Showing posts with label Moze I. Show all posts
Showing posts with label Moze I. Show all posts

Soera Moze I Faza 50

I. Fogoʼo Jakobo ba danõ Ganaʼana. II. Faʼebolo dõdõ Josefo chõ ndra gaʼania. III. Faʼatoeania ba faʼamatenia.
 
1I. Ba ifalõgoe ia ba doto namania Josefo, iʼeʼesi ia ba faʼago bawa ia chõnia. (F. 46, 4). 2Aefa daʼõ, ba ibeʼe li Josefo ba zolaoe daloedaloe, ngoningoninia, enaʼõ lalaoe daloedaloe ba mboto namania. Ba lalaoe ba mboto Gizeraëli sameʼemeʼe daloedaloe andrõ. 3Õfa woeloe wongi waʼara daʼõ, daʼõ sa waʼara wolaoelaoe daloedaloe andrõ. Ba 70 wongi laʼeʼesi ia Dawa Miseraji. 4Ba me no ahõwõ mbongi wangeʼesi andrõ, ba iʼandrõ ba ngoningoni Waraʼo Josefo, imane: Na sosó atõ dõdõmi ndraʼo maʼifoe, ba mitolo wangoemaʼõ chõ Waraʼo, wamarongogõ chõnia. 5No ibeʼe ba hõloe ndraʼo amagoe ba no imane: ”Lõ ara tõ mate ndraʼodo, ba lewatõ andrõ, nichaogoe ba danõ Ganaʼana õkoʼo ndraʼo.” Ba mõido enaʼõ mogoʼo amagoe, ba aefa daʼõ, ba oefoelido. (F. 47, 29). 6Ba ifafoeliʼõ li chõnia Faraʼo, imane: Aeʼe, ba koʼo namaoe, dali wahõloesa andrõ, me ibeʼeʼõ ba hõloe. 7Ba mõi saʼae Josefo, ba wogoʼo amania, ba ahori mõi ngoningoni Waraʼo, awõ goemandroe seboea chõnia, awõ zatoea ba danõ Miseraji, fefoe. 8Ba soroijomo Josefo, fefoe, ba talifoesõnia ba soroijomo namania, fefoe; ha iraono sawoejoe chõra, ba biribirira ba saw̃ira larõi foeri, ba danõ Gozena. 9Ba fao gõi chõnia goereta ba si fakoedo; tobali ato sibai ira. 10Ba me no laroegi Goreni-Atada andrõ, jefo Joridano, ba lalaoe mangeʼesi ba daʼõ, fangeʼesi sabõlõbõlõ sibai; fitoe bongi waʼara ifangeʼesiʼõ namania Josefo. 11Ba me laʼila wangeʼesi andrõ ba Goreni-Atada niha ba danõ, Dawa Ganaʼana, ba lamane: Fangeʼesi Ndrawa Miseraji daʼõ, sabõlõbõlõ. Andrõ wa labeʼe tõi naha andrõ ”wangeʼesi Ndrawa Miseraji”, jefo Joridano. 12Ba lalaoe iraono Jakobo niʼoroiʼõnia chõra. 13Fa laʼohe ba danõ Ganaʼana ia iraononia ba lakoʼo ia ba dõgi narõ hili andrõ ba mbenoea Machefela andrõ, benoea niʼõli Gaberahamo ba Ndraono Cheti andrõ, Eferoni, lewatõ ondrõita, ba gamaoedoe Mamere. (F. 28, 17).
14II. Ba mangawoeli ba danõ Miseraji Josefo, me no ikoʼo namania, jaʼia ba talifoesõnia ba awõra fao, fefoe, me mõi mogoʼo amania. 15Ba lamane ira gaʼa Josefo — bõrõ me no mate namara —: Ma dania iʼafõchõi tõdõ ita Josefo, ma isoelõni chõda zi lõ sõchi andrõ fefoe, nilaoeda chõnia. 16Ba lafatenge zinenge chõ Josefo, lamane chõnia: No iw̃aʼõ li amada, me lõ si mate ia na, no imane: 17Mimane chõ Josefo: Beʼe aefa chõ ndra gaʼaoe horõra, olalõw̃ara andrõ, me no lalaoe chõoe zi lõ sõchi! Ba beʼe aefa saʼae chõma horõma andrõ, chõma andre, samosoemange [gõi] Lowalangi namaoe! Ba moʼalaʼala hõrõ Josefo, me lamanõ chõnia. 18Ba mõi chõnia ndra gaʼania, latoehi danõ fõnania ba lamane: Jaʼe ndraʼaga, halõga sawoejoemõ! 19Ba imane chõra Josefo: Bõi miboesi dõdõmi! hadia sa, no salahi Lowalangi ndraʼodo? (F. 45, 5). 20Si lõ sõchi sa nifachaimi chõgoe, ba no iʼohe ba zi sõchi Lowalangi, ba wamaloea niʼilada maʼõchṍ — fangorifi niha si no ato! 21Andrõ bõi miboesi dõdõmi; oerorogõ ami ba iraonomi. Irara dõdõra, ihaogõ wehede chõra.
22III. Ba si lõ teboelõ ba danõ Miseraji Josefo, awõ zi sawōē jaʼira, ba 110 fache waʼanaoe noso Josefo. 23Ba fachamõ iʼila maʼoewoe Geferaji Josefo; ba moʼono gõi na ba gõtõ Josefo Machiri andrõ, ono Manase. 24Ba imane Josefo chõ ndra talifoesõnia: Na no ara lõ jaʼodo saʼae, ba itolo ami Lowalangi ba iheta ami ba danõ andre, iʼohe ami ba danõ andrõ, nifaboeʼoenia chõ Gaberahamo ba chõ Gizaʼaki ba chõ Jakobo, fahõloesa. (Heb. 11, 22). 25Ba ibeʼe ba hõloe Ndraono Gizeraëli Josefo, imane: Na itolo dania ami Lowalangi, ba miʼohe mbotogoe, miheta ba daʼe! (Moz. II. 13, 19. Jos. 24, 32). 26Ba mate Josefo, 110 fache waʼarania ba goeli danõ. Ba lalaoe daloedaloe ba mbotonia ba labeʼe ba hasi, [ba daʼõ] ba danõ Miseraji.

Soera Moze I Faza 49

I. Ifahowoeʼõ nononia Jakobo, famahowoe famaʼeleʼõ. II. Ifoeli ibeʼe goroisa ba wogoʼo jaʼia. Faʼamatenia.
(Faigi gõi Moz. V. 33.)
 
