Showing posts with label Josoea. Show all posts
Showing posts with label Josoea. Show all posts

Soera Josoea Faza 24

I. Faloechata safoeria chõ Josoea ba Zichema Ifasoegi wanolo Lowalangi jaʼira. II. Lafaboeʼoe lira sato, ba woloʼõ chõ Lowalangi. Lafoeli laʼorifi wawoeʼoesa li andrõ. III. Faʼamate Josoea ba faʼamate Geleazari.
 
 
1I. Ba ifaloechaʼõ mado Gizeraëli fefoe Josoea ba Zichema, ifakaoniʼõ zatoea Ndraono Gizeraëli ba salaw̃ara ba sangoehoekoe ba koemandroe chõra, ba laʼondrasi Lowalangi. 2Ba imane Josoea ba zato fefoe: Daʼõ niw̃aʼõ Jehowa, Lowalangi Ndraono Gizeraëli; ”Ba gõtõ fõna sibai, ba jefo nidanõ [Oiferati] so woeroegõmi, Tara andrõ, ama ndra Aberahamo Nachori, ba lafosoemange Lowalangi bõʼõ. (Moz. I. 11, 31). 3Ba oefawoeʼa woeroegõmi Aberahamo, oeheta ba danõ jefo nidanõ andrõ ba oefatõrõiʼõ ba danõ Ganaʼana maʼasagõrõ, ba ato maʼoewoenia oebeʼe, oebeʼe chõnia Gizaʼaki andrõ. (Moz. I. 21, 2). 4Ba chõ Gizaʼaki ba oebeʼe Jakobo andrõ ba Ezaoe; ba chõ Gezaoe andrõ, ba oetehe hili Zeʼira andrõ, enaʼõ ihalõ chõnia; ba Jakobo ba ononia, ba lasaw̃a danõ Miseraji. (Moz. I. 25, 24; 36, 8; 46, 5). 5Ba oefatenge ndra Moze Aʼaroni, oefakao Ndrawa Miseraji, wolaoe nilaoegoe andrõ ba chõra, ba aefa daʼõ, ba oefawoeʼa ami. (Moz. II. 3, 10). 6Oeheta ndra amami ba danõ Miseraji, ba miroegi nasi. Ba lagohi ndra amami Dawa Miseraji, laʼohe goereta ba wanoewõ ba fao zi fakoedo, iroegi ba mbewe nasi zoechoe andrõ. (Moz. II. 14, 5, b. t.). 7Ba laʼangõrõfi li Jehowa ba ogõmigõmi ba gotaloeami Ndrawa Miseraji ibeʼe; ba ifatõrõ chõra nasi, tobali alõmõ ira. Ba iʼila hõrõmi, nifatõrõgoe ba Ndrawa Miseraji andrõ, ba ara dania ami ba danõ si mate andrõ. 8Ba oeʼohe ami ba danõ Ndraono Gamori andrõ, sowanoea jefo Joridano ba fasõndra ira chõmi; ba oebeʼe ba dangami ira ba mihalõ chõmi danõra, ba oehori ira fõnami. (Moz. IV. 21, 25). 9Ba maoso Mbalaki andrõ, ono Zifora, razo Ndraono Moabi, ba wanoewõ Iraono Gizeraëli. Ba ifatenge zinenge, ifakaoniʼõ Mbileamo andrõ, ono Mbeori, ba wangelifi jaʼami. (Moz. IV. 22, 5). 10Ba lõ edõna oefondrondrongo li Mbileamo andrõ. Ba ifahowoeʼõ ami ba tobali oeʼefaʼõ ami ba dangania. 11Ba miʼõtõ Joridano, ba miroegi Jericho, ba fasõndra chõmi mbanoea Jericho andrõ, Iraono Gamori ba Dawa Weresi ba Dawa Ganaʼana ba Iraono Cheti ba Iraono Girigasi ba Iraono Hewi ba Iraono Jeboesi ba oebeʼe ba dangami ira. (Jos. 6, 1 b. t.). 12Ba oefowaõwaõ fõnami geto, ba moloi ira fõnami labeʼe, razo Ndraono Gamori andrõ, si felendroea; tenga ba ziʼõlimi ba tenga ba wanami! (Moz. II. 23, 28. Sin. 44, 4). 13Ba oebeʼe chõmi danõ ba zi lõ erege dõdõmi, ba banoea si tenga nitaroeʼõmi, ba mibaliʼõ nahiami, ba kaboe nagoe ba kaboe nohi, si tenga nitanõmi, ba miʼā mboea.” (Moz. V. 6, 10. b. t.). 14Ba miʼataʼoefi saʼae Jehowa ba mifosoemange ia moroi siʼaikõ ba dõdõmi ba bõi farõi ami, ba miheta nadoe andrõ, nifosoemange ndra toeami jefo nidanõ andrõ ba ba danõ Miseraji, ba mifosoemange Jehowa. (Sam. I. 7, 3). 15Ba na lõ omasi ami wamosoemange Jehowa, ba mihonogõi maʼõchṍ, ha niha nifosoemangemi, na Lowalangi andrõ, nifosoemange ndra toeami, si so jefo nidanõ andrõ, ba na Lowalangi Ndraono Gamori andrõ, si so ami ba danõ; ba jaʼodo ba soroijomogoe fefoe, ba Jehowa mafosoemange!
16II. Ba latema li sato, lamane: Ja arõoe chõma wangerogõ Jehowa, ba wamosoemange Lowalangi bõʼõ! 17Jehowa sa Lowalangima; jaʼia sa zolohe mijaw̃a jaʼita ba ira amada moroi ba danõ Miseraji, ba zi no mõi sawoejoe ita, ba solaoe sahõlihõli dõdõ andrõ, ba zanehe ita, ba sondrorogõ jaʼita ba lala andrõ fefoe, nitõrõda, ba ba niha fefoe, nitõrõda tanõ. (Moz. II. 20, 2). 18Ba no ahori itimba fõnada Jehowa soi andrõ, awõ Ndraono Gamori, si so ba danõ. Jaʼaga gõi mamosoemange Jehowa, me no jaʼia Lowalangima! 19Ba imane Josoea ba zato: Tebai samosoemange Jehowa ami, me no Lowalangi niʼamoniʼõ ia; Lowalangi solohoe ia: lõ ibeʼe aefa chõmi lalõmi ba horõmi andrõ! (Moz. II. 20, 5. Moz. III. 19, 2). 20Na miʼerogõ Jehowa, wamosoemange Lowalangi bõʼõ, ba iʼerogõ gõi ami ba ifatõrõ chõmi zi lõ sõchi ba ihori ami, lõ lai wa no si sõchi ifatõrõ chõmi mege. 21Lamane sato chõ Josoea: Bõi, Jehowa mafosoemange! (Sin. 10, 5 b. t.). 22Ba imane Josoea ba zato: Jaʼami zi so ba mbõrõ chõmi, wa no mihonogõi, Jehowa nifosoemangemi. Lamane: Jaʼia daʼõ! 23Ba miheta Lowalangi bõʼõ andrõ, si so ba chõmi, ba enaʼõ chõ Lowalangi Ndraono Gizeraëli andrõ, Jehowa, aolo dõdõmi! (Moz. I. 35, 2). 24Ba lamane sato chõ Josoea; Lowalangima, Jehowa andrõ, mafosoemange ba linia mofondrondrongo! 25Ba fawoeʼoe li ira Josoea niha sato, me loeo daʼõ, ba ibeʼe goroisa chõra Josoea ba ifachoi lala, ba daʼõ, ba Zichema. (Raz. II. 23, 3). 26Ba itanõ ba zoera goroisa Lowalangi hoehoeo andrõ Josoea; ba ihalõ gowe seboea, ifasindro ba daʼõ ba mbõrõ manawa, si teʼoeʼoe ba niʼamoniʼõ chõ Jehowa andrõ. 27Ba imane Josoea ba niha sato fefoe: Hiza, si so ba mbõrõ chõda gowe andre, noa sa irongo fefoe daroma li andrõ, hoehoeo Jehowa chõda; andrõ si so ba mbõrõ ia, ba chõmi andrõ, fa bõi miʼosilõʼõgõ Lowalangimi. (Moz. I. 31, 48). 28Aefa daʼõ, ba ifofanõ ira Josoea, isaw̃a dána chõnia zamõsana.
29III. Ba noa daʼõ, ba mate Josoea andrõ, ono Noeni, enoni Jehowa, foeloe tõra otoe fache waʼarania ba goeli danõ. 30Ba lakoʼo ia ba danõ tána chõnia, ba Dimenata Zera, ba hili mado Geferaji, jõoe hili Gasi andrõ. 31Ba lafosoemange Jehowa Iraono Gizeraëli, gõtõ waʼara Josoea andrõ, ba he ba gõtõ zatoea andrõ, sanaoe noso moroi chõ Josoea, si no mangila folaoe Jehowa andrõ, nilaoenia ba Ndraono Gizeraëli. (Ngaʼõt. II. 34, 33). 32Ba boto Josefo andrõ, niʼohe Ndraono Gizeraëli moroi ba danõ Miseraji, ba lakoʼo ba Zichema, ba mbenoea andrõ, niʼõli Jakobo no ba Ndraono Hemori, sobõli si otoe kesita, ba tebeʼe tána ba maʼoewoe Josefo. (Moz. I. 33, 19; 50, 25). 33Ba mate gõi Geleazari andrõ, ono Gaʼaroni, ba lakoʼo ia ba Gibea, banoea nononia Fineha andrõ, nitehe chõnia ba hili mado Geferaji andrõ.

