Soera Moze V Faza 2

I. Tohoetohoe hoehoeo Moze. Fanolo Lowalangi jaʼira ba Ndraono Moabi ba ba Ndraono Gamoni. II. Fangalanira Sihona andrõ, razo ba Hesibona.

1I. Ba tafoeli ita, tasaw̃a danõ si mate, lala ba nasi zoechoe tatõrõ, dali niw̃aʼõ Jehowa chõda. Ba me no ara ita wamasoei hili Zeʼira andrõ, (Moz. IV. 21, 4), 2ba imane chõgoe Jehowa: 3Noa saʼae waʼara wamasoeimi hili andrõ, mijōoe saʼae misaw̃a. 4Ba õbeʼe li ba zato, õmane: So fõnami wanõrõ tanõ dalifoesõmi andrõ, tanõ ndraono Gezaoe ba Zeʼira, ba ataʼoe ira ami dania; 5ba miʼangelama sibai, fa bõi misoewõ ira, samba lahe sa lõ oebeʼe chõmi tanõra; hili Zeʼira andrõ, ba noa sa oetehe chõ Gezaoe, tána chõnia ba ba ngaʼõtõnia. (Moz. I. 36, 8). 6Õmi, ba miʼõli chõra, mibeʼe ganaʼa, sogoena õmi; ba õmi idanõ, ba miʼõli gõi chõra. 7Noa sa atṍ ifahowoeʼõ ndraʼoegõ Lowalangioe Jehowa, ba nilaoemõ, fefoe; no irorogõ ndraʼoegõ ba wanõrõoe tanõ si mate andre, si no ebolo sibai: õfa woeloe fache iadaʼe zi no faofao chõoe Lowalangioe Jehowa; lõ hadia ia zambõ chõoe. 8Ba me tarõi dalifoesõda andrõ, iraono Gezaoe, ba Zeʼira, wanõrõ lala ba danõ si mate, moroi ba Gelata ba ba Gesionogeberi, ba tadõlõ ita ba danõ si mate andrõ, tanõ Ndraono Moabi. 9Ba imane chõgoe Jehowa: Bõi soewõ Ndraono Moabi andrõ, bõi fasoewõ ami; maʼifoe sa lõ oebeʼe chõoe tanõra, me no oetehe tána ba ngaʼõtõ Loti andrõ Gari andrõ. 10(Mefõna, ba Dawa Gemi zi so ba danõ andrõ, niha seboea sibai, ba si no ato, salaw̃a boto, timba ngaʼõtõ Genaki andrõ. (F. 9, 2). 11Dawa Refaʼi gõi ira, si mane ngaʼõtõ Genaki andrõ, ba tõira ba Ndraono Moabi, ba Dawa Gemi. (Ngaʼõt. I. 20, 4). 12Ba sowanoea ba Zeʼira mefõna, ba Dawa Hori, ba latimba daʼõ iraono Gezaoe ba lahori, ba fangalira ba danõ, ba jaʼia ndraono Gezaoe andrõ; nifolaoe Ndraono Gizeraëli ba danõ andrõ, nibeʼe Jehowa tána chõra). 13Ba mifazaw̃a saʼae ami ba miʼõtõ mbombo Saredi andrõ! Ba taʼõtõ mbombo Saredi. 14Tõloe ngafoeloe a w̃aloe fache ita ba lala, iʼotarai Gadesi Mbarenea, iroegi wangõtõda mbombo Saredi andrõ, irege no ahori mate ba golombasew̃a zi sagõtõ niha andrõ, sabõlõ andrõ, itõrõ niw̃a õ Jehowa chõra, si no mõi ba hõloe ia. (Moz. IV. 14, 29). 15Oedoera na gõi danga Jehowa, ba wangohori jaʼira ba golombasew̃a, irege samõsa lõ si tosai. 16Dozi solohe baloese ba chõra, ba no mate. 17Ba hoemede chõgoe Jehowa, imane: 18”Õtõrõ iadaʼe danõ Ndraono Moabi, Ari andrõ; 19ba ahatõ sibai dania ndraʼoegõ ba Ndraono Gamoni andrõ; bõi soewõ ira, bõi faʼoedoe ami! Maʼifoe sa lõ oebeʼe chõoe tanõ Ndraono Gamoni, me no oetehe tána ba maʼoewoe Loti andrõ mitooe.” 20Jaʼia gõi, ba tanõ Ndrawa Refaʼi law̃aʼõ; mefõna, ba Dawa Refaʼi zi so ba danõ; Dawa Zamisoemi labeʼe tõira Iraono Gamoni. 21Niha seboea sibai ba sato, salaw̃a boto, si mane ngaʼõtõ Genaki andrõ. Ba no ihori ira fõnara Jehowa, tobali Iraono Gamoni zi ochõgõ tanõ, laʼiagõ fangalira, 22irege maʼõchõ andre, nifolaoenia ba ndraono Gezaoe, ba Zeʼira, wangohori fõnara Dawa Hori andrõ, wa tobali laʼochõgõ danõ, ba laʼiagõ fangalira, irege maʼõchõ andre. 23Ba Dawa Gawi andrõ gõi, si fahalama, iroegi tánõ ba Gasa, ba Dawa Gafatori, si otarai Gafatori, zangohori, ba laʼiagõ danõ, fangalira.

