Soera Moze V Faza 1

I. Hoehoeo Moze ba zato. Hikaja Ndraono Gizeraëli, iʼotarai aheta ira ba gahe hili Zinaʼi, irege laroegi Gadesi, si samoeza andrõ, safoeria. II. Famataro satoea. III. Famatenge samaoeze. Fekõkõkõkõ zato. IV. Fotoe ba wa lõ moloʼõ.

1I. Daʼe hoehoeo Moze jefo Joridano, ba danõ si mate, ba zaloʼo tanõ andrõ, ba gamaoedoe Zoefi, ba gotaloeara Warana Dofeli Labano Haseroti Disahaba, hoehoeonia ba Ndraono Gizeraëli fefoe. 2Felezara ngaloeo fofanõ lala ba hili Zeʼira, iʼotarai hili Horebi, iroegi Gadesi Mbarenea. 3Ba ba ndrõfi si õfa woeloe, me tesaʼa lõ faoro, ba mbaw̃a si felezara, ba iʼombachaʼõ ba Ndraono Gizeraëli Moze fefoe hadia ia niʼoroiʼõ Jehowa chõnia, niw̃aʼõ chõra, 4me no aefa iʼalani razo Ndraono Gamori andrõ, Sihona, ba Hesibona, ba Ogi andrõ, razo Mbazana, ba Gasaroto, ba zinga Gedera no andrõ. (Moz. IV. 21, 24). 5Jefo Joridano, ba danõ Ndraono Moabi, ibõrõtaigõ Moze ibotochi chõra goroisa andrõ, 6imane: No imane chõda Lowalangida Jehowa, ba gahe hili Horebi no: Noa waʼarami ba gahe hili andre, 7mifazaw̃a ami ba midõlõ ami ba hili Ndraono Gamori andrõ ba ba zi faola tanõ chõra, ba naloʼo tanõ, ba ba hili ba ba ndraso ba tánõ raja ba ba mbewe nasi, ba danõ Ndrawa Ganaʼana ba ba hili Libano ba iroegi nidanõ seboea andrõ, Oiferati. 8Tanõ daʼõ oebeʼe saʼae chõmi, misaw̃a ia, ba miʼochõgõ, si no mõi ba hõloe Jehowa chõ ndra toeami Aberahamo, Izaʼaki, Jakobo, ba wameʼe chõra ba ba maʼoewoera mitooe. (Moz. I. 15, 18).

9II. Ba me loeo daʼõ, ba no oemane chõmi: Tebai oetaha, na ha jaʼo zi onoro tõdõ jaʼami. (Moz. II. 18, 18. Moz. IV. 11, 12). 10No ato sibai ami ibeʼe Lowalangimi Jehowa, faʼoja ndrõfi ba mbanoea saʼae ami maʼõchṍ. 11Ba jamoebeʼe Lowalangi ndra toeami, Jehowa, mehõnõ waʼatomi andrõ tedooe ami, ba jamoefahowoeʼõ ami, si mane nifaboeʼoenia! 12Ba hadia, tola oetaha wamakao andrõ chõmi ba faʼaboe dõdõ ba hoehoeo andrõ fefoe chõmi, na ha jaʼodo? 13Miʼohe chõgoe niha satoeatoea, si sõchi toeria, dozi mado, enaʼõ oefataro satoeami. 14Ba no mitema ligoe, no mimane: Si sõchi niw̃aʼõmõ andrõ! 15Ba oehalõ hõgõ mado andrõ chõmi, niha satoetoea, si sõchi toeria, ba oefataro satoeami, hõgõ zi hõnõ ba hõgõ zi otoe ba hõgõ zi lima woeloe ba hõgõ zi dafoeloe, koemandroe ba madomi andrõ. 16Ba me loeo daʼõ, ba oebeʼe li ba zangoehoekoe jaʼami andrõ, oemane: Misechegõ niwami andrõ, ba miʼatoelõʼõ wangoehoekoe, he na so nifadõnira ba niwara, ba he na ba niha bõʼõ. 17Bõi eboea dõdõmi zamboeana, ba wangoehoekoe hadia ia; faoma mifondrondrongo niw̃aʼõra, he si noemana, ba he seboea tõi! Bõi miʼataʼoefi niha; chõ Lowalangi sa wangoehoekoe. Ba na so hoehoeo si tebai miʼasiwai, ba mi ohe chõgoe, enaʼõ oesechegõ ira. (Moz. III. 19, 15. Ngaʼõt. II. 19, 6. Moz. II. 18, 22). 18Si manõ wameʼegoe li chõmi, me loeo daʼõ, ba halõw̃õmi andrõ fefoe.