1I. Ba hoemede Jakobo chõ nononia, imane: Mifaʼaso ami, enaʼõ oeʼombachaʼõ chõmi, hadia zi faloecha ami dania! 2Miʼowoeloi ami ba mifondrondrongo, jaʼami, iraono Jakobo, mifondrondrongo chõ namami Izeraëli! 3Jaʼoegõ Roebeno, si aʼa ndraʼoegõ chõgoe, fangabeʼegoe ba si aʼa waʼabõlõgoe — si so fõna ba waʼasalaw̃a ba si so fõna ba waʼabõlõ. 4Ba me no si maosomaoso tõdõ ndraʼoegõ, ba bõi labeʼeʼõ fõna; noa sa mõiʼõ ba gaso namaoe, no õtaʼoenõi no — no mõi ia ba gasogoe. (F. 35, 22. Ngaʼõt. I. 5, 1). 5Jaʼami, Simeʼoni ba Lewi, si fatalifoesõ, — fangõna ba wanao horõ ziʼõlira. 6Lõʼõ manõ oehalõ chõgoe nichoi dõdõra andrõ, ba lõ jaʼodo ba nifagõlõsira; noa sa laboenoe niha ba wõnoera andrõ, ba ba hoehara andrõ, ba no lataba gõloeʼõloe zi matoea zaw̃i. (F. 34, 25). 7Niʼelifi wõnoera andrõ, si no abõlõbõlõ sibai, ba bachoebachoe dõdõra andrõ, si so faʼafaito! Oefosasi ira ba ndraono Jakobo, oefazawili ira ba ndraono Gizeraëli. (Jos. 19, 1; 21, 3). 8Jaʼoegõ Joeda, jaʼoegõ nisoeno dalifoesõoe dania. Itoejoe mbõrõ doeʼi nemalimõ tangaoe; chõoe mangaloeloe ndraono namaoe. (F. 29, 35). 9Ono zingo Joeda — no salaw̃a ndraʼoegõ, onogoe, ba wamaraʼoe. No ifadõlõ ia tooe, no ikõwõ ia, si mane singo ba si mane singo si alawe; ha niha zi tola manoeko jaʼia? 10Lõ aheta dania ziʼo zalaw̃a chõ Joeda, ba chõnia manõ wamatõrõ, irege so zangehao andrõ, ba niʼoʼõ soi niha dania. (Ngaʼõt. I. 5, 2. Jes. 9, 6. 7. Mat. 2, 6. Fam. 5, 5). 11Ba dõla nagoe ifesoegõ nono galide chõnia ba ba ndraha nagoe si sõchi ifesoegõ nono zi alawe galide chõnia. Ba nõsi nagoe ibabago mbaroenia ba ba w̃e mboea nagoe noechania. 12Si baloenõ hõrõnia ba nagoe ba safoesi nifõnia ba zoesoe. 13Seboeloni, ba ba mbewe nasi so nahania, ba mbewe laboea nowo ba ba Zidona itendroʼõ ngainia. (Jos. 19, 10). 14Isasari, ba no kalide sabeʼe tõla, si mõrõmõrõ ba gandra. (Moz. V. 33, 18). 15Ba me isõndra si sõchi waʼahonohono ba omasiõ danõnia, ba ifaõndrõ mbaginia ba wonoronoro, ba tobali enoni, soʼõmõ halõw̃õ. 16Dano, ba sameʼe ba lala hoehoeo mbanoeania, fõna mado Gizeraëli bõʼõ. (Sangoehoek. 13, 5). 17Oelõ ba ngai lala Dano, taritõ ba ngai lala niha, sondrooe ahe koedo, tobali ahele tooe mifoeri zi fakoedo. 18Oedõnadõna wangorifi andrõ chõoe, Jehowa! (Loek. 2, 29). 19Gado, ba lalangõgõ ia sato, ba igohi ira moroi foeri. 20Aseri, ba si no fahõna balazo; õ razo sami iʼotarai ia. 21Nafetali ba bõhõ si alawe, si no moebõhõli; moroi chõnia hoehoeo omasiõ. (Sangoehoek. 5). 22Eoe sawena mowoea Josefo; eoe sowoea ba zinga goemboe. Dahania, ba mangoro ba gõli kara. 23Lalaoe chõnia si fafana, laʼefasi wana, lasoewõ ia. 24Ba tebai abõda wanania, alio dangania, balazi wanolo zabõlõ andrõ, chõ Jakobo, fanolo goebalo Ndraono Giseraëli andrõ, gowera. 25Chõ Lowalangi namaoe andrõ — jamoetoloʼõ — chõ Lowalangi, si lõ ambõ faʼabõlõ, — jamoefahowoeʼõ ndraʼoegõ faʼafahõna howoehowoe andrõ, moroi ba mbanoea si jaw̃a ba faʼafahõna howoehoewoe moroi ba namõ nidanõ, si no ahono si tooe, ba faʼafahõna howoehowoe andrõ moroi ba mbagi zoezoe ba moroi ba daloe nina niha. 26Howoehowoe andrõ, si no itema amaoe, ba no italoeʼi howoehowoe andrõ ba hili andrõ, si lõ teboelõ ba faʼasõchi hilihili andrõ, si lõ teboelõ. Ba enaʼõ na chõ Josefo, ba galizoezoe si no salaw̃a andrõ ba dalifoesõnia! 27Benijami, ba no asoe gatoea sondraʼoendraʼoe: na mahemoloe mbanoea, ba iʼā niraʼoenia, ba na owī, ba ifaosa gahoeloea.
28II. Daʼõ fefoe mado Gizeraëli andrõ, felendroea ira, ba daʼõ wehede namara chõra. Ba ifahowoeʼõ ira; idozigõ ifahowoeʼõ, oi fazamboezamboea howoehowoe. 29Ba ibeʼe li chõra, imane: Na no oeroegi dania ndra toeagoe, ba miʼohe ndraʼo ba lewatõ ndra toeagoe, ba dõgi narõ hili andrõ, ba mbenoea Geferoni andrõ, Iraono Cheti, (F. 23, 19), 30ba dõgi narõ hili ba mbenoea Machefela, ba gamaoedoe Mamere, ba danõ Ganaʼana, benoea niʼõli Gaberahamo chõ Geferoni andrõ, Iraono Cheti, lewatõ ondrõita. 31Ba daʼõ mege lakoʼo Gaberahamo ba foʼomonia Sara, ba daʼõ gõi lakoʼo Gizaʼaki ba foʼomonia Rebeka, ba ba daʼõ gõi oekoʼo Lea no, (F. 25, 9; 35, 29), 32ba mbenoea andrõ, niʼõli ba Ndraono Cheti, fabaja tõgi narõ hili andrõ bacha. 33Ba me no iʼoʼozoei Jakobo wangoemaʼõ li ba ndraononia, ba ileagõ tooe ia ba gasonia, ba aetoe noso; isaw̃a ndra toeania.

Soera Moze I Faza 48

I. Isooe ononia nono Josefo andrõ, si domboea, Jakobo. II. Ifahowoeʼõ ira.
 
1I. Aefa daʼõ, ba teʼombachaʼõ chõ Josefo: Mofõchõ namaoe! Ba iʼohe nononia andrõ, si domboea, Manase ba Eferaji. 2Ba me tefarongogõ chõ Jakobo: No so nonooe Josefo, ba iʼabeʼeʼõ ia Izeraëli, moedadao ia ba gasonia. 3Ba imane Jakobo chõ Josefo: No iʼoromaʼõ ia chõgoe Lowalangi si lõ ambõ faʼabõlõ, ba Loesi, ba danõ Ganaʼana, no ifahowoeʼõ ndraʼo, 4ba no imane chõgoe: ”Oefoʼono ndraʼoegõ ba ato maʼoewoemõ oebeʼe, w̃alo soi zi otarai ba chõoe oebeʼe, ba tanõ daʼe, ba oebeʼe ochõta maʼoewoemõ, si lõ teboelõ”. 5Ba onooe andrõ, si domboea, si no toemboe chõoe ba danõ Miseraji andre, me lõ si mõido chõoe na, ba danõ Miseraji, ba chõgoe daʼõ: Eferaji andrõ ba Manase — si mane Roebeno ba Simeoni ira chõgoe dania. (F. 41, 50; 46, 20). 6Ba iraono andrõ, nisõndraoe achira, ba chõoe, ba tõi gaʼara dania dõira ba dána chõra andrõ. 7Me mangawoelido moroi ba Mezofotamia, ba mate chõgoe [ninaoe] Rachela, ba lala, ba danõ Ganaʼana, me lõ arõoe tõ irege Geferata, ba no oekoʼo ia ba ngai lala ba Geferata, jaʼia Mbetilechema andrõ. (F. 35, 19).
8II. Ba me iʼila ndraono Josefo andrõ Izeraëli, ba imane: Ha niha daʼõ? 9Imane Josefo chõ namania: Onogoe daʼõ, nibeʼe Lowalangi chõgoe ba daʼe. Ba imane: Ohe ira chõgoe, enaʼõ oefahowoeʼõ ira. (Heb. 11, 21). 10Ba no abõsi hõrõ Gizeraëli, ba waʼatoea, fa lõ iʼila niha. Ba me no ihatõʼõ ira chõnia, ba faʼago bawa ia chõra ba iʼomõsi ira. (F. 27, 1). 11Ba imane Izeraëli chõ Josefo: Lõʼõ manõ fadoehoe dõdõgoe mege, ifoeli faʼila ita, ba ijaʼe, ba noa na ifaʼilaʼõ chõgoe ngaʼõtõmõ Lowalangi! 12Ba ifoeli iwoewoe ira Josefo, ba ifaõndrõ tooe ia fõna namania. 13Ba itoejoe zi daroea andrõ Josefo, ba dangania kambõlõ, ba Eferaji, tobali ba gabera Gizeraëli so daʼõ, ba ba dangania kabera, ba Manase, tobali ba gambõlõ Gizeraëli so daʼõ, ba ihatõʼõ ira chõnia. 14Ba iʼoroʼõ gambõlõnia Izeraëli, itoefa hõgõ Geferaji, lõ lai wa no si achi ia, ba ba hõgõ Manase, ba tangania kabera, tobali ifariw̃a dangania; si aʼa sa Manase. 15Ba ifahowoeʼõ Josefo, imane: Lowalangi andrõ, niʼataʼoefi ndra amagoe, Aberahamo ba Izaʼaki, Lowalangi andrõ, si no koebalogoe, iʼotarai iraono sawena siʼai toemboe ndraʼo, irege maʼõchṍ andre, malaʼika andrõ, 16si no mangefaʼõ jaʼodo ba wamakao fefoe, ba jamoefahowoeʼõ ndraono andre, ba chõra jamongaʼõtõ dõigoe ba tõi ndra amagoe, Aberahamo ba Izaʼaki ba ja ato sibai maʼoewoera ba goeli danõ! 17Ba me iʼila Josefo, wa tanga namania kambõlõ wanoefa hõgõ Geferaji, ba tetoetoe ba dõdõnia; andrõ itoejoe danga namania ba wameta jaʼia ba hõgõ Geferaji ba ba wameʼe ba hõgõ Manase. 18Imane Josefo chõ namania, ba daʼõ: Bõi, ama, daʼe sa zi aʼa, kambõlõoe beʼe ba hõgõnia. 19Ba itimba amania, imane: Oeʼila sa, onogoe, oeʼila sa! Jaʼia gõi zi tobali soi seboea dania ba jaʼia gõi zabõlõ dania. Ba lõ lai daʼõ, ba abõlõ zoei nachinia, moroi chõnia, ba maʼoewoenia, ba si ndroehoe w̃alo soi dania. 20Ba ifahowoeʼõ ira, me loeo daʼõ, imane: Tõimõ andrõ nitõtõi Ndraono Gizeraëli dania, na mamahowoe, wangoemaʼõ: Jamoefagõlõgõlõ ndraʼoegõ chõ Geferaji ba chõ Manase Lowalangi; tobali fõna Manase ibeʼe Geferaji. (Jer. 31, 9. 20). 21Aefa daʼõ, ba imane Izeraëli chõ Josefo: Lõ ara tõ, ba mate ndraʼo, ba itolo ami Lowalangi ba iʼohe mangawoeli ami ba danõ doeami. 22Ba oetehe chõoe mboto hili, mifasõbigoe ba Ndraono Gamori siʼõli ba fana, hoedeoe fõna ndra talifoesõoe. (F. 34, 25. Jos. 17, 7. Joh. 4, 5).

Soera Moze I Faza 47

I. Faloecha chõ Waraʼo dalifoesõ Josefo ba amania. II. Famaigi Josefo lala, ba lofo andrõ. III. Ibeʼe li Jakobo, ba wogoʼo jaʼia dania ba danõ Ganaʼana.
 
