Soera Moze V Faza 21

I. Soemange fanalaʼõ wamoenoe niha, na lõ moesõndra zamoenoe. II. He lawisa na laʼowaloe zawoejoe ba he lawisa ba zi aʼa ndraono. III. Fotoe ndraono si lõ moloʼõ li zatoea. Fogoʼo nitaw̃i.

1I. Na lasõndra niboenoe ba mbenoea, ba danõ andrõ, nibeʼe Lowalangioe, Jehowa, chõoe, ba na lõ moeʼila, ha niha zamoenoe jaʼia, 2ba ndramõi zatoea chõmi ba sangoehoekoe ba lasoeʼa waʼarõoe mbanoea, si tefasoei niboenoe andrõ. 3Ba na no moesõndra, he mbanoea sahatõ chõnia, ba ndramoehalõ zihene zaw̃i satoea mbanoea andrõ, ono zaw̃i si lõ moerai moefohalõw̃õ, si lõ moefokalo mbagi na; 4ba laʼohe mitooe ba ndraso nono zaw̃i andrõ salaw̃a mbanoea andrõ, ba ndraso si so idanõ si lõ ogoʼõ, daso si lõ moehalõhalõ ba si lõ moetaroe fache, ba ba daʼõ ba ndraso andrõ, lafatõ mbagi nono zaw̃i andrõ. 5Ba ndramoeʼondrasi ere andrõ, ono Lewi — me no jaʼira nitoetoejoe Lowalangioe, Jehowa, enaʼõ enoninia ira ba enaʼõ ba dõi Jehowa mamahowoe ira, ba balazi niw̃aʼõra ba wangoehoekoe hadia ia wamadõni ba hadia zocho — (F. 17, 9), 6ba dozi salaw̃a mbanoea andrõ, sabõlõ ahatõ ba niboenoe no mege, ba lasasai dangara jaw̃a nono zaw̃i andrõ, nifatõ bagi, ba daʼõ ba ndraso, ba latema lamane: 7Tenga tangama zameʼe adoewa ndro andrõ, ba hõrõma, ba tenga sangila. 8Beʼe aefa, jaʼoegõ Jehowa, ba mbanoeaoe Iraono Gizeraëli, niʼorifimõ, ba bõi beʼe ba hoeloe mbanoeamõ Iraono Gizeraëli ndro nidoewagõ, si lõ horõ! Ba aefa chõra horõ fangeʼe andrõ, 9ba õhori ba chõmi ndro andrõ nidoewagõ, si lõ horõ, enaʼõ ohahaoe dõdõoe, na õlaoe zatoelõ, wamaigi Jehowa.

10II. Na mõiʼõ fasoewõ ba nemalioe ba na ibeʼe ba dangaoe ira Lowalangioe, Jehowa, na miʼoloiʼõ niha õsa, 11ba na õʼila ba niʼoloiʼõ andrõ ndra alawe si sõchi bawa, ba na tesao chõoe waʼomasi, na omasiʼõ õhalõ dongaoe, 12ba ohe ia baomooe, enaʼõ ifatõwõʼõ ia, ba itaba zaʼania, 13ba ifalalini noechania, noechania mege, me laraʼoe ia, ba jaso jomo chõoe, ba jamoeʼeʼesi namania ba inania, sara waw̃a waʼara, ba na aefa daʼõ, ba hana na mõiʼõ chõnia, hana na õhalõ ia, fa dongaoe ia. 14Ba na lõʼõ saʼae omasiʼõ ia, ba õbeʼe aefa manõ, maʼifoe lõ tola õʼamawa ia, bõli ganaʼa, lõ tola õʼosawoejoe ia, me no oroedoeʼõ chõnia. 15Na so zi domboea donga ba na abõlõ iʼomasiʼõ zi samboea, na iʼositengagõ zi samboea, ba na faoma moʼono chõnia, ono matoea, he niʼomasiʼõ andrõ, ba he niʼositengagõ, ba na ono niʼositengagõ andrõ zi aʼa ndraononia, (Moz. I. 29, 31), 16ba na ifaosa dania ba ndraononia ganaʼania, ondrõitania, ba lõ tola itehe chõ nono niʼomasiʼõ andrõ zinehe ba zi aʼa, wangambõsi ono niʼositengagõ andrõ: me no jaʼia zi aʼa, 17si ndroehoe si aʼa, ono niʼositengagõ andrõ, ba ibeʼe si aʼa, ifo doea winaeta zinemania ba zi so chõnia, fefoe, me no si aʼa nisõndrania ba waʼabõlõnia, chõnia zinehe ba zi aʼa.

18III. Na so zi so ono matoea si lõ ngaroro ba si lõ mamondrongo li, si lõ mameʼe ba dõdõ na ifarooe ia ba zi zõchi amania, ba ma inania, ba si lõ moloʼõ na gõi, na no aefa laʼotoeʼõ ia, 19ba ndramoetoejoe daʼionia ira amania ba ndramoedõni ba zalaw̃a mbanoeara, baero mbawa gõli mbanoea chõra, 20ba lamane ba zalaw̃a mbanoeara: Onoma andre, ba no si lõ ngaroro ba sabeʼe tandro, lõ ifondrondrongo lima, no sanibonibo anaʼa ba si maboemaboe toeo! 21Ba ndramoeteboe kara ia banoeara fefoe, wamoenoe jaʼia; õhori ba chõmi zi lõ sõchi andrõ, ba ndramoerongo Iraono Gizeraëli fefoe ba ndramoeʼataʼoefi. 22Na so niboenoe, si no mamazõchi horõ bõrõ wamoenoe jaʼia, na no moetaw̃i ia ba ndraha geoe, 23ba bõi larõi ba ndraha geoe mbotonia ba zi bongi; na loeo daʼõ õkoʼo ia, me no niʼelifi chõ Lowalangi nitaw̃i, ba bõi beʼe raʼiõ danõmi andrõ, nibeʼe Lowalangioe, Jehowa, chõoe. (Jos. 8, 29. Gal. 3, 13).