Soera Moze V Faza 19

I. Oroisa ba mbanoea fangorifi andrõ. II. Bõi lafawoeʼa gowe nola. Oroisa ba zi so ba mbõrõ.

1I. Na ihori dania Lowalangioe, Jehowa, soi andrõ, ba danõ andrõ, nibeʼe Lowalangioe, Jehowa, chõoe, ba na no õtimba ira ba na no ahono ndraʼoegõ ba mbanoeara ba ba nomora, 2ba tõloe oniagõ chõoe banoea ba danõmi andrõ, nibeʼe Lowalangioe, Jehowa, chõoe, ochõtamõ. (Moz. IV. 35, 10). 3Õhaogõ lala chõoe, ba tanõ andrõ, nibeʼe Lowalangioe, Jehowa, chõoe, ba wangochõgõ jaʼia, ba õʼotõloe, enaʼõ tola ba daʼõ lasaw̃a woloi dozi si no mamoenoe niha. 4Ba si mané ba zi no mamoenoe niha andrõ, si tola manaw̃a daʼõ woloi, ba wangorifi jaʼia: Na so zamoenoe awõnia, si lõ moeʼodõdõgõ ba na lõ fatioesa chõnia, mege saʼae, (F. 4, 42), 5ma na no fao chõnia nawõnia ba gatoea, ba wolobõ eoe, ba na ibaha watonia tangania, ba wolobõ eoe, ba na adeha wato, na gõna chõ nawõnia, famoenoenia; niha si manõ, ba hana na isaw̃a zamboea mbanoea andrõ, ba wangorifi jaʼia, 6fa bõi igohi zamoenoe niha andrõ solaoe balõ, na saoechoe tõdõ ia, ba fa bõi ichamõ, na arõoe, ba wamoenoe jaʼia, he w̃aʼae tenga manõ hoekoe famoenoe hoekoenia, me lõ si fatioe ia chõnia mege. 7Andrõ oew̃aʼõ chõoe daʼe: Tõloe õʼoniagõ chõoe banoea. 8Ba na ebolo danõoe ibeʼe Lowalangioe, Jehowa, nifaboeʼoenia chõ ndra toeaoe, si no mõi ba hõloe ia chõra, na maʼasagõrõ ibeʼe chõoe danõ andrõ, nifaboeʼoenia fameʼe chõ ndra toeaoe, 9ha megara õbeʼe ba dõdõoe woloʼõ oroisa andrõ, fefoe, nifaʼemagoe chõoe maʼõchṍ, na lõ mamalõmalõ wangomasiʼõoe Lowalangioe, Jehowa, awõ wanõrõ lala andrõ, chõnia, ba tõloe tõ õnõnõ mbanoea andrõ, si tõloe, 10enaʼõ bõi adoewa ndro zi lõ horõ, ba danõ andrõ, nibeʼe Lowalangioe, Jehowa, chõoe, ba fa bõi õhalõ ba hoeloemõ, horõoe. 11Ba na so zanaw̃a banoea andrõ, zamboea, woloi, si no manarogõ awõnia, bõrõ watioesa, na no itema ibõzi, famoenoe, (Moz. IV. 35, 16), 12ba lafahalõʼõ ia ba daʼõ satoea mbanoeara, ba labeʼe ba danga zolaoe balõ, enaʼõ mate ia. 13Bõi faigifaigi ia, wangahachõsi tõdõ jaʼia, õhori ba Ndraono Gizeraëli ndro zi lõ horõ, enaʼõ sohahaoe tõdõ ndraʼoegõ.

14II. Bõi fawoeʼa nola nawõoe, nitaroeʼõ ndra toea, ba zinga mbenoeaoe, si mõi chõoe dania, ba danõ andrõ, nibeʼe Lowalangioe, Jehowa, chõoe. (F. 27, 17. Job. 24, 2. Amaed. 22, 28; 23, 10). 15Si ha samõsa, ba lõ tola mõi sasi, oedoe nisechegõ, na so hadia ia horõ, ba ma õlalõw̃a — hadia ia zala, si sala niha, ha niha ia; ba niw̃aʼõ zi daroea ba ma si datõloe aro hoehoeo, (Moz. IV. 35, 30. Mat. 18, 16. Joh. 8, 17. Kor. II. 13, 1. Hebr. 10, 28). 16Na so si maoso sasi sofaja, oedoe nawõnia, ba wamõbõgõ chõnia lalõ, hadia ia, 17ba ndramõi fõna Jehowa zi daroea andrõ, si fagoeagoea, fõna gere ba fõna zangoehoekoe, na loeo daʼõ, 18ba ndramoesechogõ sibai sangoehoekoe, ba na oroma, sasi sofaja sasi andrõ, ibõbõgõ zi lõ doehoe chõ dalifoesõnia, 19ba chõnia mifatõrõ zomasi ia lafatõrõ chõ dalifoesõnia andrõ; õhori ba chõmi zi lõ sõchi andrõ. (Amaed. 19, 5; 21, 28). 20Ba larongo niha bõʼõ, ba ataʼoe ira, ba lõʼõ saʼae lalaoe zi lõ sõchi si mane daʼõ, ba chõmi. 21Bõi ahachõ dõdõoe wamaigi niha: noso wangali noso ba hõrõ wangali hõrõ ba boha wangali mboha ba tanga wangali danga ba ahe wangali gahe! (Moz. II. 21, 24).