Soera Josoea Faza 23

I. Famarooe Josoea tõdõ zato. Fangoʼooe ba wa lõ farõi chõ Lowalangi. II. Fanenaw̃a fangerogõ Lowalangi.

1I. Ba me no ara, me no ahono Ndraono Gizeraëli ibeʼe Jehowa, ba nemalira andrõ fefoe, fasoei, ba me no atoea Josoea, me no noemalõ ndrõfi, 2ba ifaloechaʼõ Ndraono Gizeraëli fefoe Josoea, satoeara ba salaw̃ara ba sangoehoekoe ba koemandroe, ba imane chõra: Atoea ndraʼo, no noemalõ ndrõfi. 3Ba no miʼila fefoe hadia ia nilaoe Lowalangimi Jehowa ba niha andrõ fefoe fõnami; Lowalangimi andrõ, Jehowa, saʼae zi fasõndra salahimi. 4Ba hiza, ba no oetoetoeroe tána chõmi niha andrõ, si tosai, tána ba madomi, wolaoe dahõdahõ; iʼotarai Joridano, fefoe soi, nihorigoe, irege nasi seboea, tánõ ba gaechoela loeo. 5Ba itimba ira fõnami Lowalangimi, Jehowa, ifofanõ fõnami, enaʼõ mihalõ chõmi danõ, si mane nifaboeʼoe Lowalangimi, Jehowa. (Moz. IV. 33, 53). 6Ba miʼabeʼeʼõ sibai dõdõmi, ba woloʼõ ba ba wolaoe fefoe hadia ia zi so ba zoera goroisa andrõ chõ Moze, fa bõi miholeʼõ ami, he ba gambõlõ ba he ba gabera. (Moz. V. 4, 2). 7Fa bõi mifaroeka ami ba niha andrõ, si tosai na ba chõmi, ba fa bõi mitõtõi dõi Lowalangira, weʼamõi ba hõloe ba chõra, ba bõi mifosoemange ba bõi mangaloeloe ami chõra. (Moz. II. 23, 13). 8Lowalangimi andrõ, Jehowa, miʼolembai, si mane folaoemi iroegi maʼõchṍ andre. (Moz. V. 11, 22 b. t.). 9Andrõ itimba fõnami soi seboea ba sabõlõ Jehowa; samõsa lõ niha sabõlõ moroi chõmi, iroegi maʼõchṍ andre. 10Ha samõsa motõi jaʼami, ba hõnõ moloi ibeʼe, me no Lowalangimi, Jehowa, zi fasõndra salahimi, si mane nifaboeʼoenia chõmi. (Moz. III. 26, 8. Jes. 30, 17). 11Ba na omasi ami aoeri, ba mifaigi sibai, fa miʼomasiʼõ Lowalangimi, Jehowa.
12II. Ba na farõi ami enaʼõ, na mifabõbõ ami ba zi tosai soi niha andrõ ba chõmi, na fambambatõ ami ba na fahalõ, 13ba bõʼi zi lõ aboto ba dõdõmi: ba lõʼõ sa itohoegõ Lowalangimi Jehowa wanimba soi andrõ fõnami; tobali fesoe ba tandraw̃a ira chõmi, ba bõzibõzi ba ngaimi ba doi ba hõrõmi, irege ahori ami ba danõ si sõchi andre, nitehe Lowalangimi, Jehowa, chõmi. (Moz. II. 23, 33. Moz. IV. 33, 55). 14Ba na oetõrõ iadaʼe lala andrõ, nitõrõ niha fefoe dania, ba bõi zi lõ aboto sibai ba dõdõmi: samboea lõ saechoe ba danõ taroma li si sõchi andrõ, niw̃aʼõ Lowalangimi, Jehowa, ba chõmi andrõ, no ahori itõrõ chõmi, samboea lõ saechoe ba danõ. 15Ba si mane amaboeʼoela li andrõ, nifaboeʼoe Lowalangimi, Jehowa, chõmi, wa no ahori itõrõ, si manõ gõi dania wamatõrõ Jehowa fametaʼoenia jaʼami andrõ, fefoe, irege no ihori ami ba danõ si sõchi andre, nibeʼe Lowalangimi, Jehowa, chõmi. (Moz. V. 28, 15 b. t.). 16Na misawõ gamachoita Lowalangimi, Jehowa, andrõ, nifachoinia chõmi, ba na mõi ami mamosoemange Lowalangi bõʼõ, wangaloeloe chõra, ba tesao wõnoe Jehowa chõmi, ba lõ ara, ba ahori ami ba danõ si sõchi andre, nitehenia chõmi.

Soera Josoea Faza 22

I. Ifofanõ zi domboea mado a matonga andrõ Josoea. II. Lafaʼanõ naha wameʼe soemange ba mbewe Joridano. III. Lafatenge Iraono Gizeraëli bõʼõ, lategoe wamazõchi naha wameʼe soemange andrõ. IV. Laboeʼa zinegoe andrõ si domboea mado a matonga.

