Soera Zangoehoekoe Faza 2

I. Itegoe Ndraono Gizeraëli sinenge Jehowa. Faʼaboe dõdõra. II. Laʼerogõ Jehowa Iraono Gizeraëli ba teʼotoeʼõ ira. He wisa ba gõtõ Zangoehoekoe andrõ.

1I. Ba so zinenge Jehowa si otarai Giligala, weʼamõi misi jaw̃a ba Mbochimi, ba imane: No oeʼohe mijaw̃a ami moroi ba danõ Miseraji ba no oefasao ami ba danõ andre, nifaboeʼoegoe chõ ndra toeami, fahõloesa. Ba no oefaboeʼoe: Lõ oewoeʼai wawoeʼoesa li andrõ chõgoe chõmi, iroegi zi lõ aetoe; (Moz. I. 17, 7); 2ba bõi fawoeʼoe li ami ba niha ba danõ andre; naha wameʼe soemange andrõ chõra, ba midoedoegõ. Ba no lõ nifondrondrongomi oroisagoe — hadia nilaoemi? (Moz. V. 7, 2; 12, 3). 3Ba iadaʼe, ba oewaʼõ chõmi: Lõ oetimba ira fõnami, enaʼõ amaedola ndroi ira ba ngaimi, ba Lowalangira, ba enaʼõ amaedola dandraw̃a chõmi. (Moz. V. 7, 16. Jos. 23, 13). 4Ba me iw̃aʼõ daʼõ ba Ndraono Gizeraëli fefoe sinenge Lowalangi andrõ, ba meʼgeʼege niha sato fefoe. 5Andrõ wa labeʼe tõi naha andrõ Mbochimi (segeʼege). Ba labeʼe zoemange Jehowa ba daʼõ. 6Me no ifofanõ niha Josoea, ba lafazaw̃a ira Iraono Gizeraëli, mõi ira moeʼochõgõ danõ, isaw̃a dána chõnia zamõsana. 7Ba laʼoʼõ chõ Jehowa niha sato ba gõtõ Josoea andrõ ba ba gõtõ zatoea andrõ, sanaoe noso moroi chõ Josoea, si no anehe zeboea andrõ, nilaoe Jehowa ba Ndraono Gizeraëli. (Jos. 24, 31). 8Ba mate Josoea andrõ, ono Noeni, enoni Jehowa, 110 fache waʼanaoe nosonia. 9Ba lakoʼo ia ba dána chõnia tanõ andrõ, ba Dimenata Heresi, ba hili mado Geferaji, jõoe hili Gasi.

10II. Ba ahori teʼoroedoegõ chõ ndra toeara zi sagõtõ niha andrõ, ba sagõtõ zi so dania foerira, niha si lõ mangila Jehowa ba he nilaoenia andrõ ba Ndraono Gizeraëli. 11Ba si lõ omasi Jehowa lalaoe Iraono Gizeraëli, lafosoemange Mbaʼali andrõ. (Moz. IV. 25, 1 b. t. Raz. II. 2, 1 b. t. F. 8, 33). 12Ba laʼerogõ Jehowa, Lowalangi ndra toeara, si no mangeheta jaʼira ba danõ Miseraji, lagoʼõgoʼõ Lowalangi bõʼõ, Lowalangi soi niha andrõ, si tefasoei jaʼira õsa, mangaloeloe ira chõra, ba fangandrõ fõnoe Jehowa daʼõ. 13Ba me laʼerogõ Jehowa, me lafosoemange Mbaʼali ba Asera andrõ, 14ba mofõnoe Jehowa ba Ndraono Gizeraëli, ba ibeʼe ba danga zamaraʼoe, enaʼõ laraboeraboe hadia ia chõra; iloeloe ira ba danga nemalira, si fasoei, tobali tebai saʼae lalaw̃a nemalira andrõ. 15Gofoe heza mõi ira, ba oedoera danga Jehowa, ba wamakiko, itõrõ nidaõʼõdaõʼõ Jehowa, si fahõloe ia chõra. Ba tosasa sibai ira ibeʼe [Jehowa]. (Moz. III. 26, 17). 16Ba iʼasogõ zangoehoekoe Jehowa; daʼõ dania zangefaʼõ jaʼira ba danga zamaraʼoe andrõ. 17Ba he li zangoehoekoe andrõ chõra, ba lõ lafondrondrongo, omasi ira Lowalangi bõʼõ ba mangaloeloe ba daʼõ. No alio sibai larõi lala andrõ, nitõrõ ndra toeara mege, woloʼõ oroisa Lowalangi: bõʼõ wolaoerā. 18Ba na iʼasogõ chõra zangoehoekoe Jehowa, ba itolo zangoehoekoe andrõ Jehowa, wangefaʼõ jaʼira ba danga nemalira, gõtõ waʼara zangoehoekoe andrõ. So sa waʼahachõ dõdõ Jehowa ba wangarõngarõra andrõ ba zamakao jaʼira, ba zamalangõgõ jaʼira andrõ. 19Ba na no mate zangoehoekoe, ba lafoeli lalaoe zi lõ sõchi, sabõlõbõlõ moroi ba nilaoe ndra amara, woloʼõ ba Lowalangi bõʼõ, ba wamosoemange daʼõ ba ba wangaloeloe chõra. Lõ labõhõli wolaoera andrõ ba boeaboeara andrõ, boeaboea zabeʼe tandro. 20Ba mofõnoe Jehowa ba Ndraono Gizeraëli, ba imane: Me no isawõ soi andre gamachoita ba wawoeʼoesa li andrõ chõgoe, nifachoigoe chõ ndra amara, ba me lõ niʼoʼõra oroisagoe andrõ, 21ba samõsa lõʼõ saʼae oetimba fõnara soi niha andrõ, nisaigõ Josoea, me mate ia, (Jos. 23, 13), 22ba wameʼe fanandraigõ Ndraono Gizeraëli jaʼira andrõ, na latõngõni lala andrõ chõ Jehowa, ba wanõrõ jaʼia, si mane fanõngõni ndra toeara fõna, ba na lõʼõ. 23Ba tobali itehe Lowalangi, lõ teboelõ soi niha andrõ; lõ idaʼidaʼi wa nimba jaʼira ba lõ ibeʼe ba danga Josoea.