Soera Moze V Faza 23

I. Ha niha zi lõ tola mõi banoea Lowalangi. II. Oroisa ba wangehao, ba zi mõi manoewõ. III. Oroisa sachõchõ.

1I. Lõ tola ihalõ ndronga namania niha, lõ tola ifahoi gambala namania. (Moz. III. 18, 8). 2Tebai banoea Jehowa zi no aboto bazili ba he si no moechai. 3Tebai banoea Jehowa nono horõ, ba he madooe nono horõ, he irege foeloe ngaʼõtõ, ba tebai banoea Jehowa. 4Iraono Gamoni ba Iraono Moabi, ba tebai banoea Jehõwa, ba sagõtõ faʼara, ba lõ tola gõi mõi banoea Jehowa madooera, he irege foeloe ngaʼõtõ, (Neh. 13, 1), 5me lõ nifaondragõra jaʼami ba lala, me miʼotarai danõ Miseraji, molohe gõ ba idanõ chõmi, ba me no laʼoni oedoemi Mbileamo andrõ, ono Mbeori, banoea Wetori ba Mezofotamia, ba wangelifi jaʼami. (Moz. IV. 22, 5). 6Ba no lõ edõna Lowalangioe, Jehowa, ifondrondrongo niw̃aʼõ Mbileamo andrõ; no ibaliʼõ famahowoe wangelifi andrõ, chõoe, Lowalangioe, Jehowa; me no iʼomasiʼõ ndraʼoegõ Lowalangioe, Jehowa. 7Sagõtõ jaʼoegõ, ba bõi aloei waʼohahaoe dõdõra ba fangorifira. 8Iraono Gedomo, ba bõi ogorofi, me no talifoesõoe; ba Dawa Miseraji gõi, ba bõi ogorofi, me no soʼõ ba danõra mege, amaedola zi fatewoe; 9si doea gõtõ maʼoewoera, ba hana na mõi banoea Jehowa.

10II. Na mõiʼõ manoewõ emalioe, ba bõi babaja hadia ia zi lõ gõna. 11Na so ba chõmi zi no gõna hadia ia, ba zi bongi, si no raʼiõ ba daʼõ, ba jamõi baero golombasew̃a, ba lõ tola ifoeli ia bacha; 12irege no mondri ia, na tánõ owi; awena dania tola ifoeli ia ba golombasew̃a, na aechoe loeo. 13Ba õfaigi gõi chõoe gamõila, baero golombasew̃a. 14Ba jaso ba wakakemõ goʼokoʼo danõ ba na mõiʼõ ba nidanõ, baero, ba õcharoe danõ, ba õfoeli õbaloegõ dania zi taʼoenõ andrõ chõoe. 15Me sanõrõnõrõi olombasew̃amõ Lowalangioe, Jehowa, ba wangorifi jaʼoegõ ba ba wameʼe ba dangaoe emalioe; andrõ wa niʼamoniʼõ golombasew̃amõ, fa bõi iʼila ba chõmõ hadia ia zogoro ia, ba fa bõi iheta ia chõoe.

16III. Sawoejoe sanaw̃a jaʼoegõ, soloi chõ zochõ jaʼia, ba bõi foeli chõ zochõ jaʼia. 17Jamoeʼiagõ chõoe, ba danõoe, heza zatoelõ dõdõnia, ba mbanoeami heza, somasi ia, ba lõ tola õfakao ia. 18Ba nono alawe Ndraono Gizeraëli, ba lõ tola faloecha nibeʼe nihorõni, ba ba nono matoea, chõra ba lõ tola faloecha nibeʼe sohorõ. 19Bõi ohe ba nomo Lowalangioe, Jehowa, mbõli gõlõ ba wohorõ ba he bõli gõlõ nasoe, ba gamaboeʼoela li, hadia ia, me no sogoro Lowalangioe, Jehowa, zi doea balõ andrõ gõi. 20Ba dalifoesõoe, ba bõi w̃aʼõ hare, he hare ganaʼa, ba he hare gõ ba he hare hadia ia fefoe, nibeʼe nifalali, nifohare. (Moz. II. 22, 25). 21Ba niha bõʼõ, ba hana na õtema hare, ba ba dalifoesõoe, ba lõ tola õw̃aʼõ, enaʼõ ifahowoeʼõ ndraʼoegõ Lowalangioe, Jehowa, ba nilaoe dangaoe, fefoe, ba danõ andrõ, si mõiʼõ, ba wangochõgõ jaʼia. 22Na õfaboeʼoe hadia ia chõ Lowalangioe, Jehowa, ba bõi aragõ wanõrõ jaʼia, fa bõi isoegiʼõ Lowalangioe, Jehowa, ba no masala ndraʼoegõ. (Moz. IV. 30, 3. Hal. zin. 18, 18). 23Ba na lõ õfaboeʼoe hadia ia, ba lõ horõoe. 24Hadia zi no aloea ba lioe, ba bõi awoeʼa, õtõrõ nifaboeʼoemõ chõ Lowalangioe, Jehowa, saoha gõlõ, si no aloea baehaoe. 25Na mõiʼõ ba kaboe nagoe chõ nawõoe, ba hana na õʼā mboea, ha waʼoja zomasiʼõ irege aboesoʼõ ba maʼifoe lõ tola oebeʼe ba nahia chõoe. 26Ba na õtõrõ nowi nawõoe, ba hana na õboeroesi lai tangaoe; ba sabi, ba lõ tola õfatõrõ ba zinanõ nawõoe. (Mat. 12, 1).