1I. Me loeo daʼõ ifakaoniʼõ Josoea mado Roebeno ba mado Gado ba si matonga mado Manase, 2ba imane chõra: No miʼõʼõ fefoe niw̃aʼõ genoni Jehowa andrõ, Moze, chõmi ba no mifondrondrongo ligoe, fefoe hadia ia niw̃aʼõgoe chõmi. (Moz. IV. 32, 20 b. t.). 3Lõ si farõi ami ba dalifoesõmi, gõtõ waʼara andrõ, iroegi maʼõchṍ andre, ba no miʼoʼõ goroisa Lowalangimi, Jehowa, lõ si fahole. (Moz. V. 29, 9). 4Ba no faloecha waʼahono dalifoesõmi, ibeʼe Lowalangimi, Jehowa, itõrõ nifaboeʼoenia chõra; ba mifoeli saʼae ami chõmi, ba danõ tána chõmi, nitehe genoni Jehowa andrõ, Moze, chõmi, jefo Joridano. 5Ba bõi olifoe ami, jamoroi siʼaikõ ba dõdõmi woloʼõ oroisa andrõ nibeʼe genoni Jehowa andrõ, Moze, chõmi ba amachoitania, fa miʼomasiʼõ Lowalangi, Jehowa, fa bõi mamalõmalõ wanõrõmi lala andrõ chõnia, fa miʼoʼõ goroisania, fa molemba ami chõnia, fa mihorigõ dõdõmi ba eraʼerami, weʼamõi enoninia! (Moz. V. 10, 12). 6Ba iʼefaʼõ ira Josoea, ifahowoeʼõ ba ifofanõ, ba lafoeli ira chõra. 7Ba ba zi matonga mado Manase ba no itoetoeroe Moze danõ Mbazana; ba ba zi matonga, ba no itoetoeroe Josoea ba ngai dalifoesõra ba zi tambai Joridano, tánõ ba gaechoela. Ba me ifofanõ ira chõra Josoea, me no ifahowoeʼõ ira, 8ba lafoeli ira chõra; no oja chõra girõgirõ, oja sibai goerifõ ba firõ ba anaʼa ba tõla ba siʼõli ba no fahõna noecha, ba lafaosa, labeʼe ba dalifoesõra õsa, nihalõra ba nemalira andrõ.
9II. Tobali lafoeli ira mado Roebeno ba mado Gado ba si matonga mado Manase, larõi Ndraono Gizeraëli bõʼõ, ba Zilo, ba danõ Ganaʼana, ba weʼamõi ba danõ Gileadi, ba danõ tána chõrá, ba zowanoea ira, dali goroisa Jehowa andrõ, nifaʼema Moze. 10Ba me laroegi danõ ba zinga Joridano, ba danõ Ganaʼana, ba lafazõchi naha wameʼe soemange, seboea, mado Roebeno ba mado Gado ba si matonga mado Manase, ba daʼõ ba mbewe Joridano. 11Ba larongo Iraono Gizeraëli bõʼõ: Hiza, no lafazõchi naha wameʼe soemange mado Roebeno ba mado Gado ba si matonga mado Manase, ba gamaoedoe danõ Ganaʼana, ba zinga Joridano, ba danõ ba zi tambai Ndraono Gizeraëli. 12Ba me larongo daʼõ Iraono Gizeraëli, ba faloecha mbanoeara fefoe ba Zilo, ba wanoewõ jaʼira.
13III. Ba lafatenge zinenge Iraono Gizeraëli, ba weʼamõi ba mado Roebeno ba ba mado Gado ba ba zi matonga mado Manase, Fineha andrõ, 14ono Geleazari ere andrõ, awõ zalaw̃a, dafoeloe, samõsa zamboea mado, mado Ndraono Gizeraëli fefoe; dozi ira, ba no satoea wabaliw̃a madora, ba ngahõnõ Ndraono Gizeraëli andrõ. 15Ba me no laroegi mado Roebeno ba mado Gado ba si matonga mado Manase, ba danõ Gileadi, ba fahoehoeo ira chõra, lamane: 16Daʼõ niw̃aʼõ mbanoea Jehowa fefoe chõmi: Hadia, wa farõi ami chõ Lowalangi Ndraono Gizeraëli, wa miʼerogõ Jehowa maʼõchṍ, wamazõchi naha wameʼe soemange chõmi, wa milaw̃a Jehowa maʼõchṍ? (Moz. V. 12, 13 b. t.). 17Hadia, ambõ na horõda famosoemange Baʼali Weoro andrõ, si lõ teboelõ ba hoeloeda, irege maʼõchṍ andre, bõrõ wa gõna famakao mbanoea Jehowa? (Moz. IV. 25, 3). 18Ba jaʼami, ba edõna miʼerogõ Jehowa maʼõchṍ? Ba lõ foelitõ: jaʼami zolaw̃a Jehowa maõchṍ, ba mahemoloe, ba gõna fõnoe mbanoea Ndraono Gizeraëli fefoe. 19Ba na salacha danõ andrõ, nitemami tána chõmi, ba mitaboe mijefo ba danõ tána chõ Jehowa, ba zi so nahia Jehowa, ba miʼiagõ ba ngaima. Ba lõ tola milaw̃a Jehowa, ba he jaʼaga, ba lõ tola milaw̃a, wamozõchi naha wameʼe soemange, nifasamboea, baero naha wameʼe soemange andrõ chõ Lowalangida, Jehowa. 20Hadia, lõ si gõna fõnoe mbanoea Ndraono Gizeraëli fefoe, me no noemalõ danga Nachano andrõ, ono Zera, me falimo ia, ba zalacha andrõ, wa maʼifoe tenga ha jaʼia zi mate ba horõnia andrõ. (F. 7).
21IV. Ba latema lira mado Roebeno ba mado Gado ba si matonga mado Manase, lamane ba zatoea ngahõno Ndraono Gizeraëli: 22Sabõlõ andrõ, Lowalangi, Jehowa — Sabõlõ andrõ, Lowalangi, Jehowa zangila, ba ndra moerongo Iraono Gizeraëli gõi: Na folaw̃a ba na farõisama chõ Jehowa — ba bato maʼõchṍ wanolo jaʼaga — (Sin. 50, 1), 23wa no mafaʼanõ chõma naha wameʼe soemange, ba wangerogõ Jehowa; na no tanima wameʼe soemange nitoenoe ba soemange niʼā, jaw̃a, ba ma soemange fangorifi, ba jamoelaoe mbalõ Jehowa! 24Ba na tenga daʼõ dõdõma, wa malaoe ia: ma so hadia ia; me itõrõ tõdõma, ma lamane dania maʼoewoemi ba maʼoewoema: ”Hadia chõmi chõ Jehowa, Lowalangi Ndraono Gizeraëli andrõ? 25Noa sa ibeʼe ola Joridano Jehowa ba gotaloeada, jaʼami mado Roebeno ba mado Gado; saefa ami chõ Jehowa!” Ba ma labato wamosoemange Jehowa maʼoewoema labeʼe maʼoewoemi. 26Andrõ maw̃aʼõ tõdõma: Daʼõ malaoe, mafazõchi chõma naha wameʼe soemange; tenga ba wameʼe soemange nitoenoe ba soemange nitaba; 27enaʼõ famadoehoeʼõ ia, he chõma ba he chõmi ba ba maʼoewoeda, fa mafosoemange Jehowa fõnania, wameʼe soemange nitoenoe ba soemange nitaba ba soemange fangorifi chõma, fa tebai law̃aʼõ dania maʼoewoemi ba maʼoewoema: Saefa ami chõ Jehowa! 28Mamane dõdõma: Na lamanõ dania chõma, ba ma ba maʼoewoema, ba mamane: Mifaigi wamaʼanõ naha wameʼe soemange andrõ chõ Jehowa, nifaʼanõ ndra toeama, tenga ba wameʼe soemange nitoenoe ba soemange nitaba; enaʼõ famadoehoeʼõ ia, he chõma ba he chõmi. 29Ja arõoe chõma wolaw̃a Jehowa ba fangerogõ Jehowa maʼõchṍ, wamazõchi naha wameʼe soemange nitoenoe ba soemange niʼā ba soemange nitaba, nifasamboea, baero naha wameʼe soemange andrõ chõ Lowalangida, Jehowa, si so ba golajama nahiania andrõ. 30Ba me larongo ira Fineha ere andrõ ba salaw̃a mbanoea andrõ, satoea ngahõnõ Ndraono Gizeraëli, awõnia, niw̃aʼõ mado Roebeno ba mado Gado ba si matonga mado Manase, ba ahono dõdõra. 31Ba imane Fineha, ono Geleazari ere andrõ, ba mado Roebeno ba ba mado Gado ba ba zi matonga mado Manase: ”Oroma chõma maʼõchṍ andre, wa fao chõda Jehowa, me no tenga fangerogõ Jehowa wolaoemi andrõ; ba no niʼorifi Ndraono Gizeraëli, fa lõ gõna fõnoe Jehowa. 32Ba mangawoeli Wineha andrõ, ono Geleazari ere andrõ, ba salaw̃a no mege, larõi danõ Gileadi, mado Roebeno ba mado Gado andrõ; lafoeli ira ba danõ Ganaʼana ba Ndraono Gizeraëli, laʼombachaʼõ nirongora. 33Ba omasi Ndraono Gizeraëli niʼombachaʼõra andrõ ba lasoeno Lowalangi, ba lõʼõ saʼae itõrõ tõdõra wanoewõ jaʼira no mege ba famakiko tanõ andrõ sowanoea mado Roebeno ba mado Gado. 34Ba lafotõi naha wameʼe soemange andrõ mado Roebeno ba mado Gado, lamane: Famadoehoeʼõ ia chõda, wa no Lowalangi Jehowa.”

Soera Josoea Faza 21

I. Tána ba gere ba ba mado Lewi. II. Tõi mbanoea gere. III. Banoea ndraono Gahati. IV. Banoea ndraono Gereso. V. Banoea ndraono Merari. VI. Fangasiwai wangai tanõ Ganaʼana.

1I. Ba laʼondrasi Geleazari ere andrõ ba Josoea, ono Noeni, ba satoea mado Ndraono Gizeraëli satoea mado Lewi, 2lamane chõra ba daʼõ ba Zilo ba danõ Ganaʼana: No iw̃aʼõ Jehowa, nifaʼema Moze tebeʼe chõma mbanoea, nahiama, awõ mbenoea ba ngai, ba nikoebaloi oerifõma. (Moz. IV. 35, 2 b. t.). 3Ba labeʼe ba mado Lewi Iraono Gizeraëli dána chõra õsa, mbanoea andrõ, awõ mbenoea ba ngai, ba nikoebaloi oerifõra, laʼoʼõ niw̃aʼõ Jehowa. (Ngaʼõt. I. 6, 54 b. t.). 4Ba aloea dahõdahõ ba ngaʼõtõ Gahati andrõ; ba tebeʼe ba ndraono Gaʼaroni ere andrõ, mado Lewi, ba feledõloe banoea, nilaoe dahõdahõ; banoea mado Joeda ba banoea mado Zimeoni ba banoea mado Mbenijami. 5Ba ba maʼoewoe Gahati tánõ bõʼõ, ba foeloe banoea, nilaoe dahõdahõ, banoea wabaliw̃a mado Geferaji ba banoea mado Dano ba banoea zi matonga mado Manase. 6Ba ba maʼoewoe Gereso, ba feledõloe banoea, nilaoe dahõdahõ, banoea wabaliw̃a mado Isasari ba banoea mado Gaseri ba banoea mado Nafetali ba banoea zi matonga mado Manase ba Mbazana. 7Ba ba wabaliw̃a maʼoewoe Merari, ba felendroea banoea, banoea mado Roebeno ba banoea mado Gado ba banoea mado Zeboeloni. 8Ba latehe ba mado Lewi andrõ Iraono Gizeraëli mbanoea no mege, fabaja benoea ba ngai, dali dahõdahõ, laʼoʼõ niʼoroiʼõ Jehowa chõ Moze.
9II. Ba latehe mbanoea mado Joeda andrõ ba banoea mado Zimeoni andrõ, nitõtõi tõi. 10Ba tetehe ba ndraono Gaʼaroni, ngaʼõtõ Gahati, ono Lewi, chõra sa dahõdahõ si fõfõna. 11Latehe chõra mbanoea Garaba andrõ, ama Genoki, jaʼia Heberona, ba hili mado Joeda, awõ mbenoea si tefasoei jaʼia. 12Ba naha zinanõ ba ngai mbanoea, awõ halama, si fabõbõ chõnia, ba labeʼe chõ Galebi, ono Jefoene, tána chõnia, si lõ teboelõ. (Jos. 14, 14; 15, 13). 13Ba ba maʼoewoe Gaʼaroni, ere andrõ, ba latehe mbanoea saw̃atõ zangeʼe andrõ, Heberona andrõ, fabaja benoea ba ngai ba Libena, fabaja benoea, 14ba Jatiro, fabaja benoea ba Esemoa, fabaja benoea, 15ba Holona, fabaja benoea, ba Debira, fabaja benoea, 16ba Asana, fabaja benoea, ba Joeta, fabaja benoea, ba Beti Zemesi, fabaja benoea — siw̃a banoea, banoea mado no mege, si domboea. 17Ba banoea mado Mbenijami: Gibeona, fabaja benoea ba ngai, ba Geba, fabaja benoea, 18ba Anatoti, fabaja benoea, ba Alamo, fabaja benoea — õfa banoea. 19Tobali tetehe ba maʼoewoe Gaʼaroni, ere andrõ, ba feledõloe banoea fefoe, fabaja benoea ba ngai.
20III. Ba ba wabaliw̃a maʼoewoe Gahati, mado Lewi, ba zi tosai ngaʼõtõ Gahati, ba si gõna ba dahõdahõ chõra, ba banoea mado Geferaji. 21Latehe chõra mbanoea saw̃atõ zangeʼe andrõ, Sichema, fabaja benoea ba ngai, ba hili mado Geferaji ba Geseri, fabaja benoea, 22ba Kibisaʼi, fabaja benoea, ba Beti Horona, fabaja benoea — õfa banoea. 23Ba banoea mado Dano: Eliteke, fabaja benoea, ba Gibetona, fabaja benoea, 24ba Ajalona, fabaja benoea, ba Gata Rimono, fabaja benoea — õfa banoea. 25Ba banoea zi matonga mado Manase: Taʼanache, fabaja benoea, ba Jibelea, fabaja benoea — domboea banoea. 26Tobali tetehe ba wabaliw̃a maʼoewoe Gahati, si tosai andrõ, ba foeloe banoea fefoe, fabaja benoea ba ngai.
27IV. Ba ba maʼoewoe Gereso andrõ, fabaliw̃a mado Lewi, ba domboea tetehe banoea zi matonga mado Manase: banoea saw̃atõ zangeʼe andrõ, Golana ba Mbazana, fabaja benoea, ba Beʼeseri, fabaja benoea. 28Ba banoea mado Isasari: Kisiona, fabaja benoea, ba Daberata, fabaja benoea, 29ba Jaramoeta, fabaja benoea, ba Eni Gani, fabaja benoea — õfa banoea. 30Ba banoea mado Gaseri: Mizeali, fabaja benoea, ba Abedono, fabaja benoea. 31Ba Helikata, fabaja benoea ba Rehobo, fabaja banoea — õfa banoea. 32Ba banoea mado Nafetali: banoea saw̃atõ zangeʼe andrõ, Kedesi ba Galilaia, fabaja benoea, ba Hamoti Dora, fabaja benoea ba Karatana fabaja benoea — tõloe banoea. 33Tobali tetehe ba wabaliw̃a maʼoewoe Gereso andrõ feledõloe banoea, fabaja benoea ba ngai.
34V. Ba ba wabaliw̃a maʼoewoe Merari andrõ, si tosai mado Lewi, ba tetehe, banoea mado Zeboeloni, Jokenea, fabaja benoea, ba Karata, fabaja benoea, 35ba Dimena, fabaja benoea, ba Nahalala, fabaja benoea — õfa banoea. 36Ba banoea mado Roebeno: banoea saw̃atõ zangeʼe andrõ, Beseri andrõ, ba danõ si mate, fabaja benoea, ba Jasa, fabaja benoea. 37Ba Kedemoti, fabaja benoea, ba Mefaʼata, fabaja benoea — õfa banoea. 38Ba banoea mado Gado: banoea saw̃atõ zangeʼe andrõ, Ramoti ba danõ Gileadi, fabaja benoea, ba Mahanaʼi, fabaja benoea, 39ba Hesibona, fabaja benoea, ba Jaʼezeri, fabaja benoea — õfa banoea fefoe. 40Tobali tetehe ba wabaliw̃a maʼoewoe Merari andrõ, si tosai fabaliw̃a mado Lewi, felendroea banoea fefoe, tána chõra, nilaoe dahõdahõ. 41Ba banoea mado Lewi andrõ, ba no õfa woeloe a w̃aloe, fabaja benoea, si teʼoeʼoe ba dána Ndraono Gizeraëli [bõʼõ]. 42Ba banoea no mege, ba samboesamboea banoea, fabaja benoea, si tefasoei jaʼia; dozi banoea no mege, ba si manõ.
43VI. Ba ibeʼe ba danga Ndraono Gizeraëli danõ maʼasagõrõ Jehowa, si no fahõloe ia chõ ndra toeara, ba wameʼe chõra; ba lahalõ chõra ba mowanoea ira ba daʼõ. 44Ba tefasoei danõra, ba ahono ibeʼe Jehowa, itõrõ nifaboeʼoenia, chõ ndra toeara, fahõloesa. Lõ si lõ teʼala chõra emalira; ibeʼe ba dangara nemalira fefoe Jehowa. 45Samboea lõ aechoe ba danõ taroma li si sõchi andrõ, niw̃aʼõ Jehowa ba maʼoewoe Gizeraëli; ahori itõrõ. (F. 23, 14).

