa, ba miʼoʼõ sibai goroisa andrõ, mibeʼenia chõmi, wolaoe chõra. (F. 7, 2). 6Bõi atalõ dõdõmi, miʼabeʼeʼõ ami! Bõi miʼataʼoefi ba bõi tokeʼa ami chõra! Fao sa chõoe Lowalangioe, Jehowa, lõ ibõhõi ndraʼoegõ, lõ farõi ia chõoe. (Jos. 1, 5. Heb. 13, 5). 7Ba hoemede Moze chõ Josoea ba imane chõnia, ba zi so Ndraono Gizeraëli, fefoe. Bõi atalõ dõdõoe, abeʼeʼõ ndraʼoegõ! Jaʼoegõ sa zolohe jaʼira ba danõ andrõ, nifaboeʼoe Jehowa fameʼe chõ ndra toeara mege, si no mõi ba hõloe ia chõra, ba jaʼoegõ zamaosa chõra. 8Ba Jehowa zowaõwaõ fõnaoe, itolo ndraʼoegõ, lõ ibõhõiʼõ ba lõ farõi ia chõoe. Bõi ataʼoefi ba bõi aboe dõdõoe.

9II. Ba isoera goroisa andrõ Moze ba ibeʼe ba danga gere andrõ, ono Lewi, sangosaʼõ tawõla zoera goroisa Jehowa andrõ, ba ba danga zalaw̃a Ndraono Gizeraëli fefoe. 10Ba iw̃aʼõ li chõra Moze, imane: Na no iroegi mewitoe fache, na dõfi wangefa andrõ, ba na owasa nose daha geoe, (Moz. V. 15, 1), 11na mõi faloecha chõ Lowalangioe, Jehowa, Ndraono Gizeraëli fefoe, ba naha andrõ nitoejoenia dania, ba õbaso zoera goroisa andre, õfarongogõ chõra. 12Faloechaʼõ zato, ira matoea ba ira alawe ba iraono, awõ niha bõʼõ andrõ chõoe, si so ba mbanoeami, enaʼõ larongo ba enaʼõ latõngõni, ba wangataʼoefi Lowalangimi, Jehowa, ba ba woloʼõ sibai taroma li oroisa andre fefoe. 13Ba iraonora andrõ, si lõ mangila jaʼia na, ba ndramoefondrondrongo, enaʼõ lafahaõ ira ba wangataʼoefi Lowalangimi, Jehowa, gõtõ weʼasomi ba danõ andrõ, ba zi mõi ami mijefo Joridano, ba wangochõgõ jaʼia.

14III. Ba imane Jehowa chõ Moze: Hiza, no iroegi inõtõ waʼamateoe; hede chõ Josoea ba miʼae ba nose wamaʼeleʼõ, enaʼõ oew̃aʼõ li chõnia. Ba mõi ndra Moze Josoea, lasaw̃a baose wamaʼeleʼõ. 15Ba oroma Jehowa baose, ba mboto lawoeo andrõ, ba iʼagõzinga mbawandroehõ nose boto lawoeo andrõ. 16Ba imane Jehowa chõ Moze: Hiza, si mõi mõrõ ndraʼoegõ ba ngai ndra toeaoe; ba maoso dania niha andre ba lafosoemange Lowalangi bõʼõ, ba chõra, ba danõ andrõ ba zi mõi ira, ba laʼerogõ ndraʼodo, ba fawoeʼoesa li andrõ chõgoe, si fawoeʼoe li ndraʼo chõra, ba ladoedoegõ. 17Ba na loeo daʼõ, ba tesao wõnoegoe chõra ba farõi ndraʼo chõra ba oebiniʼõ mbawagoe chõra, ba famakiko lasaw̃a, oja ngawalõ zi gõna ira famakao ba fangaboe dõdõ. Ba na loeo daʼõ, ba lamane: Hadia, tenga andrõ gõna ita famakao andrõ, me lõʼõ saʼae Lowalangida ba chõda? 18Ba jaʼodo, ba oefaoeloegõ oebiniʼõ mbawagoe, na loeo daʼõ, bõrõ zi lõ sõchi andrõ fefoe, nilaoera, me no lasaw̃a Lowalangi bõʼõ. 19Ba mitanõ ba zoera chõmi zinoenõ andrõ, ba mifahaõ Ndraono Gizeraëli ba daʼõ, bõi aefa ba mbewera, enaʼõ amaedola zi so ba mbõrõ chõgoe ba Ndraono Gizeraëli zinoenõ andrõ. 20Oeʼohe sa ira ba danõ andrõ, nifaboeʼoegoe chõ ndra toeara fahõloesa, tanõ si falawoe soesoe ba w̃e w̃ani, ba manga ira ba aboeso ba esolo, ba aefa daʼõ, ba laʼotahõgõ Lowalangi bõʼõ ba lafosoemange daʼõ, ba jaʼodo, ba si lõ ba dõdõra dania, ba fawoeʼoesa li andrõ chõgoe, ba adoedoe labeʼe. 21Ba na oja dania zi gõna ira famakao ba fangaboe dõdõ, ba sinoenõ andrõ dania, wamadoehoeʼõ chõra lõʼõ sa atṍ aefaʼaefa dania ia ba mbewe madooera —; oeʼila sa geraʼerara, si so ba dõdõra maʼõchṍ [saʼae], he lõ niʼohegoe jaʼira na ba danõ andrõ, nifaboeʼoegoe chõ ndra toeara, fahõloesa. (Jer. 17, 10. Fam. 2, 23). 22Ba me loeo daʼõ itanõ ba zoera zinoenõ andrõ Moze, ba ifahaõ Ndraono Gizeraëli ba zinoenõ andrõ. 23Ba iw̃aʼõ li chõ Josoea, ono Noeni andrõ, [Lowalangi], imane chõnia: Bõi atalõ dõdõoe, abeʼeʼõ ndraʼoegõ! me jaʼoegõ zolohe Iraono Gizeraëli ba danõ andrõ, nifaboeʼoegoe chõra fahõloesa, ba jaʼo zanolo jaʼoegõ.

24IV. Ba me no ahori itanõ ba zoera daroma li oroisa andrõ fefoe Moze, 25ba ibeʼe li ba nono Lewi andrõ, sangosaʼõ tawõla andrõ, naha zoera goroisa Jehowa, imane: 26Mihalõ zoera goroisa andre ba mibeʼe ba ngai dawõla naha zoera goroisa Lowalangimi, Jehowa, enaʼõ amaedola zi so ba mbõrõ ia ba chõmi, ba daʼõ. 27Noa sa oeʼila wanandrooe ba faʼabeʼe mbõrõ doeʼimõ. He iadaʼe saʼae, ba weʼasogoe na ba chõmi, ba noa saʼae te chõmi niw̃aʼõ Jehowa; ba mendroea manõ dania, na no mate ndraʼo! 28Mifaloechaʼõ chõgoe zalaw̃a madomi fefoe, awõ goemandroe chõmi, enaʼõ oefarongogõ chõra daroma li andre ba enaʼõ oekaoni si so ba mbõrõ ba chõra andrõ mbanoea si jaw̃a ba tanõ tooe. (Moz. V. 4, 26). 29Oeʼila sa, na no mate ndraʼo dania, ba mifakiko manõ wolaoe, wondrõi lala andrõ, nitoetoeroegoe chõmi; ba gõna dania ami famakao andrõ, me solaoe si fatoewoe chõ Jehowa ami, wangandrõ fõnoenia folaoelaoemi andrõ. 30Ba ahori ifarongogõ ba Ndraono Gizeraëli fefoe daroma li sinoenõ andre Moze, imane:

Soera Moze V Faza 30

I. Tebeʼe aefa horõ, na mangesa dõdõ. II. Sahatõ goroisa andrõ. III. Amaboeʼoela li ba fametaʼoe.

1I. Ba na no itõrõ dania ndraʼoegõ daʼõ fefoe, howoehowoe andrõ ba fangelifi andrõ, niw̃aʼõgoe chõoe, ba na õbeʼe ba dõdõoe dania ba niha baero andrõ fefoe, ba nitiboʼõ Lowalangioe, Jehowa, jaʼoegõ, 2ba na õfoeliʼõ chõ Lowalangioe, Jehowa, awõ ndraonooe, soroi siʼaikõ ba dõdõ ba soroi siʼaikõ ba geraʼera, ba na õʼoʼõ linia ba niw̃aʼõgoe chõoe maõchṍ fefoe, 3ba ifoeli ifaigi lala chõoe Lowalangioe, Jehowa, ihachõsi tõdõ ndraʼoegõ, ba ifoeli iʼozaragõ ami ba niha andrõ fefoe, ba nifazaewe Lowalangimi, Jehowa, jaʼami. 4Ba he ba wondrege danõ so õsa, sizaewe, fõfõmi, ba iʼozaragõ ami ba daʼõ Lowalangimi, Jehowa, ba ihalõ ami ba daʼõ. 5Ba Lowalangioe, Jehowa zolohe jaʼoegõ ba danõ andrõ, si no tanõ ndra toeaoe mege, enaʼõ tanõoe, ba ohahaoe dõdõoe ba ato ami ibeʼe, moroi chõ ndra toeami mege. 6Iboto dõdõoe ba tõdõ madooemõ dania Lowalangioe, Jehowa, enaʼõ moroi siʼaikõ ba dõdõoe ba moroi siʼaikõ ba geraʼeraoe õʼomasiʼõ Lowalangioe, Jehowa, bõrõ wangorifioe andrõ. (Jer. 24, 7; 32, 39. Hes. 36, 26). 7Ba ba nemalioe andrõ ba ba zi fatioe tõdõ chõoe, si no molohi jaʼoegõ, ifatõrõ wangelifi andrõ fefoe Lowalangioe, Jehowa. 8Ba jaʼoegõ, ba õfoeli õfondrondrongo li Jehowa ba õʼoʼõ goroisania andrõ fefoe, nifaʼemagoe chõoe maʼõchṍ, 9ba ihõna dania zi sõchi ba halõw̃õoe andrõ fefoe, nihalõ dangaoe ba ba dabinaoe ba ba mbeto goerifõoe ba ba mboea danõ chõoe; ifoeli sa omoeso dõdõ Jehowa ndraʼoegõ, fangorifioe, si mane faʼomoeso dõdõnia ndra toeaoe mege, 10na õfondrondrongo li Lowalangioe, Jehowa, woloʼõ oroisania, awõ nifachoinia andrõ, nitanõ ba zoera goroisa andre, na moroi siʼaikõ ba dõdõoe ba na moroi siʼaikõ ba geraʼeraoe õfoeliʼõ chõ Lowalangioe, Jehowa.

11 II. Ba goroisa andre sa, nifaʼemagoe chõoe maʼõchṍ, ba tenga si tebai ndraʼoegõ, tenga si tebai õchamõ. 12Tenga si jaw̃a ba zoroego so ia, fa õw̃aʼõ enaʼõ: Ha niha chõda zi mõi jaw̃a ba zoroego ba wangai jaʼia mitooe ba ba wangombacha chõda, enaʼõ taʼoʼõ? (Rom. 10, 6). 13Ba tenga gõi jefo nasi so ia, fa ow̃aʼõ enaʼõ: Ha niha chõda zi mõi misi jefo nasi, mangai jaʼia chõda, ba wangombacha jaʼia chõda, enaʼõ taʼoʼõ? 14No sahatõ sibai chõoe daroma li andrõ, ba mbeweoe ba ba dõdõoe [tabeʼe ia], tobali õʼila õʼoʼõ.

15III. Hiza, no oefaedo chõoe maʼõchṍ waʼaoeri, awõ waʼohahaoe dõdõ, ba faʼamate, awõ wamakao. (F. 11, 26. Jer. 21, 8). 16Na õʼoʼõ goroisa Lowalangioe, Jehowa, nifaʼemagoe chõoe maʼõchṍ, wa õʼomasiʼõ Lowalangioe, Jehowa, na õtõrõ lala andrõ chõnia, ba na õtõngõni goroisania, awõ nifachoinia andrõ, awõ hoekoenia, ba aoeri ndraʼoegõ ba ato ami dania, ba ifahowoeʼõ ndraʼoegõ Lowalangioe, Jehowa, ba danõ andrõ, ba zi mõiʼõ, ba wangochõgõ jaʼia. 17Ba na faʼero dõdõoe, na lõ õfondrondrongo li, na tobali õbeʼe nifowõhõ ndraʼoegõ, ba wangaloeloe ba Lowalangi bõʼõ, ba ba wamosoemange daʼõ, ba oew̃aʼõ chõmi maʼõchṍ: 18Lõ zi lõ tekiko ami; tenga sanaoe noso ami, ba danõ andrõ, ba zi mõi ami mijefo Joridano, ba wangochõgõ jaʼia. 19Oekaoni si so ba mbõrõ ba chõmi andrõ maʼõchṍ mbanoea si jaw̃a, awõ danõ tooe, wa no oefaedo ira chõoe waʼaoeri waʼamate, ba howoehowoe ba fangelifi, ba no oefaedo chõoe; ba faʼaoeri saʼae toejoe, enaʼõ aoeriʼõ, jaʼoegõ andrõ, awõ ngaʼõtõmõ dania; (F. 4, 26); 20õmasiʼõ Lowalangioe, Jehowa, ba fondrondrongo linia ba olemba, chõnia, daʼõ sa wangorifioe ba fanganaoe nosooe, enaʼõ lõ teboelõʼõ ba danõ andrõ, nifaboeʼoe Jehowa fameʼe, chõ ndra toeaoe Aberahamo, Izaʼaki, Jakobo, si no mõi ba hõloe ia chõra!

