Soera Moze V Faza 18

I. Balazo gere. II. Fanenaw̃a fameʼe adoe ba faetasa. III. Famaboeʼoe samaʼeleʼõ seboea andrõ. IV. No faehoe ira zamaʼeleʼõ si ndroehoe zamaʼeleʼõ sofaja.

1I. Ba gere ono Lewi andrõ ba ba mado Lewi fefoe, ba lõ tebeʼe danõ, tána chõra, ondrõita dania, si mane ba Ndraono Gizeraëli bõʼõ; soemange Jehowa andrõ, nifatõrõ ba galitõ ba hadia ia dána chõnia, mbalazora. (F. 10, 9. Kor. I. 9, 13). 2Tána chõra tanõ, ba lõ labeʼe chõra ba ngai niwara andrõ; no Jehowa dána chõra, si mane nifaboeʼoenia chõra. (Hes. 44, 28). 3Ba daʼõ zinehe ba gere, ba zato, ba zanaba soemange, he saw̃i ba he biribiri: Chõ gere labeʼe daʼio ba simbi ba betoeʼa eboea. 4Fondrege zi sõchi mboea nowi chõoe ba agoe ba fanicha, ba he fondrege zi sõchi mboe mbiribiri chõoe, ba chõnia õbeʼe. 5Noa saʼae jaʼia nitoejoe Lowalangioe, Jehowa, ba madomi andrõ fefoe, enaʼõ lõ mamalõmalõ, wa jaʼia ba iraononia dania zangaingai halõw̃õ ba dõi Jehowa. (Moz. IV. 18, 6). 6Ba na so zi mõi ba naha andrõ, nitoejoe Jehowa, ono Lewi, si oroi mbanoeami heza, ba Ndraono Gizeraëli fefoe, ba zi so ia si fatewoe, ba balazi manõ ia, na mõi ia, 7— ba tola ihalõhalõ halõw̃õ ba dõi Lowalanginia Jehowa, si mane ira talifoesõnia ono Lewi, fefoe, si no mõi enoni Jehowa ba daʼõ. 8Lafagõlõgõlõ wamaosa gõ andrõ, lõ lai zi no so chõnia, bõli gondrõita ndra amania.

9II. Na õroegi danõ andrõ, nibeʼe Lowalangioe, Jehowa, chõoe, ba bõi famahaʼõ ba woloʼõ sogoro ita andrõ, ba niha andrõ. (Moz. III. 18, 3). 10Bõi faloecha ba chõmi zamatõrõ ba galitõ ononia matoea ba ma ononia alawe, ba he si faeta ba he sanahõ lawoeo ba he sanaka [oelõ] ba he si fakelemoe; (Moz. III. 18, 21; 20, 27. Jes. 8, 19); 11ba he sanaka, bõʼõnia, ba he samahede bechoe, ma bechoe waetasa, sanofoe ba zi no mate, hadia ia. 12Me no sogoro Jehowa dozi solaoe si manõ, ba bõrõ zogoro ia andrõ, wa ihori ira fõnaoe Lowalangioe, Jehowa. 13Ha sambalõ Lowalangioe Jehowa manõ õʼolembai. (Mat. 5, 48). 14Soi niha andrõ sa, nitimbamõ, ba lafondrondrongo niw̃aʼõ zanahõ lawoeo ba si faeta; ba chõoe, ba lõ itehe zi manõ Lowalangioe, Jehowa.

15III. Iʼasogõ dania chõoe zamaʼeleʼõ Lowalangioe, Jehowa, oi jaʼami, iwami, samaʼeleʼõ si mane jaʼodo; li daʼõ dania mifondrondrongo. (Mat. 17, 5. Joh. 1, 46. Hal. zin. 3, 22; 7, 37). 16Ba ahori itõrõ niʼandrõoe chõ Lowalangioe, Jehowa, me loeo waloechata ba gahe hili Horebi, me õmane: Sõchi na lõʼõ saʼae oerongo li Lowalangigoe, Jehowa, ba na lõʼõ saʼae oeʼila galitõ seboea andrõ, fa lõ matedo! (Moz. II. 20, 19). 17Ba imane chõgoe Jehowa: 18Si ndroehoe niw̃aʼõra! Samaʼeleʼõ oeʼasogõ chõra, si mane jaʼoegõ; ba niwara oehalõ; ba mbawania oebeʼe daroma ligoe ba jaʼia zangombacha chõra fefoe niʼoroiʼõgoe chõnia; (Joh. 4, 25; 6, 14); 19ba na so zi lõ mamondrongo ligoe andrõ, niʼombachaʼõnia, salahigoe, ba jaʼo zanofoe li ba zi manõ.

20IV. Ba na so zamaʼeleʼõ, si lõ ataʼoe managõ tõigoe, wangombacha hadia ia, si lõ niw̃aʼõgoe fangombacha chõnia, ma na tõi Lowalangi bõʼõ itõtõi ba wehedenia — ba si mate zamaʼeleʼõ si manõ! (F. 13, 5. Jer. 14, 14). 21Ba ma õmane dõdõoe: Ba heza maʼila, wa tenga niw̃aʼõ Jehowa, na so niw̃aʼõ hadia ia? 22Na iw̃aʼõ samaʼeleʼõ niʼoroiʼõ Jehowa chõnia, ba na lõ itõrõ niw̃aʼõnia, ba no tenga niw̃aʼõ Jehowa daroma li andrõ. Fajaw̃asa zamaʼeleʼõ andrõ wangombacha jaʼia; alacha lõ õʼataʼoefi.