Soera Josoea Faza 20

Fangohonogõi banoea saw̃atõ, faoma fatambai Joridano.

1 Ba hoemede Jehowa chõ Josoea, imane: 2Õmane ba Ndraono Gizeraëli: Mihonogõi mbanoea saw̃atõ andrõ, niʼoroiʼõgoe chõ Moze, niw̃aʼõ chõmi: (Moz. II. 21, 13. Moz. IV. 35, 10 b. t.). 3Enaʼõ isaw̃a daʼõ na so zi no mamoenoe niha si tenga niʼodõdõgõ, si lõ moedõnadõna, enaʼõ saw̃atõmi ba zolaoe balõ. 4Ba sanaw̃a banoea daʼõ, ba jamoeʼiagõ zinga mbawa gõli mbanoea ba jamoeʼombachaʼõ ba zatoea mbanoea andrõ hoehoeonia ba ndramoefaʼamõi ia jomo chõra, ndramoetehe chõnia nahia, ba wangiagõ daʼõ chõra. 5Ba na igohi ia solaoe balõ, ba lõ tola labeʼe ba dangania zangeʼe andrõ, me tenga niʼodõdõgõ wamoenoenia awõnia, me tenga fatioesa mege mbõrõ. 6Ba jamoeʼiagõ mbanoea andrõ, irege no moeʼohe ia ba waloechata mbanoea, ba wangetoeʼõ hoekoenia — irege mate gere seboea, ere seboea na loeo daʼõ. Awena dania tola mangawoeli zangeʼe andrõ ba mbanoeara ba ba nomonia, ba mbanoea ba zi otorai ia mege woloi. 7Ba laʼamoniʼõ Gedesi ba Galilaia, ba hili mado Nafetali ba Sichema ba hili mado Geferaji ba Kiriati Garaba, Heberona andrõ, ba hili mado Joeda. 8Ba jefo Joridano, ba gamaoedoe Jericho, tánõ ba gatoemboecha, lahonogõi Mbeseri ba danõ si mate, ba zaloʼo, banoea mado Roebeno, ba Ramoti ba danõ Gileadi, banoea mado Gado, ba Golana, ba danõ Mbazana, banoea mado Manase. 9Daʼõ mbanoea andrõ, nihonogõi ba Ndraono Gizeraëli fefoe ba ba niha bõʼõ, si fatewoe gana chõra, enaʼõ ba daʼõ lasaw̃a dozi samoenoe niha, si lõ moeʼodõdõgõ, enaʼõ lõ iboenoe ira solaoe balõ, lõ moeʼohe ba waloechata mbanoea.

Soera Josoea Faza 19

I. Tána ba mado Zimeoni. II. Tána ba mado Zeboeloni. III. Tána ba mado Isasari. IV. Tána ba mado Gaseri. V. Tána ba mado Nafetali. VI. Tána ba mado Dano. VII. Tána chõ Josoea.