Soera Moze V Faza 29

I. Fangaró fawoeʼoesa li andrõ. II. Fametaʼoe sanawõ.

1I. Ba hoemede Moze ba Ndraono Gizeraëli fefoe ba imane chõra: No miʼila fefoe hadia ia nilaoe Jehowa ba danõ Miseraji, chõ Waraʼo ba ba mbanoeania fefoe ba ba danõnia maʼasagõrõ, ba zanehe ami: (Moz. II. 19, 4), 2fangoromaʼõnia faʼabõlõnia andrõ, si tenga inõtõ, niʼila hõrõoe, tandra andrõ ba ilaʼila, si no eboea. (F. 7, 19). 3Ba irege maʼõchṍ andre, ba lõ nibeʼe Jehowa chõmi faʼaboto ba dõdõ ba wanõndra eloeaha, ba lõ nibeʼenia hõrõ, ba wangila, ba he tõgi dalinga, ba wamondrongo. 4Ba no oeʼohe ami, õfa woeloe fache waʼara, ba danõ si mate andrõ; noechami andrõ, ba lõ sadoedoe, ba badagahemi, ba lõ sobooe ba gahemi. (F. 8, 4). 5Lõ õmi roti, ba he agoe, ba he bõʼõnia, nibadoe, sabeʼe, enaʼõ aboto ba dõdõmi, wa jaʼodo Jehowa Lowalangimi. 6Ba me no miroegi danõ daʼe, ba me mõi fasoewõ chõda Zihona andrõ, razo ba Hesibona ba Ogi andrõ, razo ba Mbazana, ba no sabõlõ ita moroi chõra, (F. 3, 1), 7ba no taʼochõgõ danõra, ba no tabeʼe ba mado Roebeno ba ba mado Gado ba ba zi matonga mado Manase, tána chõra ba ba madooera dania. (Moz. IV. 32, 33). 8Ba mitõngõni saʼae daroma li ba wawoeʼoesa li andre, ba woloʼõ, enaʼõ mofozoe mibeʼe fefoe hadia ia nilaoemi. 9Fõna Lowalangimi, Jehowa, so ami fefoe, maʼõchṍ, salaw̃a mado chõmi ba madomi andrõ ba satoea ba koemandroe chõmi, dozi ira matoea Ndraono Gizeraëli, 10ba iraonomi ba ira alawemi, awõ niha bõʼõ andrõ chõmi, si so ba golombasew̃ami, he solew̃alew̃a eoe ba he sanaʼoenaʼoe idanõ chõmi, 11enaʼõ fawoeʼoe li ami Lowalangioe, Jehowa, ba wefao chõnia, si mõi ba hõloe ami, famagõlõ Lowalangioe, Jehowa, chõoe maʼõchõ, 12enaʼõ ifataro banoeania ndraʼoegõ maʼõchṍ ba enaʼõ Lowalangioe gõi ia, si mane nifaboeʼoenia chõoe, si no mõi ba hõloe ia chõ ndra toeaoe Aberahamo, Izaʼaki, Jakobo. (Moz. I. 17, 7). 13Ba tenga ha ba chõmi fawoeʼoe li ndraʼo iadaʼe, tenga ha jaʼita zi fabõbõ, si mõi ba hõloe ita, 14no he ba zi so ba daʼe chõda fõna Lowalangida, Jehowa, ijaʼe, ba he ba zi lõ chõda ba daʼe maʼõchṍ aʼine. 15Itõrõ sa tõdõmi weʼasoda ba danõ Miseraji mege ba fanõrõda taloe danõ niha baero, nitõrõda andrõ, 16ba fangilami sogoro ita andrõ chõra ba adoera andrõ, eoe ba kara ba firõ ba anaʼa, si so chõra.

17II. Bõi manõ faloecha ba chõmi, he ira matoea, ba he ira alawe, ba he fatalifoesõta ba he mado, si erogõ Lowalangida, Jehowa, tõdõnia, maʼõchṍ, ba weʼamõi mamosoemange Lowalangi niha baero andrõ! Bõi manõ faloecha ba chõmi mbaja sowoea langoe ba hija! (Hal. zin. 8, 23. Heb. 12, 15). 18Ma so zanõtõna manõ fefoe hadia ia zi sõchi, na irongo daroma li ba wamagõlõ andre, niʼaroʼõ fahõloesa, ma imane dõdõnia: Lõ gõnado famaʼala, he w̃aʼae oeʼoʼõ waʼabeʼe dõdõgoe andrõ. Ba fozoenia, ba tehori nibasõi, fabaja si no okõlikõli. 19Ba niha si manõ, ba lõ ibeʼe aefa horõ Jehowa, moehola dania wõnoe Jehowa ba faʼafõchõ dõdõnia ba niha si manõ, ba tohare dania chõnia wangelifi andrõ fefoe, nisoera ba zoera andre, ba iboenoe dõinia ba goeli danõ Jehowa. 20Iheta ba mado Ndraono Gizeraëli bõʼõ mado si manõ Jehowa famakikonia, itõrõ sibai niw̃aʼõ ba wangelifi andrõ, ba wawoeʼoesa li, nitanõ ba zoera goroisa andre. 21Ba lamane dania ngaʼõtõmi, iraonomi andrõ, sawena eboea foerimi dania, awõ niha bõʼõ andrõ, si otarai danõ sarõoe, na laʼila wamakao andrõ ba fõchõ andrõ, nifatõrõ Jehowa ba danõ andre, 22— na hatṍ talõ balera ba asio ba achozila danõnia tooe, tobali tebai tehalõ nowi ba lõ aoeri hadia ia, sinanõ hadia ia, ba lõ motalinga ba chõnia, wa no adoedoela, si mane ba Zodoma ba ba Gomora ba ba Gadama ba ba Zeboʼi, nidoedoegõ Jehowa no, iroegi danõ tooe ba wõnoenia andrõ ba ba mbachoebachoe dõdõnia — (Moz. I. 19, 24); 23si ndroehoe, niha baero fefoe, ba lamane dania: Hadia mbõrõ, wa no ilaoe daʼõ ba danõ andrõ Jehowa? He moroi wehola wõnoenia andrõ, si tenga inõtõ? (Jer. 22, 8). 24Ba lamane dania: Me lõ nitõngõnira fawoeʼoesa li andrõ, me fawoeʼoe li chõra Jehowa, Lowalangi doeara andrõ, me iheta ira ba danõ Miseraji, 25ba me no mõi ira mamosoemange Lowalangi bõʼõ, awõ wangaloeloe ba daʼõ, ba Lowalangi si lõ larai mila fõna ba si tenga nitoetoeroenia chõra. (F. 4, 19). 26Daʼõ mbõrõ wa tesao wõnoe Jehowa ba danõ andre ba tobali ifatõrõ chõnia wangelifi andrõ fefoe, nitanõ ba zoera andre mege. 27Ba no ideha ira ba danõra Jehowa ba wõnoenia andrõ ba ba mbachoebachoe dõdõnia ba ba waʼabao dõdõnia andrõ, si no abõlõbõlõ, ba no ifazaoemba ira ba danõ bõʼõ, si mane maʼõchṍ. 28Si tobini na oea, ba balazi Lowalangida, Jehowa, ba si no teboka, ba chõda ba ba ndraonoda, gõtõgõtõ waʼara, enaʼõ taʼoʼõ fefoe daroma li oroisa andre.

