Soera Moze V Faza 4

I. Fangoʼozoe hoehoeo Moze andrõ. Famarooe tõdõ ba woloʼõ oroisa. II. Famangelama ba wanawõ jaʼia; so wotoe dania. III. Faʼahachõ dõdõ Lowalangi mbanoeania. IV. Baroea fangorifi jefo Joridanõ. Famobõrõ famasoegi oroisa.

1I. Ba ijaʼe, ba mifondrondrongo gamachoita andrõ, awõ hoekoe andrõ ba nifahaõgoe jaʼami, jaʼami Iraono Gizeraëli, enaʼõ miʼoʼõ ia ba enaʼõ aoeri ami ba enaʼõ mõi chõmi danõ andrõ, nibeʼe Jehowa, Lowalangi ndra toeami andrõ, chõmi dania. 2Oroisa andrõ, nifaʼemagoe chõmi, ba bõi midooeʼõ ba bõi miwoewoe; oroisa andrõ, nibeʼe Lowalangimi, Jehowa, nifaʼemagoe chõmi, ba miʼoʼõ. (F. 12, 32). 3No hõrõmi zangila nilaoe Lowalangi, bõrõ Mbaʼali-Weoro andrõ: dozi si olembai Baʼali-Weoro andrõ, ba no ihori ba hoenõmi Lowalangioe Jehowa. (Moz. IV. 25, 4), 4ba jaʼami andrõ, si lõ farõi, si lõ mamõhõi Lowalangimi Jehowa, ba ahori aoeri, irege maʼõchṍ andre. 5Hiza, no oefahaõ ami ba gamachoita ba ba hoekoe, dali niw̃aʼõ Lowalangioe, Jehowa, chõgoe, enaʼõ miʼoʼõ dania ba daʼõ, ba danõ andrõ, ba zi mõi ami, ba wangochõgõ jaʼia. 6Mitõngõni ba miʼoʼõ! Daʼõ sa dania waʼatoeatoeami ba faʼonechemi wamaigi niha baero; na larongo dania gamachoita andrõ fefoe, ba lamane: Si ndroehoe, soi satoeatoea ba soneche soi seboea andrõ! 7Heza atṍ so soi seboea si so Lowalangi, si no si manõ faʼahatõ chõra, si mane Lowalangida, Jehowa [chõda], ero na taʼangarõfi li ia? 8Ba heza so soi seboea, si no si manõ faʼamoʼahonoa amachoita, awõ hoekoe, si mane oroisa andrõ fefoe, niʼombachaʼõgoe chõmi maʼõchṍ? 9Ba angelama ba faigifaigi, fa bõi olifoeʼõ ngawalõ andrõ niʼila hõrõoe, ba fa bõi aefa ba dõdõoe, gõtõ waʼanaoe nosooe; õʼombachaʼõ ba ndraonooe ba ba maʼoewoemõ. (F. 6, 7). 10Baw̃a andrõ, me soʼõ fõna Lowalangioe Jehowa, ba gahe hili Horebi andrõ, me imane chõgoe Jehowa: Faloechaʼõ chõgoe zato! Daʼoefarongogõ chõra daroma ligoe andrõ, enaʼõ lafamaha ira ba wangataʼoefi jaʼodo, gõtõ waʼanaoe nosora ba goeli danõ ba enaʼõ lafahaõ gõi ndraonora. 11Ba miʼondrasi, miʼiagõ gahe hili; ba hoemolahola hili andrõ, iroegi mbanoea si jaw̃a, ba [baero õ, ba] faʼogõmigõmi ba lawoeo ba salōē. (Moz. II. 19, 16). 12Hoemede chõmi Jehowa moroi ba daloe galitõ; linia, ba mirongo, ha li, ba lõ soroma chõmi ngaʼeoe. 13Iʼombachaʼõ chõmi wawoeʼoesa li andrõ chõnia, niw̃aʼõnia chõmi foloʼõ, taroma li si foeloe andrõ, ba isoera ba gara wanoera si domboea. 14Ba chõgoe iw̃aʼõ Jehowa, me loeo daʼõ, wamahaõ jaʼami ba gamachoita adrõ ba ba hoekoe andrõ, enaʼõ miʼoʼõ ba danõ andrõ, si mõi ami mijefo, ba wangochõgõ jaʼia.