1I. Ba dahõdahõ fanete si fõfõna andrõ, ba tána ba mado Zimeoni, ba wabaliw̃a Ndraono Zimeoni andrõ. Ba tána chõra, ba teʼoeʼoe ba dána ba mado Joeda. 2Tána chõra Mbereseba ba Saba ba Molada; 3ba Hasara Zoeala ba Bala ba Esema 4ba Eli Dolada ba Betoeli ba Horama, 5ba Sikelagi, ba Beti Marakobo ba Hasara Zoesa, 6ba Beti Lebaʼoti ba Saroehe — feledõloe banoea, awõ zi fahalama chõra. 7Ba Eni Rimono ba Eteri ba Asana — õfa banoea, awõ zi fahalama chõra; 8fabaja banoea sideʼide fefoe, si tefasoei banoea seboea andrõ no mege, iroegi Mbaʼalati Mbeʼeri jaʼia Rama raja. Daʼõ dána ba mado Zimeoni ba wabaliw̃ara. 9Ba no ba dána ba mado Joeda lahalõ dána ba mado Zimeoni. Me no tõra waʼebolo ba mado Joeda, andrõ wa labeʼe ba Ndraono Zimeoni õsa chõra.
10II. Ba dahõdahõ si tõloe, ba tána ba mado Zeboeloni, ba wabaliw̃ara, ba iroegi ba Zaridi dána chõra andrõ. 11Ba tánõ ba gaechoela, ba noemalõ mijaw̃a nolara, ba Marela, itõrõ zinga Dabeseti ba bewe mbombo andrõ, ba ngai Jokenea tánõ ba gatoemboecha. 12Ba tánõ ba gatoemboecha loeo, ba itoetoeroe danõ Gisiloti Dabora, iʼotarai Zarida, ba itohoegõ ba Daberata ba mijaw̃a ba Jafia. 13Ba iʼotarai daʼõ, ba isaw̃a ba gatoemboecha loeo Gata Heferi ba Eti Gasimi ba itohoegõ ba Rimona ba ikõiʼõ ia ba Nea. 14Ba ifasoei daʼõ mijõoe, ba Hanato, ba aetoe ba ndraso Jefita Eli. 15Katata ba Nahala ba Simerono ba Jidala ba Betilechema, — felendroea banoea, awõ zi fahalama chõra. 16Daʼõ dána ba mado Zeboeloni ba wabaliw̃ara: banoea no mege, awõ zi fahalama chõra.
17III. Ba dahõdahõ si õfa, ba tána ba mado Isasari, ba wabaliw̃ara. 18Tána chõra Jezereʼeli ba Kesoeloti ba Soenema, 19ba Hafaraʼi ba Siona ba Anaharata 20ba Rabiti ba Kisiona ba Ebesi, 21ba Remeti ba Eni Gani ba Eni Hada ba Beti Wasesi, 22ba ihene Dabora ola andrõ ba Sahasima ba Beti Zemesi ba aetoe ba Joridano — feleõnõ banoea, awõ zi fahalama chõra. 23Daʼõ dána ba mado Isasari, ba wabaliw̃ara: banoea andrõ, awõ zi fahalama chõra.
24IV. Ba dahõdahõ si lima, ba tána ba mado Gaseri, ba wabaliw̃ara. 25Chõra Helikata ba Hali ba Beteni ba Achisafi, 26ba Alamelechi ba Ameada ba Miseala, ba iroegi hili Garemeli, tánõ ba mbewe nasi, ba Sihora Libenati. 27Ba isaw̃a tánõ ba gatoemboecha Mbeti Dagono ola andrõ, ihene danõ mado Zeboeloni ba daso Jefita Eli, jõoe, ba Beti Emeki ba Negieli ba itohoegõ mijõoe ba Gaboela, 28ba ba Geberono ba ba Rehobo ba ba Gamoni ba ba Kana ba iroegi mbanoea seboea andrõ, Sidona. 29Ba ifoeli foeri ba Rama, ba iroegi mbanoea saro andrõ, Tiro; ba isaw̃a Hosi, ba aetoe ba mbewe nasi, tánõ ba Nachisibi. 30Ba Ako ba Afeki ba Rehobo — doea woeloe a roea banoea, awõ zi fahalama chõra. 31Daʼõ dána ba mado Gaseri, ba wabaliw̃ara: banoea no mege, awõ zi fahalama chõra.
32V. Ba dahõdahõ si õnõ, ba tána ba mado Nafetali, ba wabaliw̃ara. 33Ba olara, ba iʼotarai Helefi, manawa andrõ ba zinga Zaʼanani, ba Adami Nekebi ba Jabineʼeli, ba iroegi Lakoema ba aetoe ba Joridano. 34Ba isaw̃a misi tooe Gasinoti Dabora, ba itohoegõ ba Hoekoko, ihene raja danõ mado Zeboeloni ba tanõ mado Gaseri, tánõ ba gaechoela; Joridano tánõ ba gatoemboecha. 35Ba banoea saro Zidimi ba Seri ba Hamata ba Rakata ba Kinereti, 36ba Adama ba Rama ba Hasora, 37ba Kedesi ba Ederai ba Eni Hasora, 38ba Jireono ba Migedali Eli ba Horema ba Beti Ganata ba Beti Zemesi — samboea ambõ doea woeloe banoea, awõ zi fahalama chõra. 39Daʼõ dána ba mado Nafetali, ba wabaliw̃ara: banoea andrõ, awõ zi fahalama chõra.
40VI. Ba tána ba mado Dano ba wabaliw̃ara, ba dahõdahõ si fitoe. 41Ba tána chõra, ba Sorea ba Esaʼola ba Iri Zemesi, 42ba Saʼalabi ba Ajalona ba Jitela, 43ba Elono ba Timenata ba Ekerona, 44ba Eliteke ba Gibetona ba Baʼalata, 45ba Jehoedi ba Bene Mbaraki ba Gata Rimona, ba Me Jarako ba Rakona, 46fabaja tanõ tánõ ba Jafo. 47Ba tetimba mado Dano andrõ, lahalõ danõra niha bõʼõ. Ba maoso mado Dano, lasoewõ Lasema lalaw̃a bawa ziʼõli ba lahalõ nahiara mbanoea andrõ ba labeʼe tõi Lesema andrõ Dano, tõi woeroegõra Dano andrõ. (Sangoehoek. 18, 27 b. t.). 48Daʼõ dána ba mado Dano andrõ, ba wabaliw̃ara: banoea andrõ, awõ zi fahalama chõra.
49VII. Ba me no awai lafaosa danõ maʼasagõrõ, ba labeʼe dána chõ Josoea, ono Noeni, Iraono Gizeraëli, ba danõra andrõ. 50Laʼoʼõ niw̃aʼõ Jehowa, latehe chõnia mbanoea andrõ, niʼandrõnia, Timenata Zera, ba hili mado Geferaji. Ba iʼaroʼõ mbanoea andrõ ba ibaliʼõ nahiania. 51Daʼõ dána chõra, nifaosa Geleazari ere andrõ ba Josoea, ono Noeni ba satoea mado Ndraono Gizeraëli andrõ, ba Zilo, fõna Jehowa, ba zinga mbawandroehõ nose gamaboeʼoela li, nilaoe dahõdahõ. Ba tobali awai wamaosa tanõ.

Soera Josoea Faza 18

I. Lafaʼanõ nose gamaboeʼoela li ba Zilo. Famaosa tanõ si tosai. II. Tána ba mado Mbenijami.

1I. Ba owoelo mbanoea Ndraono Gizeraëli fefoe, ba Zilo. Ba daʼõ lafaʼanõ nose gamaboeʼoela li andrõ, me no mõi barõ mbawara danõ. 2Ba fitoe mado zi tosai Iraono Gizeraëli, ba zi lõ moefaosa tanõ na. 3Ba imane Josoea ba Ndraono Gizeraëli: Ha waʼara orõrõ manõ ami, wa lõ mõi ami, ba wangai chõmi tanõ andrõ, nibeʼe Jehowa, Lowalangi ndra toeami, chõmi? 4Miʼohe chõgoe niha, datõloe zamboea mado, ba daʼoefatenge ira, enaʼõ mõi ira manõrõi tanõ, enaʼõ labeʼe ba zoera he ndrege dána chõra, ba mangawoeli ira chõgoe. 5Ba ndramoeʼofitoe, wamaosa chõra. Ba mado Joeda dána chõra raja ba ba mado Josefo dána chõra jõoe, lõ teboelõ. 6Ba jaʼami, na no miʼofitoe, ba mibeʼe ba zoera ba miʼohe chõgoe ba daʼe, enaʼõ oelaoe dahõdahõ chõmi ba daʼe, fõna Lowalangida Jehowa. 7Ba mado Lewi sa, ba lõ tána chõra tanõ ba ngaimi; faʼaʼere andrõ chõ Jehowa dána chõra. Ba mado Gado andrõ ba mado Roebeno ba si matonga mado Manase, ba no latema dána chõra jefo Joridano, tánõ ba gatoemboecha, nihonogõi genoni Jehowa andrõ, Moze, chõra. 8Ba maoso ira, mofanõ. Ba ifobawa lala chõra Josoea, me mofanõ ira, ba wameʼe ba zoera danõ andrõ, imane: Miʼaeʼe, mitõrõi danõ, mibeʼe ba zoera ba mifoeli ami chõgoe; ba oelaoe dania dahõdahõ chõmi, fõna Jehowa, ba daʼe, ba Zilo. 9Ba mofanõ ira, latõrõi danõ, laʼofitoe wameʼe ba zoera, lafaigi mbanoea, ba lafoeli ira chõ Josoea ba golombasew̃a ba Zilo. 10Ba ilaoe dahõdahõ chõra Josoea, fõna Jehowa ba Zilo, ifaosa ba daʼõ danõ ba Ndraono Gizeraëli, dali wabaliw̃ara.
11II. Ba aloea dahõdahõ ba mado Mbenijami, ba wabaliw̃ara, ba tána chõra ba gotaloeara mado Joeda mado Josefo andrõ. 12Ba olara tánõ jõoe, ba iʼotarai Joridano, ba noemalõ mijaw̃a ba mboto hili, jõoe Jericho, ba itohoegõ mijaw̃a ba hili andrõ, tánõ ba gaechoela, ba noemalõ ba danõ si mate andrõ, ba Mbeti Awena. 13Ba iʼotarai daʼõ, ba noemalõ ba Loesi, ihene dánõ raja mboto hili Loesi andrõ, jaʼia Mbetiëli andrõ, ba noemalõ misi tooe ba Gateroti Adara, ba hili andrõ, raja Mbeti Horona tooe. 14Ba ikõiʼõ ia, itoetoeroe misi tooe, raja hili andrõ, fõnafõna Mbeti Horona, tánõ raja, ba aetoe tánõ ba Giriati Mbaʼali, jaʼia Giriati Jeari, banoea Ndraono Joeda. Daʼõ nola tánõ ba gaechoela loeo. 15Ba ola tánõ raja, ba iʼotarai mbalõ mbanoea Giriati Jeari ba noemalõ misa, itoetoeroe nasi, ba iroegi goemboe nidanõ Nefetoa andrõ. 16Ba noemalõ mitooe ba mbalõ hili andrõ, ba ngai ndraso chõ Mbeni Hinomo, tánõ ba gatoemboecha, jõoe ndraso Refaʼi. Ba isaw̃a mitooe ba ndraso chõ Hinomo, raja mboto hili Ndrawa Jeboesi andrõ, ba itohoegõ mitooe ba goemboe Rogeli. 17Ba ikõiʼõ ia mijõoe, isaw̃a Neni Zemesi ba itohoegõ, irege Gelilota, ba gamaoedoe hili Gadoemi. Ba noemalõ mitooe ba gowe Mbohani andrõ, ono Roebeno, 18isaw̃a mboto hili andrõ ba gamaoedoe Garaba, tánõ jõoe, ba mitooe ba Garaba. 19Ba noemalõ misa, iroegi jõoe mboto hili Mbeti Hogela ba aetoe ba mbalõ ziloeaʼasi nasio tánõ jõoe, ba loeaha Joridano. Daʼõ nola tánõ raja. 20Ba tánõ ba gatoemboecha, ba Joridano nola. Daʼõ nola dána ba mado Mbenijami, ba wabaliw̃ara. 21Ba tõi mbanoea mado Mbenijami, ba Jericho ba Beti Hogela ba Emeki Kesisi, 22ba Beti Garaba ba Semaraʼi ba Betiëli, 23ba Awimi ba Hafara ba Ofera, 24ba Kefara Amoni ba Ofeni ba Geba — felendroea banoea, awõ zi fahalama chõra. 25Ba Gibeona ba Rama ba Beʼeroti 26ba Misefe ba Kefira ba Mosa. 27Ba Rekema ba Jirifeʼeli ba Tarala, 28ba Sela ba Elefi ba banoea ndraono Jeboesi andrõ, jaʼia Jeroezalema, ba Gibeati ba Kiriati — feleõfa banoea, awõ zi fahalama chõra. Daʼõ dána ba mado Mbenijami ba wabaliw̃ara.

