Soera Moze IV Faza 22

I. Lõ iʼoʼõ Bileamo andrõ, me ifakaoniʼõ ia Balaki. II. Ifoeli ifatenge zinenge chõ Mbileamo Balaki. Mõi ia ba ibaʼa lala galidenia malaʼika. III. Iroegi Mbalaki Bileamo.

1I. Aefa daʼõ, ba latohoegõ wofanõ Iraono Gizeraëli ba molombase dania ba zaloʼo, ba danõ Ndraono Moabi, jefo Joridano, ba gamaoedoe Jericho. 2Ba iʼila Balaki, ono Zifori andrõ, fefoe nilaoe Ndraono Gizeraëli ba Ndraono Gamori. 3Ba ataʼoe sibai Ndraono Moʼabi Ndraono Gizeraëli; ato sibai sa ira, ba hoemocha mboe Ndraono Moabi Ndraono Gizeraëli andrõ. 4Ba lamane Iraono Moabi ba zalaw̃a Ndraono Midiano: Ba niʼilada maʼõchṍ, ba laʼā manõ fefoe zi tefasoei jaʼita niha sato sibai andrõ, si mane saw̃i si matoea, na laʼā ndroeʼoe ba mbenoea. Ba razo Ndraono Moʼabi, me loeo daʼõ, ba jaʼia Mbalaki andrõ, ono Zifori. 5Ba ifatenge zinenge chõ Mbileamo, ono Mbeori, ba Wetori, ba mbewe Oiferati, ba danõ niwara, ba wogaoni jaʼia, imane chõnia: So niha, saheta ba danõ Miseraji; no lahawoei danõ, ha waʼebolo, ba iadaʼe, ba molombase ba gamaoedoegoe. (Jos. 24, 9). 6Ba aine ba elifi chõgoe niha andrõ, me tebai oelaw̃a; ma atṍ oeʼila dania oeʼalani ira ba oetimba ba danõgoe. Oeʼila sa: nifahowoeʼõmõ, ba dõrõdõrṍ nifahowoeʼõ ba niʼelifimõ, ba dõrõdõrõ niʼelifi! 7Ba mangefa zatoea Ndraono Moabi ba satoea Ndraono Midiano, laʼohe loeo waetasa, ba laroegi Mbileamo, ba lafaʼema chõnia niw̃aʼõ Mbalaki. 8Ba imane chõra: Mifõrõ, ba oew̃aʼõ li chõmi, balazi hadia niw̃aʼõ Jehowa chõgoe. Ba laʼiagõ chõ Mbileamo, satoea Ndraono Moabi andrõ. 9Ba mõi Lowalangi chõ Mbileamo, imane chõnia: Ha niha domeoe andrõ? 10Ba itema li Lowalangi Bileamo, imane: Balaki andrõ, ono Zifori, razo Ndraono Moabi, no ifatenge zinenge chõgoe, imane: 11Hiza niha, saheta ba danõ Miseraji, no lahawoei danõ ha waʼebolo, ba aine, ba elifi ira chõgoe ma atṍ abeʼe ndraʼo oesoewõ ira ba oetimba. 12Ba imane Lowalangi chõ Mbileamo: Lõ tola mõiʼõ awõra, lõ tola õʼelifi niha andrõ, me no nifahowoeʼõ. 13Ba me moloeo ba iw̃aʼõ li Bileamo ba zatoea andrõ chõ Mbalaki, imane: Mifoeli manõ ami ba chõmi; lõʼõ sa itehe chõgoe Jehowa, mõido awõmi. 14Ba lafazaw̃a ira satoea Ndraono Moabi ba laroegi Mbalaki ba lamane: Lõ edõna Mbileamo mõi awõma.

