Soera Moze V Faza 10

I. Tefazõchi gara wanoera si bohooe, ba wanoera oroisa. II. Famarooe tõdõ ba wangataʼoefi Lowalangi.

1I. Ba me loeo daʼõ, ba imane chõgoe Jehowa: Toto chõoe gara wanoera, doea gõrõ, si mane mege, ba ae chõgoe mijaw̃a ba hili; ba õfazõchi gõi chõoe dawõla eoe. (Moz. II. 34, 1). 2Oesoera dania ba gara andrõ daroma li andrõ, si so ba gara mege, nirasamõ, ba õbeʼe barõ dawõla andrõ dania. 3Ba oefazõchi dawõla, bana geoenia, ba oetoto gara wanoera, domboea, si mane mege, ba mõido mijaw̃a ba hili, oeʼohe tangagoe gara andrõ, si domboea. 4Ba isoera ba gara andrõ daroma li andrõ, si foeloe, niw̃aʼõnia mege chõmi ba hili, moroi ba galitõ, me loeo waloechata andrõ, si mane fanoera mege wanoera jaʼia. Ba ibeʼe ba dangagoe Jehowa. 5Ba mõido mitooe, moroi ba hili, ba oebeʼe barõ dawõla andrõ, nifazõchigoe, gara andrõ ba ba daʼõ ahono, dali niw̃aʼõ Jehowa chõgoe. 6Ba laheta ira ba Mbeʼeroti-Bene-Jaʼaka Iraono Gizeraëli, lasaw̃a Mosera. Ba ba daʼõ mate Gaʼaroni ba ba daʼõ lakoʼo ia, ba ononia Eleazari wangalinia ere. (Moz. IV. 33, 31). 7Ba moroi ba daʼõ, ba lasaw̃a Goedigoda, ba moroi ba Goedigoda, ba lasaw̃a Jotiba, tanõ soja mbombo. 8Ba me loeo daʼõ, ba iʼoniagõ mado Lewi Jehowa, ba wolohelohe tawõla nahia zoera goroisa Jehowa, ba enaʼõ fõna Jehowa so ira, ngoningoninia, si lõ teboelõ, ba enaʼõ mamahowoe ira ba dõinia, si lõ mamalõmalõ, ero maʼõchṍ. (Moz. IV. 3, 12; 6, 23). 9Andrõ lõ manema mado Lewi tanõ, lõ tána chõra si lõ teboelõ, si mane ba dalifoesõra; tána chõrā, ba Jehowa, dali nifaboeʼoe Lowalangioe Jehowa chõra. (Moz. IV. 18, 20. Hes. 44, 28). 10Ba jaʼodo, ba si lõ teboelõ ba hili, si mane mege, ba zi fõfõna, õfa woeloe ngaloeo ba õfa woeloe mbongi, ba ifondrondrongo chõgoe Jehowa ba zi samoeza andrõ gõi: Lõ ifakiko ndraʼoegõ Jehowa. 11Ba imane chõgoe Jehowa: Laboe, aeʼe, ba wolohe jaʼira, mofanõ ami enaʼõ laroegi danõ andrõ ba enaʼõ laʼochõgõ, tanõ andrõ nibeʼegoe chõra dania, dali weʼamõigoe ba hõloe chõ ndra toeara andrõ.

12II. Ba ijaʼe, jaʼami Iraono Gizeraëli, hadia niw̃aʼõ Lowalangimi, Jehowa chõmi, na tenga fa õʼataʼoefi Lowalangioe, Jehowa, ba enaʼõ bõi õboelõʼõgõ ba lala andrõ chõnia, ba enaʼõ õʼomasiʼõ ia, ba enaʼõ enoni Lowalangioe, Jehowa, ndraʼoegõ, moroi siʼaikõ ba dõdõoe ba moroi siʼaikõ ba geraʼeraoe, 13woloʼõ oroisa andrõ ba amachoita nifachoi Jehowa nifaʼemagoe chõoe maʼõchṍ, fangohahaoe dõdõoe. 14He sa no chõ Lowalangioe, Jehowa, mbanoea si jaw̃a, iroegi ba wondrege jaw̃a, awõ danõ ba õsinia fefoe, (Sin. 24, 1; 115, 16), 15ba noa zoei ha chõ ndra toeaoe eboea dõdõ Jehowa, wangomasiʼõ jaʼira, ba no itoejoe ami, maʼoewoera andrõ, ba niha bõʼõ fefoe, si mane maʼõchṍ. (F. 4, 20). 16Ba miboto saʼae mbotolõ dõdõmi andrõ, ba bõi saʼae sabeʼe bõrõ doeʼi ami! (F. 30, 6. Jer. 4, 4). 17Me no Lowalangi Lowalangi bõʼõ Lowalangimi andrõ, Jehowa, ba me no Soʼaja sochõ, Lowalangi seboea ba sabõlõ ba sataʼoe ita, si lõ eboea tõdõ zamboeana ba si lõ manga ganaʼa, (Job. 34, 19. Hal. zin. 10, 34. Rom. 2, 11. Efes. 6, 9. Fet. I. 1, 17. Fam. 17, 14), 18solohe ba lala hoehoeo zi lõ ama, si lõ ina, ba sangomasiʼõ niha bõʼõ, wameʼe balazo chõnia, awõ noecha. 19Ba miʼomasiʼõ niha bõʼõ, me no niha bõʼõ ami gõi ba danõ Miseraji no. 20Õʼataʼoefi Lowalangioe Jehowa ba õfosoemange, chõnia molemba ndraʼoegõ ba ba dõinia mõiʼõ ba hõloe! 21Fangeboea doeriamõ ia ba Lowalangioe, si no molaoe chõoe seboea andrõ ba sataʼoe ita, niʼila hõrõoe. 22Fitoe ngafoeloe niha waʼato ndra toeaoe, me lasaw̃a danõ Miseraji, ba ijaʼe, ba no timba waʼoja ndrõfi ba mbanoea, ibeʼe Lowalangioe, Jehowa. (Moz. I. 46, 27).