1I. Ba mõi Josefo, iʼombachaʼõ chõ Waraʼo, imane: No so namagoe ba ira gaʼagoe, moroi ba danõ Ganaʼana, no laʼohe mbiribirira ba saw̃ira, awõ fefoe hadia ia zi so chõra; ba danõ Gozena so ira iadaʼe. 2Ba lima iʼohe, gaʼania, ba ifaloechaʼõ daʼõ chõ Waraʼo. 3Ba isofoe chõ ndra gaʼa Josefo Faraʼo, imane: Hadia halõhalõw̃õmi? Ba lamane chõ Waraʼo: Koebalo mbiribiri zawoejoemõ andre, he jaʼaga, ba he ira toeama fõna. 4Ba lamane na chõ Waraʼo: Mõiga ba daʼe, enaʼõ maʼiagõ daʼe maʼifoe, me no ambõ doeʼoe, õ mbiribiri chõma; noa sa afõchõ lofo andrõ ba danõ Ganaʼana. Ba enaʼõ na ba danõ Gozena so zawoejoemõ! 5Ba imane Faraʼo chõ Josefo: Hana na ba danõ Gozena laʼiagõ, ba na õʼila, so ba chõra niha si tola, ba fataro hõgõ goebalo goerifõgoe ira. 6Ba laroegi danõ Miseraji chõ Josefo Jakobo ba ononia. Ba me irongo Faraʼo, razo Miseraji, ba imane Faraʼo chõ Josefo: Ba no mõi chõoe namaoe ba talifoesõoe; hiza fõnaoe danõ Miseraji, ba zabõlõ atabõ zinanõ ba danõ faʼaso namaoe ba talifoesõoe. 7Ba iʼohe jomo namania Jakobo Josefo, ifaloechaʼõ chõ Waraʼo. Ba fatabe Jakobo chõ Waraʼo, wamahowoeʼõ jaʼia. 8Ba isofoe chõ Jakobo Faraʼo, imane: Ha me oega fache ndraʼoegõ? 9Imane Jakobo chõ Waraʼo: Faʼara wekoligoe andrõ, ba no 130 fache. Lõ anaoenaoe ba si no fahõna famakao gõtõgoe andrõ, ba lõ ichamõ gõtõ ndra amagoe toeagoe, tõrõw̃ara andrõ. (Sin. 39, 13; 119, 19. Heb. 11, 13). 10Ba iʼangonasi Waraʼo Jakobo, wamahowoeʼõ jaʼia zoei, ba irõi Waraʼo. 11Ba ihonogõi nahia chõ namania ba chõ ndra talifoesõnia Josefo, ifachoi chõra dána chõra tanõ ba danõ Miseraji, ba zabõlõ atabõ zinanõ ba danõ, ba danõ Ramese, iʼoʼõ niw̃aʼõ Waraʼo. 12Ba ibalazoi namania ba talifoesõnia ba soroijomo namania fefoe Josefo, fache, dali waʼoja ndraono.
13II. Ba dozi tanõ, ba lõ õ fache, abõlõbõlõ sibai lofo, he tanõ Miseraji ba he tanõ Ganaʼana, ba erege dõdõ ba lofo andrõ. 14Ba owoelo manõ chõ Josefo ganaʼa fefoe, he anaʼa ba danõ Miseraji, ba he anaʼa ba danõ Ganaʼana, bõli wache andrõ, niʼõlira, ba ifaʼema ba nomo Waraʼo ganaʼa andrõ Josefo. 15Ba me no ahori ganaʼa ba danõ Miseraji ba ba danõ Ganaʼana, ba dozi mõi Ndrawa Miseraji chõ Josefo, lamane: Faigi chõma mbalazo! Ma tola matega ba zanehe ndraʼoegõ? anaʼa sa, ba no ahori! 16Imane Josefo: Mibeʼe goerifõmi, ba oebeʼe chõmi, bõli goerifõmi andrõ, na no ahori ganaʼa. 17Ba laʼohe chõ Josefo goerifõra, ba ibeʼe chõra wache Josefo, bõli koedo ba bõli mbiribiri ba bõli zaw̃i ba bõli galide. Itaha mbalazora fache, barõ ndrõfi andrõ, bõli goerifõra fefoe. 18Ba aloea ndrõfi andrõ; ba ba ndrõfi dania, ba mõi ira zoei chõnia, ba lamane: Tebai mabiniʼõ chõoe, Toea: no ahori ganaʼa ba ochõtama oerifõ, ba no mõi chõoe. Lõ si tosai nihalõoe enaʼõ, hatṍ botoma ba benoeama. 19Hadia, tola tekiko ndraʼaga fõnaoe, jaʼaga andre ba benoeama. Tema õli ndraʼaga, fabaja benoeama andrõ, fache beʼe bõli, ba enoni Waraʼo ndraʼaga, fabaja benoeama. Ba beʼe chõma danõmõ, enaʼõ aoeri ndraʼaga ba bõi mate, ba fa bõi tobali sasaiʼõ mbenoeama. 20Ba ahori iʼõli mbenoea Ndrawa Miseraji andrõ Josefo, chõ Waraʼo. Dozi sa laʼamawa mbenoeara Dawa Miseraji, me no famakaora lofo andrõ; ba tobali ochõta Waraʼo danõ. 21Ba niha sato andrõ, ba iʼowoeloi ba mbanoea misa, iʼotarai wondrege danõ Miseraji, noemalõ ba wondregenia tánõ sa. 22Hatṍ banoea gere zi lõ iʼõli. Ere andrõ sa, ba nibalazoi Waraʼo, aoerifara mbalazo andrõ, nibeʼe Waraʼo chõra; daʼõ mbõrõ, wa lõ laʼamawa mbenoeara. 23Ba imane Josefo ba niha sato: Ba tobali, no oeʼõli ami, chõ Waraʼo saʼae ami, fabaja benoeami. Jaʼe chõmi danõmõ, enaʼõ tola manaroe ami. 24Ba boeania dania, ba samboea niʼolima mibeʼe chõ Waraʼo; ba si õfa niʼolima, ba chõmi, tanõmõmi ba balazomi ba balazo zoroijomomi ba õ ndraono sawoejoe chõmi. 25Ba lamane: No õʼorifi ndraʼaga! Asala faloechaga waʼeboea dõdõ chõoe, Toea, ba sawoejoe Waraʼo saʼae ndraʼaga! 26Ba tobali ifatõ gõmõ Ndrawa Miseraji Josefo, si lõ teboelõ, irege maʼõchṍ: samboea niʼolima labeʼe chõ Waraʼo mboea nowira; hatṍ nowi gere zi tenga chõ Waraʼo.
27III. Ba Iraono Gizeraëli, ba sahono ba danõ Miseraji, ba danõ Gozena. Mow̃aʼa ira ba daʼõ, ba itoegoe ato ira, tobali ato sibai dania. 28Ba faʼanaoe noso Jakobo na, ba danõ Miseraji, ba 17 fache, ba faʼanaoe noso Jakobo fefoe, gõtõnia, ba 147 fache. 29Ba me no ahatõ waʼamate Gizeraëli, ba ifakaoniʼõ nononia Josefo, imane chõnia: Na sosó dõdõoe ndraʼodo maʼifoe, ba toefa tanga narõ zolagoe [ba weʼamõi ba hõloe], eboeaʼõ dõdõoe chõgoe, bõi limodo: bõi koʼo ndraʼo ba danõ Miseraji! (F. 24, 2). 30Omasido ba ngai ndra toeagoe sodo; andrõ õʼohe ndraʼo, õhetado ba danõ Miseraji ba ba lewatõra õtanõ ndraʼo. Ba imane: Oeʼoʼõ zomasiʼõ. (F. 23, 19). 31Ba imane Jakobo: Ae ba hõloe chõgoe! Ba mõi ia ba hõloe chõnia; ba ifaõndrõ ia Izeraëli ba loeloe waratenia tánõ ba hõgõ.

Soera Moze I Faza 46

I. Iheta ia ba danõ Ganaʼana Jakobo, awõ zoroijomonia fefoe, me no iʼabeʼeʼõ dõdõnia Lowalangi amaboeʼoela linia. II. Tõi ngaʼõtõ Jakobo andrõ. III. Faloecha ira Jakobo Josefo.
 
