Soera Moze V Faza 11

I. Tohoetohoe wamarooe tõdõ ba woloʼõ, na lafasoegi ba dõdõra zi no ilaoe chõra Lowalangi. II. No faehoe sibai ira danõ Ganaʼana danõ Miseraji. III. Bõi manõ olifoe ira goroisa Jehowa. IV. Howoehowoe ba fangelifi.

1I. Ba õʼomasiʼõ saʼae Lowalangioe, Jehowa, ba õʼoʼõ niw̃aʼõnia niʼoʼõ, nifachoinia andrõ ba hoekoe andrõ chõnia ba oroisania, sagõtõ jaʼoegõ, 2ba jaʼaboto ba dõdõmi maʼõchṍ, — tenga sa ba ndraonomi, si lõʼõ na mege, si lõ mangila jaʼia [hoemede ndraʼo] — wotoe Lowalangimi, Jehowa, ba faʼasalaw̃ania ba tangania andrõ, si no abeʼe ba taʼionia, si no moeʼoroʼõ, 3ba tandra andrõ chõnia ba folaoenia ba danõ Miseraji, chõ Waraʼo, razo Miseraji, ba ba danõnia maʼasagõrõ, 4nifatõrõnia ba zabõlõ Miseraji ba ba koedora ba ba goeretara, me ihawoei ira asi zoechoe andrõ, me lagohi ami, wangohori jaʼira, iroegi maʼõchõ andre, (Moz. II. 14, 26), 5ba he iwisa chõmi ba danõ si mate, iroegi no michamõ daʼe, 6awõ nilaoenia chõ ndra Datano Abiramo, iraono Geliabi andrõ, mado Roebeno, me ifaboka mbawania tanõ, me itõlõ ira ba hoenõ Ndraono Gizeraëli fefoe, fabaja nahiara, awõ nosera, awõ fefoe hadia ia zi faofao chõra. (Moz. IV. 16, 32). 7Noa saʼae hõrõmi zangila seboea andrõ fefoe, nilaoe Jehowa. 8Ba miʼoʼõ saʼae goroisa andrõ fefoe, nifaʼemagoe chõmi maʼõchṍ, enaʼõ abõlõ ami, ba wondroegi tanõ andrõ ba ba wangochõgõ jaʼia, tanõ si mõi ami mijefo ijaʼe, ba wangai jaʼia chõmi, 9ba enaʼõ anaoe nosomi ba danõ andrõ, si no mõi ba hõloe Jehowa chõ ndra toeami, ba wameʼe chõra ba ba maʼoewoera, — tanõ ba zi falawoe soesoe ba w̃e w̃ani.

10II. Tanõ andrõ sa, ba zi mõi ndraʼoegõ, ba wangochõgõ jaʼia, ba no tenga si mane tanõ Miseraji andrõ, saheta ami, nifoʼidanõmõ aheoe, na no õtaroe danõmõoe, amaedola kaboe goele. 11Tanõ andrõ, ba zi mõi ami mijefo ba wangochõgõ jaʼia, ba no tanõ si so hili ba si so daso, tanõ samadoe teoe, na atoroe moroi jaw̃a, (F. 8, 7), 12tanõ nirorogõ Lowalangioe, Jehowa; lõ aefa hõrõ Lowalangioe, Jehowa, chõnia, dõfi fasoei. 13Ba na aʼoi dõdõmi woloʼõ oroisagoe andrõ, nibeʼegoe chõmi maʼõchṍ, wangomasiʼõ Lowalangimi Jehowa, na moroi siʼaikõ ba dõdõmi ba na moroi siʼaikõ ba geraʼerami mõi ami enoninia, 14ba oefatõrõ ba danõmi deoe, na inõtõ, teoe sahoelõ ba teoe sara, enaʼõ õʼila õʼozaragõ mboea nowi chõoe ba boea nagoe chõoe ba fanicha. (F. 28, 12. Joël. 2, 23). 15Ba oefodoeʼoe mbenoeamõ, õ goerifõoe, enaʼõ õsõndra gõoe ba enaʼõ aboesoʼõ. 16Mifaigi sibai, fa bõi ibeʼe nifõw̃õhõ ia tõdõmi, ba wamosoemange Lowalangi bõʼõ, ba ba wangaloeloe ba daʼõ; 17fa bõi tesao wõnoe Jehowa chõmi, fa bõi ikoesi mbanoea si jaw̃a, tobali lõ teoe saʼae ba lõʼõ saʼae boea danõ, ba lõ ararā, ba ahori ami ba danõ si sõchi andrõ, nibeʼe Jehowa chõmi. (F. 28, 23).