Soera Moze V Faza 28

I. Famaboeʼoe howoehowoe ba zoloʼõ. II. Fangelifi ba zi lõ moloʼõ.

1I. Na lõ teboelõ dania wamondrongooe li Lowalangioe, Jehowa, ba na õtõngõni sibai goroisania fefoe, nifaʼemagoe chõoe maʼõchṍ, ba woloʼõ jaʼia, ba alaw̃a jaw̃a niha bõʼõ ba goeli danõ fefoe ndraʼoegõ ibeʼe Lowalangioe, Jehowa, (Moz. III. 26, 3, b. t. F. 26, 19), 2ba mõi chõoe howoehowoe andrõ fefoe, aloea chõoe, na õʼoʼõ li Lowalangioe, Jehowa. 3Nifahowoeʼõ ndraʼoegõ jomo ba mbanoea, ba nifahowoeʼõ baero ba danõ. (F. 7, 13, b. t.). 4Nifahowoeʼõ dabinamõ ba boea danõ chõoe, ba beto goerifõoe ba ono zaw̃ioe ba foʼono mbiribirioe. 5Nifahowoeʼõ ndragamõ, awõ naha wamaroeka roti chõoe. 6Nifahowoeʼõ ndraʼoegõ na soʼõ, ba nifahowoeʼõ na mofanõʼõ. 7Jehowa zamõzi tooe fõnaoe emalioe, si maoso oedoemõ; ha sara lalara, na so ira, ba wanoewõ jaʼoegõ, ba fitoe rozi lalara, na moloi ira, õbeʼe. 8Jamoefao chõoe howoehowoe Jehowa, ba halasamõ ba ba nilaoe dangaoe fefoe, jamoefahowoeʼõ ndraʼoegõ ba danõ andrõ, nibeʼe Lowalangioe, Jehowa, chõoe! 9Jamoebaliʼõ soi niʼamoniʼõ ndraʼoegõ chõnia Jehowa, si mane niw̃aʼonia chõoe, si no mõi ba hõloe ia, na õʼoʼõ goroisa Lowalangioe, Jehowa, ba na õtõrõ lala andrõ chõnia, 10enaʼõ laʼila niha baero, ba goeli danõ fefoe wa no dali dõi Jehowa mege, ba wamatõrõ tõimõ, ba enaʼõ laʼataʼoefi ndraʼoegõ! 11Ba fahõna dania chõoe zi sõchi, ibeʼe Jehowa, he ono chõoe ba he ono goerifõoe, ba he boea danõ chõoe, ba danõ andrõ, nifaboeʼoe Jehowa fameʼe chõoe chõ ndra toeaoe, si no mõi ba hõloe ia. 12Ibokai chõoe Jehowa naha girõgirõ andrõ chõnia, si no fahõna, banoea si jaw̃a andrõ, ba wameʼe teoe ba danõoe, na inõtõ, ba ba wamahowoeʼõ halõw̃õ dangaoe fefoe, tobali ato niha nibeʼeoe nifalali, ba jaʼoegõ, ba alacha lõʼõ manõ mamalaliʼõ hadia ia. 13Ba ibeʼe hõgõ ndraʼoegõ Jehowa ba tenga iʼo, ba itoegoe manõi ndraʼoegõ, ba lõʼõ manõ tooelõ ndraʼoegõ, na õʼoʼõ goroisa Lowalangioe, Jehowa, andrõ, nifaʼemagoe chõoe maʼõchṍ, na õtõngõni ba na õʼoʼõ, 14na õtõrõ fefoe niw̃aʼõgoe chõoe maʼõchṍ, na lõ õholeʼõ ndraʼoegõ, he ba gambõlõ, ba he ba gabera, ba woloʼõ ba Lowalangi bõʼõ ba ba wamosoemange daʼõ.

