Soera Moze V Faza 7

I. Dawa Ganaʼana andrõ, ba niboenoe, ba nifoefoe nadoera. II. Ifaboeʼoe ba Ndraono Gizeraëli howoehowoe Lowalangi.

1I. Na no iʼohe dania ndraʼoegõ ba danõ andrõ Lowalangioe Jehowa, ba danõ andrõ, ba zi mõiʼõ, ba wangochõgõ jaʼia, ba na no oja soi itimba fõnaoe: Iraono Cheti ba Iraono Girigasi ba Iraono Gamori ba Dawa Ganaʼana ba Iraono Weresi ba Iraono Hewi ba Iraono Jeboesi, fitoe soi seboea moroi chõoe ba sabõlõ moroi chõoe, 2na no ibeʼe ba dangaoe Lowalangioe, Jehowa, ba na no õlaw̃a ira, ba õlachaʼõ ira; lõ tola fawoeʼoe li ndraʼoegõ chõra, ba lõ tola õhachõsi tõdõ. (Moz. IV. 33, 52. Jos. 11, 11). 3Ba lõʼõ gõi tola fahalõ ami; lõ tola õbeʼe chõ nonora matoea nonooe alawe ba lõ tola õhalõ chõ nonooe matoea nonora alawe. (Moz. II. 23, 32. Kor. II. 6, 14). 4Ma dania ïʼerogõ ndraʼo onooe matoea labeʼe, ma tobali ifosoemange Lowalangi bõʼõ, ba mofõnoe chõmi Jehowa ba itaʼitaʼi ihori ami. (Raz. I. 11, 2). 5Mimane saʼae wolaoe chõra: Naha wameʼe soemange chõra, ba midoedoegõ, gowe andrõ chõra, ba mirasa, eoe niʼamoniʼõ chõra, ba miʼobõ, ba adoera, ba mitoenoe ba galitõ, (Moz. II. 23, 24. Moz. IV. 33, 52), 6me no soi niʼamoniʼõ chõ Lowalangioe, Jehowa, ndraʼoegõ; no jaʼoegõ nitoejoe Lowalangioe, Jehowa, chõnia, soi tána chõnia, niʼoniagõ ba soi bõʼõ fefoe, ba goeli danõ. (Moz. II. 19, 6. Sin. 135, 4). 7Tenga sa me no sato niha ami, moroi ba soi bõʼõ, wa no eboea dõdõ Jehowa chõoe, wa no jaʼami nitoejoe, — noa sa fondrege zideʼide ami, ba ngai soi bõʼõ fefoe—, bõrõ me iʼomasiʼõ ami, 8ba me edõna ia itõrõ zi no mõi ba hõloe ia chõ ndra toeami mege; andrõ iheta ami tanga sabeʼe, iʼefaʼõ ami ba waʼasawoejoe, ba danga Waraʼo, razo Miseraji, 9enaʼõ aboto ba dõdõoe, wa no Lowalangi [si ndroehoe] Lowalangioe andrõ, Jehowa, wa no Lowalangi si lõ farõi, si lõ mamõhõi fawoeʼoesa li ba faʼeboea dõdõ andrõ, irege hõnõ ngaʼõtõ, chõra sangomasiʼõ jaʼia ba soloʼõ oroisania, (Moz. II. 20, 6), 10ba solaoe soelõ, nifatõrõ chõra, ba zi fatioe tõdõ chõnia, fefoe, wangohori jaʼira. Lõʼõ sa faʼebolo dõdõnia ba zi fatioe tõdõ chõnia, chõnia ifatõrõ zoelõ. (Nah. 1, 2). 11Andrõ õʼoʼõ goroisania, awõ gamachoita andrõ, awõ hoekoe andrõ, nifaʼemagoe chõoe maʼõchṍ, enaʼõ õbeʼe tali wolaoemõ ia.