Soera Josoea Faza 17

I. Tána ba zi matonga mado Manase. II. Fekõkõkõkõ Ndraono Josefo ba dána chõra andrõ.

1I. Ba latema dána chõra mado Manase, me no si aʼa ndraono Josefo Manase andrõ. Tána chõ Machiro, si aʼa ndraono Manase, ama Gileadi, ba tanõ Gileadi ba tanõ Mbazana, me no sabõlõ ba wanoewõ ia. 2Ba dozi maʼoewoe Manase, si tosai, ba latema dána chõra, balazi wabaliw̃ara: maʼoewoe Gabiëzeri ba maʼoewoe Heleki ba maʼoewoe Gazeriëli ba maʼoewoe Zechema ba maʼoewoe Heferi ba maʼoewoe Zemida. Daʼõ ndra matoea, maʼoewoe Manase, ono Josefo, ba wabaliw̃ara. 3Ba chõ Zelofadi, ono Heferi ono Gileadi ono Machiro ono Manase, ba lõ ono matoea, ha ono alawe; ba daʼe dõi nononia alawe: Mala ba Noa ba Hogela ba Milika ba Tirisa. (Moz. IV. 27. 1 b. t.). 4Ba mõi ira chõ Geleazari ere andrõ ba chõ Josoea, ono Noeni, ba ba zalaw̃a andrõ, lamane: No iw̃aʼõ Jehowa, labeʼe dána chõma gõi, ba ngai ndra talifoesõma. Ba ibeʼe chõra, dali goroisa Jehowa andrõ, dána chõra, ba ngai ndra talifoesõ namara. 5Tobali dafoeloe moʼoeracha ba mado Manase, lõ lai danõ Gileadi ba tanõ Mbazana, jefo Joridano, 6me latema gõi dána chõra maʼoewoe Manase ono alawe, ba ngai miʼoewoenia ono matoea. Ba tanõ Gileadi andrõ, ba tána ba zi tosai maʼoewoe Manase. 7Ba ola danõ mado Manase, ba iʼotarai danõ Mado Gaseri, noemalõ ba Michimeta, tánõ ba gatoemboecha iʼotarai Zichema. Ba isaw̃a gambõlõ ba mbanoea Neni Dafoea. 8Tanõ Dafoea andrõ, ba ba mado Manase ba banoea Dafoea, ba nola Manase, ba ba mado Geferaji. 9Ba itohoegõ mitooe ola, ba mbombo Kana, bewe nidanõ tánõ raja; banoea daʼõ, ba gotaloea mbanoea mado Manase, ba tána ba mado Geferaji. Ba iʼõtõ nidanõ ola mado Manase, ihene mbewenia tánõ jõoe ba aetoe ba mbewe nasi. 10Tánõ raja, ba ba mado Geferaji, ba tánõ jõoe, ba ba mado Manase, ba ola mbewe nasi. Ba tánõ jõoe, ba faola ba mado Gaseri, ba tánõ ba gatoemboecha, ba ba mado Isasari. 11Ba ba danõ mado Isasari ba ba dánõ mado Gaseri, ba banoea Manase na Mbeti Zeana ba si fahalama chõra, ba Jibelea ba si fahalama chõra ba banoea Dora ba si fahalama chõra ba banoea Neni Dora ba si fahalama chõra ba banoea Daʼanachi ba si fahalama chõra, ba si tõloe hili banoea Megido ba si fahalama chõra andrõ. 12Ba tebai latimba mbanoea daʼõ no mege mado Manase, ba tobali faloecha Ndrawa Ganaʼana lõ teboelõ ira ba danõ daʼõ. 13Ba me itoegoe abõlõ Ndraono Gizeraëli, ba labeʼe sangai halõw̃õra Ndrawa Ganaʼana andrõ: ba lõ aloea latimba.
14II. Ba hoemede Ndraono Josefo andrõ chõ Josoea, lamane: Hana wa ha samboea mado motanõ, ha samboea mado moʼoeracha õbeʼe chõma, ba no ato ndraʼaga, me no ifahowoeʼõ ndraʼaga Jehowa, iroegi maʼõchṍ andre? 15Ba imane chõra Josoea: Na no ato ami, ba miʼae mijaw̃a ba hili ba zatoea eoe, molahoi chõmi ba daʼõ, ba danõ Ndraono Weresi ba ba danõ Ndrawa Refaʼi, na ambõ tanõ chõmi ba hili mado Geferaji! 16Ba lamane Iraono Josefo: Ambõ tanõma hili andrõ, ba no mokoereta siʼõli Ndrawa Ganaʼana andrõ fefoe, ba ndraso andrõ ba banoea Mbeti Zeana, awõ zi fahalama chõra ba ba ndraso Jezereʼeli andrõ. 17Ba imane Josoea ba maʼoewoe Josefo andrõ, mado Geferaji, ba ba mado Manase: Ato ami ba sabõlõ, bõi ha samboea mado motanõ chõmi; 18labeʼe chõmi zamboea hili: na no satoea eoe, ba miʼobõ, ba chõmi gõi zi faola ba daʼõ. Mitimba saʼae Ndrawa Ganaʼana andrõ, me no mokoereta siʼõli ira ba me no sabõlõ.

Soera Joaoea Faza 16

I. Tána ba maʼoewoe Josefo. II. Tána ba mado Geferaji.
 
 
1I. Ba latema dána chõra Iraono Josefo, iʼotarai Joridano ba gamaoedoe Jericho, tánõ ba gatoemboecha, iʼotarai nidanõ andrõ ba Jericho, tanõ si mate andrõ mijaw̃a, iʼotarai Jericho, noemalõ ba hili Mbetiëli andrõ. 2Ba iʼotarai Mbetiëli [ola andrõ] isaw̃a Loesi ba misa ba danõ Gareki, ba Gataroti. 3Ba isaw̃a mitooe ba gaechoela loeo, ba danõ Ndraono Jefeleti, iroegi danõ Mbeti Horona tooe ba irege Geseri ba aetoe ba mbewe nasi. 4Daʼõ nitema Ndraono Josefo andrõ, Manase ba Eferaji, tána chõra ba ndraono mitooe.
5II. Ba daʼe nola Ndraono Geferaji, ba wabaliw̃ara: Ola danõra tánõ ba gatoemboecha, ba Ateroti Adara, ba noemalõ ba Mbeti Horona jaw̃a, ba itohoegõ iroegi mbewe nasi. 6Ba ola tánõ jõoe, ba Michemeta ba isaw̃a tánõ ba gatoemboecha ba Daʼanata Silo ba itõrõ zinga daʼõ, tánõ ba gatoemboecha, iʼotarai Janoha. 7Ba iʼotarai Janoha, ba noemalõ mitooe ba Gataroti ba ba Naʼarata ba faola ba danõ Jericho andrõ ba aetoe ba mbewe Joridano. 8Ba iʼotarai Dafoea, ba itoetoeroe gaechoela loeo, noemalõ ba mbombo Kana ba aetoe ba mbewe nasi. Daʼõ dána ba Ndraono Geferaji, ba wabaliw̃ara, si lõ teboelõ ba Ndraono mitooe. 9Ba banoea andrõ, niʼoniagõ banoea Ndraono Geferaji ba danõ Ndraono Manase, banoea andrõ fefoe, awõ zi fahalama chõra. 10Ba lõ latimba Ndrawa Ganaʼana ba Geseri. Ba tobali oroedoe ba Ndraono Geferaji Ndrawa Ganaʼana, iroegi maʼõchṍ andre, ba tobali sangai halõw̃õ chõra.