15II. Ba na lõ õʼoʼõ niw̃aʼõ Lowalangioe, Jehowa, niw̃aʼõnia chõoe, ba woloʼõ sibai oroisa andrõ, awõ nifachoi andrõ fefoe, nifaʼemagoe chõoe maʼõchõ, ba tohare chõoe wangelifi andrõ fefoe, aloea chõoe dania. (Moz. III. 20, 14 b. t. Dan. 9, 11). 16Niʼelifi ndraʼoegõ jomo ba mbanoea ba niʼelifi baero ba danõ. 17Niʼelifi ndragamõ ba niʼelifi naha wamaroeka roti chõoe. 18Niʼelifi dabinamõ ba boea danõ chõoe ba ono zaw̃ioe ba foʼono mbiribirioe. 19Niʼelifi ndraʼoegõ na soʼõ, ba niʼelifi na mofanõʼõ. 20Ifatõrõ chõoe Jehowa wangelifi andrõ ba faʼatobali dõdõ ba fa lõ howoehowoe ba halõw̃õoe fefoe, nihalõ dangaoe, irege tehori ndraʼoegõ, si lõ ararā, irege tekiko ndraʼoegõ, bõrõ walõsõchi wolaoemõ andrõ, wa no õʼerogõ ndraʼodo. 21Iʼolembai dania ndraʼoegõ fõchõ waba, ibeʼe Jehowa, irege ahori ndraʼoegõ ibeʼe, ba danõ andrõ, ba zi mõiʼõ, ba wangochõgõ jaʼia. 22Ibõziʼõ fõchõ baõsi Jehowa, ba fogichi ba faosa ba faʼaoechoe ba faʼokõlikõli [danõ] ba faʼachozi lai wache ba faʼahohomõ; daʼõ zi lõ aefaʼaefa chõoe, irege no tekiko ndraʼoegõ. 23Tõla dania mbanoea si jaw̃a, jaw̃aoe, ba siʼõli danõ barõ gaheoe. 24Ibaliʼõ gawoegawoe ba ene deoe ba danõoe Jehowa, daʼõ dania zatoroe chõoe moroi jaw̃a, irege no tekiko ndraʼoegõ. 25Tegaõlõ tooe ndraʼoegõ fõna nemalioe ibeʼe Jehowa; ha sara lalamõ, na awena mõiʼõ fasoewõ chõra, ba fitoe rozi lala, na moloiʼõ labeʼe, ba tobali dozi niha bõʼõ ba goeli danõ ba moehocha mboe wamaigi jaʼoegõ. 26Ba õ wofo ba daloe mbanoea fefoe ba õ goetoe ndroeʼoe dania mboto zi mate chõoe, lõ sanaboi jaʼira. 27Ibõzi dania ndraʼoegõ Jehowa faosa Ndrawa Miseraji ba faosa sembili ba gigimõ ba bõni, si lõ famadõhõ. (Moz. II. 9, 9). 28Ibõziʼõ Jehowa faʼowõhõ ba faʼaoeʼa ba faʼafawoeka dõdõ. 29Õbajabajaisi manõ hadia ia ba zi laloeo, si mane na ibajaisi niha saoeʼa ba zogõmigõmi andrõ, ba si lõ fozoe nilaoelaoemõ andrõ; fadoro manõ nifakao ndraʼoegõ ba niʼanagõi, ba lõ sanolo jaʼoegõ. 30Õfohoe chõoe ndra alawe, ba niha bõʼõ zi horõni jaʼia; õʼotomosi nomo, ba lõ õʼonahia; õfazõchi kaboe nagoe, ba lõʼõ sa õʼā mboeania. 31Ba zanehe ndraʼoegõ tetaba zaw̃ioe ba maʼifoe lõʼõ labeʼe õoe; teraboe galideoe, niʼila hõrõoe, ba lõʼõ saʼae mangawoeli chõoe; ba danga nemalioe mõi mbiribirioe, ba lõ sanolo jaʼoegõ. 32Onooe matoea ba onooe alawe, ba tebeʼe ba danga niha bõʼõ [sawoejoe], iʼila hõrõoe, ba moʼala, ba wehoeloe dõdõoe chõra, maʼõmaʼõchõ, ba tebai õlaoe hadia ia. 33Boea danõ chõoe ba hadia ia gõlõoe fefoe, si no erege dõdõoe, ba soi si lõ õrai mila zi manga, ba fadoro manõ nifakao ndraʼoegõ ba nihoendragõ, 34ba owõhõ ndraʼoegõ, ba wamaigimaigi niʼila hõrõoe andrõ. 35Ibõzi ndraʼoegõ gigimõ sanandraw̃a, si lõ daloedaloe ba mbalõdoehioe ba ba waha, ba iʼotarai narõ kahe, noemalõ ba galizoezoe. 36Jaʼoegõ ba razo andrõ, nifataromõ chõoe, ba iʼohe ba niha bõʼõ Jehowa, ba niha si lõ mirai mila, jaʼoegõ ba ira toeaoe mege; Lowalangi bõʼõ nifosoemangeoe ba daʼõ dania, balõ geoe ba kara. 37Bõrõ waʼatobali dõdõ dania ndraʼoegõ ba bõrõ wangoʼaja ba bõrõ wangehera, ba niha andrõ fefoe, ba niʼohe Jehowa jaʼoegõ. 38Oja õbeʼe ba danõ tanõmõ zinanõ, ba lõ ojaʼoja õbasi boea, tamo saʼae zi manga jaʼia. (Mich. 6, 15). 39Õfazõchi kaboe nagoe ba õhaogõhaogõ, ba lõ dania õoe, õsi nagoe nibadoe, ba lõ nibeʼe ba naha; era saʼae zi manga dõla. 40Õfatoetoe wananõ ono zai ba mbenoeaoe, ba lõ fanicha dania, ba wamajoinioe jaʼoegõ, me sadoroedoroe mboea zai. 41Moʼono ndraʼoegõ, ono matoea ba ono alawe, ba tenga onooe dania, me niʼoloiʼõ dania ira. 42Fefoe geoe sowoea chõoe ba sinanõoe ba danõ, ba gola faroewoe zi ochõgõ. 43Niha bõʼõ, si fatewoe chõoe, ba itoegoe eboea manõ moroi chõoe, ba jaʼoegõ ba sahõndrõhõndrõ; 44jaʼia zameʼemeʼe nifalali chõoe, ba jaʼoegõ, ba tenga sameʼe nifalali chõnia hadia ia; jaʼia dania hõgõ ba jaʼoegõ, ba iʼo. 45Fangelifi andrõ fefoe zanõrõ jaʼoegõ dania, lõ aefaʼaefa chõoe ba aloea ba chõoe, balazi no ahori ndraʼoegõ, me no lõ nifondrondrongooe li Lowalangioe, Jehowa ba me lõ niʼoʼõmõ oroisania ba amachoita andrõ, nifachoinia chõoe; 46ba tandra dania ia ba ilaʼila, ba chõoe ba ba madooemõ dania, gõtõgõtõ waʼara. 47Me no lõ nifosoemangeoe Lowalangioe, Jehowa, saoha gõlõ ba soroi ba dõdõ, me no fahõna chõoe fefoe hadia ia, 48ba mõiʼõ sawoejoe nemalioe, nifatõrõ Jehowa chõoe, gõnaʼõ faʼolofo ba faʼowõchi dõdõ ba fa lõ noecha ba faʼambõ manõ hadia ia fefoe, iba ibeʼe ba mbagioe galo mbagi siʼõli, irege no ihori ndraʼoegõ. 49Ikaoni oedoemõ niha, moroi ba zarõoe, moroi ba wondrege danõ, Jehowa, hoelõ na itõrõ mojo, na so moroi sa, niha si lõ õʼila li, (Jer. 5, 15), 50niha sabeʼe hõrõ, si lõ ba dõdõ si no tohare hoewa, ba si lõ faʼahachõ dõdõ ono matoea. 51Laʼā nono goerifõoe ba boea danõ chõoe, irege no ahori ndraʼoegõ; lõ lasaigõ chõoe, he fache ba he w̃e nagoe ba he fanicha, he ono zaw̃ioe ba he ono mbiribirioe, balazi no lafakiko ami. 52Lafaʼoeʼoe ami ba mbanoeami fefoe, irege no adoedoe gõli kara andrõ chõmi, si no alaw̃a ba si no aro, nidõnadõnami, ba danõmi misa fefoe; lafasoei ami ba mbanoeami fefoe, ba danõmi misa, ba danõ nibeʼe Lowalangioe, Jehowa, chõoe. 53Ba ba waʼaboe dõdõ andrõ ba ba waʼatosasa, ba nemali andrõ, ba õʼā ndraonooe, õsi nonooe matoea ba õsi nonooe alawe, nibeʼe Lowalangioe, Jehowa, chõoe. (Jer. 19, 9). 54Ba he sabõlõ omboejoe mege ba si hoelõ nono omasiõ ba chõmi, ba safõchõ tõdõ dania chõ dalifoesõnia ba ba ndra alawe andrõ, nitalagoeinia ba ba ndraono andrõ, si tosai na chõnia. 55Chõra fefoe, ba lõ ibeʼe wõfõ nõsi nononia andrõ niʼānia, me lõ hadia ia zi tosai chõnia, ba waʼaboe dõdõ andrõ ba ba waʼatosasa, ba nemali andrõ, ba mbanoeami fefoe. 56Ira alawe sabõlõ omboejoetõ ba sabõlõ mangehangehao chõnia fefoe hadia ia ba chõmi, si lõ irai manandraigõ mangoehoendragõ tanõ, ba waʼomboejoemboejoe ba ba wangehangehao, ba afõchõ dõdõnia ba ndra matoeania, nitalagoeinia ba ba nononia matoea ba ba nononia alawe, 57iʼafõchõi tõdõ chõra nawõ nono andrõ, si otarai daloenia ba ono andrõ, niʼadonogõnia, iʼā saʼae, nibiniʼõ, me lõ hadia ia chõnia, ba waʼaboe dõdõ andrõ ba ba waʼatosasa, ba nemali andrõ, ba mbanoeami fefoe. 58Na lõ õtõngõni daroma li oroisa andrõ fefoe, nitanõ ba zoera andre, ba woloʼõ jaʼia, wangataʼoefi Lowalangioe, Jehowa, tõi andrõ, seboea lachõmi ba sataʼoe ita. 59Ba ifatõrõ chõoe ba ba madooemõ dania wamakao si tenga inõtõ Jehowa, famakao sabõlõbõlõ ba sarā, ba fõchõ sabeʼe sibai ba sarā gõi. 60Ba ifoeli ifatõrõ chõoe wõchõ Ndrawa Miseraji andrõ fefoe, si hocha mboemõ iʼolembai ndraʼoegõ. 61Ba ifatõrõ na gõi chõoe Jehowa ngawalõ wõchõ ba famakao, si lõ ba zoera goroisa andre, irege no tetiko ndraʼoegõ. 62Faʼoja ndrõfi ba mbanoea si jaw̃a ami menaʼõ, ba ha fasamõsa dania zi tosai jaʼami, me no lõ nifondrondrongooe li Lowalangioe, Jehowa. 63Ba si mane faʼomoeso dõdõ Jehowa mege wameʼe faʼohahaoe dõdõ chõmi, awõ wangojaʼõ jaʼami, si manõ waʼomoeso dõdõ Jehowa dania wamakiko jaʼami, awõ wangohori jaʼami, tobali tetimba ami ba danõ andrõ, ba zi mõi ami iadaʼe, ba wangochõgõ jaʼia. 64Ifazawili dania ndraʼoegõ ba niha baero fefoe, iʼotarai wondrege danõ, noemalõ ba wondrege tánõ sa; ba õfosoemange dania Lowalangi bõʼõ, ba daʼõ, si lõ mirai mila mege, jaʼoegõ ba ira toeaoe mege, balõ geoe ba kara. (F. 4, 27. Neh. 1, 8). 65Ba si lõ ahono ndraʼoegõ ba niha andrõ dania, ba lõ naha solombase gaheoe; tõdõ sanizinizi ibeʼe chõoe ba daʼõ Jehowa, awõ hõrõ sariri ba faʼaboe dõdõ. 66Nosooe, ba hoelõ zanaw̃anaw̃a fõnaoe wamaigioe; lõ bongi lõ maʼṍchõ, ba manizinizi ndraʼoegõ ba lõ õdõnadõna aoeriʼõ, õw̃aʼõ. 67Ba zangoehoelõ wongi, ba õmane: Enaʼõ na bongi! ba na bongi, ba õmane: Enaʼõ na ifoeli moloeo! bõrõ waʼaboe dõdõoe andrõ ba famaigioe hadia niʼila hõrõoe andrõ. 68Ifoeli ifolojo ndraʼoegõ ba danõ Miseraji Jehowa; ifatõrõ ba lala andrõ, niw̃aʼõgoe chõoe no: Lõʼõ saʼae iʼila ia hõrõoe, ba ba daʼõ teʼoroʼõ dania ami sawoejoe, ira matoea ba ira alawe, ba nemalimi, ba lõ sedõna mowõli jaʼami. 69Daʼõ daroma li ba wawoeʼoesa li andrõ, me fawoeʼoe li Moze ba Ndraono Gizeraëli, ba danõ Ndraono Moabi, niw̃aʼõ Jehowa chõnia, lõ lai wawoeʼoesa li andrõ, me fawoeʼoe li ia chõra ba gahe hili Horebi.