1I. Ba mangefa Gizeraëli, awõ zoroijomonia fefoe, ba iroegi Mbereseba, ba ibeʼe zoemange Lowalangi namania Izaʼaki, ba daʼõ. (Jos. 24, 4. Sin. 105, 23. Hal. zin. 7, 15). 2Ba moeʼao chõ Gizeraëli Lowalangi, ba gangilata ba zi bongi, imane: He Jakobo! He Jakobo! Ba imane: Oerongo! 3Ba imane: Lowalangi ndraʼodo, Lowalangi namaoe. Bõi mangiwa dõdõoe weʼamõi ba danõ Miseraji, ba daʼõ sa oebaliʼõ soi seboea ndraʼoegõ. (F. 26, 24; 28, 13). 4Jaʼodo zi fao chõoe ba danõ Miseraji ba jaʼodo gõi zolohe mangawoeli jaʼoegõ, ba Josefo zamakifoe hõrõoe dania. 5Ba iheta ia ba Mbereseba Jakobo, ba lafazaw̃a ba goereta namara Jakobo iraono Gizeraëli, awõ ndraonora sawoejoe, awõ woʼomora, ba goereta andrõ, nifaoheʼõ Waraʼo, lalara. 6Ba laʼohe goerifõra ba hadia ia zi so chõra, nisõndrara ba danõ Ganaʼana, ba laroegi, danõ Miseraji, Jakobo, awõ ngaʼõtõnia fefoe; 7ononia matoea ba maʼoewoenia matoea ba ononia alawe ba maʼoewoenia alawe, ngaʼõtõnia maʼafefoe iʼohe awõnia ba danõ Miseraji.
8II. Ba daʼe dõi ngaʼõtõ Gizeraëli andrõ, si fao ba danõ Miseraji, Jakobo, awõ ngaʼõtõnia: Si aʼa nono Jakobo Roebeno. (Moz. II. 1, 1. Ngaʼõt. I. 5, 3). 9Ba ono Roebeno, ba Hanochi ba Fáloe ba Heseroni ba Karemi. 10Ba ono Zimeoni, ba Jemoeeli ba Jamino ba Ohada ba Jachino ba Sohara; ba Saoelo, ono mbeneʼõ Ndrawa Ganaʼana andrõ. 11Ba ono Lewi, ba Gereso ba Kahati ba Merari. 12Ba ono Joeda, ba Geri ba Onani ba Sela ba Feresi ba Sera; ba si mate ba danõ Ganaʼana Geri ba Onani. Ba ono Weresi andrõ, ba Heseroni ba Hamoela. 13Ba ono Isasari, ba Tola ba Foewa ba Jobi ba Simeroni. 14Ba ono Zeboeloni, ba Serede ba Elono ba Jaleʼeli. 15Daʼõ nono Lea andrõ, ononia chõ Jakobo ba danõ Mezofotamia, awõ nono alawe andrõ, Dina; 33 fefoe, ono matoea ba ono alawe. 16Ba ono Gado, ba Safono ba Hági ba Soeni ba Esebono ba Eri ba Arodi ba Areli. 17Ba ono Gaseri, ba Jimena ba Jisiwa ba Jisiwi ba Beria ba talifoesõra alawe Sera; ba ono Mberia andrõ, ba Heberi ba Malekiëli. 18Daʼõ nono Zilifa andrõ, nifaʼoheʼõ Labano chõ nononia Lea, ononia chõ Jakobo, 16 niha fefoe. (F. 29, 24). 19Ba ono Rachela andrõ, foʼomo Jakobo, ba Josefo ba Benijami. 20Ba ono si toemboe chõ Josefo ba danõ Miseraji, ononia chõ Gasanata andrõ, ono Wotifera, hõgõ gere ba Gono, ba Manase ba Eferaji. (F. 41, 50). 21Ba ono Mbenijami, ba Bela ba Becheri ba Asibeli; ba Gera ba Naʼama ba Ehi ba Rosi ba Moefi ba Hoefi ba Aredi. 22Daʼõ nono Rachela, ononia chõ Jakobo, 14 niha fefoe. 23Ba ono Dano, ba Hoesimi, ba ono Nafetali, 24ba Jaseʼeli ba Goeni ba Jeseri ba Silemi. 25Daʼõ nono Mbiliha andrõ, nifaʼoheʼõ Labano chõ nononia Rachela, ononia chõ Jakobo, fitoe niha fefoe. (F. 29, 29). 26Faʼato ngaʼõtõ Jakobo andrõ, sanaw̃a tanõ Miseraji, lõ lai noemõnõnia andrõ, ba 66 niha. 27Ba ono Josefo andrõ, si toemboe chõnia ba dánõ Miseraji, ba domboea. Tobali 70 fefoe zoroijomo Jakobo andrõ, sanaw̃a tanõ Miseraji. (Moz. V. 10, 22. Ngaʼõt. I. 7, 14).
28III. Ba ifowaõwaõ Joeda, chõ Josefo, ba wanofoe lala ba Gozena, fõnania. Ba me no laroegi danõ Gozena, 29ba ifaʼanõ goeretania Josefo, fakoereta ia, isaw̃a Gozena, ba wamaondragõ amania Izeraëli. Ba me faloecha ia chõnia, ba italagoei mbagi, ba ara megeʼege ia ba mbaginia. 30Ba imane Izeraëli chõ Josefo: Lõʼõ saʼae afõchõ chõgoe waʼamate, me no ifoeli faloecha ita, wa lõ si mate ndraʼoegõ! (F. 45, 28). 31Ba imane Josefo chõ ndra gaʼania ba ba zoroijomo namania: Damõido mangombacha chõ Waraʼo, oemane dania chõnia: No mõi chõgoe ndra talifoesõgoe ba tána chõ namagoe andrõ, si so ba danõ Ganaʼana mege. 32Ba no koebalo mbiribiri niha andrõ — sangoeri oerifõ niha sa ira — ba no laʼohe mbiribirira ba saw̃ira, awõ fefoe hadia ia zi so chõra. 33Ba na ifakaoniʼõ dania ami Faraʼo, na isofoe: Hadia halõhalõw̃õmi? 34ba mimane: Sangoeri oerifõ niha zawoejoemõ, iʼotarai iraono ndraʼaga, irege maʼõchṍ, he jaʼaga andre, ba he ira toeama — enaʼõ tola ba danõ Gozena miʼiagõ. Koebalo mbiribiri sa, ba no sogoro Ndrawa Miseraji.

Soera Moze I Faza 45

I. Iʼombachaʼõ ia chõ ndra talifoesõnia Josefo, ba iʼandrõ chõra, ndramõi mitooe ba danõ Miseraji, awõ namara. II. Iʼoroʼõ chõra zogoena chõra Faraʼo. III. Mangawoeli ndraono Jakobo; lõ fadoehoe dõdõ namara, ba omoeso dõdõnia dania.
 
1I. Ba tebai saʼae itaha dõdõnia Josefo, wamaigi si so ba ngainia, ba imane: Ndramõi baero fefoe! Ba tobali lõ niha bõʼõ, me iʼombachaʼõ ia ba dalifoesõnia Josefo. (Hal. zin. 7, 13). 2Ba megeʼege sibai ia, irege larongo Dawa Miseraji andrõ, awõ ngoningoni Waraʼo andrõ. 3Ba imane Josefo ba dalifoesõnia: Josefo ndraʼo! Hadia, lõ si mate namada? Ba tebai latema linia ira talifoesõnia, ba waʼatobali dõdõra chõnia. 4Ba imane Josefo chõ ndra talifoesõnia: Ba mihatõʼõ ami chõgoe! Ba me lahatõʼõ ira, ba imane: Talifoesõmi Josefo ndraʼodo, niʼamawami ba danõ Miseraji! (F. 37, 28). 5Ba bõi aboe dõdõmi ba daʼõ, ba bõi maoso dõdõmi, me no miʼamawa ndraʼo ba daʼe; ba wangorifi sa ifowaõwaõ ndraʼo fõnami Lowalangi. (F. 50, 20). 6No mendroea fache saʼae wamakao andrõ ba danõ, lofo andrõ, ba melima fache tõ na fõnada, si lõ fananõ ba si lõ famasi. 7Ba no ifowaõwaõ ndraʼo fõnami Lowalangi ba wamaigi lala, fa bõi aetoe ngaʼõtõmi, enaʼõ aoeri õsa ami, ba wangorifi seboea. 8Tobali tenga jaʼami zamatenge jaʼodo ba daʼe, no Lowalangi zamatenge. No jaʼia zamaliʼõ anofoela Waraʼo ndraʼodo ba mandroe ba nomonia maʼasamboea ba samatõrõ tanõ Miseraji maʼasagõrõ. (F. 41, 40). 9Ba miʼaliogõ miʼae chõ namada ba mimane chõnia: Daʼõ niw̃aʼõ nonooe Josefo chõoe: No ibaliʼõ samatõrõ tanõ Miseraji maʼasagõrõ ndraʼodo Lowalangi; ae chõgoe, bõi radõʼõ! (Hal. zin. 7, 14). 10Ba danõ Gozena nahaoe dania, ba sahatõ chõgoe ndraʼoegõ, awõ nonooe ba maʼoewoemõ ba biribiri chõoe ba saw̃ioe ba hadia ia na fefoe zi so chõoe. 11Ba jaʼo ziʼonoro tõdõ balazooe ba daʼõ; melima fache tõ na lofo andre: ma dania noemana ndraʼoegõ, awõ zoroijomooe fefoe ba awõ zi so chõoe fefoe. 12Hõrõmi saʼae zangila ba hõrõ nachigoe Benijami zangila, wa jaʼodo zihede chõmi. 13Ba ahori miʼombachaʼõ chõ namada waʼasalaw̃agoe andre ba danõ Miseraji, awõ niʼilami andrõ fefoe, ba mitaʼitaʼi miʼohe ba daʼe namada. 14Ba italagoei mbagi nachinia Benijami ba megeʼege; ba Benijami gõi, ba megeʼege ba mbaginia. 15Ba faʼago bawa ia ba dalifoesõnia fefoe ba megeʼege wanalagoei jaʼira; ba fahoehoeo chõnia dalifoesõnia.
16II. Ba terongo chõ Waraʼo ba nomonia doeria daʼõ: no so dalifoesõ Josefo! Ba omoeso dõdõ Waraʼo, awõ zi sosó chõnia. 17Ba imane Faraʼo chõ Josefo: Õmane ba dalifoesõoe andrõ: Mifonoro saʼae galidemi, ba miʼae ba danõ Ganaʼana, 18mihalõ namami ba soroijomomi fefoe, ba miʼae ba daʼe chõgoe, ba oebeʼe chõmi hadia zi sõchi nisõndra ba danõ Miseraji, ba miʼā zatabõ, si faloecha ba danõ. 19Ba jaʼoegõ, ba õw̃aʼõ chõra: mimanõ! Miʼohe goereta, moroi ba danõ Miseraji andre, lala ndraono sawoejoe chõmi ba lala woʼomomi ba mifaʼamõi jaw̃a namami ba miʼae ba daʼe. 20Ba bõi afõchõ chõmi gamagamami jomo, hadia sa zi sõchi ba danõ Miseraji, ba chõmi dania.
21III. Ba laʼoʼõ daʼõ iraono Gizeraëli, ba ibeʼe chõra goereta Josefo, dali niw̃aʼõ Waraʼo, ba ibeʼe gõi chõra nifatõʼõ ba lala. 22Ba idozigõ ira baroe loeo, boeala, ba chõ Mbenijami, ba 300 roefia ba lima ngaʼõrõ baroe loeo ibeʼe boeala. 23Ba chõ amania, ba foeloe ngaʼeoe kalide gõi ifaʼoheʼõ, sonoro fondrege zi sõchi mboea danõ, ba foeloe ngaʼeoe kalide si alawe, sonoro fache ba roti ba nifatõʼõ chõ namania dania ba lala. 24Awena dania ifofanõ dalifoesõnia ba mangefa ira, me no ibeʼe na li chõra, imane: Bõi fasoso ami ba lala! 25Ba mofanõ ira, larõi danõ Miseraji ba laroegi danõ Ganaʼana, namara Jakobo. 26Ba laʼombachaʼõ chõnia, lamane: Lõ si mate Josefo; samatõrõ tanõ Miseraji maʼasagõrõ ia aʼine. Ba lõʼõ manõ mõi ba dõdõnia, me tebai fadoehoe dõdõnia chõra. (Loek. 24, 41). 27Ba me ahori laʼombachaʼõ chõnia niw̃aʼõ Josefo chõra, ba me iʼila goereta andrõ, nifaʼoheʼõ Josefo, ba wolohe jaʼia, ba ifoeli aoeri dõdõ namara Jakobo. 28Ba imane Izeraëli: Noa saʼae — tenga si no mate nonogoe Josefo! Mõido faloecha chõnia, gasagasa waʼamategoe!