15II. Ba ifoeli ifatenge zinenge Balaki, sato ba salaw̃a, seboea moroi ba daʼõ no mege. 16Ba me laroegi Mbileamo daʼõ, ba lamane chõnia: Daʼõ niw̃aʼõ Mbalaki, ono Zifori: Bõi w̃aʼõ lõ mõiʼõ chõgoe! 17Eboea sibai loeooe oebeʼe, ba fefoe hadia ia niw̃aʼõoe chõgoe, ba oeʼoʼõ; ba ae elifi chõgoe niha andrõ! 18Ba imane Bileamo ba mbanoea Mbalaki andrõ: Ba he afõnoe nomonia firõ ba anaʼa ibeʼe chõgoe Balaki, ba tebai sa atṍ oefadaõ niw̃aʼõ Lowalangigoe Jehowa, he ba hoehoeo sideʼide, ba he ba hoehoeo seboea. 19Ba mifõrõ gõi ba daʼe, bongī, enaʼõ oerongo, hadia niw̃aʼõ Jehowa iadaʼe. 20Ba ba zi bongi, ba mõi Lowalangi chõ Mbileamo, imane chõnia: Na ba wogaoni jaʼoegõ mõi niha andrõ, ba faoso, ba ae awõra, ba bõi laoe zi tenga niw̃aʼõgoe chõoe. 21Ba ihoelõ wongi ifosela galidenia Bileamo, mõi ia awõ zalaw̃a draono Moabi andrõ. 22Ba mofõnoe Lowalangi, bõrõ weʼamõinia andrõ; ba iagõ lalania malaʼika Jehowa ba wanenaw̃a jaʼia; no fakoedo ia ba hoeloe galidenia ba fao chõnia zawoejoenia, daroea. 23Ba me iʼila kalidenia, no so ba lala malaʼika Jehowa ba sara wõda ba dangania, si no isõbi, ba iholeʼõ ia ba zinga lala, itõrõ mbenoea, Ba ibõzi galide Bileamo, enaʼõ ifoeli itõrõ lala. 24Ba iʼagõ ziseʼise lala malaʼika Jehowa, ba gotaloea kaboe nagoe, ba zi so õli, faoma fatambai. 25Ba me iʼila malaʼika Jehowa kalide, ba ifadege ia ba gõli, ilazi gahe Mbileamo ba gõli; ba ifoeli ibõzi ia. 26Ba ifoeli mowaõwaõ malaʼika Jehowa ba iʼagõ ziseʼise sibai, si lõ lala wangoholeʼõ, he ba gambõlõ ba he ba gabera. 27Ba me iʼila malaʼika Jehowa kalide, ba ibalõdoehini tooe danõ, barõ Mbileamo. Ba mofõnoe Mbileamõ, ihareʼõ chõnia mbõzibõzi. 28Ba ifehede galide Jehowa; ba imane chõ Mbileamo: Hadia horõgoe chõoe, wa õbõzibõzido, no medõloe saʼae? (Fet. II. 2, 16. Joed. a. 11). 29Imane Bileamo chõ galide: Me no õʼoʼaja ndraʼodo! Enaʼõ na so chõgoe ziʼõli, ba noa saʼae oeboenoeʼõ! 30Ba imane kalide chõ Mbileamo: Hadia, tenga sa kalideoe ndraʼo, si fakoedo ndraʼoegõ ba hoeloe, sagõtõ faʼara, irege maʼõchṍ andre? Hadia, no irai amoeatagoe, oelaoe chõoe zi manõ? Ba imane: Lõʼõ! 31Ba ibokai hõrõ Mbileamo Jehowa, ba iʼila malaʼika Jehowa, si so ba lala, sara wõda nidõni ba dangania. Ba ifaondrõ ia, ba ifalõgoe tooe ia ba danõ. 32Ba imane chõnia malaʼika Jehowa: Hana wa õbõzibõzi galide andrõ chõoe, no medõloe saʼae? Jaʼodo aʼi zombaʼa lala chõoe, me no lala si lõ sõchi wamaigigoe. 33Ba kalide andrõ, ba no iʼilado, ba no medõloe iholeʼõ ia chõgoe; na lõ iholeʼõ ia menaʼõ, ba mege saʼae oeboenoe ndraʼoegõ, ba jaʼia, ba oeʼorifi menaʼõ. 34Ba imane Bileamo chõ malaʼika Jehowa andrõ: Horõgoe daʼõ, lõʼõ sa oeʼila, wa jaʼoegõ zombaʼa lala chõgoe; ba na fatoewoe chõoe, ba oefoelido. 35Ba itema li Mbileamo malaʼika Jehowa, imane. Ae manõ awõ niha andro; ba bõi w̃aʼõ hadia zi tenga niw̃aʼõgoe chõoe! Ba fao Mbileamo ba zalaw̃a andrõ chõ Mbalaki.

36III. Ba me irongo Balaki, no so ba lala Mbileamo, ba ifaondragõ ia, irege Iri Moabi ba mbewe Garono, ba wondrege nola danõ. 37Ba imane Balaki chõ Mbileamo: Hadia, tenga no mato mendroea oefatenge zinenge chõoe, ba wogaoni jaʼoegõ? Hadia mbõrõ, wa lõ mõiʼõ chõgoe? Hadia, tebai oefosoemange ndraʼoegõ! 38Ba imane Bileamo chõ Mbalaki: Ba no sodo ae. Ba hadia, tola maõ oew̃aʼõ hadia ia? Taroma li nibeʼe Lowalangi ba mbewegoe, daʼõ niw̃aʼõgoe dania! 39Ba fao Mbileamo chõ Mbalaki, ba laroegi Giriati Choesoti. 40Ba ibeʼe soemange [Lowalangi] zaw̃i ba biribiri Balaki, ba ifaʼoheʼõ [wõfõ] õ Mbileamo ba õ zalaw̃a andrõ, awõnia fao. 41Ba mahemoloe õ, ba ihoelõ wongi Balaki wolohe Bileamo, ifasao mijaw̃a ba Mbamoti Mbaʼali; ba daʼõ oroma chõnia Ndraono Gizeraëli õsa.