15II. Ba mifaigi sibai — nosomi mbalazi — me no lõ niʼilami hadia ia ngaʼeoe, me loeo hoemede chõmi Jehowa moroi ba galitõ, ba gahe hili Horebi, 16fa bõi miwõwõi wamakiko, wamazõchi chõmi adoe nifoë, hadia ia wamaedo, he ngaʼeoe ndra matoea, ba he ngaʼeoe ndra alawe, 17ba he ngaʼeoe zaliw̃aliw̃a ba danõ, hadia ia, si õfa ahe, ba he ngaʼeoe wofo soʼafi, sihombo ba daloe mbanoea, 18ba he ngaʼeoe zanana ba danõ, ba he ngaʼeoe giʼa, si so ba nidanõ barõ danõ. 19Ba na õfachõlõʼõ mijaw̃a ba mbanoea, na õfaigifaigi loeo ba baw̃a ba dõfi, ngahõnõ andrõ fefoe ba mbanoea si jaw̃a, ba fa bõi eloengoeʼõ, wangaloeloe chõnia, awõ wamosoemange jaʼia, me no ibeʼe ba soi niha bõʼõ fefoe, ba goeli danõ misa Lowalangioe, Jehowa. (F. 29, 26). 20Ba jaʼami, ba no nihalõ Jehowa chõnia, no iheta ami ba galitõ famahele ziʼõli andrõ, ba danõ Miseraji, enaʼõ soi tána chõnia ami, si mane maʼõchṍ. (Moz. II. 19, 5). 21Ba chõgōē, ba no mofõnoe Jehowa, bõrõ ba chõmi, irege tobali fahõloe ia, lõ tola oeʼõtõ Joridano, ba lõ tola oehoendragõ danõ si sõchi andrõ, nibeʼe Lowalangioe, Jehowa, chõoe. (Moz. IV. 20, 12). 22Ba danõ andre mate ndraʼo iw̃aʼõ, lõ oeʼõtõ Joridano, ba jaʼami ba miʼõtõ ba wangochõgõ tanõ si sõchi andrõ. 23Mifaigi sibai, fa bõi olifoe ami wawoeʼoesa li andrõ, me no fawoeʼoe li chõmi Lowalangimi, Jehowa, ba fa bõi mifazõchi chõmi nadoe, famaedo hadia ia, nitenaw̃a Lowalangioe, Jehowa, jaʼoegõ. 24Alitõ si mangamanga hadia ia sa Lowalangioe andrõ, Jehowa, no Lowalangi solohoe. (Heb. 12, 28). 25Ba na miwõwõi wamakikomi, na no moʼono ndraʼoegõ ba na no toemboe maʼoewoemõ, na no ara ami ba danõ, na mifazõchi chõmi nadoe, famaedo hadia ia, wamazõchi horõ chõ Lowalangimi, Jehowa, na tobali mofõnoe ia, 26ba oekaoni si so ba mbõrõ ba chõmi andrõ mbanoea si jaw̃a ba tanõ tooe, maʼõchṍ andre, wa lõ ararā dania, ba tehori ami ba danõ andrõ, ba zi mõi ami dania, mijefo Joridano, ba wangochõgõ jaʼia, lõʼõ sa ara dania ami ba danõ; niseʼe ami. (F. 30, 19). 27Ba niha baero ifazawili ami Jehowa; lõʼõ sa atotó dania ami, si tosai, ba mbanoea niha baero andrõ, ba niʼoloiʼõ Jehowa jaʼami dania. (F. 28, 62). 28Lowalangi nifazõchi danga niha dania mifosoemange ba daʼõ, eoe ba kara, si lõ mangila niha ba si lõ mamondrongo li niha, ba si lõ manga ba si lõ mangago hoea hadia ia. (Sin. 115, 4; 135, 15).