24II. Ba mifazaw̃a ami ba miʼõtõ Garono. Hiza, oebeʼe ba dangaoe Ndraono Gamori andrõ, Sihona, razo ba Hesibona, fabaja tanõnia; bõrõtaigõ ochõgõ [danõ] ba soewõ ia! 25Iʼotarai daʼe, ba oehawoei faʼataʼoe ba fehocha mboe ba chõoe andrõ fefoe soi ba goeli danõ, fefoe gofoe heza: ha larongo ndraʼoegõ, ba manizinizi ba mogichi dõdõ ba chõmõ andrõ.” 26Ba oefatenge zinenge chõ Zihona andrõ, razo ba Hesibona, moroi ba danõ si mate Kedemoti, hoehoeo nihaogõ oeʼoroiʼõ, oemane: 27Omasido oetõrõ danõoe, ba ha sambalõ lala seboea oetõrõ, lõ oeholeʼõ ndraʼodo, he ba gambõlõ, ba he ba gabera. 28Õma, fa bõi olofo ndraʼaga, ba õʼamawa chõma, mabeʼe ganaʼa, ba ba gõma idanõ, ba mabeʼe chõoe mbõli. Ha lala barõ gahegoe, ba wanõrõ, oeʼandrõ, — 29noa gõi latehe chõgoe daʼõ iraono Gezaoe, ba Zeʼira, ba Iraono Moabi, ba Gari, — irege oeʼõtõ Joridano, mijefo, ba danõ andrõ, nibeʼe Lowalangima, Jehowa, chõma dania. 30Ba lõ edõna Zihona, razo ba Hesibona, itehe chõda wanõrõ, me no tebai aloeloe geraʼerania ba no abeʼe dõdõnia ibeʼe Lowalangioe, Jehowa, enaʼõ ibeʼe ba dangaoe ia, si no aloea maʼõchṍ. 31Ba imane chõgoe Jehowa: Hiza, noa saʼae oebeʼe ba dangaoe Zihona andrõ, fabaja tanõnia, ba bõrõtaigõ ochõgõ, wangai chõmi tanõnia. 32Ba me ifaondragõ ita Sihona, awõ zabõlõ chõnia fefoe, me mõi fasõndra chõda ba zinga Jahasi, (Moz. IV. 21, 23), 33ba ibeʼe ba dangada ia Lowalangida, Jehowa, tobali taʼalani ia, awõ nononia, awõ zabõlõ andrõ chõnia fefoe. 34Ba atoeʼa ita ba mbanoeania fefoe, me loeo daʼõ, ba dozi banoea, ba talachaʼõ, he ira matoea, ba he ira alawe, ba he iraono; samõsa lõ taʼorifi. 35Ha oerifõ andrõ ba hadia nihalõda ba mbanoea andrõ, si no atoeʼa ita, ba tahalõ chõda ahoeloeada. 36Iʼotarai Garoëri, ba mbewe Garono ba iʼotarai mbanoea ba ndraso andrõ, noemalõ ba Gileadi, ba lõ banoea saro, si no tõra faʼalaw̃a chõda menaʼõ; ahori ibeʼe ba dangada Lowalangida, Jehowa. 37Ha tanõ Ndraono Gamoni andrõ, ba lõ õbabaja, fefoe, tánõ ba Jaboko, ba banoea ba hili andrõ, ba hadia ia fefoe, nitenaw̃a Lowalangida, Jehowa, jaʼita.