Soera Moze V Faza 14

I. Fanenaw̃a fangeʼesi fajafaja andrõ. II. Famasoegi si lõ tola laʼā. III. Famogoenaʼõ si samboea niʼofoeloe andrõ.

1I. Ono Lowalangimi, Jehowa, ami; ba bõi michoi nõsimi, na so zi mate ba bõi mitõwõ mboemi jaw̃a gangango. (Moz. III. 19, 28). 2No soi niʼamoniʼõ chõ Lowalangioe, Jehowa, ndraʼoegõ, ba no jaʼoegõ nitoejoe Jehowa ba niha bõʼõ fefoe ba goeli danõ, enaʼõ chõnia ndraʼoegõ, soi tána chõnia. (Moz. II. 19, 6).

3II. Bõi a hadia ia zogoro ita! 4Daʼõ zaliw̃aliw̃a ba danõ si tola miʼā: 5Saw̃i ba biribiri ba nambi, ba bõhõ ba nago ba õrõbao ba felandroe ba bate ba selandra ba bõhõ dandri. (Moz. III. 11, 2 b. t.). 6Fefoe zi õfa ahe ba si no fabali saʼa si domboea ba samomendroea fonganga gõra, ba zi õfa ahe andrõ, ba tola miʼā. 7Ba ba zamomendroea fonganga gõra ba ba zi no aloea fabali saʼa, ba daʼõ zi lõ tola miʼā: Ondra ba kaweloe ba kelindri; lafomendroea sa wonganga gõra ba tenga si no fabali saʼa — si raʼiõ ira miw̃aʼõ; 8ba bawi; noa sa si fabali saʼa ia, ba tenga samomendroea fonganga gõnia — si raʼiõ ia miw̃aʼõ. He õsinia ba he amatelania, ba lõ tola mibabaja. 9Ba daʼõ zi tola miʼā saliw̃aliw̃a ba nidanõ, fefoe: Fefoe zi so ferefere ba hoenahoena, ba tola miʼā: 10ba ba zi lõ ferefere ba si lõ hoenahoena, ba samboea lõʼõ si tola miʼā; si raʼiõ ira miw̃aʼõ. 11Fefoe wofo, si tenga si raʼiõ, ba tola miʼā; 12ba daʼõ zi lõ tola miʼā: Mojo ba hela ba razõ wali, 13ba sajowa ba alaʼala ba fefoe motõi hela nasi, 14ba fefoe motõi gaga, 15ba fofo ondra ba katawaena ba samari ba fefoe motõi fõtõ. 16Ba toegõoe ba lamoehoe ba meoe, 17ba engangi ba bangaoe ba belibi, 18ba lakilaki ba fefoe motõi kotoli ba meragai ba bõgi. 19Fefoe ngawalõ zaliw̃aliw̃a ba danõ soʼafi, ba salacha miw̃aʼõ; tõ tõla teʼā. 20Fefoe wofo, si tenga si raʼiõ, ba tola miʼā. 21Hadia ia gamatela, ba lõ tola miʼā; ba niha bõʼõ, si fatewoe ba mbanoeami ba hana na õbeʼe, õnia, ba he na õbeʼe õnia, ba he na õʼamawa ba niha bõʼõ, ba hana; me no soi niʼamoniʼõ chõ Lowalangioe, Jehowa, ndraʼoegõ. Ono mbiribiri, ba bõi rino ba nõsi zoesoe ninania (Moz. II. 23, 19).

22III. Ba mboea zinanõoe ba danõ fefoe, ba õhalõ zamboea niʼofoeloe, ero rõfi, (Moz. III. 27, 30), 23ba fõna Lowalangioe, Jehowa, ba naha andrõ, nitoejoenia, ba wamonahia tõinia ba daʼõ, õʼā zi samboea niʼofoeloe andrõ, boea nowi chõoe ba agoe ba fanicha chõoe ba si aʼa nono zaw̃i ba si aʼa nono mbiribiri chõoe, ba wamamaha jaʼoegõ ba wangataʼoefi Lowalangioe, Jehowa, gõtõ waʼanaoe nosooe, (F. 12, 18). 24Ba na abõlõ arõoe õw̃aʼõ, na tebai õʼohe ba daʼõ, me no arõoe naha andrõ, nitoejoe Lowalangioe, Jehowa, nahia dõinia, ba na no ifahowoeʼõ ndraʼoegõ Lowalangioe, Jehowa, 25ba beʼe bõli ganaʼa, ba ohe ganaʼa andrõ, bõi taja, ba ae ba naha andrõ, nitoejoe Lowalangioe, Jehowa, 26ba õli hadia ia zomasiʼõ — anaʼa andrõ beʼe bõli — saw̃i ba biribiri ba agoe ba hadia nibadoe na, sabeʼe, ba hadia ia fefoe zomasiʼõ, ba mangaʼõ ba daʼõ fõna Lowalangioe, Jehowa, ba jaʼomoeso dõdõoe, awõ zoroijomooe fefoe. 27Ba bõi olifoegõʼõ ba daʼõ nono Lewi, si so ba chõmi, me lõ chõnia tanõ, lõ tána chõnia, ba ngaimõ. 28Ba na no iroegi medõloe fache, ba õ owoeloi zi samboea niʼofoeloe nisõndraoe ba ndrõfi daʼõ, fefoe, õbeʼe tooe ba nahiamõ, 29enaʼõ mõi nono Lewi andrõ, si lõ tanõ, si lõ tána chõra, ba ngaimõ, awõ niha bõʼõ andrõ, ba si lõ ama, si lõ ina, awõ lacha mbanoea, si so ba chõmi, ba enaʼõ laʼaboesoiʼõ ira, enaʼõ ifahowoeʼõ ndraʼoegõ Lowalangioe, Jehowa, ba nilaoemõ andrõ fefoe, halõhalõw̃õ dangaoe andrõ.