Soera Moze V Faza 12

I. Oroisa ba wanoedoegõ naha wameʼe adoe, fefoe. II. Fangohonogõi naha wameʼe soemange, si ha samboea. III. Fanenaw̃a wemanga ndro. IV. Famangelama ba zogoro ita andrõ ba Ndrawa Ganaʼana.

1I. Daʼe nifachoi, ba daʼe hoekoe, nitõngõnimi ba woloʼõ jaʼia, si lõ mamalõmalõ, ba danõ andrõ, nibeʼe Lowalangi ndra toeaoe, Jehowa, chõoe, gõtõ waʼanaoe nosomi ba goeli danõ. 2Mifaoeloegõ wanoedoegõ nahia andrõ fefoe, ba nifosoemange soi niha andrõ, nitimbami, Lowalangira mege, ba hili salaw̃a, ba ba hilihili ba ba mbõrõ geoe saoeri fefoe. (Moz. II. 34, 13). 3Midoedoegõ naha wameʼe soemange andrõ chõra, ba gowe chõra, ba mirasa, ba eoe niʼamoniʼõ andrõ chõra, ba mitoenoe, ba famaedo Lowalangira, ba mifoefoe, mibeʼe mate dõinia ba nahania andrõ. (Sangoehoek. 2, 2). 4Ba bõi nimanõ ba chõ Lowalangimi, Jehowa. (Moz. II. 20, 24. Raz. I. 8, 29).

5II. Naha andrõ, nihonogõi Lowalangimi, Jehowa, dania, nitoejoenia ba madomi andrõ fefoe, ba wamonahia tõinia ba daʼõ, ba bõi mibõhõli, ba daʼõ mõiʼõmõiʼõ. 6Ba daʼõ miʼohe zoemange nitoenoe andrõ chõmi ba soemange nitaba, ba si samboea niʼofoeloe andrõ chõmi ba hadia nibeʼemi soemange si no amaedola wegero, ba amaboeʼoela limi. Ba saoha gõlõmi ba si aʼa ba waʼatoemboe ba zaw̃imi ba ba mbiri-birimi. 7Ba daʼõ milaoe manga fõna Lowalangimi, Jehowa, ba ba daʼõ omoeso dõdõmi, soroijomomi fefoe, miʼomoesoiʼõ tõdõ gõlõmi, nisõndrami andrõ, nifahowoeʼõ Lowalangioe, Jehowa, jaʼoegõ. 8Bõi mitohoegõ wolaoelaoeda ijaʼe, me ilaoe zomasi ia zamõsana. 9Iroegi maõchṍ sa, ba lõ nichamõmi faʼahono ba tenga na chõmi danõ, nibeʼe Lowalangioe, Jehowa, dania. 10Ba na no miʼõtõ Joridano, na no ahono ami ba danõ andrõ, nibeʼe Lowalangimi, Jehowa, ochõtami ba na no itimba nemalimi fefoe, fasoei, fa ahono ami, 11fa lõ hadia ia saʼae chõmi, awena dania moʼahonoa, wa ba naha andrõ, miʼohe fefoe hadia ia niw̃aʼõgoe chõmi, ba naha andrõ, nitoejoe Lowalangimi, Jehowa, ba wamonahia tõinia ba daʼõ; soemange nitoenoe andrõ chõmi ba soemange nitaba, ba si samboea niʼofoeloe andrõ chõmi, ba hadia nibeʼemi soemange si no amaedola wegero, ba soemange amaboeʼoela li andrõ chõmi, nitoetoejoe, nifaboeʼoemi chõ Jehowa. 12Ba omoeso dõdõmi fõna Lowalangimi, Jehowa, jaʼami ba iraonomi matoea ba iraonomi alawe ba sawoejoemi, ira matoea ba ira alawe, awõ nono Lewi andrõ, si fatewoe chõmi, me lõ chõnia tanõ, lõ tána chõnia, ondrõita dania. (Moz. IV. 18, 20). 13Faigi sibai, fa bõi saté õbeʼe zoemange nitoenoe andrõ chõoe: 14ba naha nitoejoe Jehowa ba madomi andrõ, heza, ba daʼõ õbeʼe zoemange nitoenoe andrõ chõoe, ba ba daʼõ õlaoe fefoe hadia ia niw̃aʼõgoe chõoe. 15Ba hana sa na õtaba õoe zomasiʼõ ba mbanoeami fefoe, misa, ha waʼoja nibeʼe chõoe, howoehowoe Lowalangioe, Jehowa; he si raʼiõ ba he si lõ faʼaraʼiõ, ba hana na laʼā, amaedola nago ba amaedola mbõhõ. 16Ha do zi lõ tola miʼā; õfanoewagõ idanõ ba danõ. (Moz. I. 9, 4). 17Ba si samboea niʼofoeloe andrõ chõoe, he boea danõ ba he agoe ba he fanicha, ba lõ tola õʼā ba mbanoeami misa, ba he si aʼa ba waʼatoemboe andrõ ba zaw̃ioe ba ba mbiribirioe, ba he hadia ia gamaboeʼoela li andrõ, nifaboeʼoemõ, ba he ameʼelamõ saoha gõlõ, ba he hadia ia nibeʼeoe soemange fegero; 18fõna Lowalangioe Jehowa, ba naha andrõ nitoejoe Lowalangioe, Jehowa, õʼā ia, jaʼoegõ ba onooe matoea ba onooe alawe, ba sawoejoemõ, ira matoea ba ira alawe, awõ nono Lewi andrõ, si fatewoe ba mbanoeami, ba õʼomoesoiʼõ tõdõ fefoe hadia ia, nisõndraoe fõna Lowalangioe, Jehowa. (F. 14, 23). 19Ba faigi sibai, fa bõi õʼositengagõ nono Lewi andrõ, gõtõ waʼanaoe nosooe ba danõmi.

