Soera Moze V Faza 22

I. Oroisa ba wangomasiʼõ awõ, ba hadia ia zoadoe. II. He lawisa na so zamõbõgõ horõ ba ndra alawe. III. Hoekoe zohorõ.

1I. Na õʼila zaw̃i dalifoesõoe si soena ba ma biribirinia, ba bõi zi lõ õtolo; õʼohe mangawoeli chõ dalifoesõoe. (Moz. II. 23, 4). 2Ba na arõoe mbanoea dalifoesõoe andrõ, ba ma na lõ õʼila ha niha, ba õhalõ chõoe oea, õfonaha ba chõoe, irege iʼaloei talifoesõoe andrõ, ba õfoeli chõnia dania. 3Ba õmanõ gõi na kalidenia, ba he na noechania ba he hadia ia fefoe, si no aechoe chõ dalifoesõoe, na no õsõndra; lõ tola lõ õrorogõ. 4Na õʼila no alaoe galide dalifoesõoe, ba lala, ba ma saw̃inia, ba bõi zi lõ õtolo, õloeloei chõnia ba wamaoso. (Mat. 12, 11. Loek. 14, 5). 5Ira alawe, ba bõi jamoeʼonoecha noecha ndra matoea, ba ira matoea, ba bõi jamoeʼonoecha noecha ndra alawe; dozi sa solaoe si manõ, ba sogoro Lowalangioe, Jehowa. 6Na õʼila ba zinga lala ba hogoe geoe, ba ma ba danõ tooe, gazoeni wofo, si so ono, ba ma si so adoelo ba na ifaoechoe na nononia, ba ma adoelo, ina, ba bõi halõ nina fabaja ono; 7õfoloi nina ba õhalõ chõoe nono, enaʼõ sohahaoe tõdõ ndraʼoegõ ba enaʼõ anaoe nosooe. 8Na molaoe omo ndraʼoegõ, ba õfotarali zagõ chõoe, fa bõi tohare ba nomooe horõ fangeʼe õbeʼe, na so zaechoe tooe, moroi jaw̃a, niha. 9Bõi fodoea balõ zinanõ ba kaboe nagoe chõoe, fa bõi tobali niʼamoniʼõ fefoe, he boea zinanõ andrõ, nitaroemõ, ba he boea nagoe ba kaboe andrõ. (Moz. III. 19, 19. Moz. IV. 18, 27). 10Bõi faedo ira zaw̃i galide ba wamotochi tanõ. 11Bõi fake noecha si doea balõ bana, boe mbiribiri ba tarafali, ba wanoso jaʼia mege. 12Õfobowobowo watalinga mbaroemõ seboea andrõ, si õfa, baroemõ loeniloenimõ andrõ, (Moz. IV. 15, 38).

13II. Na so zi no mangai ira alawe, ba na anoezoe dõdõnia dania, na no oroedoe ia chõnia, 14na ibõbõgõ chõnia zi lõ sõchi, na obooe dõinia ibeʼe, wangoemaʼõ: No oehalõ galawe andrõ, ba oroedoedo chõnia, ba oeʼila wa tenga ono alawe, 15ba ndramoehalõ ira ama nono alawe andrõ dandra wa ono alawe ia, ba ndramoeʼohe baero, ba mbawa gõli ba zalaw̃a mbanoea, 16ba imane dania ba zalaw̃a ama nono alawe andrõ: No oebeʼe ba niha andre nonogoe, ba me anoezoe dõdõnia ijaʼe, 17ba ibõbõgõ chõnia horõ, wangoemaʼõ: Tenga ono alawe nonooe andrõ, oeʼila, ba jāʼe dandra wa ono alawe nonogoe! Ba ndramoebologõ lembe andrõ fõna zalaw̃a mbanoea. 18Ba noa daʼõ, ba ndramoehalõ niha andrõ salaw̃a mbanoea andrõ ba ndramoew̃aʼõ wangotoeʼõ jaʼia, 19ba lachaoe gõi ia, otoe roefia, ba wameʼe chõ nama galawe andrõ. Noa sa ibeʼe obooe dõi nono alawe Ndraono Gizeraëli [niha andrõ], ba bõi jateboelõ dongania, ba sagõtõ jaʼia lõ tola itiboʼõ. 20Ba na si ndroehoe niw̃aʼõnia andrõ, na tebai tefadoehoeʼõ, wa ono alawe zi bohooe moehalõ andrõ, 21ba laʼohe ba golajama namania galawe andrõ, ba lateboe kara ia banoeara, wamoenoe jaʼia, me no horõ seboea ifazõchi ba Ndraono Gizeraëli, me no mohorõ ia baomo chõ namania. Õmanõ wangohori si lõ sõchi ba chõmi.

22III. Na so niraʼoe baewawõ, na ihorõni ndronga zodonga, ba faoma mate ira, he ira matoea, si horõni alawe andrõ ba he ira alawe andrõ. Õmanõ wangohori si lõ sõchi ba Ndraono Gizeraëli. (Moz. III. 20, 10). 23Na so zi faloecha chõ nono alawe, si no moefohoe, bacha ba mbanoea, ba na ihorõni, 24ba miʼohe baero mbawa gõli mbanoea andrõ, faoma daroea ira, ba miteboe kara, wamoenoe jaʼira, ono alawe andrõ, me lõ niʼechoegõnia niha, bacha ba mbanoea, ba ira matoea andrõ, me no ihorõni ndra alawe nawõnia. Õmanõ wangohori si lõ zõchi ba chõmi. 25Ba na ba danõ faloecha ndra matoea andrõ chõ nono alawe andrõ, si no moeʼonihagõ, ba na ilangõgõ manõ, na ihorõni, ba ha ira matoea, si horõni jaʼia, zi mate. 26Ba ono alawe andrõ, ba bõi lababaja; lõʼõ sa nifazõchinia horõ bõrõ wamoenoe; ba zi manõ, ba no timba na itema iboenoe nawõnia niha. 27Me no ba danõ faloecha ia chõnia, ba ma no moeʼao nono alawe andrõ, si no moefohoe, ba ma lõ si mõi manolo jaʼia. 28Ba na so zi faloecha chõ nono alawe si lõ moefohoe na, ba na iraʼoe ba na ihorõni, ba na niraʼoe baewawõ, (Moz. II. 22, 16), 29ba 50 roefia ibeʼe chõ nama nono alawe andrõ niha andrõ, si horõni jaʼia, ba labeʼe chõnia, dongania, me no ihorõni, ba sagõtõ jaʼia, ba lõ tola itiboʼõ.