Soera Moze V Faza 9

I. Bõi law̃aʼõ tõdõra satoelõ ira. II. Famasoegi ba dõdõ horõ no, ba nono zaw̃i balaki. III. Awõ wa no asese moekõkõkõkõ ira.

1I. Mifondrondrongo, jaʼami Iraono Gizeraëli! Õʼõtõ ijaʼe Joridano andrõ, ba wolaw̃a soi sato moroi chõoe ba sabõlõ moroi chõoe, ba enaʼõ atoeʼa ndraʼoegõ ba mbanoea, si no eboea ba si no aro, siroegi ba mbanoea si jaw̃a õli, 2enaʼõ õlaw̃a soi sato niha ba salaw̃a boto, Dawa Genaki andrõ, si no iʼila hõrõoe ba si no õrongo, na law̃aʼõ: Ha niha zangila molaw̃a Dawa Genaki andrõ? 3Ba bõi zi lõ aboto ba dõdõoe saʼae, wa no Lowalangioe, Jehowa zowaõwaõ fõnaoe, amaedola galitõ si mangamanga hadia ia; jaʼia zangohori, jaʼia zangõhõndrõgõ jaʼira fõnaoe, ba tobali lõ ararā õʼanimbaʼõ jaʼira ba lõ ararā õʼangohoriʼõ, itõrõ nifaboeʼoe Jehowa chõoe. 4Ba na itimba dania ira fõnaoe Lowalangioe, Jehowa, ba bõi õmane dõdõoe: Bõrõ waʼatoelõ dõdõgoe, wa jaʼo zochõ tanõ andre, ibeʼe Jehowa; me no bõrõ horõ niha andrõ, wa itimba ira fõnaoe Jehowa. (Moz. I. 15, 16. Moz. III. 20, 23). 5Tenga sa ba waʼatoelõ dõdõoe ba tenga ba waʼadõlõ dõdõoe mõi chõoe danõra andrõ, bõrõ horõ soi andrõ, wa itimba ira fõnaoe Lowalangioe, Jehowa, ba enaʼõ itõrõ gamaboeʼoela linia andrõ, nifaboeʼoe Jehowa chõ ndra toeaoe Aberahamo, Izaʼaki, Jakobo, si no mõi ba hõloe ia. 6Ba jaʼaboto ba dõdõoe, wa tenga bõrõ waʼatoelõ dõdõoe, wa ibeʼe ochõtaoe danõ si sõchi andre Lowalangioe, Jehowa: noa sa soi sabeʼe tandro ndraʼoegõ.