29III. Ba ba daʼõ dania õʼaloei Lowalangimõ, Jehowa, ba õsõndra, na moroi siʼaikõ ba dõdõoe ba na moroi siʼaikõ ba geraʼeraoe fefoe wehoeloe dõdõoe chõnia. (F. 30, 2. Jer. 29, 13). 30Ba ba waʼaboe dõdõoe andrõ dania, na no gõna ndraʼoegõ daʼõ fefoe, ba ba gafoeriata, ba õfalalini geraʼeraoe, õfoeliʼõ chõ Lowalangioe, Jehowa, ba õfondrondrongo linia. 31Me no Lowalangi sahachõ tõdõ Lowalangimõ andrõ, Jehowa, lõ ibõhõli ndraʼoegõ, ba lõ omasi ia tekiko ndraʼoegõ, ba lõ olifoe ia wawoeʼoesa li andrõ, me fawoeʼoe li ia chõ ndra toeaoe mege, si no mõi ba hõloe ia chõra. 32Sofoe atṍ, he wisa ba gõtõ fõna, me lõ jaʼoegõ na, iʼotarai loeo andrõ, me ifazõchi niha ba goeli danõ Lowalangi; sofoe, iʼotarai wondrege danõ, noemalõ ba wondrege tánõ sa, na no irai itõrõ si manõ faʼeboea, na no moerai moerongo zi manõ! 33Na so na soi bõʼõ, si no irai mamondrongo fehede Lowalangi, si oroi ba galitõ, si mane nirongooe, ba na lõ si mate ira. 34Ma na no so Lowalangi bõʼõ, si no manandraigõ feʼamõi, ba wangoromaʼõ faʼabõlõ ba ba wolaoe tandra ba ilaʼila ba fanoewõ, ba wangai chõnia samboea soi ba hoenõ mbõʼõ, tangania sabeʼe ba taʼionia niʼoroʼõ, ba ba waʼabõlõnia sahõlihõli dõdõda; nifolaoe Lowalangimõ andrõ, Jehowa, chõmi, ba danõ Miseraji, ba zanehe ami mege! 35Hõrõoe mege zangila, enaʼõ aboto ba dõdõoe, wa no Jehowa Lowalangi, awõ wa lõ Lowalangi baeronia. (F. 6, 4. Ngaʼõt. I. 17, 20). 36Moroi ba zoroego ifarongogõ chõoe linia ba wamobawa lala chõoe, ba ba goeli danõ iʼoromaʼõ chõoe galitõ seboea andrõ chõnia, ba moroi ba galitõ andrõ õrongo mege daroma linia. 37Ba me no iʼomasiʼõ ndra toeaoe ba me no itoejoe maʼoewoera foerira, ba me no jaʼia zangeheta jaʼoegõ ba danõ Miseraji, ba waʼabõlõnia andrõ, si tenga inõtõ; (Moz. II. 33, 14); 38tõdõnia, itimba fõnaoe soi seboea moroi chõoe ba sabõlõ moroi chõoe, enaʼõ jaʼoegõ iʼohe ba danõ ba enaʼõ chõoe ibeʼe, 39ochõtamõ, si mane maʼõchṍ, ba jaʼaboto saʼae ba dõdõoe, ba õtanõ ba dõdõoe, wa no Jehowa Lowalangi ba zoroego jaw̃a ba ba goeli danõ tooe, awõ wa lõ Lowalangi baeronia. 40Ba õʼoʼõ nifachoinia andrõ ba oroisania, nifaʼemagoe chõoe maʼõchṍ, enaʼõ sohahaoe tõdõ ndraʼoegõ, fabaja iraonooe foerioe dania, ba enaʼõ lõ teboelõ waʼanaoe nosooe ba danõ andrõ, nibeʼe Lowalangioe, Jehowa, chõoe dania.

41IV. Ba ihonogõi mbanoea Moze, banoea jefo Joridano, tánõ ba gatoemboecha loeo, tõloe, (Moz. IV. 35, 13), 42enaʼõ ba daʼõ isaw̃a, na so zi no mamoenoe awõnia si lõ moeʼodõdõgõ ba si lõ fatioesania chõnia, mege saʼae, ba enaʼõ iʼila iʼorifi ia, wanaw̃a banoea daʼõ zamboea: 43Beseri andrõ, ba danõ si mate ba zaloʼo hili, ba ba mado Roebeno, ba ba mado Gado, ba Ramoti ba Gileadi ba ba mado Manase, ba Golana ba Mbazana. 44Ba daʼõ goroisa andrõ, nifaʼema Moze ba Ndraono Gizeraëli. 45Daʼõ lala ba daʼõ, nifachoi andrõ, awõ hoekoe andrõ niʼombachaʼõ Moze ba Ndraono Gizeraëli, me aheta ira ba danõ Miseraji, 46jefo Joridano, ba ndraso, ba gamaoedoe Mbeti-Weoro, ba danõ razo Ndraono Gamori andrõ, Sihona andrõ, ba Hesibona, niʼalani Moze ba Iraono Gizeraëli, me laʼotarai danõ Miseraji, (Moz. IV. 21, 24), 47nihalõra tanõ, si mane tanõ Ogi andrõ, razo Mbazana, tanõ razo Ndraono Gamori andrõ, si daroea, jefo Joridano, tánõ ba gatoemboecha loeo, 48iʼotarai Garoëri, ba mbewe Garono, iroegi hili Ziono, 49jaʼia Heremono andrõ, fabaja saloʼo tanõ andrõ, ba zi tambai Joridano, tánõ ba gatoemboecha loeo, fefoe, iroegi ziloeaʼasi andrõ ba zaloʼo tanõ ba gahe hili Wisiga.