Soera Moze V Faza 6

I. Ifarooe sibai na dõdõra Moze, ba woloʼõ oroisa si fõfõna andrõ, ba wangataʼoefi Lowalangi ba ba wangomasiʼõ jaʼia. II. He lawisa wamahaõ iraonora ba daʼõ.

1I. Daʼõ goroisa andrõ, awõ gamachoita andrõ, awõ hoekoe, ba nifahaõgoe jaʼami, dali niw̃aʼõ Lowalangimi, Jehowa, enaʼõ miʼoʼõ ba daʼõ, ba danõ andrõ, ba zi mõi ami, mijefo, 2ba wangoehõgõ jaʼia, enaʼõ õʼataʼoefi Lowalangioe, Jehowa, ba enaʼõ õʼoʼõ nifachoinia andrõ ba oroisania fefoe, nifaʼemagoe chõoe, ba enaʼõ anaoe nosooe. 3Ba na no mirongo, jaʼami Iraono Gizeraëli, ba mitõngõni, ba woloʼõ jaʼia, enaʼõ sohahaoe tõdõ ami, ba enaʼõ ato sibai ami dania, si mane nifaboeʼoe Lowalangi ndra toeami andrõ, Jehowa, tanõ si no falawoe soesoe ba w̃e w̃ani. 4Mifondrondrongo, jaʼami Iraono Gizeraëli! Jehowa, ba no Lowalangida, ha Jehowa, ha jaʼia! (F. 4, 35. Jes. 44, 8. Mar. 12, 29. 30). 5Ba õʼomasiʼõ Jehowa andrõ, Lowalangioe, moroi siʼaikõ ba dõdõoe ba moroi siʼaikõ ba geraʼeraoe fefoe, õʼoigõ waʼabõlõoe. (Mat. 22, 37. Loek. 10, 27). 6Taroma li andre, niw̃aʼõgoe chõoe maʼõchṍ, ba õtanõ ba dõdõoe. 7Ba õfahaõ gõi ndraonooe ba daʼõ, itõrõtõrõ lioe, na jomo soʼõ, ba he na ba wekoli; na mõiʼõ mõrõ ba na maosoʼõ. (F. 11, 19). 8Õbõbõgõ ba dete dangaoe, tandra, ba ba mbõrõ nichoemõ, amaedola mbala hõgõ; 9ba õsoera ba gehomo nomooe, ba ba lagõ mbawa gõli chõoe. 10Ba na iʼohe dania ndraʼoegõ Lowalangioe, Jehowa, ba danõ andrõ, nibeʼenia chõoe dania, dali wahõloesania mege chõ ndra toeaoe Aberahamo, Izaʼaki, Jakobo, tanõ si so banoea seboea ba si sõchi, si tenga nitaroeʼõmõ, 11ba omo si no moʼõsi gamagama si sõchi, tenga moroi chõoe, ba baʼa nichao ba gara, si tenga nichaomõ, ba kaboe nagoe ba kaboe falo, si tenga nitanõoe; ba na manga ndraʼoegõ na aboesoʼõ, ba faigi sibai, 12fa bõi olifoeʼõ Jehowa, si no mangeheta jaʼoegõ ba danõ Miseraji, ba danõ si no mõi sawoejoe ndraʼoegõ. 13Lowalangioe andrõ, Jehowa, ba õʼataʼoefi ba õfosoemange ba ba dõinia mõiʼõ ba hõloe, 14ba lõ tola miʼoʼõ Lowalangi bõʼõ, Lowalangi niha andrõ, si tefasoei jaʼami. 15Me no Lowalangi solohoe Lowalangimõ andrõ, Jehowa, ba chõmi, fa bõi mofõnoe chõoe Lowalangimõ, Jehowa, ba fa bõi iseʼe ndraʼoegõ ba goeli danõ! 16Bõi mitandraigõ Lowalangimi, Jehowa, si mane fanandraigõmi jaʼia no, ba Masa. (Moz. 11. 17, 7. Mat. 4, 7). 17Oroisa Lowalangimi Jehowa andrõ, ba miʼoʼõ, lala andrõ ba amachoita nibeʼenia chõmi, ba mitõrõ; 18hadia zatoelõ ba hadia zi sõchi, wamaigi Jehowa, daʼõ õtõrõ, enaʼõ sohahaoe tõdõ ndraʼoegõ, ba enaʼõ õroegi danõ si sõchi andrõ, nifaboeʼoe Jehowa chõ ndra toeaoe, fahõloesa, ba enaʼõ õʼochõgõ, 19wanimba fõnaoe si faʼoedoe chõoe andrõ, fefoe, dali nifaboeʼoe Jehowa.

20II. Na isofoe dania chõoe onooe, na imane: Hadia niw̃aʼõ andrõ ba amachoita andrõ ba hoekoe andrõ, nioroiʼõ Lowalangida, Jehowa? (Moz. II. 12, 26), 21ba õmane chõ nonooe andrõ: No sawoejoe Waraʼo ndraʼaga mege, ba danõ Miseraji, ba no ihetaga ba danõ Miseraji Jehowa, tangania andrõ, si no abeʼe. 22No ilaoe dandra ba ilaʼila seboea ba famakiko Jehowa, ba danõ Miseraji, chõ Waraʼo ba ba zoroijomonia fefoe, ba zanehe ndraʼaga; 23ba jaʼaga, ba no iheta ba daʼõ, ba wolohe jaʼaga ba danõ andrõ ba ba wameʼe chõda tanõ andrõ, nifaboeʼoenia chõ ndra toeada, fahõloesa. 24Ba no iw̃aʼõ chõma Jehowa woloʼõ nifachoi andrõ fefoe, wangataʼoefi Lowalangida, Jehowa, enaʼõ lõ teboelõ wa sohahaoe tõdõ ita, ba enaʼõ iʼoriorifi ita, si mane maʼõchṍ. 25Ba niha satoelõ ita, na lõ olifoe ita woloʼõ oroisa andrõ fefoe, fõna Lowalangida Jehowa, si mane niw̃aʼõnia chõda.