Soera Moze I Faza 44

I. Mofanõ ndra gaʼa Josefo. Faʼaboe dõdõra, nifobõrõ Josefo. II. Hoehoeo Joeda: iʼandrõ aefa Mbenijami.
 
1I. Ba imane Josefo ba zatoea zangai halõw̃õ chõnia: Foʼõsi fache ziʼe niha andrõ, ndrohoendrohoe zi tola laʼohe; ba anaʼa zamõsana, ba õbeʼe ba zoezoe nõsi ziʼe chõnia; ba mako firõ andrõ chõgoe, 2ba õbeʼe ba zoezoe nõsi ziʼe zi achi, awõ mbõli wache andrõ chõnia. Ba iʼoʼõ niw̃aʼõ Josefo. 3Ba ha moloeo sibai, ba lafofanõ ira, awõ galidera. 4Ba ha siʼaikõ laroegi ngai mbanoea, ba imane Josefo chõ zatoea zangai halõw̃õ chõnia: Laboe, gohi niha andrõ, ba na õchamõ ira, ba õmane chõra: Hana wa misoelõni si lõ sõchi zi sõchi? Hana wa no mitagõ mako firõ andrõ chõgoe? 5Tenga jaʼia niʼamadoegõ zochõ jaʼo, ba tenga jaʼia ba zi faeta ia? andrõ wa si lõ sõchi nilaoemi! 6Ba me no ichamõ ira, ba imanõ chõra. 7Ba lamane chõnia: He Toea, hana wa õmanõ wehede? Lõʼõ manõ mõi ba dõdõ zawoejoemõ wolaoe si manõ. 8Hadia, tenga no mafoeli maʼohe chõoe ganaʼa andrõ, me maʼotarai danõ Ganaʼana, anaʼa andrõ nisõndra ba zoezoe nõsi ziʼe chõma: ba he moroi, wa matagõ menaʼõ wirõ, ba ma anaʼa, jomo chõ zochõ jaʼoegõ? 9Nisõndra jaʼia, ba zawoejoemõ andre, ba ja mate, ba jaʼaga tánõ bõʼõ, ba si mõi sawoejoemõ. 10Ba imane: Laoe, jaʼia daʼõ niwaʼõmi. Nisõndra jaʼia, ba sawoejoegoe dania, ba saefa ami. 11Ba dozi laʼaliogõ latooeʼõ tooe nganoeʼi chõra, ba dozi latotoʼõ mbõbõ. 12Ba ibõrõtaigõ iʼaloei, iʼotarai ba zi aʼa ba ba zi achi ibato, ba ba ziʼe chõ Mbenijami tesõndra mako. 13Ba lasika noechara, dozi lafoeli lafonoro galidera ba lafoeli ira mijomo. 14Ba me iroegi jomo ba nomo Josefo Joeda, awõ dalifoesõnia — no so na ba daʼõ Josefo — ba lafalõgoe tooe ira ba zalo, fõnania. 15Ba imane chõra Josefo: Hadia nilaoemi andrõ? Hadia, lõʼõ sa itõrõ tõdõmi, iʼohe ba waetasa niha si mane jaʼodo andre? 16Ba imane Joeda: Hadia niw̃aʼõma chõ zochõ jaʼaga? Hadia hoehoeoma ba he mawisa wamoeʼa ba hoeloema, me no isõndra horõ zawoejoemõ Lowalangi! Sawoejoemõ saʼae ndraʼaga, jaʼaga andre, fabaja nisõndra mako andrõ. 17Ba imane Josefo: Ja arõoe chõgoe wolaoe si manõ: nisõndra mako andrõ, daʼõ zawoejoegoe; ba jaʼami andrõ, ba hana na mifoeli ami chõ namami, lõ moetenaw̃a.
18II. Ba ihatõʼõ ia chõnia Joeda, imane: He Toea! Hadia na lõ ataʼoe zawoejoemõ moehede chõoe, hadia, lõ mofõnoeʼõ chõ zawoejoemõ ba daʼõ? me no fagõlõgõlõ ami Waraʼo! 19No isofoe chõ zawoejoenia sochõ jaʼo, imane: Hadia, so na namami, so dalifoesõmi na? 20Ba no mamane chõoe: Lõ si mate namama satoea andrõ ba so na nononia si achi si toemboe moroi foeri; si ndroehoe gaʼania, ba no mate, ba tobali ha jaʼia zi tosai ono ninania, ba no omasiõ namania. (F. 42, 13 b. t.). 21Ba no õw̃aʼõ ba zawoejoemõ andre: Miʼohe ia ba daʼe chõgoe, enaʼõ iʼila ia hõrõgoe. 22Ba no mamane chõoe: Tebai irõi namania ono matoea andrõ; na irõi enaʼõ namania, ba lõ aoeri daʼõ. 23Ba õmane ba zawoejoemõ: Na lõ miʼohe nachimi andrõ, ba tebai ifoeli faʼila bawa ita. 24Ba me no mangawoeli ndraʼaga chõ zawoejoemõ amagoe, ba maʼombachaʼõ chõnia niw̃aʼõoe. 25Ba me iw̃aʼõ dania chõma amama: Mifoeli miʼaeʼe, ba wowõli fache chõda maʼifoe, 26ba mamane chõnia: Tebai mõiga! Na fao chõma nachima, awena mõiga; tebai sa faʼila bawa ndraʼaga ba niha andrõ, na lõ fao chõma nachima. (F. 43, 2). 27Ba imane chõma sawoejoemõ amagoe: Miʼila jaʼõ, wa ha domboea nono woʼomogoe chõgoe. 28Si samboea, ba no irõi ndraʼo, ba no oemane dõdõgoe: Si ndroehoe, no tesasawi ia [ba goetoe ndroeʼoe]! ba irege maʼõchṍ, ba lõ niʼila hõrõgoe jaʼia mangawoeli. 29Ba na mihalõ na daʼe gõi chõgoe, ba na gõna ia hadia ia enaʼõ, ba horõmi, na oeʼohe hoewagoe andre, weʼamõi mitooe, ba mbanoea niha tooe aboe sibai dõdõ. (F. 42, 38). 30Ba si ndroehoe, na mangawoelido enaʼõ dania chõ zawoejoemõ amagoe, ba lõ fao chõma nono andrõ, ba zi no molemba dõdõnia maʼasamboea, 31ba ha siʼaikõ enaʼõ irongo, lõʼõ saʼae fao chõma nono andrõ, ba lõ aoeri ia, ba horõ zawoejoemõ andre enaʼõ, na iʼohe hoewania andrõ sawoejoemõ amama, wanaw̃a banoea niha tooe aboe dõdõ. 32Noa sa mõi ba wali zawoejoemõ andre, chõ namagoe, ba chõ nono andre, no ifaboeʼoe: Na lõ oefoeli ia chõoe, ba jaʼodo zoloeʼi horõ andrõ chõ namagoe, sagõtõ jaʼo. (F. 43, 8). 33Ba enaʼõ na tola torõi foeri zawoejoemõ andre sawoejoe zochõ jaʼo salahi nono matoea andrõ, ba enaʼõ na tola fao chõ ndra gaʼania nono, wangawoeli! 34He oewisa saʼae wangawoeli chõ namagoe, na lõ fao chõgoe nono andrõ! Tebai oefaigifaigi enaʼõ waʼaboe dõdõ andrõ, si faloecha namagoe!

