Soera Moze V Faza 13

I. Fangoehoekoe samaʼeleʼõ sofaja, II. ba samaeloengoe ba wameʼe adoe, III. ba banoea si no mangerogõ Lowalangi.

1I. Fefoe goroisa andrõ, nibeʼegoe chõmi, ba mitõngõni, ba woloʼõ jaʼia; bõi minõnõ, ba bõi miwoewoe. 2Na so zi maoso ba chõmi samaʼeleʼõ, ba ma sangifi, sangombacha chõoe tandra ba ma ilaʼila, (Mat. 7, 15), 3ba na itõrõ tandra andrõ ba ma ilaʼila andrõ, niʼombachaʼõnia chõoe, wangoemaʼõ: Dataʼoʼõ Lowalangi bõʼõ — [Lowalangi] si lõ õrai mila — ba tafosoemange! 4ba bõi fondrondrongo li zamaʼeleʼõ andrõ, ba he na sangifi, me no fanandraigõ Lowalangimi, Jehowa, jaʼami, ba wamaigi, na moroi siʼaikõ ba dõdõmi miʼomasiʼõ Lowalangimi, Jehowa, ba na moroi siʼaikõ ba geraʼerami. 5Chõ Lowalangimi, Jehowa, miʼoʼõ, miʼataʼoefi ia, miʼoʼõ goroisania ba mifondrondrongo linia, jaʼia nifosoemangemi, ba chõnia molemba ami. 6Ba samaʼeleʼõ andrõ ba ma zoei sangifi andrõ, ba niboenoe, me no ifarooe niha ba wolaw̃a Lowalangimi, Jehowa, si no mangeheta jaʼami ba danõ Miseraji, si no mangefaʼõ jaʼoegõ ba zi no mõiʼõ sawoejoe, ba wamaeloengoe jaʼoegõ, enaʼõ õrõi lala andrõ, niw̃aʼõ Lowalangioe, Jehowa, chõoe fanõrõ; tobali õhori zi lõ sõchi ba chõmi. (F. 18, 20. Jer. 28, 16).

7II. Na so zamowõhõ jaʼoegõ, nibiniʼõ, he na talifoesõoe, ono ninaoe, ba he na onooe matoea, ba he na onooe alawe, ba he na foʼomooe, nitalagoeimõ bagi, ba he na si fahoewoe chõoe, somasiʼõ, timba nosooe, na imane chõoe: Talaboe, tafosoemange Lowalangi niha bõʼõ! — [Lowalangi] si lõ mirai miʼila, he ira toeaoe mege, (F. 17, 2), 8Lowalangi soi andrõ, si tefasoei jaʼami, he ba zahatõ, ba he ba zarõoe, iʼotarai wondrege danõ, noemalõ ba wondrege tánõ sa —, 9ba bõi oʼõ, bõi fondrondrongo linia; ba bõi ahachõ dõdõoe, wamaigi jaʼia, bõi alimagõ ia chõoe ba bõi biniʼõ horõnia, 10õboenoe ia; tangaoe zi ofõna tohare chõnia, ba wamoenoe jaʼia, ba awena dania danga zato fefoe. 11Õteboe kara ia, wamoenoe jaʼia, me no iʼaloei wamabali jaʼoegõ chõ Lowalangioe, Jehowa, si no mangeheta jaʼoegõ ba danõ Miseraji, ba zi no mõiʼõ sawoejoe. 12Ba jalarongo Iraono Gizeraëli fefoe, enaʼõ ataʼoe ira, fa bõi saʼae faloecha ba chõmi zamazõchi horõ si mane daʼõ. (F. 19, 20).

13III. Na õrongo, ba mbanoea andrõ, heza, nibeʼe Lowalangioe, Jehowa nahiaoe, 14no maoso niha si lõ ngaroro, banoeami, ba no lafowõhõ mbanoeara, wangoemaʼõ: Talaboe, tafosoemange Lowalangi bõʼõ! — 15[Lowalangi] si lõ mirai mila —, ba haogõ wanechegõ, aloealoei sibai, ba na oroma dania, wa tenga faja, wa no telaoe ba chõmi zogoro ita andrõ, 16ba õboenoe mbanoea andrõ siʼõli, õlachaʼõ mbanoea andrõ, awõ nõsinia fefoe, awõ goerifõra, siʼõli. 17Fefoe hadia ia zi mõi ba dangami ba mbanoea andrõ, ba õʼowoeloi baewali sebolo chõra, ba õtoenoe mbanoea, fabaja nihalõmi andrõ, fefoe, soemange Lowalangioe, Jehowa, saʼoi so, ba ja hilihili adoedoela ia, si lõ teboelõ, bõi jatetaroeʼõ saʼae. 18Bõi falemba ba dangaoe hadia ia nilachaʼõ andrõ, enaʼõ alõ wõnoe Jehowa andrõ, si no abõlõbõlõ, ba enaʼõ ahachõ dõdõnia ndraʼoegõ, ba enaʼõ ato ami, ibeʼe, ba waʼahachõ dõdõnia andrõ, si mane nifaboeʼoenia chõ ndra toeaoe, si no mõi ba hõloe ia, (F. 7, 26), 19na õfondrondrongo li Lowalangioe, Jehowa, woloʼõ oroisania andrõ fefoe, nifaʼemagoe chõoe maʼõchṍ, awõ wolaoe satoelõ, wamaigi Lowalangioe, Jehowa.