Soera Moze V Faza 15

I. Dõfi wangefa andrõ, ba he lawisa ba zi noemana. II. Fangefaʼõ sawoejoe. III. Feʼamoniʼõ ono si aʼa.

1I. Ba na no iroegi mewitoe fache, ba milaoe ndrõfi wangefa. (Jer. 34, 14). 2Ba mimane ba wangefa andrõ: Dozi sosoegilõ, ba bõi saʼae lasoegi nibeʼera nifalali chõ nawõra; bõi lasasagõ nawõra iwara, me no moefarongogõ wangefa andrõ chõ Jehowa. 3Niha bõʼõ, ba hana na õsasagõ, ba soegilõoe ba niwami, ba õloeloe. 4Ba lõʼõ sa si noemana ba chõmi dania; ifahowoeʼõ sibai saʼae ndraʼoegõ dania Jehowa, ba danõ andrõ, nibeʼe Lowalangioe, Jehowa, chõoe, tána chõoe ba tána ba madooemõ dania, enaʼõ õʼochõgõ, 5asala õfondrondrongo sibai li Lowalangioe, Jehowa, wanõngõni oroisa andrõ fefoe, nifaʼemagoe chõoe maʼõchṍ, ba woloʼõ jaʼia. 6Noʼa sa ibeʼe chõoe howoehowoe andrõ Lowalangioe, Jehowa, si mane nifaboeʼoenia chõoe, tobali oja soi nibeʼeoe nifalali; ba jaʼoegõ, ba alacha lõ õfalali ganaʼa, ba oja soi dania zi so barõ mbawaoe; ba lõʼõ sa si mõi ndraʼoegõ barõ mbawa. (F. 28, 12). 7Na so ba chõmi zi noemana, iwami, ha niha, ba mbanoeami, heza, ba danõmi andrõ, nibeʼe Lowalangimi, Jehowa, chõmi, ba bõi zi lõ ahachõ dõdõoe, ba bõi gochõi dangaoe ba niwami andrõ, si noemana, (Moz. III. 25, 35. Joh. I. 3, 17), 8õbokai dangaoe chõnia, ba ja aoha gõlõoe wameʼe nifalali chõnia, ha waʼeboea zogoena chõnia, ba waʼambõ andrõ chõnia, si no gõna ia. 9Ba angelama, fa bõi toemboe ba dõdõoe geraʼera si lõ sõchi, fa bõi õmane dõdõoe: No ahatõ ndrõfi si fitoe andrõ, dõfi wangefa! ba fa bõi afõchõ dõdõoe wamaigioe iwami andrõ, si noemana, fa lõ õbeʼe chõnia, ba na iʼangarõfi li dania Jehowa, ba chõmõ andrõ, ba tobali horõoe. 10Õbeʼe chõnia ba bõi aboea gõlõoe wameʼe chõnia; bõrõ sa wolaoe si manõ, wa ifahowoeʼõ dania ndraʼoegõ Lowalangioe, Jehowa, ba nilaoemõ fefoe, hadia ia, halõhalõw̃õ dangaoe. (Mat. 5, 42. Loek. 6, 35). 11Lõʼõ sa aefaʼaefa, wa so ba danõ zi noemana, andrõ oew̃aʼõ chõoe: bõi aboea gõlõoe wamokai tangaoe ba niwami andrõ si tosasa ba si noemana, ba danõmi. (Mat. 26, 11. Joh. 12, 8).

12II. Na so zamawa jaʼia chõoe, iwami; Heberaio, he ira matoea ba he ira alawe, ba meʼõnõ fache sawoejoemõ ia, ba ba ndrõfi si fitoe, ba õʼefaʼõ ia. (Moz. II. 21, 2). 13Ba na õʼefaʼõ ia, ba bõi fofanõ ia lõ noro danga, 14õfonoro ia biribiri chõoe ba boea nowi ba agoe, sabõnõ noronia, nifahowoeʼõ Lowalangioe, Jehowa, jaʼoegõ, ba õbeʼe chõnia õsa. 15Ba õtõrõ tõdõoe wa no sawoejoe ndraʼoegõ gõi ba danõ Miseraji no, awõ wa no iʼefaʼõ ndraʼoegõ Lowalangioe, Jehowa; andrõ oew̃aʼõ chõoe daʼõ maʼõchṍ. 16Ba na imane chõoe: Lõ edõnado aefa chõoe — bõrõ waʼomasinia ndraʼoegõ ba soroijomooe fefoe, me no ohahaoe dõdõnia jomo chõoe, 17— ba halõ wõrõgi, ba togi dalingania ba mbawandroehõ, ba sawoejoemõ ia, si lõ mamalõmalõ; ba he ba zawoejoemõ ira alawe, ba õmanõ gõi wolaoe. (Moz. II. 21, 6). 18Bõi afõchõ chõoe, na niʼefaʼõ ia, noa sa timba zi daroea mogazi enoni wohalõw̃õnia chõoe zi meonõ fache andrõ; ba tobali ifahowoeʼõ ndraʼoegõ Lowalangioe, Jehowa, ba nilaoemõ, fefoe.

19III. Fefoe nono si aʼa, si matoea, ono zaw̃ioe ba ono mbiribirioe, ba õʼamoniʼõ chõ Lowalangioe, Jehowa. Si aʼa nono zaw̃ioe, ba lõ õfohalõw̃õ, ba ba zi aʼa nono mbiribirioe, ba lõ tola õgoeti mboe. (Moz. II. 13, 2). 20Ba naha andrõ nitoejoe Jehowa, õʼā ia, fõna Lowalangioe, Jehowa, ero rõfi, ba awõoe zoroijomooe fefoe. (F. 12, 5). 21Ba na so chõnia zi sala, ma faʼomboejoemboejoe dõla, ba ma faʼaoeʼa ba ma bõʼõnia sala seboea, ba lõ tola õbeʼe soemange Lowalangioe, Jehowa. (Moz. III. 22, 20). 22Ba nahiamõ õʼā zi manõ, ba he si raʼiõ ba he si lõ faʼaraʼiõ, ba iʼā, nifemanga nago ba ma bõhõ. 23Ha do zi lõ tola õʼā, õfanoewagõ idanõ, ba danõ tooe. (F. 12, 10).