20III. Ba ebolo dania danõoe, ibeʼe Lowalangioe, Jehowa, na itõrõ nifaboeʼoenia chõoe, ba na õmane dania: Omasido ndriwo! me no mamiomio dõlõtõlõoe ba daʼõ, ba hana na õʼā ndriwo, ha waʼoja zomasiʼõ. 21Ba na no abõlõ arõoe naha andrõ, nitoejoe Lowalangioe, Jehowa, ba wamonahia tõinia ba daʼõ, ba tabataba, si mane niw̃aʼõgoe chõoe, saw̃imõ ba biribirimõ, nibeʼe Jehowa chõoe, ba a ia, ba nahiaoe andrõ, ha waʼoja zomasiʼõ. 22Si mane na laʼā nago ba bõhõ wemangaoe jaʼia; he si raʼiõ, ba he si lõ faʼaraʼiõ, ba faoma tola laʼā wõfõ. 23Ba bõi awoeʼa, wa bõi manõ õʼā ndro; me no noso ndro andrõ, ba lõ tola õfao wemanga noso, na õʼā nõsi. (Moz. III. 17, 11). 24Lõ tola õʼā, õfanoewagõ idanõ ba danõ tooe. 25Lõ tola õʼā, enaʼõ sohahaoe dõdõ ndraʼoegõ ba iraonooe foerioe, na õʼoʼõ zatoelõ, wamaigi Jehowa. 26Ba hadia nibeʼeoe ameʼela niʼamoniʼõ ba soemange amaboeʼoela li andrõ chõoe, ba ba naha andrõ, nitoejoe Jehowa, õʼohe, 27ba ba naha wameʼe soemange chõ Lowalangioe, Jehowa, õbeʼe zoemange nitoenoe andrõ chõoe, õsi ba do, ba do zoemange nitoenoe andrõ chõoe, ba nifadoewa ba naha wameʼe soemange chõ Lowalangioe, Jehowa; ba õsi, ba tola õʼā. 28Tõngõni goroisa andrõ fefoe, nifaʼemagoe chõoe, ba oʼõ, enaʼõ lõ mamalõmalõ, wa sohahaoe tõdõ ndraʼoegõ, fabaja onooe foerioe dania, na õlaoe zatoelõ ba si sõchi, wamaigi Lowalangioe, Jehowa.

29IV. Ba na ihori fõnaoe soi niha andrõ Lowalangioe, Jehowa, soi si mõiʼõ moetimba, ba na no õtimba ira ba na no ahono ndraʼoegõ ba danõra, 30ba angelama, fa bõi eloengoe ndraʼoegõ, ba woloʼõ hoekoe chõra, na no moehori ira fõnaoe, ba fa bõi õzofoezofoe Lowalangira andrõ, fa bõi õmane: He wisa atṍ wamosoemange soi andrõ Lowalangira, enaʼõ oemanõ gõi wolaoe? 31Lõ tola õmanõ wolaoe ba chõ Lowalangimõ, Jehowa; nilaoera chõ Lowalangira sa, ba oi sogoro Jehowa ba oi si fatoewoe chõnia, onora matoea naʼi ba onora alawe, ba latoetoenoe õ Lowalangira. (F. 18, 9).