Soera Moze V Faza 5

I. Famasoegi ba dõdõ oroisa si foeloe andrõ. II. Gõna ba dõdõ zato ba ifarooe na dõdõra Moze ba woloʼõ.

1I. Ba hoemede Moze ba Ndraono Gizeraëli fefoe, ba imane chõra: Mifondrondrongo, jaʼami Iraono Gizeraëli, nifachoi andrõ, awõ hoekoe andrõ, nifarongogõgoe chõmi maʼõchṍ andre! Mitanõ ba dõdõ, ba mitõngõni, ba woloʼõ jaʼia. 2Lowalangida, Jehowa, ba no fawoeʼoe li chõda, ba gahe hili Horebi. (Moz. II. 19, 5). 3Tenga sa chõ ndra toeada fawoeʼoe li Jehowa, no chõda, saoeri andre, chõda fefoe, si so ba daʼe maʼõchṍ. 4Si no faʼila bawa ami chõ Jehowa, me hoemede ia chõmi ba hili andrõ, moroi ba galitõ. 5Ba jaʼodo, ba ba gotaloeami Jehowa sodo, me loeo daʼõ, ba wamaʼema chõmi taroma li Jehowa, me no ataʼoe ami galitõ andrõ, ba me lõ mõi mijaw̃a ba hili ami. Ba no imane: (Moz. 11. 20, 18).

(A. 6—28: Moz. II. 20.)

6Jaʼodo Jehowa, Lowalangioe, si no mangeheta jaʼoegõ ba danõ Miseraji, ba danõ andrõ, si no mõi sawoejoe ami. 7Bõi so chõmõ Lowalangi tánõ bõʼõ, baero ndraʼo. 8Bõi fazõchi chõoe nadoe, famaedo hadia ia, he si so si jaw̃a ba mbanoea, ba he si so si tooe ba goeli danõ, ba he si so ba nidanõ barõ danõ. 9Bõi angaloeloe chõnia ba bõi fosoemange ia; me no Lowalangi solohoe adraʼo, jaʼodo andre, Lowalangioe, Jehowa, sangoehoekoe horõ ndra ama, ba ndraono ba ba maʼoewoe mitooe, iroegi tõloe, irege õfa ngaʼõtõ, chõra si fatioe tõdõ chõgoe, 10ba si hachõsi tõdõ sangomasiʼõ jaʼo ba soloʼõ oroisagoe, iroegi hõnõ ngaʼõtõ. 11Ba tõtõi dõi Lowalangioe Jehowa ba waja; lõʼõ sa zi lõ ihoekoe Jehowa zanõtõi tõinia ba waja. 12Ameʼegõ tõdõ loeo wolombase andrõ, ba weʼamoniʼõ jaʼia, dali niw̃aʼõ Lowalangioe, Jehowa, chõoe. 13Õnõ ngaloeo mohalõw̃õ ndraʼoegõ ba õhalõ halõw̃õoe fefoe, ba ero fitoe bongi, 14ba loeo wolombase chõ Lowalangioe, Jehowa; bõi babaja hadia ia halõw̃õ ba daʼõ, he jaʼoegõ, ba he onooe matoea, ba he onooe alawe, ba he sangai halõw̃õ chõoe ira matoea, ba he sangai halõw̃õ chõoe ira alawe, ba he oerifõoe, ba he si fatewoe chõoe, ba mbanoeami; enaʼõ laʼila molombase sangai halõw̃õ chõoe, ira matoea ba ira alawe, si mane jaʼoegõ. 15Tõrõtõrõ tõdõoe, wa no sawoejoe gõi ndraʼoegõ mege, ba danõ Miseraji, awõ wa no ihetaʼõ ba daʼõ Lowalangioe, Jehowa, tangania sabeʼe ba taʼionia niʼoroʼõ. Daʼõ mbõrõ, wa no iw̃aʼõ chõoe weʼamoniʼõ loeo sabato andrõ Lowalangioe, Jehowa. 16Fosoemange namaoe, awõ ninaoe, dali niw̃aʼõ Lowalangioe, Jehowa, chõoe, enaʼõ anaoe nosooe ba enaʼõ ohahaoe dõdõoe ba danõ andrõ, nibeʼe Lowalangioe, Jehowa, chõoe. 17Bõi angeʼe. Bõi ohorõ. Bõi anagõ. Bõi bõbõgõ chõ nawõoe zi lõ doehoe. 18Bõi isõ woʼomo nawõoe. Bõi isõ nomo nawõoe, ba he benoeania, ba he sangai halõw̃õ chõnia, ira matoea ba ira alawe, ba he õrõbaonia, ba he koedonia, ba he fefoe gofoe hadia zi so chõ nawõoe. 19Ha daʼõ niw̃aʼõ Jehowa ba chõmi sato fefoe; eboea linia, ba hili andrõ, moroi ba galitõ andrõ ba moroi ba zalōē ba moroi ba zogõmigõmi. Ba isoera ba gara wanoera, si domboea, ba ibeʼe chõgoe. (Moz. II. 31, 18.).