Soera Moze V Faza 27

I. Oroisa ba wanaroeʼõ harefa ba hili Gebala. II. Famahowoe ba hili Garisi ba fangelifi ba hili Gebala.

1I. Ba labeʼe li ba zato Moze ba salaw̃a Ndraono Gizeraëli, lamane: Miʼoʼõ goroisa andrõ fefoe, nifaʼemagoe chõmi maʼõchṍ! 2Ba na no miʼõtõ Joridano, na no miroegi danõ andrõ, nibeʼe Lowalangioe, Jehowa, chõoe, ba õtaroeʼõ chõoe gowe seboea, õʼafoesiʼõ bõtoea, (Jos. 4, 3), 3ba õsoera ba detenia daroma li goroisa andrõ fefoe; ha siʼai õroegi si jefo, enaʼõ õchamõ danõ andrõ, nibeʼe Lowalangioe, Jehowa, chõoe, enaʼõ itõrõ nifaboeʼoe Lowalangi ndra toeaoe, Jehowa, chõoe, tanõ si falawoe soesoe ba w̃e w̃ani. 4Ha siʼai miʼõtõ Joridano, ba mitaroeʼõ gowe andrõ, niw̃aʼõgoe chõmi maʼõchṍ; ba hili Gebala mitaroeʼõ ba miʼafoesiʼõ bõtoea. 5Ba õfaʼanõ gõi naha wameʼe soemange chõ Lowalangioe, Jehowa, ba daʼõ, naha wameʼe soemange kara, si tenga nitotooe siʼõli; 6kara si lõ moetoto õbeʼe naha wameʼe soemange chõ Lowalangioe, Jehowa, ba õbeʼe zoemange Lowalangioe, Jehowa, ba detenia, soemange nitoenoe, (Moz. II. 20, 25), 7ba soemange fangorifi õtaba, ba õʼā ba daʼõ, ba omoeso dõdõoe fõna Lowalangioe, Jehowa. 8Ba ba dete gowe no mege, ba õsoera daroma li goroisa andrõ fefoe, õhaogõ wanoera. 9Ba hoemede Moze ba ere ono Lewi ba Ndraono Gizeraëli fefoe, lamane: Mihonogõ ami ba mifondrondrongo, jaʼami Iraono Gizeraëli! Maʼõchṍ andre, ba no tobali banoea Lowalangimi, Jehowa, ami; 10ba mifondrondrongo saʼae li Lowalangimi, Jehowa, ba miʼoʼõ goroisania, awõ nifachoinia, nifaʼemagoe chõoe maõchṍ.

11II. Ba ibeʼe li ba zato Moze, me loeo daʼõ, imane: Na no miʼõtõ Joridano, ba ndramoeʼiagõ hili Garisi õsa, 12ba wamahowoeʼõ sato, jaʼia mado Zimeoni ba mado Lewi ba mado Joeda ba mado Isasari ba mado Josefo ba mado Mbenijami; 13ba tánõ bõʼõ andrõ, ba ba hili Gebala laʼiagõ, ba wangelifi, jaʼia mado Roebeno ba mado Gado ba mado Gaseri ba mado Zeboeloni ba mado Dano ba mado Nafetali. 14Ba ono Lewi, ba latema laʼeboeaʼõ lira, lamane ba Ndraono Gizeraëli fefoe: 15Niʼelifi zamazõchi adoe nifofoë ba ma nifahele, necheneche doeka ba sameʼe ba nahania, nibiniʼõ! Ba latema dania li sato fefoe, lamane: Jadoehoe! (Moz. II. 20, 4). 16Niʼelifi zangoʼaja amania ba ma inania! Ba lamane sato fefoe: Jadoehoe! (Moz. II. 21, 17). 17Niʼelifi zamawoeʼa gowe nola chõ nawõnia! Ba lamane sato fefoe: Jadoehoe! (F. 19, 14). 18Niʼelifi zamaeloengoe niha saoeʼa! Ba lamane sato fefoe: Jadoehoe! (Moz. III. 19, 14). 19Niʼelifi zamoejoeʼõ hoekoe, na so hoehoeo niha bõʼõ ba hoehoeo zi lõ ama, si lõ ina, ba hoehoeo lacha mbanoea; ba lamane sato fefoe: Jadoehoe! (Moz. II. 23, 6). 20Niʼelifi zi horõni donga namania! me no ibokai gambala chõ namania. Ba lamane sato fefoe: Jadoehoe! (Moz. III. 18, 8). 21Niʼelifi zi horõni hadia ia zaliw̃aliw̃a ba danõ! Ba lamane sato fefoe: Jadoehoe! (Moz. II. 22, 19). 22Niʼelifi zi horõni talifoesõnia alawe, he ono namania, ba he ono ninania! Ba lamane sato fefoe: Jadoehoe! (Moz. III. 18, 9). 23Niʼelifi zi horõni inania matoeania! Ba lamane sato fefoe: Jadoehoe! 24Niʼelifi zamoenoe awõnia, ba zi tobini! Ba lamane sato fefoe: Jadoehoe! (Moz. II. 21, 12). 25Niʼelifi zi manga ganaʼa, ba wamoenoe si lõ horõ! Ba lamane sato fefoe: Jadoehoe! (Moz. II. 23, 8). 26Niʼelifi zi lõ manõrõ taroma li oroisa andrõ, woloʼõ jaʼia! Ba lamane sato fefoe: Jadoehoe! (Gal. 3, 10).