18III. Ba mibeʼe ba dõdõmi niw̃aʼõgoe andre, bõi olifoe ami; mibõbõgõ ba dete dangami, tandratandra, ba ba mbõrõ nichoemi mibeʼe, amaedola mbala hõgõ! (F. 6, 8). 19Mifahaõ ndraonomi ba daʼõ, jaʼitõrõ limõ na jomo soʼõ ba na ba wekoli, na mõiʼõ mõrõ ba na maosoʼõ; (F. 4, 10); 20õsoera ba gehomo nomooe ba ba lagõ mbawa gõli chõoe, 21enaʼõ anaoe nosomi ba he noso ndraonomi dania, sagõtõ banoea jaw̃a danõ, ba danõ andrõ, nifaboeʼoe Jehowa chõ ndra toeami, fahõloesa. 22Ba na moroi ba dõdõmi mifaigi woloʼõ oroisa andrõ fefoe, nifaʼemagoe chõmi, na miʼomasiʼõ Lowalangimi, Jehowa, ba na lõ teboelõ wa lala andrõ chõnia mitõrõ ba chõnia molemba ami, 23ba itimba dania fõnami soi andrõ fefoe Jehowa, ba mitema gondrõita soi sato niha, moroi chõmi, ba sabõlõ, moroi chõmi. 24Fefoe danõ, nihoendragõ gahemi, ba chõmi dania, iʼotarai danõ si mate andrõ, noemalõ ba hili Libano, ba iʼotarai mboto nidanõ andrõ, Oiferati, noemalõ ba mbewe nasi tánõ ba gaechoela loeo, ba tanõmi dania. (Jos. 1, 3). 25Lõ sabeʼe moroi chõmi dania; sagõrõ tanõ si mõi ami ihawoei dania ira Lowalangimi, Jehowa, faʼataʼoera ami ba fehocha mboera chõmi, itõrõ nifaboeʼoenia chõmi. (Moz. II. 23, 27).

26IV. Hiza, howoehowoe ba fangelifi oefaedo chõmi miʼõchṍ: (F. 30, 1): 27howoehowoe na miʼoʼõ goroisa Lowalangimi, Jehowa, andrõ, nifaʼemagoe chõmi maʼõchṍ, 28ba fangelifi, na lõ miʼoʼõ goroisa Lowalangimi, Jehowa, na mirõi lala andrõ, nifachoigoe chõmi maʼõchṍ, ba woloʼõ Lowalangi bõʼõ, si lõ mirai mila mege. 29Ba na no iʼohe dania ndraʼoegõ Lowalangioe, Jehowa, ba danõ andrõ, ba zi mõiʼõ, ba wangochõgõ jaʼia, ba ba hili Gerisi õbeʼe howoehoewoe, ba fengelifi, ba ba hili Gebala õbeʼe. (F. 27, 12. Jos. 8, 33). 30Hili andrõ jefo Joridano ba zi tambai lala andrõ tánõ ba gatoemboecha loeo, ba danõ Ndrawa Ganaʼana andrõ ba Garaba, ba gamaoedoe Giligala, ba ngai gatoea manawa More. 31Miʼõtõ saʼae Joridano, ba wangochõgõ tanõ andrõ, nibeʼe Lowalangimi, Jehowa, chõmi. Ba na no mihalõ chõmi, na no ahono ami ba danõ, 32ba mifaigi, bõi zi lõ miʼoʼõ nifachoi andrõ fefoe, awõ hoekoe andrõ, niʼombachaʼõgoe chõmi maʼõchṍ.