20II. Ba me mirongo li andrõ moroi bacha ba zogõmigõmi andrõ, me hoemolahola hili andrõ, ba miʼondrasi ndraʼo, satoea mado chõmi ba salaw̃ami, ba mimane: 21No iʼoromaʼõ chõda lachõminia ba faʼasalaw̃ania Lowalangida, Jehowa, ba no tarongo linia moroi ba galitõ andrõ, ba tobali no fadoehoe dõdõda, tola moehede Lowalangi ba niha lõ mate nihá. 22Ba hana wa mate na ita iadaʼe enaʼõ? Iʼā sa [enaʼõ] ita alitõ seboea andrõ; na itohoegõ na tarongo li Lowalangida, ba si mate ita. 23Heza sa so ba nõsi goeli danõ, fefoe zi no mamondrongo li Lowalangi saoeri andrõ, sihede moroi ba galitõ, si mane famondrongoda, ba sooeri na dania? (F. 4, 33. Sangoehoek. 13, 22). 24Jaʼoegõ andrõ ondrasi ba fondrondrongo, hadia ia niw̃aʼõ Lowalangida, Jehowa, ba jaʼoegõ dania zamaʼema chõma fefoe hadia ia, niw̃aʼõ Lowalangida, Jehowa, chõoe, enaʼõ marongo ba enaʼõ maʼoʼõ. (Moz. II. 19, 8). 25Ba irongo limi Jehowa, me fahoehoeo ami chõgoe, ba imane chõgoe Jehowa: No oerongo hoehoeo niha andrõ chõoe; si ndroehoe niw̃aʼõra. 26Enaʼõ na si manõmanõ dõdõra dania gõi, enaʼõ laʼataʼoefi ndraʼodo ba enaʼõ na laʼoʼõ goroisagoe andrõ, fefoe, fa sohahaoe tõdõ ira, awõ maʼoewoera, si lõ mamalõmalõ! (Sin. 81, 14). 27Ae hede chõra, õmane: Mifoeli manõ ami baose chõmi! 28Ba jaʼoegõ iagõ daʼe chõgoe, enaʼõ oeʼombachaʼõ chõoe goroisa andrõ fefoe, awõ gamachoita, awõ hoekoe andrõ, ba nifahaõmõ jaʼira dania, enaʼõ laʼoʼõ ba danõ andrõ, nibeʼegoe chõra dania. 29Ba mitõngõni saʼae, enaʼõ miʼoʼõ niw̃aʼõ Lowalangimi, Jehowa, chõmi, fa bõi miholeʼõ ami, he ba gambõlõ ba he ba gabera. 30Mitõrõ sibai lala andrõ, nifachoi Lowalangimi, Jehowa, chõmi, fa bõi mate ami, ba enaʼõ sohahaoe tõdõ ami ba sanaoe noso ba danõ andrõ, niʼochõgõmi dania.