Soera Moze V Faza 20

I. He wisa ba wanoewõ: Ha niha zi mõi. II. He wisa na lafasoei mbanoea ba he wisa na atoeʼa ira.

1I. Na mõiʼõ moesoewõ nemalioe ba na õʼila koedo ba koereta ba sabõlõ chõra, sato moroi chõmi, ba bõi ataʼoefi ira, me itolo ndraʼoegõ Lowalangioe, Jehowa, solohe mijaw̃a jaʼoegõ moroi ba danõ Miseraji. 2Ba na milaoe saʼae chõra, ba jamoefaʼaso ia ere, ba jamoehede ba zato, 3imane chõra: Mifondrondrongo, jaʼami Iraono Gizeraëli! Si mõi manoewõ emalimi ami maʼõchṍ; miʼabeʼeʼõ dõdõmi, bõi ataʼoe, bõi manizinizi ami ba bõi tokea ami chõra; (F. 1, 21), 4fao saʼae chõmi Lowalangimi, Jehowa, ba wanoewõ emalimi, fõnami, ba ba wameʼe faʼabõlõ chõmi. 5Ba lamane koemandroe ba zanoewõ: Ha niha zi no molaoe omo, si lõ moeʼamoniʼõ na, ba hana na iheta ia, hana na mangawoeli, fa bõi mate ia ba wasõndrata, ba fa bõi niha bõʼõ zi amoniʼõ [omonia]. 6Ba ha niha zi no mamazõchi kaboe nagoe, si lõ moeʼā boea na, ba jamoeheta ia, jamangawoeli, fa bõi mate ia ba wasõndrata, ba fa bõi niha bõʼõzi manga mboea. (Moz. III. 19, 23). 7Ba ha niha zi no mamaigi niha, si lõ moehalõ na, ba jamoeheta ia, jamangawoeli, fa bõi mate ia ba wasõndrata, ba fa bõi niha bõʼõ zangai [alawe andrõ]. (F. 24, 5). 8Ba lamane na ira koemandroe ba zanoewõ: Ha niha zataʼoe ba satalõ tõdõ, ba jamoeheta ia, jamangawoeli, fa bõi atalõ gõi dõdõ dalifoesõnia, si mane tõdõnia, ibeʼe. (Sangoehoek. 7, 3). 9Ba na no awai wehede ndra koemandroe ba zato, ba lafataro sangoloiʼõ sato goemandra andrõ.

10II. Na mamasoei banoea ndraʼoegõ enaʼõ, ba õwaʼõ chõra wangatoelõ oea. 11Ba na latehe wangatoelõ andrõ, na labokai chõoe mbawa gõli ba õbeʼe sameʼemeʼe beo chõoe mbanoea andrõ fefoe ba si so barõ mbawaoe. 12Ba na lõ edõna ira waʼatoelõ, na omasi ira fasoewõ chõoe, ba õfasoei mbanoea, 13ba na no ibeʼe ba dangaoe ia Lowalangioe, Jehowa, ba õboenoe siʼõli ndra matoea ba mbanoea bacha, fefoe, 14ba ira alawe ba iraono ba oerifõ ba hadia ia fefoe ba mbanoea bacha, fefoe zahoeloe ami bacha, ba õhalõ ahoeloeamõ, ba õʼā zahoeloe ndraʼoegõ ba nemalioe andrõ, nibeʼe Lowalangioe, Jehowa, chõoe. (Jos. 8, 27). 15Si manõ wolaoemõ ba mbanoea andrõ fefoe, si no arõoe chõoe, si tenga si fabõbõ ba mbanoea niha andre. 16Ba ba mbanoea niha andre, nibeʼe Lowalangioe, Jehowa, chõoe, ba samõsa lõ õʼorifi niha; (F. 7, 2); 17õlachaʼõ ira, Iraono Cheti ba Iraono Gamori ba Dawa Ganaʼana ba Iraono Weresi ba Iraono Hewi ba Iraono Jeboesi, si mane niw̃aʼõ Lowalangioe, Jehowa, chõoe. 18Fa bõi lafahaõ ami ba woloʼõ sogoro ita andrõ, chõra, fefoe, nilaoera chõ Lowalangira andrõ, ba fa bõi mifazõchi horõ chõ Lowalangimi, Jehowa. 19Na ara tebai atoeʼa ndraʼoegõ ba mbanoea, nisoewõmõ, ba wangai jaʼia chõoe, ba bõi fakiko geoe sowoea ba ngainia, wolobõ jaʼia; a mboeania, ba bõi obõ. Hadia, niha dõla geoe ba mbenoea, fa õsoewõ ia? 20Ha tõla geoe, niʼilaoe lõ laʼā mboea, ba hana na õfakiko, hana na õʼobõ, ba wolaoe baʼabaʼa chõoe ba mbanoea andrõ nisoewõmõ, irege atoeʼa ami bacha.