Soera Moze I Faza 43

I. Lafoeli mõi ba danõ Miseraji iraono Jakobo ba fao Mbenijami. II. Faʼaboe dõdõra. III. Faʼobõwõ Josefo chõra.
 
1I. Ba abõlõbõlõ na lofo ba danõ. 2Ba me no ahori fefoe wache andrõ, nihalõra ba danõ Miseraji, ba imane chõra amara: Mifoeli miʼaeʼe, ba wowõli fache chõda maʼifoe. (F. 42, 20). 3Ba imane chõnia Joeda: No iw̃aʼõ sibai chõma niha andrõ, imane: Lõ tola faʼila bawa ita, na lõ miʼohe nachimi andrõ. 4Ba na õfaʼamõi awõma nachima, ba mõiga mowõli fache chõoe. 5Ba na lõ õfaʼamõi ia, ba lõ mõiga. Noa sa iw̃aʼõ chõma niha andrõ imane: Lõ tola faʼila bawa ita, na lõ miʼohe nachimi andrõ. 6Imane Izeraëli: Ba hana wa mifakao ndraʼo wangombacha ba niha andrõ, wa so na nachimi? Lamane: 7No izofoezofoe sibai ndraʼaga ba soroijomonia niha andrõ, imane: Hadia, lõ si mate namami? Hadia, so nachini na? Ba maʼombachaʼõ chõnia, lõ mabiniʼõ zi doehoe. Hadaõ ho maʼila, iw̃aʼõ dania: Miʼohe ba daʼe nachimi andrõ? 8Ba imane Joeda chõ namania Izeraëli: Chõgoe faʼoheʼõ nono andrõ, ba mafazaw̃a ndraʼaga, mõiga, enaʼõ aoeri ita ba bõi mate, jaʼaga ba jaʼoegõ ba iraonoma. (F. 44, 32). 9Jaʼo zi so ba wali chõoe ba chõnia andrõ; ba hoeloegoe õbeʼe. Na lõ oefoeli ia chõoe, na lõ oefalʼilaʼõ chõoe, ba jaʼodo zoloeʼi sala chõoe, sagõtõ jaʼodo. 10Na lõ arõrõga menaʼõ, si tenga inõtõ, ba no tola mendroea mangawoeliga. 11Ba imane chõra amara Izeraeli: Na lõ tola lõʼõ saʼae, ba mimane: Miʼohe õsi ziʼe chõmi, nisõndra ba danõda, maʼifoe, miʼohe boeala ba niha andrõ: daloedaloe maʼifoe ba w̃e w̃ani maʼifoe ba gitõ godoe ba samohoea ba boea kare ba boea falo. 12Ba mifoeli miʼohe ganaʼa, faʼoja mege ba anaʼa andrõ, nisõndra ba zoezoe nõsi ziʼe chõmi mege, ba mifoeli miʼohe — tabeʼe seloengoe ia. 13Ba miʼohe gõi nachimi, mifazaw̃a ami ba mifoeli miʼae ba niha andrõ. 14Ba Lowalangi si lõ ambõ faʼabõlõ, ba jamoebeʼe ahachõ dõdõ niha andrõ chõmi, enaʼõ ifoeli ifaʼamõi awõmi dalifoesõmi si samõsa andrõ, awõ Mbenijami gõi; ba jaʼodo, ba na lõ tola lõʼõ, ba si lõ ono saʼae ndraʼo. 15Ba laʼohe mboeala no mege ba anaʼa bõʼõ gõi laʼohe, awõ Mbenijami, ba mangefa ira, lasaw̃a danõ Miseraji ba laʼondrasi Josefo.
16II. Ba me iʼila Josefo, no so Mbenijami, awõra, ba imane ba zatoea zangai halõw̃õ jomo: Ohe jomo niha andrõ, taba ndriwora, ba halõ gõra, manga dania niha andrõ, awõgoe, na laloeo. 17Ba iʼoʼõ daʼõ niw̃aʼõ Josefo, iʼohe jomo ira, ba nomo Josefo. 18Ba ataʼoe ira, me teʼohe jomo ira, ba nomo Josefo, lamane: Bõrõ ganaʼa andrõ seloengoe no ba ziʼe chõda, me mõi ita no, si fõfõna, wa laʼohe jomo ita: lahawoei dania ita, laraʼoe ita ba labaliʼõ sawoejoe ita, fabaja kalide chõda. 19Ba laʼondrasi zatoea zangai halõw̃õ, ba zinga mbawandroehõ ba nomo, lamane chõnia: 20So niʼandrõma chõoe, Toea: No mõiga ba daʼe, si fõfõna no, ba wowõli fache. 21Ba me no maroegi zi mõrõga, me matotoʼõ mbõbõ ziʼe chõma, ba hiza ganaʼa zamõsana ba zoezoe nõsi ziʼe chõnia — anaʼa andrõ chõma, lõ ambõ ba wanoelo; no mafoeli maʼohe iadaʼe. 22Ba anaʼa bõʼõ gõi, no maʼohe, ba wowõli fache. Lõ aboto ba dõdõma, ha niha zameʼe ba ziʼe wache chõma anaʼa andrõ, (F. 31, 29; 42, 24). 23Ba imane chõra: Mihonogõ manõ ami; bõi miboesi dõdõmi! Lowalangimi, Lowalangi namami andrõ, ba no ifoʼanaʼa ami, nibiniʼõ, ba ziʼe wache chõmi. Anaʼami andrõ, ba no mõi chõgoe. Ba iʼohe baero chõra Zimeoni. 24Aefa daʼõ, ba iʼohe ira ba nomo Josefo. Ibeʼe chõra nidanõ, ba lasasai gahera, ba ibeʼe gõ galidera. 25Ba lafaʼoli tooe mboeala andrõ, gasagasa waʼaso Josefo, na laloeo; noa sa terongo chõra, wa ba daʼõ manga ira dania.
26III. Ba me no mõi jomo Josefo, ba labeʼe chõnia mboeala andrõ, niʼohera, ba lafaõndrõ ira fõnania, irege zalo tooe. 27Ba isofoe chõra, na lõ hadia ia chõra, ba imane: He wisa, lõ hadia ia chõ namami, nitõrõ limi no. Hadia, lõ si mate ia? (F. 37, 7). 28Ba lamane: Lõʼõ sa hadia chõ zawoejoemõ andrõ, amama; sosó ia na. Ba lafaõndrõ ira, mangaloeloe ira chõnia. 29Ba iʼila Mbenijami, si ndroehoe nachinia, ba imane: Hadia, daʼõ nachimi, si achi andrõ, niw̃aʼõmi no? ba imane [chõ Mbenijami]: Jamoeʼeboeaʼõ dõdõnia chõoe Lowalangi, onogoe! 30Ba iʼozoemagõ lõ hedehedenia saʼae, ahachõ sibai dõdõnia, me no so tánõ fõnania nachinia andrõ, ba iʼaloei, heza zi tola meʼe ia. Andrõ mõi ia si bacha ba mbateʼe, tánõ si bacha, ba megeʼege ia ba daʼõ. 31Awena dania ifoeli isasai mbawania ba ifoeli mõi baoeloe, iʼabeʼeʼõ dõdõnia ba imane: Mifaʼoli gõ. 32Ba laʼoniagõ, chõnia ba chõrá, ba si manõ gõi ba Ndrawa Miseraji, soroedoe manga chõnia. Lõʼõ sa tola oroedoe manga Ndrawa Miseraji ba niha Heberaio; salacha daʼõ ba Ndrawa Miseraji. 33Ba ba gamaoedoenia tefedadao ira, iʼotarai zi aʼa, noemalõ ba zi achi, balazi sibai waʼasiaʼa; ba faoma lafaigifaigi nawõra, ahõlihõli dõdõra. 34Aefa daʼõ, ba ifabeʼeʼõ õra gõ andrõ si so fõnania õsa; ba oeracha Mbenijami, ba no melima faʼeboea goeracha dánõ bõʼõ fefoe. Ba labadoe nagoe, awõnia, ba sõchi dõdõra.

Soera Moze I Faza 42

I. Feʼamõi ndraono Jakobo ba danõ Miseraji, si fõfõna. II. Ifakao ndra gaʼania andrõ Josefo ba itaha Zimeoni. III. Fangawoelira; fangarõngarõ namara.
 
