Soera Moze V Faza 8

I. Famasoegi ba dõdõ faʼobõwõ Lowalangi chõra ba famarooe tõdõ ba wangandrõ saoha gõlõ jaʼia. II. Bõi olifoe ira waʼeboea dõdõ Lowalangi andrõ.

1I. Oroisa andrõ fefoe, nifaʼemagoe chõmi maʼõchṍ, ba miʼoʼõ, enaʼõ aoeri ami ba enaʼõ ato ami, ba enaʼõ miroegi danõ andrõ ba wangochõgõ jaʼia, tanõ andrõ nifaboeʼoe Jehowa chõ ndra toeami, fahõloesa. 2Tõrõtõrõ tõdõoe wamasao Lowalangioe, Jehowa jaʼoegõ, no õfa woeloe fache waʼara, ba danõ si mate andrõ, ba dõrõw̃aoe andrõ, fadoro, ba wangõhõndrõgõ jaʼoegõ ba ba wanandraigõ jaʼoegõ, enaʼõ isõndra he wisa dõdõoe, na edõna õʼoʼõ goroisania, ba na lõʼõ. 3No ihõndrõgõ ndraʼoegõ, ifatõrõ chõoe lofo, ba aefa daʼõ, ba ibeʼe õoe ”mana” andrõ, si lõ mirai mila, he ira toeaoe, ba wamaʼeleʼõ chõoe, wa tenga ha ba gõnia aoeri niha, wa tola gõi fangorifinia hadia ia daroma li, si otarai mbawa Jehowa. (Moz. II. 16, 15. Mat. 4, 4). 4Noechaoe andrõ, ba lõ sadoedoe, ba aheoe, ba lõ sabao, si õfa woeloe fache andrõ. (F. 29, 5). 5Ba jafadoehoe saʼae dõdõoe, iʼohe ba zi sõchi ndraʼoegõ Lowalangioe, Jehowa, nifamatõrõ siʼaikõ nama ononia. 6Ba oʼõ goroisa Lowalangioe, Jehowa andrõ, wanõrõ lala andrõ chõnia, awõ wangataʼoefi jaʼia. 7Ba danõ si sõchi sa iʼohe ndraʼoegõ Lowalangioe, Jehowa, ba danõ si so mbombo ba oemboe nidanõ ba baw̃a, soʼoeloe ba zaloʼo ba soʼoeloe ba hili; 8tanõ si so fache ba si so rigi ba agoe ba boea ara ba dalimo, tanõ si so falo ba si so w̃e w̃ani; 9tenga tanõ sambõʼambõ balazo, no tanõ si so manõ fefoe hadia ia, tanõ sosiʼõli kara ba nicharoe tõla garamba ba hili. 10Ba na no mangaʼõ dania, na no aboesoʼõ, ba õsoeno Lowalangioe Jehowa, bõrõ danõ si sõchi andrõ nibeʼenia chõoe. (Kor. I. 10, 31. Tim. I. 4, 4).

11II. Faigi sibai, fa bõi olifoeʼõ Lowalangioe, Jehowa, fa bõi õbato woloʼõ oroisania andrõ, awõ hoekoe andrõ, awõ gamachoita, nifaʼemagoe chõoe maʼõchṍ. 12Na aboeso ndraʼoegõ dania ba õlaoe chõoe nomo si sõchi, 13na itoegoe oja zaw̃ioe ba biribirimõ ba na fahõna chõoe wirõ ba anaʼa, na tedooe fefoe hadia ia zi so chõoe, 14ba bõi fajaw̃a dõdõoe, ba bõi olifoegõʼõ Lowalangioe, Jehowa, si no mangeheta jaʼoegõ ba danõ Miseraji andrõ, ba danõ, ba zi no mõiʼõ sawoejoe, 15si no mamatõrõ jaʼoegõ ba danõ si mate andrõ, sebolo sibai ba sataʼoe ita, ba zi so oelõ sosõfoe ba tongo, ba danõ si no okõlikõli ba si lõ idanõ, si no mameʼe õoe idanõ sangoemboengoemboe moroi ba gara sabeʼe, (Moz. IV. 21, 6. Moz. II. 17, 6), 16si no mameʼe õoe ”mana” andrõ, ba danõ si mate, õ si lõ larai mila ira toeaoe, ba wangõhõndrõgõ jaʼoegõ ba ba wanadraigõ jaʼoegõ, enaʼõ ihaogõ chõoe ba gõtõ dania, 17ba bõi õmane dõdõoe: Faʼabõlõgoe ba faʼabeʼe dangagoe mbõrõ, wa so chõgoe woʼanaʼa andre. 18Tõrõ tõdõoe Lowalangioe, Jehowa, me no jaʼia zameʼe faʼabõlõ, ba wangaloei anaʼa, ba wamaloea amaboeʼoela linia andrõ, si no mõi ba hõloe ia chõ ndra toeaoe, si mane maʼõchõ. 19Ba na olifoeʼõ zoei Lowalangioe, Jehowa, woloʼõ Lowalangi bõʼõ, na õfosoemange daʼõ, ba na mangaloeloeʼõ chõra, ba maʼifoe lõ oebiniʼõ chõmi maʼõchṍ, wa si tekiko ami dania. 20Si mane niha baero andrõ, nifakiko Jehowa fõnami, si manõ gõi waʼatekikomi, fotoe; me lõ nifondrondrongomi li Lowalangimi, Jehowa.