12II. Ba na mifondrondrongo hoekoe andrõ ba ni miʼoʼõ, ba lõʼõ gõi iboelõʼõ chõoe Lowalangioe, Jehowa, wawoeʼoesa li andrõ, awõ waʼeboea dõdõ, si no mõi ba hõloe ia chõ ndra toeaoe: (Moz. III. 26, 3 b. t.) 13iʼomasiʼõ ndraʼoegõ ba ifahowoeʼõ ndraʼoegõ ba iʼojaʼõ ami; tabinamõ andrõ ba boea nowioe, facheoe, ba õsi mboea nagoe, awõ wanicha chõoe, ba ono zaw̃i chõoe, ba foʼono mbiribiri chõoe, fabaja nambi, ba ifahowoeʼõ, ba danõ andrõ, nibeʼenia chõoe dania, dali wahõloesania andrõ chõ ndra toeaoe. 14Nifahowoeʼõ dania ndraʼoegõ, fõna soi bõʼõ fefoe; he ba ndra matoea chõoe ba he ba ndra alawe, ba lõ si lõ moʼono, ba si manõ gõi ba goerifõmõ. (Moz. II. 23, 26). 15Fefoe ngawalõ wõchõ, ba itimba chõoe Jehowa, ba sambalõ lõ igõnaisi ndraʼoegõ fõchõ Ndrawa Miseraji andrõ, teoe mbanoea andrõ, si no õʼila fõna; ba zi faʼoedoe chõoe ihareʼõ daʼõ. (Moz. II. 9, 3). 16Ba fefoe soi andrõ, nibeʼe Lowalangioe, Jehowa, ba dangaoe, ba õhori. Bõi ahachõ dõdõoe, wamaigi jaʼira, ba bõi fosoemange Lowalangira andrõ; tandraw̃a sa chõoe daʼõ enaʼõ. 17Ba na õmane dõdõoe enaʼõ: Sato moroi chõgoe soi andrõ, he oewisa wanimba jaʼira? 18ba bõi ataʼoefi, tõrõ manõ tõdõoe nifatõrõ Lowalangioe, Jehowa chõ Waraʼo no, ba ba Ndrawa Miseraji fefoe. 19Faʼabõlõ andrõ, nifaʼeleʼõ, niʼila hõrõoe, tandra andrõ, ba ilaʼila, tanga sabeʼe andrõ ba taʼio niʼoroʼõ, chõ Lowalangioe, Jehowa, wamawoeʼa jaʼoegõ! Si manõ dania ilaoe Lowalangioe, Jehowa, ba niha bõʼõ andrõ fefoe, niʼataʼoefimõ. (F. 29, 3). 20Ba ifatõrõ na chõra geto Lowalangioe, Jehowa, irege ahori zi tosai andrõ, si no maminiʼõ jaʼira mege chõoe. (Moz. II. 23, 28). 21Bõi hoemocha mboemõ chõra! me no so ba chõoe Lowalangioe, Jehowa, Lowalangi seboea ba sataʼoe ita, 22ba izarazara wanimba fõnaoe soi andrõ Lowalangioe, Jehowa. Bõi osamoezaigõ wangohori jaʼira, ma dania abõlõ chõoe goetoe ndroeʼoe. (Moz. II. 23, 29). 23Ibeʼe ba dangaoe Lowalangioe, Jehowa, ba fawoeka ibeʼe, irege no ahori ira. 24Ba razora, ba ibeʼe ba dangaoe, enaʼõ olifoe niha ba goeli danõ dõira õbeʼe. Samõsa lõ solaw̃a jaʼoegõ, irege no õhori ira. 25Famaedo Lowalangira andrõ, ba mitoenoe, ba firõnia ba anaʼania, ba bõi isõ, bõi halõ chõoe, fa bõi tobali famaʼalamõ. Me no sogoro Lowalangioe, Jehowa, zi mane daʼõ. 26Ba sogoro ita, ba bõi ohe jomo ba nomooe, fa bõi mõi salacha gõi ndraʼoegõ, si mane jaʼia. 27Õʼogorofi ba si hocha mboemõ ia, me no moelachaʼõ.