19III. Ba me aefa daʼõ ba tafazaw̃a ita ba gahe hili Horebi andrõ, ba tatõrõ danõ si mate andrõ sebolo sibai ba sataʼoe ita, maʼasagõrõ, dali goroisa Lowalangida, Jehowa, tasaw̃a hili Ndraono Gamori andrõ. Ba me no taroegi Gadesi Mbarenea, ba oemane chõmi: 20Ba no miroegi hili Ndraono Gamori andrõ, nibeʼe Lowalangida, Jehowa chõda. 21Hiza, noa saʼae ibeʼe ba dangaoe danõ andrõ Lowalangioe, Jehowa; ba ae ochõgõ, oʼõ niw̃aʼõ Lowalangi ndra toeaoe andrõ, Jehowa, chõoe. Bõi ataʼoe ndraʼoegõ, ba bõi aboe dõdõoe! 22Ba miʼondrasido, dozi ami, ba nimane: Datafowaõwaõ õsa, ba wamaoeze tanõ andrõ chõda, ba enaʼõ laʼombachaʼõ chõda lala, lalada mijaw̃a, ba he wisa mbanoea andrõ, niroegida dania. (Moz. IV. 13, 3). 23Ba me si sõchi daʼõ oew̃aʼõ, ba oetoetoejoe niha ba chõmi, felendroea, samõsa zamboea mado. 24Ba ladõlõ ira mijawa ba hili daʼõ, laroegi ndraso Esikoli ba lafaoezeï danõ. 25Ba lahalõ gõi õsa mboea danõ, laʼohe chõda, mitooe. Ba laʼombachaʼõ chõda, lamane: Tanõ andrõ, nibeʼe Lowalangida, Jehowa, chõda, ba no si sõchi. 26Ba lõ edõna ami mõi misi jaw̃a, ba mitandro niw̃aʼõ Lowalangimi, Jehowa. 27Moekõkõkõkõ ami baose chõmi, mimane: Fatioesa Jehowa chõda, wa no iheta ita ba danõ Miseraji, ba wameʼe ba danga Ndraono Gamori andrõ jaʼita, enaʼõ lahori ita. 28Ba heza atṍ tasaw̃a! Iwada andrõ zameʼe atalõ dõdõda, wangoemaʼõ: Seboea niha ira, salaw̃a moroi chõda, ba banoea, ba no seboea sibai, iroegi mbanoea si jaw̃a faʼalaw̃a gõli, ba maʼoewoe Genaki naʼi maʼila ba daʼõ. (F. 9, 2). 29Ba oemane chõmi: Bõi moehocha mboemi ba bõi miʼataʼoefi ira! 30Si fasõndra salahimi dania Lowalangimi, Jehowa, sowaõwaõ fõnami, si mane me itolo ami ba danõ Miseraji no, si no anehe ita, 31ba si mane ba danõ si mate, niʼila hõrõoe, niloeʼi Lowalangimõ, Jehowa, jaʼoegõ, nifoloeʼi niha ononia, maʼasara lala andrõ, nitõrõmi, irege ofeta ami ba daʼe. 32Ba lõ lai daʼõ fefoe, ba lõ fanõtõnami chõ Jehowa, 33Lowalangimi, sowaõwaõ fõnami ba lala, ba wamaigi olombasew̃a chõmi: ba zi bongi, ba ba galitõ, enaʼõ oroma chõmi lala nitõrõmi, ba na maʼṍchõ ba ba lawoeo. (Moz. II. 13, 21).

34IV. Ba me irongo wehedemi andrõ Jehowa, ba mofõnoe ia, fahõloe ia, imane: 35Ba niha andrõ, niha si lõ sõchi, ba samõsa lõ sangila dania tanõ si sõchi andrõ, nifaboeʼoegoe chõ ndra toeami fahõloesa. (Moz. IV. 14, 23). 36Ha Kalebi andrõ, ono Jefoene, zangila dania; chõnia ba ba ndraononia oebeʼe dania danõ andrõ, si no mõi ia, me no aʼoi dõdõnia woloʼõ chõ Jehowa. 37Chõgoe gõi mofõnoe Jehowa, bõrõ ami, tobali imane: Ba jaʼoegõ gõi, ba lõ õroegi (Moz. IV. 20, 12). 38Josoea andrõ, õno Noeni, si lõ aefaʼaefa ngoningonioe, daʼõ zondroegi dania; abeʼeʼõ dõdõnia, jaʼia dania zamaosa ba Ndraono Gizeraëli [tanõ andrõ]. 39Ba iraonomi andrõ, niw̃aʼõmi, õ nemali dania! onomi matoea, si lõ mangila na maʼõchṍ hadia zi sõchi ba hadia zi lõ sõchi, daʼõ dania zondroegi; chõra oebeʼe [danõ] ba jaʼira zi ochõgõ. (Moz. IV. 14, 31). 40Ba jaʼami andrõ, ba mifoeli ami, mifazaw̃a ami ba misaw̃a danõ si mate andrõ, lala ba nasi zoechoe mitõrõ! 41Ba mitema ligoe, mimane chõgoe: Horõma chõ Jehowa daʼõ; da mõiga mijaw̃a manoewõ, maʼoʼõ manõ niw̃aʼõ Lowalangida Jehowa chõda! Ba mangaró ami fefoe, ba mõi ami mijaw̃a ba hili, sambõ eraʼera. (Moz. IV. 14, 40). 42Ba imane chõgoe Jehowa: Õmane chõra: Bõi miʼae mijaw̃a, bõi manoewõ, lõʼõ sa fao ndraʼo chõmi; fa bõi teʼala ami ba nemalimi andrõ! 43Ba oew̃aʼõ chõmi, ba lõ mifondrondrongo, mitandro manõ niw̃aʼõ Jehowa, miʼabeʼeʼõ manõ dõdõmi, weʼamõi mijaw̃a ba hili. 44Ba faondra chõmi Ndraono Gamori ba hili andrõ, ba lagohi ami, hoelõ w̃ani, ba lafazawili ami ba Zeʼira, iroegi Horema. 45Ba me no mangawoeli ami, ba mangarõngarõ ami chõ Jehowa, ba iʼosilõmilagõ wangarõngarõmi Jehowa, 46iʼosilõmoerongogõ. Ba ara ami ba Gadesi, ha waʼara weʼasomi ba daʼõ.