Soera Moze V Faz 16

I. Oroisa ba wolaoe fasa andrõ. II. Owasa ba wamasi. III. Owasa nose daha geoe. IV. Famataro sangoehoekoe. Fanenaw̃a famazõchi adoe.

1I. Tõngõni mbaw̃a Abibi andrõ, ba wolaoe fasa chõ Lowalangioe, Jehowa; no ba mbaw̃a Abibi iheta ndraʼoegõ ba danõ Miseraji Lowalangioe, Jehowa, ba zi bongi. 2Ba õtaba fasa chõ Lowalangioe, Jehowa, mbiribiri ba saw̃i, ba naha andrõ, nitoejoe Jehowa, ba wamonahia tõina ba daʼõ. (Moz. II. 12, 2. Moz. III. 23, 53 b. t.). 3Ba lõ tola õʼā hadia ia niʼaisõni, awõnia; fitoe ngaloeo waʼara õʼā roti si lõ moeʼaisõni, roti ba waʼanoemana; — me no soloi ndraʼoegõ ba danõ Miseraji mege — enaʼõ itõrõ tõdõoe mbaw̃a waʼahetamõ ba danõ Miseraji, sagõtõ jaʼoegõ. 4Fitoe bongi waʼara, ba lõ tola faloecha danõmõ roti ba mbanoeami fefoe, ba õsi nitabamõ soemange, tánõ owī, na loeo si fõfõna andrõ, ba lõ tola tosai irege mahemoloe mbanoea. 5Ba fasa andrõ, ba lõ tola õlaoe ba mbanoea heza, nibeʼe Lowalangioe Jehowa chõoe, 6ba naha andrõ, nitoejoe Lowalangioe, Jehowa, dania, ba wamonahia tõinia ba daʼõ, õtaba wasa andrõ, tánõ owī, na aechoe loeo, ba waʼalaw̃a loeo sahetaʼõ ba danõ Miseraji, 7ba õrino ba õʼā ba naha andrõ, nitoejoe Lowalangioe, Jehowa, dania, ba si hoelõ wongi mahemoloe õ, ba õfazaw̃aʼõ, ba wangawoeli. 8Õnõ ngaloeo waʼara õʼā roti si lõ moeʼaisõni, ba na loeo si fitoe, ba owoeloa chõ Lowalangioe, Jehowa, ba lõ tola õhalõ hadia ia halõw̃õ ba daʼõ.

9II. Fitoe migoe õʼerai; ba mbõrõta sibai wamasi õbõrõgõ wangerai migoe andrõ, si fitoe. (Moz. III. 23, 15). 10Ba aefa daʼõ, ba õlaoe gowasa migoe andrõ chõ Jehowa, õbeʼe zoemange saoha gõlõ, nibeʼe dangaoe, dali waʼeboea howoehowoe andrõ, nibeʼe Lowalangioe, Jehowa, chõoe. 11Ba omoeso dõdõoe fõna Lowalangioe, Jehowa, jaʼoegõ ba onooe matoea ha onooe alawe, ba sawoejoemõ, ira matoea ba ira alawe, ba ono Lewi andrõ, si so ba chõmi, awõ niha bõʼõ andrõ ba si lõ ama, si lõ ina, awõ lacha mbanoea, ba chõmi, ba naha andrõ, nitoejoe Lowalangioe, Jehowa, ba wamonahia tõinia ba daʼõ. 12Ba õtõrõtõrõ tõdõoe, wa no sawoejoe ndraʼoegõ ba danõ Miseraji mege, ba õtõngõni gamachoita andrõ, ba woloʼõ jaʼia.

13III. Ba folaoemõ owasa nose daha geoe, ba fitoe bongi waʼara, na no õʼozaragõ mboea nowi chõoe, awõ nõsi mboea nagoe. (Moz. III. 23, 34 b. t.). 14Ba somoeso tõdõ ndraʼoegõ ba gowasa andrõ chõoe, jaʼoegõ ba onooe matoea ba onooe alawe ba sawoejoemõ, ira matoea ba ira alawe, ba ono Lewi andrõ, awõ niha bõʼõ andrõ ba si lõ ama, si lõ ina, awõ lacha mbanoea si so ba chõmi. 15Fitoe bongi waʼara õlaoe, chõ Lowalangioe, ba naha andrõ, nitoejoe Jehowa dania; ifahowoeʼõ sa ndraʼoegõ Lowalangioe, Jehowa, ba mboea zinanõoe fefoe ba ba halõhalõw̃õ dangaoe fefoe, andrõ wa õʼomoesoiʼõ sibai dõdõoe. 16Medõloe zi dõfi laʼoromaʼõ ira fõna Lowalangioe, Jehowa, dozi motõi matoea ba chõmi, ba naha andrõ, nitoejoenia dania: ba gowasa roti si lõ moeʼaisõni ba ba gowasa migoe andrõ ba ba gowasa nose daha geoe, ba fõna Jehowa, ba lõ taʼoromaʼõ ita lõ taʼohe hadia ia; 17si tola itaha õlõnia iʼohe zamõsana, dali howoehowoe andrõ, nibeʼe Lowalangioe, Jehowa, chõoe.

18IV. Fefoe mado ba dozi banoea chõoe, nibeʼe Lowalangioe, Jehowa, chõoe, ba õfataro chõoe zangoehoekoe ba koemandroe, sangatoelõʼõ fangoehoekoe niha sato. 19Bõi foejoeʼõ hoekoe, bõi eboea dõdõoe zamboeana, bõi a ganaʼa; õ anaʼa andrõ, ba abõsi zatoeatoea ibeʼe, ba ifoejoeʼõ hoehoeo satoelõ. (Moz. II. 23, 8). 20Ha satoelõ õfaigi, enaʼõ aoeri ndraʼoegõ ba enaʼõ lõ aefa chõoe danõ andrõ, nibeʼe Lowalangioe, Jehowa, chõoe. (Mat. 6, 33). 21Bõi taroeʼõ chõoe geoe niʼamoniʼõ, hadia ia ngawalõ geoe, ba ngai naha wameʼe soemange andrõ, chõ Lowalangioe, Jehowa, nifaʼanõmõ chõoe, 22ba he gowe si fatoewoe chõ Lowalangioe, Jehowa, ba bõi taroeʼõ.