1I. Ba me irongo Jakobo, ba danõ Miseraji so wache, ba imane Jakobo chõ nononia: Hadia, wa mifaigifaigi nawõmi? 2Ba imane na: Hiza, no oerongo, ba danõ Miseraji so wache. Miʼaeʼe mihalõ chõda wache ba daʼõ, enaʼõ aoeri ita ba enaʼõ lõ mate. (Hal. zin. 7, 12). 3Ba dafoeloe zi mõi gaʼa Josefo, ba wangai fache ba danõ Miseraji. 4Ba Benijami andrõ, achi Josefo, ba lõ ifaʼamõi Jakobo, awõ ndra gaʼania; sosó dõdõnia, ma gõna ia hadia ia. 5Ba laroegi gõi iraono Gizeraëli andrõ, awõ zi mõimõi andrõ, ba wowõli fache; lofo sa ba danõ Ganaʼana.
6II. Ba Josefo, si no salaw̃a, ba danõ, zamawa fache ba niha fefoe. Ba me no laroegi jomo ira gaʼa Josefo ba me mangaloeloe ira chõnia, ba iʼila Josefo, 7wa ira gaʼania, me ha siʼaikõ anehe ia. Ba lõ iʼombachaʼõ ia chõra, iʼabeʼeʼõ wehedenia chõra, imane chõra: Heza miʼotarai? Lamane: Ba danõ Ganaʼana, ba wowõli fache. 8Ba iʼila Josefo, wa ira gaʼania, ba jaʼira, ba lõ laʼila, wa jaʼia. 9Ba itõrõ tõdõ Josefo wangifinia andrõ, niʼifinia nitandrõsaigõ chõra. Ba [iʼabeʼeʼõ wehedenia chõra], imane chõra: Samaoeze ami! Mõi ami mamaigi, hezo lala ba danõ. (F. 37, 5 b. t.). 10Lamane chõnia: Tenga, Toea! ba wowõli balazo mõi zawoejoemõ. 11Ha samboea namama; niha sadõlõ tõdõ ndraʼaga; tenga samaoeze zawoejoemõ! 12Imane chõra: Faja! ba daʼõ mõi ami, ba wamaigi hezo lala ba danõ! 13Ba lamane chõnia: Felendroea ndraʼaga, sawoejoemõ andre, oi si fatalifoesõ, ha samboea namama, ba danõ Ganaʼana; si achi, ba so chõ namama maʼõchṍ, ba samõsa zi no taja. 14Ba imane chõra Josefo: Si ndroehoe niw̃aʼõgoe chõmi: Samaoeze ami! 15Ba daʼõ mifadoehoeʼõ ami: Faja wa no saoeri Waraʼo, na aefa ami ba daʼe, na lõ mõi ba daʼe nachimi andrõ, si achi. 16Mifatenge zamõsa, ba wangai achimi; ba jaʼami, ba nitaha ba daʼe. Si manõ wanandraigõ niw̃aʼõmi, na si doehoe nilaoemi, ba na tenga. Ba waʼadoehoe waʼaoeri Waraʼo — samaoeze zoei ami! 17Aefa daʼõ, ba tõloe ngaloeo itaha ira. 18Ba me aefa doea wongi, ba imane chõra Josefo: Miʼoʼõ dae, enaʼõ aoeri ami — niha sangataʼoefi Lowalangi sa ndraʼodo. 19Na niha sadõlõ tõdõ ami, ba jatorõi dalifoesõmi samõsa, nitaha, ba nitaha jaʼami mege, ba jaʼami, ba miʼaeʼe, miʼohe wache andrõ, sogoena õ zoroijomomi. 20Ba achimi andrõ, si achi, ba niʼohe ba daʼe chõgoe, ba oroma dania, wa si doehoe niw̃aʼõmi, ba lõ mate ami. Ba laʼoʼõ daʼõ. 21Ba faoma lamane chõ nawõra: Si ndroehoe, loealoea horõda chõ nachida no daʼe; noa sa taʼila waʼataʼoenia, me fakao ia chõda, ba lõ tafondrondrongo. Andrõ itõrõ ita faʼataʼoe dõdõ andre. 22Ba imane chõra Roebeno: Tenga no oew̃aʼõ chõmi: bõi mihalõ horõmi wolaoemi ba ndraono andrõ! Ba lõ sedõna mamondrongo ami — ba iadaʼe telaoe mbalõ ndronia! (F. 37, 21). 23Ba lõʼõ sa laʼila, wa aboto ba dõdõ Josefo niw̃aʼõra, me no so zangali lira, na fahoehoeo ira. 24Ba ibaliʼõ ia, ba weʼe, ba ifoeli ia chõra, fahoehoeo chõra. Ba ifaraʼoeʼõ Zimeoni, ba ngaira, ba ifabõbõʼõ, ba zanehe ira. 25Aefa daʼõ, ba iw̃aʼõ Josefo lafoʼõsi fache ziʼera ba ladozigõ labeʼe ba ziʼe bacha mbõli wache chõ zamõsana ba lafaʼoheʼõ na gõi nifatõʼõra, ba lala. Ba laʼoʼõ daʼõ wameʼe chõra.
26III. Ba lahareʼõ ba hoeloe galidera wache andrõ chõra ba mofanõ ira. 27Ba me itotoʼõ mbõbõ ziʼe chõnia si samõsa, ba zi mõrõ ira, ba wameʼe gõ galidenia, ba iʼila ganaʼania andrõ, ba dete nõsi ziʼe chõnia. 28Ba iʼombachaʼõ chõ ndra talifoesõnia, imane: No mangawoeli chõgoe ganaʼagoe, hiza ia ba ziʼe chõgoe! Ba atoroe dõdõra, faoma lafaigifaigi nawõra, manizinizi, ba lamane: Hadia nilaoe Lowalangi chõda ba daʼõ! 29Ba me laroegi namara ba danõ Ganaʼana, ba ladoenõdoenõ chõnia fefoe hadia ia zi gõna ira, lamane: 30Niha andrõ, si no salaw̃a ba danõ, ba iʼabeʼeʼõ wehedenia chõma, ifoʼesoeanõ ndraʼaga, ba wamaoeze tanõ mõi ndraʼaga, iw̃aʼõ. 31Ba mamane chõnia: Niha sadõlõ tõdõ ndraʼaga, tenga samaoeze ndraʼaga! 32Felendroea ndraʼaga, ha samboea namama; samõsa si no taja, ba fondrege zi achi, ba so chõ namama na ijaʼe, ba danõ Ganaʼana. 33Ba imane chõma niha andrõ, salaw̃a ba danõ: Ba daʼõ ja oroma chõgoe dania wa niha sadõlõ tõdõ ami: mirõi ba daʼe chõgoe zamõsa, talifoesõmi! Hadia zogoena chõmi, õ zoroijomomi, fache, ba hana na miʼohe, ba hana na mofanõ ami. 34Ba miʼohe ba daʼe nachimi andrõ, enaʼõ oroma chõgoe, wa tenga samaoeze ami, wa no niha sadõlõ tõdõ ami. Ba oefoeli dania chõmi dalifoesõmi andre, ba tola mitõrõ danõ, lõ moetenaw̃a. 35Ba me lafadoewa nõsi ziʼe chõra ba hiza mbola ganaʼa ba ziʼe zamõsana. Ba me laʼila mbola ganaʼa andrõ, ba me iʼila gõi amara, ba tobali dõdõra. 36Ba imane chõra Amara Jakobo: Tajataja ndraonogoe mibeʼe: Josefo, ba si no taja, ba Simeoni, ba si no taja, ba edõna mihalõ na gõi Mbenijami — tehawoe manõ ndraʼo daʼõ fefoe! 37Ba itema li namania Roebeno, imane: Tema boenoe nonogoe matoea si domboea, na lõ oefoeli ia chõoe. Beʼe ba dangagoe ia, ba oefoeli ia chõoe! 38Ba imane: Lõ fao chõmi nonogoe; noa sa mate gaʼania, ba hatṍ jaʼia zi tosai; na so enaʼõ zi gõna ia ba lala andrõ, nitõrõmi, ba horõmi enaʼõ, na oeʼohe hoewagoe andre, wanaw̃a banoea tooe, oi so waʼaboe dõdõ.

Soera Moze I Faza 41

I. Fangifi Waraʼo. II. Aboe dõdõnia ba daʼõ: ifakaoniʼõ Josefo. III. Iʼombachaʼõ geloeaha wangifi Waraʼo ba ifobawa lala chõnia. IV. Tefataro salaw̃a ia. Itõrõ niw̃aʼõnia. V. Ono Josefo. Bõrõta lofo andrõ.
 