7II. Tõrõtõrõ tõdõoe ba bõi olifoegõʼõ he wisa wangandrõngandrõoe fõnoe Lowalangioe, Jehowa, ba danõ si mate! Iʼotarai loeo andrõ, me aheta ami ba danõ Miseraji, irege miroegi daʼe, ba sabeʼe tandro ami chõ Jehowa. (Moz. II. 14, 11). 8Ba gahe hili Horebi andrõ miʼandrõ wõnoe Jehowa, ba abao dõdõnia chõmi, irege ihori ami menaʼõ. (Moz. II. 32, 4). 9No mõido mijaw̃a ba hili, ba wanema kara wanoera andrõ, kara nisoera fawoeʼoesa li andrõ, nilaoe Jehowa chõmi, ba õfa woeloe ngaloeo ba õfa woeloe mbongi waʼaragoe ba hili andrõ, lõ niʼagoe roti ba lõ nibadoegoe idanõ. (Moz. II. 24, 18). 10Ba ibeʼe ba dangagoe Jehowa gara wanoera andrõ, si doea gõrõ, nisoea toeroe Lowalangi, si so taroma li andrõ fefoe, niw̃aʼõ Jehowa chõmi, moroi ba galitõ, me loeo waloechata, ba hili andrõ. (Moz. II. 31, 18). 11Me no aefa zi õfa woeloe ngaloeo ba si õfa woeloe wongi, ba ibeʼe ba dangagoe Jehowa gara wanoera andrõ, si doea gõrõ, kara andrõ nisoera oroisa andrõ. 12Ba imane saʼae chõgoe Jehowa: Laboe, taʼitaʼi mitooe, noa sa lalaoe wamakiko banoeaoe andrõ, nihetamõ ba danõ Miseraji. No alio sibai larõi lala andrõ, nifachoigoe chõra: no lafazõchi chõra nadoe nifahele. 13Ba imane na chõgoe Jehowa: Oeʼila sibai saʼae soi andrõ, wa no soi sabeʼe bõrõ doeʼi. (Moz. II. 32, 9). 14Ba bõhõlido saʼae, enaʼõ oehori ira, oeboenoe dõira ba goeli danõ ba oebaliʼõ foeroegõ soi ndraʼoegõ, foeroegõ soi sabõlõ moroi chõra ba sato niha. 15Ba maoso ndraʼo oefoelido mitooe moroi ba hili siholahola na, doea dangagoe wolohe kara andrõ, si doea gõrõ, soera goroisa. 16Ba awena oeʼila, ba hiza, ba no mifazõchi horõ chõ Lowalangimi, Jehowa, no milaoe nono zaw̃i nifahele; no alio sibai mirõi lala andrõ, nifachoi Jehowa chõmi. 17Ba oetoejoe gara andrõ, si doea gõrõ, ba doea dangagoe wamazaoemba jaʼia, oerasa, ba zanehe ami. 18Ba oefalõgoe tooe ndraʼo fõna Jehowa; si mane mege, õfa woeloe ngaloeo ba õfa woeloe mbongi, lõ oeʼā roti ba lõ oebadoe nidanõ, bõrõ horõmi andrõ fefoe, nifazõchimi, me no milaoe zi lõ omasi Jehowa, fangandrõ wõnoenia. (Moz. II. 34, 28). 19Sataʼoe saʼae ndraʼo fõnoe Jehowa ba bachoebachoe dõdõnia chõmi, wa ihori ami menaʼõ. Ba ifondrondrongo chõgoe Jehowa, ba daʼõ gõi. 20Ba chõ Gaʼaroni gõi, ba mofõnoe sibai ia, irege ifakiko menaʼõ, ba ba chõ Gaʼaroni gõi mangandrõ ndraʼo, me loeo daʼõ. 21Ba horõmi andrõ, nilaoemi, ono zaw̃i andrõ, ba oehalõ, oetoenoe, ba oetoetoe, oefaoeloegõ oefoefoe, balazi no ohama sibai, ba si hoelõ gawoegawoe andrõ, ba oetiboʼõ ba mbombo andrõ, si otarai hili moroi jaw̃a. (Moz. II. 32, 20).

22III. Ba baero daʼõ, ba ba Dabera miʼandrõ wõnoe Jehowa ba ba Masa ba ba nikoʼo soloeʼaloeʼa. (Moz. IV. 11, 3. Moz. II. 17, 7. Moz. IV. 11, 34). 23Ba he me ifatenge ami Jehowa, moroi ba Gadesi-Mbarenea, wangoemaʼõ chõmi: Miʼae misi jaw̃a ba miʼochõgõ danõ, nibeʼegoe chõmi, ba te chõmi goroisa Lowalangimi, Jehowa, ba lõ fadoehoe dõdõmi chõnia ba lõ mifondrondrongo chõnia. (Moz. IV. 14, 1). 24No sabeʼe bõrõ doeʼi ami chõ Jehowa, iʼotarai me awena oeʼila ami. 25Ba me sodo manõ tooe ba danõ, fõna Jehowa, si õfa woeloe ngaloeo õfa woeloe mbongi, si no oefalõgoe tooe ndraʼodo, me no idaõʼõdaõʼõ Jehowa ihori ami, 26ba mangandrõdo chõ Jehowa, oemane: He Soʼaja, Jehowa bõi fakiko mbanoea tána chõoe andrõ, niʼefaʼõmõ faʼabõlõoe andrõ si tenga inõtõ, nihetaoe ba danõ Miseraji tangaoe andrõ, si no abeʼe! (Moz. IV. 14, 13. Jos. 7, 7). 27Tõrõtõrõ tõdõoe genonioe andrõ, Aberahamo ba Izaʼaki ba Jakobo! Ba bõi beʼe balazi waʼabeʼe mbõrõ doeʼi mbanoeaoe andrõ ba he falõsõchira andrõ ba he horõra. 28Fa bõi law̃aʼõ niha ba danõ andrõ, ba nihetaoe jaʼira: Me tebai iʼohe ira Jehowa ba danõ andrõ, nifaboeʼoenia chõra, ba me no fatioe dõdõnia chõra, ba ba wameʼe tekiko jaʼira ba danõ si mate iheta ira! 29Noa sa atṍ banoeaoe ira, no tána chõoe, nihetaoe faʼabõlõoe andrõ si tenga inõtõ, ba taʼiomõ andrõ niʼoroʼõ.