Soera Josoea Faza 15

I. Tána ba mado Joeda. II. Tána chõ Galebi ba chõ Gotenieli. III. Tõi mbanoea ba mado Joeda.

1I. Ba tána ba Ndraono Joeda andrõ ba wabaliw̃ara, ba tánõ ba nola Ndraono Gedomo, miraja, tánõ ba danõ si mate Sini andrõ, fondrege raja. 2Ba olara tánõ raja ba iʼotarai mbalõ ziloeaʼasi, sadõni ia andrõ miraja. 3Ba tohoetohoenia irege raja hili Nakerabi, misa ba Zini ba misi jaw̃a, miraja, iʼotarai Kadesi Mbarenea, ba noemalõ ba Heserona ba mijaw̃a ba Gadara, ba manalinga ziʼoe ba iroegi Garaka, 4ba noemalõ misa ba Gasemo ba iroegi nidanõ Miseraji andrõ ba aetoe ba mbewe nasi. 5Daʼõ nola tánõ raja. Ba ola tánõ ba gatoemboecha ba siloeaʼasi nasio, iroegi loeaha Joridano. Ba ola mijõoe, ba iʼotarai mbalõ ziloeaʼasi, loeaha Joridano andrõ. 6Ba noemalõ misi jaw̃a ba Mbeti Hogela ba misa, iroegi jõoe Mbeti Garaba ba mijaw̃a, irege gowe Mbohani andrõ, maʼoewoe Roebeno. 7Ba noemalõ mijaw̃a ba Debira, iʼotarai ndraso Achori andrõ, ba isaw̃a mijõoe Giligala, ba gamaoedoe hili Gadoemi, raja mbombo andrõ. Ba noemalõ ba goemboe loeo andrõ ba iroegi goemboe Rogeli. 8Ba noemalõ misi jaw̃a ba ndraso chõ Mbeni Hinomo, raja hili Ndraono Jeboesi, jaʼia Jeroezalema andrõ. Ba itohoegõ mijaw̃a, ba zoezoe hili andrõ, tánõ ba gatoemboecha na taʼotarai ndraso chõ Mbeni Hinomo ba mbalõ zaloʼo tanõ Refaʼi, tánõ jõoe. 9Ba moroi ba zoezoe hili andrõ, ba noemalõ ba goemboe nidanõ Nefetoa andrõ, ba iroegi mbanoea andrõ ba hili Geferona, ba manakõi ba Mbaʼala, jaʼia Kiriati Jeʼari. 10Ba moroi ba Mbaʼala, ba isaw̃a gaechoela loeo, hili Zeʼira, ba itõrõ gahe hili Jeari, tánõ jõoe; jaʼia Gezalo, ba noemalõ misa ba Mbeti Zemesi ba misa ba Dimena. 11Ba itohoegõ mijõoe, irege hili Nekerona andrõ ba manakõi ba Zicherona, noemalõ ba hili Mbaʼala ba itohoegõ irege Jabeneli, ba tobali aetoe ba mbewe nasi. 12Ba ola tánõ ba gaechoela loeo, ba asi seboea, bewenia andrõ. Daʼõ nola Ndraono Joeda andrõ, ba wabaliw̃ara, fasoei.
13II. Ba chõ Galebi, ono Jefoene andrõ, ba ibeʼe tána chõ ba danõ Ndraono Joeda andrõ, dali niw̃aʼõ Jehowa chõ Josoea, mbanoea Garaba andrõ, ama Genaki, jaʼia Heberona andrõ. 14Ba itimba ba daʼõ Kalebi nono Genaki andrõ, si datõloe, Sezai ba Ahima ba Talamai, ngaʼõtõ Genaki. (Moz. IV. 13, 23). 15Ba moroi ba daʼõ mõi ia misi jaw̃a, ba wanoewõ banoea Debira. Ba tõi Debira andrõ fõna, ba Kiriati Zeferi. 16Ba imane Kalebi: Na so zolaw̃a Giriati Zeferi, na atoeʼa ia, ba oebeʼe chõnia nonogoe Achesa. (Sangoehoek. 1, 12—15). 17Ba atoeʼa Goteniëli, ono Genasi, achi Galebi, ba ibeʼe dongania nononia Achesa. (Moz. IV. 33, 12). 18Ba me tehalõ ia, ba ifarooe Goteniëli, ba wangandrõ benoea, sagõrõ, chõ namania. Mõi ia tooe moroi ba galide; ba imane chõnia Kalebi: Hana? 19Ba imane: Beʼe chõgoe howoehowoe! Noa saʼae õbeʼe ndraʼo miraja, ba õbeʼe gõi chõgoe goemboe nidanõ! Ba ibeʼe chõnia goemboe si jaw̃a ba oemboe si tooe.
20III. Daʼõ dána ba Ndraono Joeda andrõ, ba wabaliw̃ara. 21Ba banoea ba mbalõ danõ Ndraono Joeda andrõ, ba nola Ndraono Gedomo, tánõ raja, ba daʼe dõi: Kabizeʼeli ba Ederi ba Jagoera, 22ba Kina ba Dimona ba Adada, 23ba Kedesi ba Hasora ba Jitenani, 24ba Sifi ba Telemi ba Bealoti, 25ba Hasara Hadata ba Kerioti Heserona, jaʼia Hasora, 26ba Amana ba Sema ba Molada, 27ba Hasara Gada ba Hesimona ba Beti Feleti, 28ba Hasara Soeali ba Beri Seba ba Bisiotia, 29ba Baʼala ba Ijima ba Esema, 30ba Eletoladi ba Kesila ba Horama, 31ba Sikelagi ba Madimana ba Sanasana, 32ba Lebaoti ba Silihima ba Aʼina ba Rimona — doea woeloe a siw̃a banoea, awõ zi fahalama chõra. 33Ba ba ndraso, ba Esaʼola ba Sorea ba Asena, 34ba Sanoa ba Eni Gani ba Tafoea ba Enamo, 35ba Jaramoeti ba Adoela ba Socho ba Aseka, 36ba Saʼaraʼi ba Aditaʼi ba Gedera ba Gederotaʼi — feleõfa banoea, awõ zi fahalama chõra. 37Ba Senana ba Hadasa ba Migidala Gado. 38Ba Dileano ba Misefe ba Jokiteʼeli, 39ba Lachisi ba Bosakati ba Egelona, 40ba Kabona ba Lamasi ba Kiteli, 41ba Gederoti ba Beti Dagono ba Naʼama ba Makeda, — feleõnõ banoea, awõ zi fahalama chõra. 42Ba Libena ba Eteri ba Asana, 43ba Jifita ba Asena ba Nesibi, 44ba Kegila ba Achisibi ba Maresa, — siw̃a banoea, awõ zi fahalama chõra. 45Ba Ekerona, awõ zi fabõbõ ba daʼõ ba si fahalama chõra. 46Fefoe, iʼotarai Nekerona, noemalõ ba mbewe nasi, ba ngai Gasoto, awõ zi fahalama chõra. 47Ba Asoto andrõ ba si fabõbõ chõra ba si fahalama, ba Gasa, awõ zi fabõbõ chõra, awõ zi fahalama, iroegi nidanõ Miseraji andrõ; ba ola nasi seboea andrõ, bewenia. 48Ba ba zohili, ba Samiri ba Jatiri ba Socho, 49ba Dana ba Kiriati Sana, jaʼia Debira andrõ, 50ba Anaba ba Esihemo ba Anima, 51ba Gosena ba Holono ba Gilo — felezara banoea, awõ zi fahalama chõra. 52Ba Araba ba Doema ba Eseano, 53ba janoema ba Beti Tafoea, ba Afeka, 54ba Hoemeta ba Kiriati Garaba, jaʼia Heberona andrõ, ba Siora — siw̃a banoea, awõ zi fahalama chõra. 55Ba Maʼona ba Karemeli ba Sifi ba Joeta, 56ba Jezereʼeli ba Jokedea ba Sanoa, 57ba Kaʼino ba Gibea ba Timena —foeloe banoea, awõ zi fahalama chõra. 58Ba Halihoela ba Betisoeri ba Gedoro, 59ba Maʼarata ba Beti Anota ba Eleteko, — õnõ banoea, awõ zi fahalama chõra. 60Ba Kiriati Mbaʼali, jaʼia Giriati Jeari, ba Raba — domboea banoea, awõ zi fahalama chõra. 61Ba ba danõ si mate, ba Beti Garaba ba Midini ba Sechacha, 62ba Nibesana ba Iri Hamelachi ba Engedi, — õnõ banoea, awõ zi fahalama chõra. 63Ba Iraono Jeboesi andrõ, banoea, Jeroezalema, ba tebai latimba Iraono Joeda, ba tobali oroedoe ba Ndraono Joeda Ndraono Jeboesi andrõ ba Jeroezalema, iroegi maʼõchṍ andre.

Soera Josoea Faza 14

I. Tefaosa danõ Ganaʼana, fadahõdahõ ira. II. Tána chõ Galebi andrõ.

1I. Daʼõ nitema Ndraono Gizeraëli tána chõra, ba danõ Ganaʼana, nifaosa Geleazari ere andrõ ba Josoea, ono Noeni, ba satoea zalaw̃a mado Ndraono Gizeraëli chõra. 2Me lafaosa chõra, me fadahõdahõ, si mane niw̃aʼõ Jehowa, nifaʼema Moze, ba wameʼe ba madora andrõ si siw̃a a matonga. (Moz. IV. 26, 55). 3Ba ba zi domboea a matonga mado andrõ, ba noa saʼae ibeʼe Moze dána chõra, jefo Joridano. Ba ba mado Lewi, ba lõ ibeʼe dána chõra tanõ, ba ngaira. 4Me no domboea mado Ndraono Josefo, Manase ba Eferaji. Andrõ lõ labeʼe ba mado Lewi dána chõ ba danõ, ha banoea, nahiara, ba benoea, ba nikoebaloi oerifõ, ba gamagamara. (Moz. IV. 35, 2). 5Si mane niw̃aʼõ Moze, si manõ lafatõrõ Iraono Gizeraëli, ba lafaosa danõ.
6II. Ba laʼondrasi Josoea ba Giligala, Iraono Joeda ba imane chõnia Kalebi andrõ, ono Jefoene, maʼoewoe Genasi andrõ: Õʼila niw̃aʼõ Jehowa chõ Moze, enoni Lowalangi andrõ, ba Gadesi Mbarenea, ba chõgoe andre ba ba chõoe. (Moz. IV. 14, 24). 7Õfa woeloe fache ndraʼo, me ifatenge ndraʼodo Moze, enoni Jehowa andrõ, moroi ba Gadesi Mbarenea, ba wamaoeze tanõ, ba oeʼombachaʼõ chõnia zi fadoehoe dõdõgoe. 8Ba talifoesõgoe andrõ, si mõi awõgoe misi jaw̃a, ba atalõ dõdõ mbanoeada labeʼe, ba jaʼodo, ba no oeʼoʼõ sibai chõ Lowalangigoe, Jehowa. 9Ba fahõloe Moze, me loeo daʼõ, imane: Si ndroehoendroehoe, chõoe ba chõ maʼoewoemõ danõ andrõ, nihoendragõ gaheoe, tána chõmi, si lõ teboelõ, iroegi zi lõ aetoe, me no oʼoʼõ sibai chõ Lowalangioe, Jehowa! 10Ba faigi iadaʼe, no iʼorifi ndraʼodo Jehowa, itõrõ niw̃aʼõnia, si õfa woeloe a lima fache andrõ, iʼotarai me iw̃aʼõ daʼõ chõ Moze Jehowa gõtõ wangõrõngõrõ Ndraono Gizeraëli ba danõ si mate, ba tobali w̃aloe ngafoeloe a lima fache ndraʼodo iadaʼe. 11Ba faʼabõlõgoe na maʼõchṍ, ba si mane me loeo ifatenge ndraʼo Moze; faoma waʼabeʼe mbotogoe, he me loeo daʼõ, ba he maʼõchṍ andre, ba wasõndrata enaʼõ ba ba wofanõfanõ heza mõi. 12Ba iadaʼe, ba tehe chõgoe hili andre, nitõrõ li Jehowa, me loeo daʼõ; noa sa õrongo, me loeo daʼõ, wa so Ndraono Genaki ba daʼõ, si so banoea seboea ba saro. Te itolodo Jehowa, ba wanimba jaʼira, si mane niw̃aʼõ Jehowa. (Moz. IV. 13, 23). 13Ba ifahowoeʼõ ia Josoea ba itehe chõ Galebi andrõ, ono Jefoene, Heberona andrõ, tána chõnia, si lõ teboelõ mitooe. (Sangoehoek. 1, 20). 14Ba tobali chõ Galebi, ono Jefoene, maʼoewoe Genasi, Heborona andrõ, tána chõnia si lõ teboelõ, iroegi maʼõchṍ andre, bõrõ me no iʼoʼõ sibai chõ Jehowa, Lowalangi Ndraono Gizeraëli. 15Ba tõi Heberona andrõ fõna, ba Kiriati Garaba (banoea Garaba); fondrege zabõlõ ba ndraono Genaki Garaba andrõ. Ba lõʼõ saʼae fanoewõ ba danõ, no ahono.