Soera Moze V Faza 26

I. Oroisa ba wameʼe si aʼa mboea nowi. II. Si samboea niʼofoeloe. III. Famarooe tõdõ na.

1I. Na no õroegi dania danõ andrõ, nibeʼe Lowalangioe, Jehowa, chõoe, ochõtamõ, na no õʼochõgõ ba na no ahonoʼõ ba danõ, 2ba õhalõ õsa zi aʼa ngawalõ mboea danõ fefoe, nisõndraoe ba danõoe andrõ, nibeʼe Lowalangioe, Jehowa, chõoe, õbeʼe ba ndraga ba mõiʼõ ba mbanoea andrõ, nitoejoe Lowalangioe, Jehowa, nahia dõinia dania; (Moz. II. 23, 19), 3ba õʼondrasi gere, ere na loeo daʼõ, ba õmane chõnia: Oefadoehoeʼõ maʼõchṍ chõ Lowalangioe, Jehowa, wa no oeroegi danõ andrõ, nifaboeʼoe Jehowa fameʼe chõda, si no mõi ba hõloe ia chõ ndra toeada. 4Ba jamoetema ba dangaoe ndraga andrõ ere, jamoebeʼe fõna naha wameʼe soemange andrõ chõ Lowalangioe, Jehowa, 5ba õtema õmane dania fõna Lowalangioe, Jehowa: Dawa Garamo sanõrõnõrõi tanõ doeagoe mege ba isaw̃a misi tooe danõ Miseraji, lõ atotṍ zi fao chõnia, ba si fatewoe ia ba daʼõ, ba tobali soi seboea ba daʼõ, sato niha ba sabõlõ. (Moz. I. 46, 1). 6Ba me laʼosiwawõi ita Dawa Miseraji, me lafakao ita ba me lafohalõw̃õ ita halõw̃õ sabeʼe, 7ba taʼangarõfi li Jehowa, Lowalangi ndra toeada andrõ, ba ifondrondrongo wangarõngarõda andrõ Jehowa, ba iʼila waʼanoemanada ba famakaoda ba faʼatosasada. 8Ba iheta ita ba danõ Miseraji Jehowa tangania sabeʼe andrõ ba taʼionia andrõ, si no moeʼoroʼõ, faʼabõlõnia sataʼoe ita, ba no fao dandra ba ilaʼila. 9Ba no iʼohe ita ba daʼe ba no ibeʼe chõda danõ andre, tanõ zi falawoe soesoe ba w̃e w̃ani. 10Ba jāʼe niʼohegoe, si aʼa mboea danõ andrõ, nibeʼeoe chõgoe, jaʼoegõ Jehowa! Ba õbeʼe chõ Lowalangioe, Jehowa, ba mangaloeloe ndraʼoegõ chõ Lowalangioe, Jehowa, 11ba õʼomoesoiʼõ dõdõoe ba howoehowoe andrõ fefoe, nibeʼe Lowalangioe Jehowa, chõoe, ba awõoe zoroijomooe fefoe ba ono Lewi andrõ ba niha bõʼõ, si so ba chõmi.

12II. Ba na no ahori dania õbeʼe zi samboea niʼofoeloe nisõndraoe fefoe, na dõfi si tõloe andrõ, dõfi nibeʼe niʼofoeloe andrõ, na no õbeʼe ba nono Lewi ba ba niha bõʼõ andrõ ba ba zi lõ ama, si lõ ina ba ba lacha mbanoea, enaʼõ laʼā ba mbanoeami ba enaʼõ aboeso ira, (F. 14, 28), 13ba õmane fõna Lowalangioe, Jehowa: No oeheta jomo niʼamoniʼõ andrõ, no oebeʼe ba nono Lewi ba ba niha bõʼõ andrõ ba ba zi lõ ama, si lõ ina ba ba lacha mbanoea, no oeʼoʼõ sibai goroisa andrõ, nibeʼeoe chõgoe; sambalõ lõ nisawõgoe oroisamõ, sambalõ lõ solifoedo. 14Maʼifoe lõ niʼagoe me aboe dõdõgoe ba maʼifoe lõ nihalõgoe, me si raʼiõ ndraʼodo ba maʼifoe lõ nibeʼegoe fangasi. No oefondrondrongo goroisa Lowalangigoe, Jehowa, no ahori oeʼoʼõ niʼoroiʼõmõ chõgoe. 15Faigi mitooe moroi ba nahiamõ andrõ, niʼamoniʼõ, moroi ba zoroego, ba fahowoeʼõ mbanoeaoe, Iraono Gizeraëli, awõ danõ andrõ nibeʼeoe chõma, si mane niw̃aʼõoe chõ ndra toeama, si no mõiʼõ ba hõloe, tanõ si falawoe soesoe ba w̃e w̃ani.

16III. Maʼõchṍ andre iw̃aʼõ chõoe Lowalangioe, Jehowa, gamachoita andrõ, awõ hoekoe andrõ niʼoʼõ; ba tõngõni saʼae ba oʼõ moroi siʼaikõ ba dõdõoe ba moroi siʼaikõ ba geraʼeraoe! 17No õrongo chõ Jehowa maʼõchṍ, wa edõna ia Lowalangioe ia, awõ wa sanõrõ lala andrõ chõnia ndraʼoegõ, ba soloʼõ nifachoinia ba oroisania ba hoekoenia, ba samondrongo linia. 18Ba no iw̃aʼõ chõoe maʼõchṍ Jehowa, õfaboeʼoe, wa soi tána chõnia ndraʼoegõ, awõ wa edõnaʼõ õʼoʼõ goroisania fefoe, (Moz. II. 19, 5. Jes. 43, 1. Tit. 2, 14). 19Enaʼõ alaw̃a jaw̃a niha bõʼõ fefoe, nifazõchinia, ndraʼoegõ ibeʼe, nisoeno ba niʼeboeaʼõ tõi ba nifosoemange, ba enaʼõ soi niʼamoniʼõ chõ Lowalangioe, Jehowa, ndraʼoegõ, enaʼõ itõrõ niw̃aʼõnia andrõ.

Soera Moze V Faza 25

I. Oroisa sachõchõ. II. Ba wangai lacha. III. Oroisa sachõchõ zoei. IV. Oroisa ba wangohori Iraono Gamaleki.

1I. Na no moeʼohe ba rafe niha si fagoeagoea ba na no moeʼetoeʼõ hoekoe, na no moebeʼe aefa zi lõ horõ ba na no moeʼetoeʼõ hoekoe zi so horõ, 2ba na nibõzi zi so horõ andrõ, ba jamoew̃aʼõ sangoehoekoe lafadõlõ tooe, ba lahareʼõ chõnia, ba zi so sangoehoekoe, ndrohoendrohoe ba zalania andrõ. 3Õfa woeloe zi tola iw̃aʼõ lahareʼõ chõnia, ba bõi italoeʼi daʼõ, fa bõi teʼoʼaja dalifoesõoe, wamaigioe, na oja na baero õ lahareʼo chõnia. (Kor. II. 11, 24). 4Bõi fosareʼa gõrõbao samõbõrõ fache. (Kor. I. 9, 9. Tim. I. 5, 18).

5II. Na so zoroedoe ba mbanoea si fatalifoesõ, ba na mate zi samõsa lõ ono matoea, ba bõi jamõi nihalõ niha bõʼõ, baero, woʼomonia; solacha jaʼia andrõ zi mõi chõnia, ihalõ dongania, itõrõ chõnia gõmõ zolacha andrõ. (Moz. I. 33, 8. Mat. 22, 24). 6Ba na moʼono ia, ono matoea si aʼa, ba lafotõi ono zi mate andrõ, fa bõi taja dõinia ba Ndraono Gizeraëli. 7Ba na lõ edõna ndra matoea andrõ ihalõ lachania, ba jamõi ba mbawa gõli, ba zalaw̃a, lachania andrõ, ba imane: Lõ edõna gaʼagoe andrõ iʼorifi dõi dalifoesõnia, ba Ndraono Gizeraëli; lõ itõrõ chõgoe gõmõ zolacha andrõ. (Roet. 4, 6). 8Ba ndramoefakaoniʼõ ia salaw̃a mbanoeara andrõ, ndrafahoehoeo chõnia, ba na lõ aloeloe dõdõnia, na imane: 9Lõ omasido oehalõ ia, ba jamõi chõnia lachania, ba zi so salaw̃a no mege, iheta mbadagahe ba gahenia zamboea, ba idiloi mbawa, ba itema imane: Daʼõ milaoe ba ndra matoea fefoe, si lõ edõna mamongaʼõtõ talifoesõra. 10Ba tõi ngaʼõtõnia ba Ndraono Gizeraëli saʼae, ba ”Ngaʼõtõ zi lõ badagahe.”

