Soera Moze IV Faza 24

I. Fama eleʼõ Mbileamo fanete zi doea balõ. II. Fangoʼozoei famaʼeleʼõ.

1I. Ba me iʼila Bileamo, omasi Jehowa, tefahowoeʼõ Ndraono Gizeraëli, ba lõ iʼaloei wamaʼeleʼõ si mane ba zi mendroea mege, itema iʼotahõgõ danõ si mate. 2Ba me ifachõlõ ia, ba me iʼila Ndraono Gizeraëli solombase ba daʼõ, samboesamboea mado ba samboesamboea nahia, ba so chõnia Geheha Lowalangi. 3Ba iw̃aʼõ niw̃aʼõnia, imane: ”Daʼe niw̃aʼõ Mbileamo andre, ono Mbeori; daʼe niw̃aʼõ niha andrõ, si no teboka hõrõ. 4Daʼe niw̃aʼõ zamondrongo fehede Lowalangi, sanehe angilata chõ Zi lõ ambõ faʼabõlõ, si no alaoe tooe ba si no moeheta baloebaloe hõrõ: 5Ha lõ agasõchi nosemi, jaʼami maʼoewoe Jakobo! nahiami andrõ, jaʼami Iraono Gizeraëli. 6Si mane daso, si no ebolo misa, si mane kaboe ba mbewe nidanõ seboea, si mane gõna farasi, nitanõ Jehowa, si mane eresi ba mbewe nidanõ! 7Adoewa nidanõ ba dimba andrõ chõnia, ba si lõ ambõ idanõ nowinia. Sabõlõ moroi chõ Agagi andrõ razora, seboea sibai waʼasalaw̃ania. (Sam. I. 15, 8). 8Lowalangi andrõ zangeheta mege ba danõ Miseraji, ba no amaedola waʼabõlõ gõrõbao chõra. Niha si faʼemali chõra, ba laʼā, larasa dõla, lafatõ nono wana chõra. 9No lafadõlõ ira, mõrõ ira tooe, si mane singo, ba si mane singo si alawe; ha niha zi keani jaʼira? Ha niha zamahowoeʼõ jaʼoegõ, ba nifahowoehowoeʼõ, ba ha niha zangelifi jaʼoegõ, ba niʼelifi!” (Moz. I. 12, 3).

10II. Ba mofõnoe sibai Mbalaki chõ Mbileamo, ilaoe datawṍ. Ba imane chõ Mbileamo: Ba wangelifi emaligoe oefakaoniʼõ ndraʼoegõ, ba no ha sambalõ famahowoe chõoe, no medõloe ae! 11Ba foeliʼõ manõ saʼae chõmi; tõdõgoe, ba oeʼeboeaʼõ loeooe, ba si lõ loeo ndraʼoegõ ibeʼe Jehowa. 12Ba imane Bileamo chõ Mbalaki: Hadia, tenga no oew̃aʼõ ba zinenge andrõ, nifatengeoe chõgoe: 13He afõnoe nomonia firõ ba anaʼa ibeʼe chõgoe Balaki, ba tebai zoei oefadaõ niw̃aʼõ Jehowa ba tebai oelaoe zomasi ndraʼo, ha nibeʼe Jehowa ba dõdõgoe, ha daʼõ oew̃aʼõ. (Neh. 13, 2). 14Ba oefoelido saʼae ba niwama; ba hiza, daʼoebokai chõoe hadia nilaoe niha andrõ ba mbanoeaoe dania. 15Ba iw̃aʼõ niw̃aʼõnia, imane: ”Daʼe niw̃aʼõ Mbileamo andre, ono Mbeori, niha andrõ, si no teboka hõrõ. 16Daʼe niw̃aʼõ zamondrongo fehede Lowalangi, si no aboto ba dõdõ Fondrege zalaw̃a andrõ, sanehe angilata chõ Zi lõ ambõ faʼabõlõ, si no alaoe tooe ba si no moeheta baloebaloe hõrõ; 17”Oeʼila ia, ba lõʼõ na anehedo ia, ba arõoe na maʼifoe. Toemboe ndrõfi ba maʼoewoe Jakobo, ba siʼo zalaw̃a iʼotarai Ndraono Gizeraëli; daʼõ worasa dangidangi Ndraono Moabi, fabaja amoeʼoe maʼoewoe Zeti fefoe. (Sam. II. 8, 2. Jer. 48, 45). 18Tanõ Ndraono Gedomo, ba mõi barõ mbawara, ba Seʼira, emalira, ba mõi barõ mbawara. Ba seboea toeria nilaoe Ndraono Gizeraëli, (Sam. II. 8, 14). 19Ba maʼoewoe Jakobo iʼotarai salaw̃a, ba ihori zi no moloi mege, ba mbanoea misa!” 20Ba me iʼila Ndraono Gamaleki, ba iw̃aʼõ niw̃aʼõnia, imane: ”Si aʼa niha baero andrõ, ba jaʼia Ndraono Gamaleki, ba fozoenia, ba faʼatekiko!” (Sam. I. 15, 3). 21Ba me iʼila maʼoewoe Geni andrõ, ba iw̃aʼõ niw̃aʼõnia, imane: ”No aro nahiamõ, nifanoege ba dete gara gazoenimõ. (Moz. I. 15, 19). 22Ba faʼatekiko sa atṍ fõna Gaʼino, ha waʼara tõ na, ba laʼoloiʼõ ndraʼoegõ Dawa Asiria.” 23Ba imane na: ”Alai ita, ha niha zaoeri, na ifatõrõ zi manõ Lowalangi! 24Ba hiza nowo moroi sa ba Ndrawa Giti, fangõhõndrõgõ Ndrawa Asiria, fangõhõndrõgõ danõ si jefo; ba daʼõ gõi, ba faʼatekiko fõnania.” 25Ba ifazaw̃a ia Bileamo, ba wamoeli jaʼia ba chõra, ba mofanõ gõi Mbalaki.