Soera Josoea Faza 13

I. Iw̃aʼõ chõ Josoea wamaosa tanõ Jehowa. II. Tána ba zi domboea mado a matonga, jefo Joridano. III. Tána ba mado Roebeno. IV. Tána ba mado Gado. V. Tána ba zi matonga mado Manase.

1I. Ba me no atoea Josoea, me no noemalõ ndrõfi chõnia, ba imane Jehowa chõnia: Hiza, no atoea ndraʼoegõ, no noemalõ ndrõfioe, ba ebolo sibai na danõ, si lõ hoemalõ. 2Ba daʼõ danõ si tosai na, si lõ moehalõ: Tanõ Ndrawa Wilisiti maʼafefoe ba tanõ Gesoeri maʼasagõrõ. (Sam. I. 27, 8). 3Iʼotarai Zihora andrõ, ola danõ Miseraji, tánõ ba gatoemboecha loeo, iroegi nola Nekerona andrõ, tánõ jõoe, ba tanõ Ndrawa Ganaʼana labeʼe: salaw̃a Wilisiti andrõ si dalima, salaw̃a Gasa ba salaw̃a Gasoto ba salaw̃a Gasekalo ba salaw̃a Gata ba salaw̃a Nekerona, awõ Ndrawa Gawi andrõ, tánõ raja. 4Tanõ Ndrawa Ganaʼana andrõ, maʼasagõrõ, ba tanõ Meara, tanõ mbanoea Zidona, iroegi Gafeka, iroegi nola Ndraono Gamori, 5ba tanõ mbanoea Gebala andrõ, ba hili Libano maʼafefoe, tánõ ba gatoemboecha, iʼotarai Mbaʼali Gado, ba gahe hili Heremono, iroegi tánõ ba Hamata. 6Dozi banoea ba hili andrõ, iʼotarai hili Libano, iroegi Misirefo Maji, fefoe mbanoea Zidona, ba jaʼodo zanimba fõna ndraono Gizeraëli; faoso manõ ba Ndraono Gizeraëli, laoe dahõdahõ, tána chõra si lõ teboelõ ba ngaʼõtõra, si mane niw̃aʼõgoe chõoe. (F. 11, 8). 7Ba fosasi saʼae danõ andrõ, tána chõ, ba mado andrõ si siw̃a ba ba zi matonga mado Manase.
8II. Awõ daʼõ [awõ zi matonga] latema mege dána chõra mado Roebeno ba mado Gado, me ifachoi chõra Moze, jefo Joridano, tánõ ba gatoemboecha, itõrõ nibeʼe Moze, enoni Jehowa andrõ, chõra. (Moz. IV. 32, 33). 9Iʼotarai Garoëri andrõ, ba mbewe Garono, mbanoea andrõ ba daloe ndraso, awõ zaloʼo andrõ maʼafefoe — Medeba ba Dibona — 10awõ fefoe mbanoea Zihona andrõ, razo Ndraono Gamori, ba Hesibona, iroegi nola Ndraono Gamoni, 11ba Gileadi, awõ danõ Gesoeri andrõ ba tanõ Maʼachati, ba he hili Heremono, maʼafefoe, ba tanõ Mbazana maʼafefoe, 12iroegi Zalecha, tanõ Ogi andrõ, razo Mbazana, ba Gasaroti ba ba Gederai. Si tosai seboea niha andrõ daʼõ, nilaw̃a Moze ba nitimbania. (Mos. V. 3, 11). 13Ba banoea Gesoeri andrõ ba banoea Maʼachati, ba lõ latimba Iraono Gizeraëli, ba lõ teboelõ ba Ndraono Gizeraëli mbanoea Gesoeri, ba banoea Maʼachati õsa, iroegi maʼõchṍ andre. 14Ha ba mado Lewi lõ ibeʼe dána chõ; Jehowa, Lowalangi Ndraono Gizeraëli, dána chõra, si mane nifaboeʼoenia chõra. (Moz. IV. 18, 8).
15III. Ba no ibeʼe ba mado Roebeno Moze, iʼohiaʼõ wabaliw̃ara. 16Ba tána chõra iʼotarai Garoëri andrõ, ba mbewe Garono, mbanoea andrõ ba daloe ndraso ba saloʼo andrõ fefoe ba ngai Medeba. 17Hesibona ba banoea si rabõbõ chõra, ba saloʼo tanõ andrõ, Dibona ba Bamoti Mbaʼali ba Beti Mbaʼali Meono, 18ba Jasa ba Kedemoti ba Mefaʼata, 19ba Kiriataʼi ba Sibema ba Sereti Sahara, ba hili ba ba ndraso. 20Ba Beti Weoro ba sanaere hili Wisiga ba Beti Jezimoti, 21awõ fefoe mbanoea ba saloʼo ba he maʼasagõrõ danõ Zihona andrõ, razo Ndraono Gamori, ba Hesibona, nisoew̃o Moze no, fabaja salaw̃a Ndraono Midiano andrõ: Ewi ba Rekema ba Soeri ba Hoeri ba Reba, awõ Zihona andrõ, ba danõ. 22Ba he si faeta andrõ, Bileamo, ono Mbeori, ba laboenoe Iraono Gizeraëli siʼõli, awõ dánõ bõʼõ andrõ niboenoera. 23Ba ola mado Roebeno zoei, ba Joridano, bewenia andrõ. Daʼõ dána ba wabaliw̃a mado Roebeno andrõ, banoea andrõ, awõ halama soja chõra.
24IV. Ba no ibeʼe ba mado Gado Moze iʼohiaʼõ wabaliw̃ara; 25ba tána chõra, ba Jaʼezeri, awõ mbanoea Gileadi fefoe ba matonga danõ Ndraono Gamoni, iroegi Garoëri andrõ, tánõ ba gatoemboecha, iʼotarai Raba. 26Ba iʼotarai Hesibona, iroegi Ramata Misefe ba Betoni, ba iʼotarai Mahanaʼi, iroegi nola Debira. 27Ba ba ndraso, ba Beti Harama ba Beti Nimera ba Soechota ba Safona, si tosai banoea Zihona andrõ, razo Hesibona, ola Joridano, iroegi mbalõ mbaw̃a Kineroti, jefo Joridano, tánõ ba gatoemboecha. 28Daʼõ dána ba mado Gado, balazi wabaliw̃ara, banoea andrõ, awõ halama soja chõra.
29V. Ba no ibeʼe ba zi matonga mado Manase Moze, ba daʼe dána ba zi matonga mado Manase andrõ, balazi wabaliw̃ara: 30Tanõra andrõ, ba iʼotarai Mahanaʼi ba teʼoeʼoe danõ Mbazana maʼafefoe, tanõ Ogi andrõ, razo Mbazana, maʼasagõrõ, awõ fefoe zi fahalama andrõ chõ Jaʼiro, ba Mbazana, õnõ ngafoeloe banoea. 31Ba si matonga danõ Gileadi ba Asaroti ba Ederai, banoea seboea andrõ ba danõ Ogi ba Mbazana. Daʼõ zi mõi ba Ndraono Machiro andrõ, ono Manase, ba wabaliw̃a zi matonga Ndraono Machiro. 32Daʼõ danõ nifaosa Moze, ba zaloʼo tanõ Moabi, jefo Joridano, tánõ ba gatoembacha, ba gamaoedoe Jericho. 33Ba ba mado lewi, ba lõ ibeʼe Moze dána chõra tanõ; Jehowa, Lowalangi ndraono Gizeraëli, dána chõra, si mane nifaboeʼoenia chõra.