11III. Na so zi fasõndra, si fatalifoesõ, ba na so ndra alawe zi samõsa, ba wangefaʼõ dongania ba danga zamago jaʼia, ba na iraʼoe wamatoea daʼõ, 12ba õʼew̃a dangania andrõ, bõi hachõsi tõdõ. 13Bõi domboea zaga ba dokosa chõoe, samboea zeboea ba samboea zideʼide. (Moz. III. 19, 35). 14Ba bõi domboea laoeroe baomooe, samboea zeboea ba samboea zideʼide. 15Saga satoelõ, si lõ ambõ, õfake, awõ laoeroe satoelõ, si lõ ambõ, enaʼõ anaoe nosooe ba danõ andrõ, nibeʼe Lowalangioe, Jehowa chõoe. 16Me no sogoro Lowalangioe, Jehowa, dozi solaoe si manõ, dozi sanõrõ si lõ atoelõ.

17IV. Tõrõtõrõ tõdõoe hadia nilaoe Ndraono Gamaleki andrõ chõoe, me miʼotarai danõ Miseraji no. (Moz. II. 17, 8). 18Wa lõ laʼataʼoefi Lowalangi, wangahawoei jaʼoegõ ba lala, me si tebai saʼae ndraʼoegõ, ba me no erege dõdõoe, wa fabali manõ chõoe fefoe zi tebai andrõ, si so moroi foeri, labeʼe. 19Ba na no ahono dania ndraʼoegõ ba danõ, ibeʼe Lowalangioe, Jehowa, ba danõ andrõ nibeʼe Lowalangioe, Jehowa, chõoe, ondrõitamõ ba madooemõ dania, na no itimba nemali fefoe, si tefasoei jaʼoegõ, ba õhori ba danõ Ndraono Gamaleki andrõ, fabaja tõira; bõi olifoegõʼõ! (Sam. I. 15, 3).

Soera Moze V Faza 24

I. Oroisa ba zi faronga. II. Oroisa ba wamaigi si noemana.

1I. Na so zangai ira alawe, na iʼowaloe, ba na tebai iʼomasiʼõ dania, me no iʼila ba chõnia zi fatoewoe chõnia, ba na no ibeʼe chõnia zoera wangefa ba na no ifofanõ baomonia, (Mat. 5, 31; 19, 7. Mar. 10, 4), 2ba na noa saʼae mõi donga niha bõʼõ, me no aefa aheta ia baomonia, 3ba na no ibeʼe gõi zoera wangefa, na no ifofanõ gõi baomonia ira matoeania si samõsa andrõ, me anoezoe dõdõnia gõi chõnia —, ma na no mate ndrongania si samõsa andrõ, sangowaloe jaʼia mege: 4ba lõ tola ifoeli ihalõ ira matoeania si fõfõna andrõ, sangefaʼõ jaʼia mege, enaʼõ dongania zoei, me no itehe, raʼiõ ia labeʼe, me no sogoro Jehowa zi manõ, ba bõi fatõrõ horõ ba danõ andrõ, nibeʼe Lowalangioe, Jehowa, chõoe, ochõtaoe. 5Na so zi bohooe mangowaloe, ba acha lõ fao ia ba wanoewõ, ba lõ lafoʼõmõ ia hadia ia; dõfi aefa ia, fa bõi mofanõfanõ ia, enaʼõ iʼomoesoiʼõ dõdõ ndra alawe andrõ, nihalõnia. (F. 20, 7).

6II. Bõi lahalõ gade lõsoe, ba he ha haloe; amaedola lahalõ gade noso, na lahalõ daʼõ. 7Na teʼila zondraʼoe iwania, Iraono Gizeraëli, ba na iʼosawoejoe, ba ma na iʼamawa, ba si mate zanagõ andrõ. Õhori ba chõmi zi lõ sõchi. (Moz. II. 21, 16). 8Faigifaigi sibai ba wamakao andrõ, booe aoeri andrõ; õtõngõni sibai niw̃aʼõ gere, ono Lewi, ba õʼoʼõ; oroisagoe andrõ chõra, ba mitõrõ sibai. (Moz. III. 13, 2). 9Tõrõtõrõ tõdõ hadia nifatõrõ Lowalangioe, Jehowa, chõ Mirija no, ba lala, me miʼotarai danõ Miseraji! (Moz. IV. 12, 10). 10Na õbeʼe chõ nawõoe nifalali, hadia ia, ba lõ tola mõiʼõ ba nomonia mangai gade chõnia. 11Tooe õʼiagõ, ba nibeʼeoe nifalali, ba iʼohe tooe chõoe gade. 12Ba na niha si noemana ia, ba bõi mõrõʼõ so ba dangaoe gade andrõ nibeʼenia; 13na aechoe loeo, ba õfoeli chõnia gade andrõ, enaʼõ ibeʼe baloebaloenia mbaroenia seboea, na mõrõ ia, ba enaʼõ ifahowoeʼõ ndraʼoegõ, ba niha satoelõ ndraʼoegõ iw̃aʼõ Lowalangioe, Jehowa. (Moz. II. 22, 26). 14Enoni si noemana ba sambõ balazo, ba bõi fakao, he na oi jaʼami, ba he na niha bõʼõ, si so ba danõmi, ba mbanoeami misa. (Moz. III. 19, 13). 15Ero owi õbeʼe loeonia, bõi naʼi õbaseʼõ waʼaechoe loeo, me no si noemana ia ba me hoemoeloe dõdõnia wanema, fa bõi iʼangarõfi li Jehowa, ba chõmõ andrõ, ba fa bõi tobali horõoe. 16Bõi mate nama bõrõ ndraono, ba bõi mate ndraono bõrõ nama; ba horõnia mate zamõsana. (Raz. II. 14, 6. Jer. 30, 31. Hez. 18. 20). 17Bõi foejoeʼõ hoekoe, na so hoehoeo niha bõʼõ ba ma na hoehoeo zi lõ ama, si lõ ina; ba bõi halõ gade mbaroe lacha mbanoea. (Moz. II. 23, 9. F. 16, 19). 18Tõrõtõrõ tõdõoe, wa no sawoejoe ndraʼoegõ ba danõ Miseraji mege, awõ wa no iʼefaʼõ ndraʼoegõ ba daʼõ Lowalangioe, Jehowa, andrõ oew̃aʼõ chõoe wolaoe si manõ. 19Na õbasi mboea nowioe, ba na so zolifoeʼõ ba danõ, fache, ba bõi foeliʼõ wangai; acha õ niha bõʼõ ba õ zi lõ ama, si lõ ina ba õ lacha mbanoea, enaʼõ ifahowoeʼõ ndraʼoegõ Lowalangioe, Jehowa, ba nilaoe dangaoe, fefoe. (Moz. III. 19, 9). 20Ba na õteteoe mboea falo chõoe, ba bõi aloealoei woʼoewoʼoe ba ndraha misa; acha õ niha bõʼõ, ba õ zi lõ ama, si lõ ina ba õ lacha mbanoea. 21Ba na õʼozaragõ mboea nagoe ba kaboe chõoe, ba bõi ozaragõ na gõi woʼoewoʼoe dania; acha õ niha bõʼõ ba õ zi lõ ama, si lõ ina ba õ lacha mbanoea. 22Tõrõtõrõ tõdõoe, wa no sawoejoe ndraʼoegõ ba danõ Miseraji mege; andrõ oew̃aʼõ chõoe wolaoe si manõ.