1I. Ba mendroea fache aefa daʼõ, ba mangifi Waraʼo; ba mbewe Nilo so ia, iw̃aʼõ, (Dan. 2,1), 2ba mõi mijaw̃a moroi ba Nilo zaw̃i, fitoe ngaʼeoe, si sõchi famaigi ba satabõ, ba mõi ira ba ndroeʼoe mangaloei gõra. 3Ba aefa daʼõ, ba mõi mijaw̃a zaw̃i bõʼõ, fitoe ngaʼeoe gõi, moroi ba Nilo, ba si lõ sõchi famaigi ba sangao; ba mõi ba ngai zaw̃i no mege, ba mbewe Nilo. 4Ba latema laʼā zaw̃i si sõchi andrõ, satabõ, saw̃i si lõ sõchi andrõ, sangao, si fitoe ngaʼeoe — ba tokea saʼae Waraʼo. 5Ba ifoeli mõrõ, ba ifoeli mangifi gõi, ha sara dõla wache, iw̃aʼõ, ba fitoe ngalai, saloea chõnia, soʼõsi ba si sõchi. 6Aefa daʼõ, ba fitoe tõ zaloea ngalai, si lõ õsi, si no ariri ba nangi moroi ba gatoemboecha. 7Ba ngalai si lõ õsi andrõ, ba latõlõ ngalai si so õsi andrõ, si no owoelowoelo, si fitoe. Awena tokea Waraʼo, ba iʼila, wa fangifi.
8II. Ba me moloeo ba aboe dõdõnia. Ba ifatenge, ifakaonia fefoe zi faeta ba satoeatoea ba danõ Miseraji ba itoenõ chõra wangifinia andrõ. Ba lõ sangila mangombacha eloeaha chõ Waraʼo. 9Awena hoemede hõgõ zamaʼoli gõ andrõ, imane chõ Waraʼo: Awena maʼõchõ itõrõ tõdõgoe horõgoe. 10Mofõnoe no Waraʼo chõ ngoningoninia, ba ifabeʼeʼõ ba goeroenga ira, ba nomo hõgõ wazoeri, jaʼodo andre ba hõgõ zamazõchi koee andrõ. 11Ba mangifi ndraʼaga, daroeaga, ha sara wongi, ba no fasamboea geloeaha wangifima andrõ. 12Ba so ba daʼõ, awõma, nono matoea Heberaio, sawoejoe hõgõ wazoeri; chõnia matoenõ wangifima, ba iʼombachaʼõ chõma geloeaha, ifaʼeleʼõ sibai, hadia lawoelawoe wangifi zamõsana. (F. 40, 15). 13Ba niw̃aʼõnia chõma, ba no itõrõ: jaʼodo, ba no moefoeli moefataro ba halõw̃õgoe ba jaʼia ba no moetaw̃i. 14Ba ifatenge Faraʼo, ifakaoniʼõ Josefo. Ba lataʼitaʼi laʼefaʼõ ia ba goeroenga, ba ifatõwõʼõ ia, ifalalini noechania, ba mõi jomo chõ Waraʼo. (Sin. 105, 20). 15Ba imane Faraʼo chõ Josefo: No mangifi ndraʼo, ba lõ sangila mangombacha eloeaha. Ba no oerongo ndraʼoegõ: ha õrongo wangifi, ba õʼanemaʼõ õʼombachaʼõ geloeaha. 16Ba imane Josefo chõ Waraʼo: Ai, tenga, tenga jaʼodo; ba ja fangorifi nifaʼeleʼõ Lowalangi chõ Waraʼo! (F. 40, 8. Dan. 2, 28). 17Ba imane Faraʼo chõ Josefo: Mangifi ndraʼo, ba mbewe Nilo sodo, oew̃aʼõ. 18Ba mõi mijaw̃a, moroi ba Nilo, zaw̃i, fitoe ngaʼeoe, satabõ ba si sõchi famaigi. Ba mõi ira ba ndroeʼoe, mangaloei gõra. 19Ba aefa daʼõ, ba mõi mijaw̃a zaw̃i bõʼõ, fitoe ngaʼeoe gõi, si no okõlikõli, si lõ sõchi famaigi, ba si no angao — lõ oerai oeʼila ba danõ Miseraji maʼasagõrõ zi manõ fa lõ sõchi! 20Ba latema laʼā zaw̃i satabõ andrõ, si fõfõna andrõ, si fitoe, saw̃i sangao andrõ, si lõ sõchisõchi. 21Ba he me no laʼā, ba lõ oroma, wa no laʼā, lõʼõ sa teboelõ wa lõ sõchisõchi mege. 22Ba tokea ndraʼo. Ba oeʼila na gõi ba wangifi: ha sara dõla wache, ba fitoe zaloea ngalai, soʼõsi ba si sõchi. 23Ba aefa daʼõ ba aloea gõi ngalai si lõ õsi, si no okõlikõli, fitoe gõi, si no ariri ba nangi moroi ba gatoemboecha, 24ba latema latõlõ ngalai si sõchi andrõ, si fitoe, ngalai si no okõlikõli andrõ. Daʼõ nitoenõgoe ba zi faeta andrõ, ba lõ sangila mangombacha eloeaha chõgoe.
25III. Ba imane Josefo chõ Waraʼo: Eloeaha wangifi Waraʼo andrõ, ba no faoma. No ihõnagõ ifaʼeleʼõ chõ Waraʼo Lowalangi hadia nilaoenia dania. 26Saw̃i si sõchi andrõ, si fitoe ngaʼeoe, ba mewitoe fache, ba ngalai wache andrõ, si sõchi, si fitoe, ba mewitoe fache gõi — no faoma geloeaha wangifi andrõ. 27Ba saw̃i safoeo andrõ, si fitoe ngaʼeoe, si lõ sõchisõchi, safoeria mõi jaw̃a, ba mewitoe fache, ba ngalai wache andrõ si lõ õsi, si fitoe, si no ariri ba nangi moroi ba gatoemboecha, ba mewitoe fache lofo, oroma dania. 28Andrõ oemane mege chõ Waraʼo: Hadia zi so ba dõdõ Lowalangi, nilaoe dania, ba no ifaʼeleʼõ chõ Waraʼo. 29Mewitoe fache iadaʼe dania, ba fahõna manõ hadia ia ba danõ Miseraji, maʼasagõrõ. 30Ba na aefa daʼõ, ba mewitoe fache lofo, ba tobali olifoe manõ niha waʼafahõna mege, ba danõ Miseraji, ba iʼā danõ lofo andrõ. 31Ba lõʼõ manõ saʼae itõrõ tõdõ niha waʼafahõna mege ba danõ, balazi lofo andrõ moroi foeri dania, abõlõbõlõ sibai sa dania. 32Ba ba zi mendroea andrõ, wa no fatete mendroea mangifi Waraʼo, ba hiza, no ihonogõi sibai daʼõ Lowalangi ba iʼaliogõ Lowalangi ifaloea. 33Ba jamoefaigi chõnia Faraʼo niha si so tõdõ, satoeatoea, enaʼõ ibeʼe barõ mbawania danõ Miseraji. 34Ba jamoenõnõ na Faraʼo wamataro mandroe ba danõ, enaʼõ laʼozaragõ zamboea niʼolima ba danõ Miseraji, barõ ndrõfi andrõ si fitoe, ba zi fahõna boea nowi. 35Niʼowoeloi mboea nowi andrõ fefoe, barõ ndrõfi andre, si fitoe dania, nihõna mboea nowi ba danga Waraʼo, boea nowi ba mbanoea misa, ba niʼirõʼõ. 36Ba ja weʼeweʼe dõdõ ba danõ nihõna andrõ, ba zi mewitoe fache andrõ dania, ba lofo andrõ, sanõrõ tanõ Miseraji dania; ba tobali lõ tekiko niha ba danõ ba lofo andrõ.
37IV. Ba fadoehoe dõdõ Waraʼo ba wehedenia andrõ ba tõdõ ngoningoninia fefoe. 38Ba imane Faraʼo ba ngoningoninia andrõ: Hadia, tasõndra na niha, si so Eheha Lowalangi ba dõdõ, si mane chõnia? (Dan. 5, 11). 39Ba imane Faraʼo chõ Josefo: Me no ifaʼeleʼõ chõoe Lowalangi daʼõ fefoe, ba lõʼõ saʼae niha, si manõ fotõdõ ba si manõ faʼatoeatoea, si mane jaʼoegõ. 40Tebeʼe barõ mbawaoe nomogoe ba ndramoeʼoʼõ niw̃aʼõoe banoeagoe fefoe, ha irege dadaoma razo tohoede ndraʼo moroi chõoe. (Dan. 2, 48. Hal. zin. 7, 10). 41Ba imane na Faraʼo chõ Josefo: Hiza, oebeʼe barõ mbawaoe danõ Miseraji maʼasagõrõ! 42Ba iheta ba doeroenia laedoeroe andrõ chõnia Faraʼo, ibeʼe ba doeroe Josefo; ba ifobaroe ia baroe moeko karate ba ibeʼe naja anaʼa ba mbaginia. 43Ba ifakoereta ia ba koereta razo, fanete chõnia, ba moeʼao fõnania niha, lamane: Miʼangaloeloe! Si manõ wameʼe Waraʼo barõ mbawania tanõ Miseraji maʼasagõrõ. 44Ba imane Faraʼo chõ Josefo: Faraʼo ndraʼodo — ba lõ tola ifaliw̃a dangania, ba ma ahenia, niha ba danõ Miseraji maʼasagõrõ, na tenga jaʼoegõ zangoemaʼõ. 45Ba Faraʼo andrõ, ba ibeʼe tõi Josefo Zafenati Faneachi ba ibeʼe chõnia Gasenata, ono Wotifera, hõgõ gere ba Gono. Ba itõrõi danõ Miseraji Josefo. 46Ba tõloe ngafoeloe fache Josefo, me so ia ba daʼõ fõna Waraʼo, razo Miseraji. Ba irõi Waraʼo Josefo ba itõrõi danõ Miseraji. 47Ba falawoelaete mboea danõ ba zi mewitoe fache andrõ, ba zi fahõna. 48Ba iʼowoeloi mboea nowi andrõ fefoe Josefo ba zi mewitoe fache andrõ, gõtõ waʼafahõna ba danõ Miseraji, ibeʼe ba mbanoea misa nitenagõ andrõ; samboesamboea banoea ba ihõna mboea nowi andrõ, si tefasoei jaʼia. 49Tobali ihõna mboea nowi Josefo, si mane ene ba mbewe nasi, tenga ono waʼoja, irege ibõhõli wanoeʼa, tebai saʼae lasoeʼa.
50V. Ba domboea toemboe ono matoea chõ Josefo, fõna ndrõfi bõrõta lofo andrõ, ononia chõ Gasenata andrõ, ono Wotifera, hõgõ gere ba Gono. 51Tõi zi aʼa, ba Manase ibeʼe Josefo, imane: Noa saʼae olifoedo wamakaogoe andrõ fefoe ba ira amagoe ba ira talifoesõgoe fefoe, ibeʼe Lowalangi. 52Ba tõi zi achi, ba Eferaji ibeʼe, imane: Noa sa ifowoea ndraʼodo Lowalangi ba danõ wamakaogoe andre. 53Ba me no noemalõ ndrõfi andrõ si fitoe ba zi fahõna balazo ba danõ Miseraji, 54ba ibõrõtaigõ dõfi lofo andrõ, si fitoe, itõrõ nihõnagõ Josefo fangombacha. Ba dozi tanõ itõrõ lofo andrõ; ba ba danõ Miseraji maʼasagõrõ, ba so mbalazo. (Sin. 105, 16). 55Ba me no afõchõ lofo andrõ ba danõ Miseraji maʼasagõrõ, ba laforege niha sato wangandrõ gõ chõ Waraʼo. Ba imane Faraʼo ba Ndrawa Miseraji fefoe: Miʼae chõ Josefo; hadia niw̃aʼõnia chõmi, daʼõ milaoe! 56Ba sagõrõ goeli danõ, ba afõchõ lofo andrõ. Ba ibokai halasa andrõ fefoe Josefo ba iʼamawa ba Ndrawa Miseraji wache. Ba itoegoe tedooe waʼafõchõ lofo andrõ ba danõ Miseraji. 57Ba dozi niha ba goeli danõ, ba mõi chõ Josefo ba danõ Miseraji, ba wowõli fache; fefoe gofoe heza sa, ba lofo safõchõ sibai.