Soera Moze IV Faza 23

I. Famaʼeleʼõ Mbileamo si fõfõna. II. Fanete wamaʼeleʼõ ai fõfõna.

1I. Ba imane Bileamo chõ Mbalaki: W̃aʼõ wamaʼanõ naha wameʼe soemange ba daʼe, fitoe, ba fitoe hõnagõ chõgoe ba daʼe ono zaw̃i si matoea ba fitoe mbiribiri si matoea. 2Ba iʼoʼõ Balaki niw̃aʼõ Mbileamo, ba labeʼe zoemange Balaki ba Bileamo, samboesamboea naha wameʼe soemange, ba sarasara nono zaw̃i ba sagesageoe mbiribiri si matoea. 3Ba imane Bileamo chõ Mbalaki: Iagõ daʼe, ba ngai zoemange nitoenoe; mofanõ ndraʼo, tabeʼe ifaʼeleʼõ ia chõgoe Jehowa, ba hadia niʼoromaʼõnia chõgoe, ba oeʼombachaʼõ chõoe. Ba mõi ia ba hilihili. 4Ba iʼoromaʼõ ia Lowalangi chõ Mbileamo, ba imane chõnia daʼõ: Naha wameʼe soemange andrõ, si fitoe, ba no oefaʼanõ, ba samboesamboea naha wameʼe soemange, ba no sarasara nono zaw̃i ba sagesageoe mbiribiri si matoea oebeʼe soemange. 5Ba ibeʼe ba mbewe Mbileamo daroma li Jehowa, imane chõnia: Foeliʼõ chõ Mbalaki, ba õmanõ chõnia. 6Ba ifoeli ia chõnia; ba lõ si teboelõ ia ba ngai zoemange andrõ chõnia, ba awõnia zatoea Ndraono Moabi fefoe. 7Ba iw̃aʼõ niw̃aʼõnia andrõ, imane: ”Moroi ba Garamo ifahalõʼõ ndraʼo Balaki, moroi ba hili tanõ ba gatoemboecha loeo ifakaoniʼõ ndraʼo razo Ndraono Moabi: ”Ae elifi chõgoe maʼoewoe Jakobo, ae lachaʼõ chõgoe Ndraono Gizeraëli!” 8He oewisa wangelifi si tenga niʼelifi Lowalangi, ba he oewisa wolachaʼõ si tenga nilachaʼõ Jehowa? 9Moroi ba zokara hili sa oeʼila ira, moroi ba zalaw̃a tanõ oroma ira chõgoe. Soi si no tonia nahia, si lõ mamadoro jaʼia ba ngenoli niha baero. 10Ha niha zangila mangerai ngawoea gawoe andrõ chõ Jakobo, ba ha niha zangila mamaʼoli liwoe Ndraono Gizeraëli? Enaʼõ na faʼamate zatoelõ tõdõ waʼamategoe dania, ba enaʼõ na faʼaetoe nosorā waʼaetoe nosogoe!” 11Ba imane Balaki chõ Mbileamo: Hadia nilaoemõ andrõ chõgoe! Ba wangelifi emaligoe oefaʼaso ndraʼoegõ; ba hiza, ba no õfahowoeʼõ! 12Ba imane: Hadia, tenga ha sambalõ nibeʼe Jehowa ba mbewegoe oew̃aʼõ?

13II. Ba imane chõnia Balaki: Taboe ba nahia bõʼõ, soroma ira chõoe — ba ha balõra õila, lõ ahori õʼila ira — ba ba daʼõ elifi ira chõgoe. 14Ba iʼohe ia ba mbenoea Zofimi ba zoezoe hili Wisiga, ba fitoe ifaʼanõ naha wameʼe soemange, ba samboesamboea naha wameʼe soemange, ba sarasara nono zaw̃i ba sagesageoe mbiribiri si matoea ibeʼe soemange. 15Ba imane Bileamo chõ Mbalaki: Baseʼõ ba daʼe, ba ngai zoemange nitoenoe, daʼoefaondragõ [Lowalangi] ba daʼõ. 16Ba ifaʼeleʼõ ia Jehowa chõ Mbileamo, ibeʼe ba mbewenia daroma li, ba imane chõnia: Foeliʼõ chõ Mbalaki ba õmanõ chõnia. 17Ba iroegi Mbalaki; ba lõ si teboelõ ia ba ngai zoemange andrõ chõnia, ba awõnia zatoea Ndraono Moabi. Ba isofoe chõnia Balaki, imane: Hadia niw̃aʼõ Jehowa? 18Ba iw̃aʼõ niw̃aʼõnia, imane: ”Laoe, jaʼoegõ Balaki, fondrondrongo! Beʼe mbõrõ dalingaoe chõgoe, jaʼoegõ, ono Zifori! 19Tenga niha Lowalangi, fa ifoeli linia, ba tenga ono niha, fa mangesa dõdõnia ba ngawalõ hadia ia. Hadia, iw̃aʼõ hadia ia, ba lõ itorõ. (Sam. I. 15, 29. Jak. 1, 17). 20Famahowoeʼõ niw̃aʼõ chõgoe, ba da mamahowoe ndraʼo ba lõ oefoeli ligoe! 21Famakao, ba lõ taʼila ba maʼoewoe Jakobo, ba faʼaboe dõdõ, ba lõ faloecha ba Ndraono Gizeraëli; itolo ira Lowalangira Jehowa, ba faʼowoeawoea dõdõ zalaw̃a tarongo ba chõra. (Jer. 50, 20). 22No iheta ira ba danõ Miseraji Lowalangi; no faʼabõlõ gõrõbao waʼabõlõra. 23Lõ fachai wanaka ba maʼoewoe Jakobo, ba lõ molemba gelemoe ba Ndraono Gizeraëli. Awai niw̃aʼõda maõchṍ, ba chõ maʼoewoe Jakobo, ba chõ Ndraono Gizeraëli andrõ: Waʼeboea nilaoe Lowalangi! 24Famazaw̃a zingo si alawe jaʼia wamazaw̃ara jaʼira, ba femaoso zingo si matoea wemaosora; lõ mõrõ ira, na lõ moeʼā gahoeloea oea, na lõ moebadoe ndro niboenoe!” (Moz. I. 49, 9). 25Ba imane Balaki chõ Mbileamo: Bõi elifi ira ba bõi fahowoeʼõ. 26Itema li Mbalaki Bileamo, imane chõnia: Tenga no oew̃aʼõ chõoe: Fefoe hadia ia niw̃aʼõ Jehowa, daʼõ oelaoe. 27Ba imane Balaki chõ Mbileamo: Taboe, daʼoeʼohe ndraʼoegõ ba nahia bõʼõ, ma itehe Lowalangi, ba daʼõ õʼelifi ira chõgoe. 28Ba iʼohe ba zoezoe hili Weoro Mbileamo Balaki, hili si otahõgõ tanõ si mate. 29Ba imane Bileamo chõ Mbalaki: W̃aʼõ wamaʼanõ naha wameʼe soemange chõgoe, fitoe, ba fitoe rozi hõnagõ chõgoe ba daʼe ono zaw̃i ba fitoe ngaʼeoe biribiri si matoea. 30Ba iʼoʼõ Balaki niw̃aʼõ Mbileamo; ba samboesamboea naha wameʼe ba sarasara nono zaw̃i ba sagesageoe mbiribiri si matoea ibeʼe soemange.