Soera Moze V Faza 17

I. Bõi labeʼe soemange zi so sala. II. Ba naha niʼamoniʼõ andrõ setoe hoekoe, na so hoehoeo seboea. III. Oroisa ba wamataro razo.

1I. Bõi beʼe soemange Lowalangioe, Jehowa, zaw̃i ba ma biribiri, si so sala, hadia ia zi lõ sõchi, me no sogoro Lowalangioe, Jehowa, daʼõ. (Moz. III. 22, 20). 2Na faloecha ba mbanoeami andrõ heza, nibeʼe Lowalangioe, Jehowa, chõoe, niha, he ira matoea, ba he ira alawe, solaoe si lõ omasi Lowalangioe, Jehowa, wanawõ fawoeʼoesa li andrõ chõnia, (F. 13, 6), 3na mõi ia mamosoemange Lowalangi bõʼõ ba na mangaloeloe chõra, ba ba loeo ba ma ba mbaw̃a ba ma ba ngahõnõ andrõ fefoe, ba mbanoea si jaw̃a, si tenga nitehegoe, (F. 4, 19), 4ba na teʼombachaʼõ chõoe, ba na tesõndra — na no moesechegõ — si ndroehoe, no moelaoe zi manõ — sogoro ita — ba Ndraono Gizeraëli, 5ba õʼohe baero mbawa gõli niha andrõ, he ira matoea, ba he ira alawe; solaoe si lõ sõchi andrõ, ba he ira matoea, ba he ira alawe, ba õteboe kara, wamoenoe jaʼia. 6Ba niw̃aʼõ zi daroea, ba ma si datõloe, si so ba mbõrõ, teboenoe zi manõ, na no moeʼetoeʼõ hoekoe, ba lõ tola laboenoe ia, na ha samõsa zi so ba mbõrõ. (F. 19, 15. Mat. 18, 16). 7Si so ba mbõrõ andrõ zi bõrõtaigõ mamoenoe jaʼia, ba awena dania zato fefoe, ba tobali õhori ba chõmi zi lõ sõchi andrõ.

8II. Na so hoehoeo sabõlõ afõchõ famatoenõ õw̃aʼõ, ma na fangeʼe mbõrõ ba ma famadõni hadia ia, ba ma fabagosa, hoehoeo ba mbanoeami, ba fazaw̃aʼõ baʼae ba naha andrõ nitoejoe Lowalangioe, Jehowa, 9dania, ba õtoenõ chõ gere, ono Lewi ba ba zangoehoekoe andrõ, si so na loeo daʼõ, õsofoe lala, ba jaʼira zangombacha chõoe he wisa hoekoe. 10Ba õʼoʼõ niw̃aʼõra, niʼombachaʼõra chõoe ba naha andrõ nitoejoe Jehowa; fefoe nilaoemõ dania, ba dali sibai lala andrõ, niʼombachaʼõra chõoe. 11Lala andrõ, niʼombachaʼõra chõoe, ba hoekoe andrõ, niʼetoeʼõra õbeʼe dali ba wolaoemõ, niw̃aʼõra andrõ chõoe, ba õtõrõ, bõi holeʼõ ndraʼoegõ, he ba gambõlõ, ba he gabera. 12Ba na so zi fajaw̃a, si lõ mamondrongo li gere andrõ, si no so ba daʼõ, enoni Lowalangioe, Jehowa, ba he li zangoekoekoe andrõ, ba si mate daʼõ; õhori zi lõ sõchi ba Ndraono Gizeraëli, 13enaʼõ larongo sato fefoe ba enaʼõ ataʼoe ira, fa bõi faloecha zi fajaw̃a.

14III. Na no õroegi danõ andrõ, nibeʼe Lowalangioe, Jehowa, chõoe, na no õʼochõgõ ba na no ahono ndraʼoegõ ba danõ, ba na õmane dania: Daʼoefataro chõgoe razo, hõgõgoe, si mane ba niha baero fefoe, si tefasoei jaʼo, (Sam. I. 8, 5), 15ba ha nitoejoe Lowalangioe, Jehowa, õfataro razo chõoe. Iwami õfataro razo chõoe; niha bõʼõ, si tenga jaʼami, ba lõ tola õfataro chõoe. 16Ba fa bõi soja koedo ia ba bõi jamoeʼohe mangawoeli ami ba danõ Miseraji, ba wangojaʼõ koedonia, me noa saʼae iw̃aʼõ chõmi Jehowa: Bõi manõ mifoeli ami ba daʼõ! (Raz. I. 4, 26). 17Ba bõi jamoeʼojaʼõ ndrongania, fa bõi iʼerogõ [Jehowa], ba bõi jamoehõna chõnia wirõ ba anaʼa. (Raz. I. 11, 1. Jes. 2, 7). 18Ba na no doemadao dania ia ba dadaoma razo, ba jamoesoera chõnia zamboea zoera goroisa andre, chõ gere ono Lewi andrõ ihalõ; 19ba bõi aefaʼaefa chõnia, ba ibasobaso sagõtõ jaʼia, enaʼõ ifamaha ia ba wangataʼoefi Lowalanginia, Jehowa, ba enaʼõ itõngõni daroma li goroisa andre, awõ nifachoi andrõ, fefoe, ba woloʼõ jaʼia, (Jos. 1, 8), 20fa bõi fajaw̃a ia ba niwania andrõ, ba bõi zi lõ itõrõ goroisa andrõ, bõi jamoeholeʼõ ia, he ba gambõlõ, ba he ba gabera, enaʼõ ara razo ia ba Ndraono Gizerāëli, he jaʼia, ba he ononia dania.